1. Akin et agla makaloob so pamilya di Adan tan Eva diad hardin na Eden, tan antoy labalabay nen Abel ya nagawa?

BANBANTAYAN nen Abel iray karnero to legan iran mankakabkab diad gilig na palandey. Diman ed bandad arawi et walay nababantag ton maliwawa. Amta to ya aman imay mandarlang ya espada ya ag-ontutundan ontetelek, tan akasarad dalan paloob ed hardin na Eden. Ditan so datin panaayaman na atateng to, balet natan et agla ra nayarin onlad man, anggan saray anak da. Mansirunget la tan mapalayupoy so dagem. Imadyin mo pay Abel ya akatangay ed tawen tan sankanonot toy Amalsa ed sikato. Nipawil ni kasi maong ya relasyon na too ed Dios? Atan so labalabay nen Abel ya nagawa.

2-4. Panon ya “mansasalita” ni Abel anggano inatey la?

² Walay ibabaga nen Abel ed sika. Narerengel mo? Isipen mo lagi ya imposible ’tan! Ngalngali 6,000 taon lay linmabas sanen inatey iyan komaduan ilalak nen Adan​—abayag lan nagmaliw ya dabok. Ibabaga na Biblia ya saray inatey et “anggapoy amta ran balot.” (Eccl. 9:5, 10, Maung a Balita) Sakey ni, anggapoy nabasad Biblia ya imbaga nen Abel. Kanian panon ton mitongtong ed sikatayo?

³ Oniay impaisulat na Dios ed si apostol Pablo nipaakar ed si Abel: “Diad panamegley na satan et sikatoy mansasalita ni anggano inatey la.” (Basaen so Hebreos 11:4.) Unong ed satan et mansasalita ni Abel. Panamegley na anto? Panamegley na pananisia. Si Abel so sankaunaan ya angipanengneng ed satan ya balibalin kualidad. Ontan lay kabiskeg na pananisia to ya anggano inatey la, mabilabilay ni so alimbawa to. Kanian aliling to et narerengel tayon “mansasalita” si Abel no gagawaen tayoy anggaay nayarian tayon aligey pananisia to.

⁴ Anto balet so naaralan tayod si Abel anta dagdaiset labat so nabasa tayod Biblia nipaakar ed sikato? Nengnengen tayo.

5. Antoy labay ya ibaga nen Jesus sanen imbaga ton si Abel et nambilay diad panaon na “inkiletneg na mundo”? (Nengnengen met so footnote.)

⁵ Nianak si Abel ag-abayag kayari impamalsad inmunan totoo.  Imbaga nen Jesus ya si Abel et nambilay diad panaon na “inkiletneg na mundo.” (Basaen so Lucas 11:50, 51.) Say tutukoyen dia nen Jesus ya mundo et saray totoon walaan na ilalon nadondon so kasalanan da. Si Abel so komapat ya toon nambilay, balet sikato so sankaunaan ya toon makanepegan ya dondonen. * Mapatnag sirin ya binmaleg si Abel ya anggapoy naalig ton maabig ya alimbawa.

6. Anton klase na atateng si Adan tan Eva?

⁶ Aganggano ni labat ya apalsay too, balet makapaermen lay situasyon da. Seguradon guapo tan magana so atateng nen Abel ya si Adan tan Eva, tan maksil so laman da. Balet ta akagawa iray baleg ya kasalanan. Dati et perpekto ira, tan posible iran manbilay na andi-anggaan. Balet nanrebelde irad si Jehova kanian pinaekal to rad Paraison ayaman da diad hardin na Eden. Lapud inyuna day panlabayan da tan agda la ninonot so arum nin bengatla​—anggan say pankaukolan na ananak da​—naandid sikaray inkaperpekto tan say bilay ya andi-anggaan.​—Gen. 2:15–3:24.

7, 8. Antoy imbaga nen Eva sanen inyanak toy Cain, tan antoy posiblin ninonot to?

⁷ Diad paway na hardin, agaylay irap na bilay di Adan tan Eva. Balet nen nianak so panguloan da ya si Cain, inkuan nen Eva: “Akala ak na sakey a laki a nanlapu ed Jehova.” Diad satan ya imbaga to, anganko et sankanonot to imay insipan nen Jehova diman ed hardin, ya walay sakey a biin mamawala na ilalak o bini ya maneral ed samay mauges ya anukso ed si Adan tan Eva. (Gen. 3:15; 4:1) Kasin  inisip nen Eva ya sikato imay bii ed satan a propesiya tan si Cain imay insipan ya bini?

