Imadyin mo yan eksena: No mani-espiho si Julia, say pakanengneng tod sarili to et matabataba la. “Kailangan ko lay manpaebeng,” so kuan tod sarili to—anggano ibabaga na atateng tan kakaaro to ya mapmabeng la.

Plano nen Julia ya daiset labat so kanen to diad pigaran agew pian nabawasay timbang to.

No parehas kayo nen Julia na situasyon, antoy gawaen mo?

Agmet mauges no mapaga kad itsuram. Diad tua, wala ray imbaga na Biblia ya guapo tan maganggana, singa si Sara, Raquel, Abigail, Jose, tan David. Ibabaga na Biblia ya si Abisag et “talagan maganggana.”—1 Arari 1:4.

Balet, dakel ya kabataan natan so obsess lan maong ed itsura da. Posiblin panlapuan itan na graben problema. Niay pigaran alimbawa:

• Diad sakey a survey, 58% na bibii so mangibabagan overweight la ra, pero 17% labat ed sikara so talagan overweight.

• Diad sakey nin survey, iisipen na 45% na bibii ya overweight ira anta underweight ira!

• Wala ray kabataan ya lapud panpapaebeng da et nansakit iray anorexia—graben eating disorder ya say sakey et ngalngali agla mangan.

 No walay sintomas mo na anorexia odino arum nin eating disorder, manpatulong ka. Ibagam ed ateng mo odino ed pantitiwalaan mon kaaro. Ibabaga na Biblia: “Say tuan kaaro et mangaaro ed amin a panaon, tan sakey ya agi a nailaloan diad panaon na gonigon.”—Proverbio 17:17.

Mas labalabay ka na totoo no balibali so ugalim. Isip mo pay Absalom ya anak nen Arin David. Oniay ibabaga na Biblia:

“Anggapoy lakin nirayrayew a singa si Absalom lapud inkaguapo to. Manlapud dapan ya anggad toktok na ulo to et anggapoy nabalaw ed sikato.”—2 Samuel 14:25.

Balet sikatoy malastog, ambisyoso, tan traidor! Kanian anggano guapo, mas dakel so nabasa ed Biblia ya makapabaing a ginawa to, singa say impantraidor tod ama to tan impamatey tod kuya to.

Kanian dugaruga irayan bilin na Biblia:

“Isulong yoy balon personalidad.”—Colosas 3:10.

“Komon ta say pamarakep yo et aliwan samay nanengneng . . . , noagta say peteg ya inkatoo ed dalem na puso.”—1 Pedro 3:3, 4.

Aliwa met ya mauges so manpaganggana o manpaguapo, balet tandaan mo ya mas importante so ugalim nen say itsuram. Diad ilabas na panaon, mas balibali so pakanengneng ed sika na arum lapud ugalim, aliwan lapud itsuram! “Napansin kan tampol no magana ka,” so kuan nen Phylicia, “pero say mas natandaan na totoo et say inkatoom tan saray balibalin ugalim.”

Kasin naynay kan nadidismaya ed itsuram?

Kasin iisipen moy manpa-plastic surgery odino manpaebeng a maong pian ondakep so itsuram?

No walay sarag mon umanen ed itsuram, anto itan? (Pilim so amin ya labay mon umanen.)

• KAATAGEY

• KABELAT

• BUEK

• IMPANLAMAN

• LUPA

• KUTIS

No “on” so ebat mo ed samay unonan duaran tepet tan masulok a talora so pinilim ed komatlon tepet, isipen iya: Nayarin say pakanengneng ed sika na arum et duma ed pakanengneng mod sarilim. Ompan masyado ka labat ya aburido ed itsuram.—1 Samuel 16:7.