“Talomplo tan walon porsiento labat ed saray ugugaw ya anggapo ni 5 taon da so walaan na birth certificate,” so inreport na UNICEF diad sub-Sahara Africa. Balet diad arum a parte na satan a lugar, kaukolan ya “irehistroy inkianak na saray ugugaw pian makaala ray health care tan makapanaral ira. Kaukolan met iya na saray ugugaw ya ulila pian naala day tawir da,” so inkuan nen Elke Wisch, deputy regional director na UNICEF ed eastern tan southern Africa.

Unong ed sakey a survey, say manunan tatakotan na saray Italyanon kalangweran et say cyberbullying. Pitomplo tan duan porsiento ed saray mantaon na 12 anggad 17 so angibagan natatakot irad satan. Mas atagey ni porsiento na saray antakot ed satan nen saramay antakot ed druga (55 porsiento), namolestya na saray adulto (44 porsiento), odino naalisay sakit lapud pisi-sex (24 porsiento).

Unong ed inreport na The Japan Times, ondarakel so kalangweran a Japanese ya agmangaawat na promosyon ed trabaho. Apataplon porsiento so nadidismaya lapud aliwliwa iran ugali tan sobran panagsaol. Dakel so empleyadon agda nibagay labay da ed saray boss da. Saramay abayag lad trabaho et agmanreresign, balet 60 porsiento ed saray agano ni et mantratrabaho labat legan dan manaalagar na mas marakep a trabaho.

Manlapu nen 1980 anggad 2010, manga 800,000 a totoo diad Brazil so inatey lapud apaltog ira. Masulok a 450,000 ya biktima so mantaon na 15 anggad 29. Ipapanengneng na agano ni ran survey a maslak ya sengegay panagpatey et say pankokolkol, agpantatalosan na kakaabay, imon, odino pansasangsangan na saray drayber.