Antoy Antam La ed Saray Tasi nen Jehova?

I-PLAY

Nanenengneng mo kamin manpupulong. Nayarin wala lay arengel mo nipaakar ed sikami diad balita o diad arum. Balet panon karakel lay antam ed saray Tasi nen Jehova?

SALIEN NO ANTAM

I-check no tua o tila.

TUA TILA

Saray Tasi nen Jehova et Kristiano.
Saray Tasi nen Jehova et creationist.
Saray Tasi nen Jehova et agmanpapatambal ed doktor.
Saray Tasi nen Jehova et manisiad interon Biblia.
Saray Tasi nen Jehova et uusaren da labat so sarili dan patalos na Biblia.
Saray Tasi nen Jehova et inuman day Biblia da pian nasuportaay papanisiaan da.
Saray Tasi nen Jehova et ag-ontutulong ed komunidad.
Saray Tasi nen Jehova et babalawen da ray arum a relihyon.

Nengnengen iray ebat ed ontumbok a pahina.

1 TUA. Gagawaen mi anggaay nayarian min tumboken iray bangat tan ugali nen Jesu-Kristo. (1 Pedro 2:21) Balet dakel so pidumaan mi ed arum a relihyon a tatawagen ya Kristiano. Singa bilang, naaralan mid Biblia ya si Jesus et Anak na Dios; agkabiangan na Trinidad. (Marcos 12:29) Agkami manisian say kamarerwa et ag-ompatey o walay nabasad Biblia ya dudusaen na Dios iray totoo ya anggapoy anggaan diad impierno. Agkami met manisia a nepeg ya tawagen ed titulo iray mangidadaulo ed saray kimey na relihyon ya singa mas atagey ira nen say arum.—Eclesiastes 9:5; Ezequiel 18:4; Mateo 23:8-10.
2 TILA. Manisia kamin ginawa na Dios so amin a bengatla. Balet agkami manisia ed ibabaga na dakel ya creationist. Akin? Lapud kontra ed Biblia so dakel ed papanisiaan da. Singa bilang, ibabaga na arum ed sikara ya say anemiran agew ya impamalsa na Dios et literal ya 24 oras so kada agew. Balet say salitan “agew” diad Biblia et nayarin ontukoy ed andukey ya panaon. (Genesis 2:4; Salmo 90:4) Tan ibabangat na arum ya creationist ya say dalin et pigaran libon taon ni labat. Balet, ipapaamta na Biblia ya say dalin tan uniberso et wala lan abayag antis na anemiran agew ya impamalsa. ¹—Genesis 1:1.
3 TILA. Manpapatambal kamid doktor. Diad tua, wala ray doktor ya Tasi, singa say Kristiano nen inmunan siglo a si Lucas. (Colosas 4:14) Balet agmi aawaten so panagpatambal ya kontra ed saray prinsipyod Biblia. Singa bilang, agkami manpapa-blood transfusion ta ibabawal na Biblia so pangiloob na dala ed laman.—Gawa 15:20, 28, 29.

Balet ta labay mi sankaepektiboan ya panagtambal parad sarili mi tan pamilya mi. Diad tua, wala ray paraan na panagtambal ya agla kaukolay blood transfusion a ginawa parad saray pasyente ya Tasi tan aawaten met la na arum a pasyente. Diad dakel a bansa, naiwasan la na anggan siopan pasyente iray probleman iter na blood transfusion, singa say sakit, komplikasyon, tan no nalingo rad pangusar ed dala.
4 TUA. Manisia kami ya say interon Biblia et “impuyan na Dios tan mausa-usar.” (2 Timoteo 3:16) Kaiba lay tatawagen ya Daan a Sipan tan Balon Sipan. Say tawag mid sayan duaran parte na Biblia et Hebreon Kasulatan tan Kristianon Griegon Kasulatan. Kanian, agmi ipapasen a say arum ya parte na Biblia et daan la o agla makana.
5 TILA. Dakel ya bersion so uusaren mid panagaral na Biblia. Balet no walad lenguahe mi, mas labay min usaren so New World Translation of the Holy Scriptures lapud inusar ditan so ngaran na Dios, tan duga tan malinew so impangipatalos ed satan. Imanoen so ginawa na arum ed ngaran na Dios ya Jehova. Diad introduksion na sakey a bersion na Biblia, akasulat so kangaranan na 79 totoo ya tinmulong ed impangipatalos ed satan. Balet diad satan ya Biblia et inekal so ngaran na mismon Autor to—si Jehova a Dios! Duma balet ed New World Translation ta impawil ditan so ngaran na Dios diad nilibon pakabasaan ed satan diad orihinal a teksto. ²
6 TILA. Nen naamtaan min duma ed ibabaga na Biblia iray papanisiaan mi, inuman mi pakatalos mi. Dakel a taon antis min inggapon i-publish so New World Translation of the Holy Scriptures nen 1950, inusar mi ray available ya bersion tan diad saratan so angibasiyan mid saray papanisiaan mi.
7 TILA. Dakel so natutulongan lapud pambabangat mi. Natutulongan mi ray totoo ya nitunday inkaadik dad druga tan panagbuanges. Wala ray inorganisa min klase ed interon mundo ya makakatulong ed nilibo ya makaaral a manbasa tan mansulat. No walay kalamidad, mangiiter kami na praktikal a tulong ed saray Tasi tan aliwan Tasi. Mangiiter kami met na panamabiskeg manlapud Biblia a kakkaukolan na saray naapektoan ed saratan a panaon. ³
8 TILA. Uunoren mi so bilin na Biblia ya ‘igalang so amin’—antokaman so relihyon da. (1 Pedro 2:17) Singa bilang, anggano diad arum a bansa et dakdakel kami, agmi susugsogan iray walad gobierno odino managgaway ley ya istriktoan o ibawal so kimey na arum a relihyon. Agkami met mangikakampanya na saray ganggan pian ipilit ed totoo iray papanisiaan mi. Imbes, rerespetoen mi so pananisia na arum a singa panagrespeto dad sikami.—Mateo 7:12.

Nabasad sayan artikulo iray impormasyon ya walad website mi ya jw.org/pag. Pian dakel ni naaralan, onlad NIPAAKAR ED SIKAMI > MABETBET YA ITETEPET.

^ 1. Lapud saya, agmi kokontraen—a singa met ed arum a creationist—iray napanmatalkan ya a-research ed science a say dalin et nayarin pigaran bilyon ya taon la.

^ 2. Wala ni sakey ya pidumaan na New World Translation: Iiter itan ya libre. Kanian minilyon so makakabasa na Biblia ed lenguahe da. Say New World Translation et wala la natan ed manga 130 ya lenguahe. Nabasa met itan online diad www.pr418.com.

^ 3. Say sakey ya panguusaran mid saray donasyon et say pangiter na tulong ed saray biktima na kalamidad. (Gawa 11:27-30) Lapud boluntaryo iray mankikimey, saray pundo et oonlan talaga ed relief, aliwan pampasueldo ed saray angorganisa ed satan.