⁸ No atan so abaloan to, alingo-lingo! Tan no atan met so intanem da ed isip nen Cain legay ibabaleg to, imbangat da labat a magmaliw ya mapasirayew. Sanen nananak lamet si Eva, anggapoy nabasa tayon maabig ya imbaga to nipaakar ed komaduan anak da. Say inter dan ngaran to et Abel, ya nayarin mankabaliksan na “Sengaw,” odino “Anggapoy Kana.” (Gen. 4:2) Kasin satan so inngaran da ta abebay pakanengneng dad sikato no ikomparad si Cain? Posible, balet agtayo segurado.

9. Antoy naaralan na atateng natan ed samay agawad si Adan tan Eva?

⁹ Pakaaralan iya na saray atateng natan. Antoy epektod saray anak yo na ibabaga tan gagawaen yo? Kasin nibabangat yo ra laingen a magmaliw ya mapasirayew, ambisyoso, tan makasarili? Odino ibabangat yo ran aroen day Jehova, tan mikaaro ed sikato? Makapaermen ta ag-agawaan di Adan tan Eva so responsabilidad da. Balet wala ni ilalo na ananak da.

10, 11. Antoy nagmaliw ya trabaho di Cain tan Abel, tan anton kualidad so niwalad si Abel?

¹⁰ Legan na ibabaleg di Cain tan Abel, seguradon impasal ira nen Adan ya mantrabaho pian walay pambilay na pamilya da. Si Cain et nagmaliw ya dumaralos, si Abel balet et managpastol.

¹¹ Balet wala ni ginawa nen Abel ya mas importante. Diad inlabas na panaon, niwalad sikato so pananisia​—atan imay balibalin kualidad ya tinukoy nen apostol Pablo diad sulat to. Balet nonot mo pa. Anggapoy too nensaman ya maong so alimbawa to ya naalig komon nen Abel. Panon sirin ya awalaan na mabiskeg a pananisia ed si Jehova? Pantongtongan tayo so taloran rason.

12, 13. Panon ya binmiskeg so pananisia nen Abel diad impangobserba tod saray palsa nen Jehova?

¹² Saray palsa nen Jehova. Insumpa nen Jehova so dalin kanian tinmutubo iray sabisabit tan dikarika ya mamapairap ed ibaleg na saray tanaman. Anggaman ontan, dakel nin siansiay produkto na dalin ya napambilay na pamilya di Abel. Sakey ni, ag-insumpa iray ayayep, kaiba la ray manok tan sira; pati saray kapalandeyan, ilog, tan dayat; ontan met ed tawen, lurem, agew, bulan, tan saray bitewen. Amin ya nengnengen nen Abel et ebidensya na agaylan panangaro, karunongan, tan kamaongan nen Jehova, say Dios ya amalsa ed amin a bengatla. (Basaen so Roma 1:20.) Legan ya dadalepdepen nen Abel iray palsa na Dios tan saray kualidad To, diman met ombibiskeg so pananisia to.

¹³ Seguradon sankanonot ya naynay nen Abel si Jehova. Imadyin  mo pay Abel legan ton papastolan iray karnero to. Nambabangil ya pasen iray nanakar to. Igigiya to ray karnero diad kapalandeyan tan ibabaliw to rad ilog. Lanang ya manaanap na marikan pasen, no iner so kawalaay subol na danum, tan lugar ya napampainawaan ya ditan et maligen iray karnero to. Diad amin ya ayayep, say karnero so singa pakaskasi ta agto niyagel so sarili to, kanian kaukolan toy too ya mangigiya tan manprotekta ed sikato. Kasin alikna nen Abel ya kaukolan to met so panangigiya, proteksion, tan panangasikaso na Dios ta Sikatoy mas marunong tan mas makapanyari nen say siopa man ya too? Seguradon lanang to itan ya ipipikasid si Jehova, tan lapud satan et lalon binmiskeg so pananisia to.

14, 15. Anto ray imbaga nen Jehova ya dinalepdep nen Abel, tan antoy epekto na satan ed sikato?

¹⁴ Saray salita nen Jehova. Seguradon naistorya di Adan tan Eva ed ananak da no akin ya pinalayas irad hardin na Eden. Kanian dakel so nayarin dalepdepen nen Abel.

¹⁵ Imbaga nen Jehova ya lapud impankasalanan di Adan et naayew odino insumpa so dalin. Saray sabisabit tan dikarika ya nanenengneng nen Abel so paneknek ya tinmua itan. Imbaga met nen Jehova ya si Eva et nairapan ya manlukon tan mananak. Nen inyanak iramay yugtan nen Abel, anengneng to met ya tinmua iratan ya salita. Impasakbay met la nen Jehova ya alablabas ya pirawaten nen Eva so panangaro tan atension nen Adan, tan sikatoy uleyan balet nen Adan. Naobserbaan itan a mismo nen Abel. On, anengneng nen Abel ya tinmua iray salita nen Jehova. Kanian ontan lay kabiskeg na pananisia tod samay sipan na Dios ya walay onsabin “ilalak” odino bini ya manresolbe ed probleman ginmapod hardin na Eden.​—Gen. 3:15-19.

16, 17. Antoy anengneng nen Abel diad impangobserba tod saray kerubin nen Jehova?

¹⁶ Saray lingkor nen Jehova. Anggapoy naalig nen Abel ya maong ya alimbawa ed pamilya ra. Balet diad saman ya panaon, wala ray wadiad dalin ya say pananisia ra et napanuliranan nen Abel. Sanen pinapaway nen Jehova si Adan tan Eva ed hardin, sinegurado  ton agla ran balot makaloob ed satan a Paraiso, anggan saray ananak da. Pian seguradon ag-ira makaloob, angiyan si Jehova na bantay​—saray kerubin odino anghel ya atagey so rangko da, tan wala met so mandarlang ya espada ya tuloytuloy ya ontetelek.​—Basaen so Genesis 3:24.

¹⁷ Isip mo pay epekto ed si Abel ya manlapud inkaugaw to et nanenengneng to la iramay kerubin lapud pinagmaliw dan too so itsura da. Seguradon pandinayewan nen Abel so pakapanyari da. Tan pambiliban to met imay mandarlang ya “espada” ya ag-ontutundan ontetelek. Legay ibabaleg nen Abel, kasin anengneng ton sinmawa iramay kerubin ed asainmin da tan inmekal irad puesto ra? Andi. Diad agew tan labi, sarayan matalino tan makapanyarin palsa nen Jehova et ag-inmalis diman anggano linmabas ni dakel a taon tan dekada. Amoria sirin nen Abel ya wala ray matunong tan matoor ya lingkor nen Jehova. Anengneng tod saratan ya kerubin so katooran tan katutulok ya agto anengneng ed pamilya to. Seguradon binmiskeg so pananisia to lapud alimbawa na saratan ya anghel.

18. Anto ray napangibasian tayoy pananisia tayo natan?

¹⁸ Diad impandalepdep nen Abel ed saray palsa nen Jehova, saray salita To, tan say alimbawa na saray anghel To, binmiskeg lan binmiskeg so pananisia to. Talagan dakel so naaralan tayod si Abel! Nagkalalo lan makapaseseg so alimbawa to ed saray kalangweran natan, ya anggano anggapoy maabig ya alimbawa ed pamilya ra et sarag da nin siansiay nawalaan na tuan pananisia ed Dios. On, dakel  so rason ya ombiskeg so pananisia tayo natan​—wadtan iray makapakelaw a palsa, say interon Biblia, tan say alimbawa na dakel a totoon angipanengneng na pananisia.

19. Anton importantin katuaan so atalosan nen Abel diad inlabas na panaon?

¹⁹ Legan ya ombibiskeg so pananisia nen Abel ed si Jehova, labay ton nipanengneng itan diad gawa. Balet, antoy niiter na sakey a too ed Amalsa na uniberso? Agkaukolan na Dios so tulong na too odino antokaman ya regalo. Balet diad inlabas na panaon, atalosan nen Abel so sakey ya importantin katuaan: No iyapay tod si Jehova so sankaabigan ya niiter to​—tan duga so motibo to​—naliketan so maaron Ama to.

20, 21. Antoy imbagat di Cain tan Abel ed si Jehova, tan antoy reaksion nen Jehova?

²⁰ Angala si Abel na pigaran karnero ya iyapay tod si Jehova. Pinili to iramay panguloan, matataba tan maong a klase, tan aramay balibalin parte na ayep. Labay met nen Cain ya sikatoy bendisyonan tan paboran na Dios, kanian angala na saray bunga na tanem to pian ibagat to met. Balet dumad si Abel so motibo to. Nanengneng so pandumaan sanen inyapay da la ray bagat da.

²¹ Nayari pa lagin pareho iran angusar na altar tan apoy diad impanbagat da, ya anganko et diad pasen ya sankanengneng na saray kerubin ta diad saman a panaon et sikara so mangirerepresenta ed si Jehova diad dalin. Antoy reaksion nen Jehova? Oniay nabasa tayo: “Si Jehova pinabli to si Abel tan say iyaapay to.” (Gen. 4:4) Agla balet indetalye na Biblia no panon ya impanengneng na Dios so panamabli to.

22, 23. Antoy rason akin et pinaboran nen Jehova so bagat nen Abel?

²² Akin et si Abel so pinaboran na Dios? Kasin lapud samay imbagat to? Mabilay ya pinalsa so imbagat nen Abel, tan impaagus to so dala ya mangirerepresenta ed bilay. Amta kasi nen Abel ya mabli ed Dios so ontan ya klase na bagat? Kalabas na dakel a siglo, say andiay pakabalawan ya kordero so inusar na Dios pian irepresenta so bagat na perpekton Anak to, “say Kordero na Dios,” ya onsabi panaon et nipaagus so dala to ya andiay kasalanan. (Juan 1:29; Exo. 12:5-7) Anganko et anggapoy ideya nen Abel ed satan.

²³ Balet aya so segurado: Inyapay nen Abel so sankaabigan ya niiter to. Aliwan samay bagat to labat so pinaboran nen Jehova, noagta sikaton mismo tan say motibo to​—nambagat si Abel lapud panangaro tan tuan pananisia tod si Jehova.

24. (a) Akin et nibaga tayon aliwan samay bagat nen Cain so problema? (b) Diad anton paraan ya singa si Cain so dakel a totoo natan?

²⁴ Aliwan ontan balet si Cain. “Anggapo so panamabli [nen  Jehova] ed Cain tan say iyaapay to.” (Gen. 4:5) Akin ey? Aliwan samay bagat to so problema. Diad tua, sinmabi panaon et inyabuloy na Ganggan na Dios so pangibagat na saray bunga na tanaman. (Lev. 6:14, 15) Say kuan na Biblia et “mauges iray mismon gawa” nen Cain. (Basaen so 1 Juan 3:12.) Singa iisipen na dakel a totoo natan, nayarin inisip nen Cain ya magenap la so pangipanengneng na kunkunwarin debosyon ed Dios. Balet nanengneng ya tampol ed saray sinmublay ya ginawa to ya anggapoy pananisia tan panangaro tod si Jehova.

25, 26. Antoy impasakbay nen Jehova ed si Cain, balet anto nin siansiay ginawa to?

²⁵ Sanen naamtaan nen Cain ya sikatoy agpinaboran nen Jehova, kasin ginawa toy anggaay nayarian ton aligey Abel? Andi. Ampetang so ulo tod agi to. Kakkabusol to! Anengneng nen Jehova so walad puso nen Cain tan maanos ton sinimbawa. Pinasakbayan toy Cain ya no ontay walad puso to, ompan makagaway baleg ya kasalanan. Balet no sikatoy manguman, insipan nen Jehova ya sikatoy “nitandoro” odino napaboran.​—Gen. 4:6, 7.

²⁶ Agdinengel nen Cain so pasakbay na Dios. Imbes, intagar toy agi to diad uma, insan diman to pinatey. (Gen. 4:8) Kanian si Abel so sankaunaan ya biktima na panagbusol lapud relihyon, say sankaunaan ya martir. Balet anggano inatey lay Abel, agbalot lingwanan nen Jehova.

27. (a) Akin et matalek itayon napaoli si Abel? (b) Panon tayon nasegurado ya napinengnengan tayoy Abel?

²⁷ Aliling to et ‘onaakis ed si Jehova so dala’ nen Abel parad hustisya. Kanian sinegurado na Dios ya naikday hustisya si Abel​—dinusa Toy Cain lapud ginawa ton krimen. (Gen. 4:9-12) Tan say mas importante, si Abel et mansasalita ni anggad natan panamegley na intilak ton alimbawa na pananisia. Manga 100 taon labat ya nambilay si Abel. Antiktikey itan no ikomparad bilay na arum a too diad saman a panaon. Balet agto sinayang so kada agew na bilay to. Inatey ya amta ton sikatoy aaroen tan papaboran na Ama tod tawen, si Jehova. (Heb. 11:4) Seguradon si Abel et walad memorya nen Jehova, tan diad arapen et paolien to diad Paraison dalin. (Juan 5:28, 29) Kasin napinengnengan moy Abel diman? On, no dengelen moy ibabaga to tan aligen moy mabiskeg ya pananisia to.