NO ANTOY IBABAGA NA TOTOO

Diad pigaran kultura, agda ipapasen ya mauges so pisekso ed agmo asawa, lalo lad saray asawan lalaki. Tan parad arum et agkaukolan a permanente so kasal.

NO ANTOY KUAN NA BIBLIA

Diad Biblia, say pikakalugoran et ontutukoy ed mabulos ya pisekso na de-asawan indibidual​—laki o bii—​diad arum ya agto asawa. (Job 24:15; Uliran 30:20) Say pikakalugoran et makapadimlad arap na Dios. Diad Israel nensaman, say dusa parad satan et patey. (Levitico 18:20, 22, 29) Imbangat nen Jesus iray papatumbok to ya agmikakalugoran.​—Mateo 5:27, 28; Lucas 18:18-20.

NO AKIN YA IMPORTANTIN PANTONGTONGAN

Dederalen na saray mikakalugoran so seryoson impansamba dad asawa ra nen nankasal ira. Satan et ‘kasalanan ed Dios.’ (Genesis 39:7-9) Buyaken na satan so ulopan na ananak tan atateng. Niarum ni, ipapasakbay na Biblia ya “ukomen na Dios iray . . . managkalugoran.”​—Hebreos 13:4.

“Komon ta say panangasawa et nepeg a galangen na amin a totoo, tan ag-itan komon narutakan.”​—Hebreos 13:4.

NO ANTOY KUAN NA BIBLIA

Unong ed Biblia, say sakey et naabuloyan a pultotey relasyon dan sanasawa no say kapareha to et nanggaway seksual ya imoralidad. (Mateo 19:9) Kabaliksan na saya a kayarin nanggaway imoral so asawa to, walay kanepegan na inosentin asawa ya mandesisyon no kasin mansiansia ed agnanmatoor ya asawa to odino midiborsyo. Personal iyan desisyon.​—Galacia 6:5.

Balet, diad arap na Dios et sagrado tan legay bilay so panangasawa. (1 Corinto 7:39) Kabusol na Dios no midiborsyo so sakey lapu labat ed ataptapew iran rason, singa say agpakakapenek ed asawa. Kanian, say pidiborsyo et aliwan anlemew ya desisyon.​—Malaquias 2:16; Mateo 19:3-6.

“Ibagak ed sikayo a siopaman a lakin mangidiborsyo ed asawa to, ya aliwan makasengeg ed pilalawanan, ipepeligro to so asawa to a makapikalugoran.”​—Mateo 5:32.

NO ANTOY KUAN NA BIBLIA

Andi. Ibabaga na Biblia ya kakasian na Dios iramay magbabawi tan manguman ed saray kasalanan da—kaiba lay pikakalugoran. (Gawa 3:19; Galacia 5:19-21) Diad tua, nabasad Biblia iray lalaki tan bibii ya tinmundad pikakalugoran tan nagmaliw a kaaro na Dios.​—1 Corinto 6:9-11.

Nanengneng so panangasi na Dios diad samay agawad si Arin David na Israel nensaman. Akikalugoran si David ed asawa na sakey ed saray sundalo to. (2 Samuel 11:2-4) Malinew ya ibabaga na Biblia a ‘say ginawa nen David et makapasanok’ ed Dios. (2 Samuel 11:27) Kayarin abaat, nagbabawi si David tan pinerdona na Dios. Balet, inani nen David iray makapaermen ya epekto na ginawa to. (2 Samuel 12:13, 14) Ag-abayag et pinaneknekan na makabat ya Arin Solomon ya ‘say mikakalugoran et andian na pakatalos.’​—Uliran 6:32.

NO ANTOY NAYARIN GAWAEN MO

No akikalugoran ka, kaukolan moy onkerew na perdona ed Dios tan ed asawam. (Salmo 51:1-5) Aral mon busoley pikakalugoran a singa pamubusol na Dios ed satan. (Salmo 97:10) Determinadon paliisay pornograpiya, seksual a panagpantasya, pikarinyoan, odino arum nin manresultad pakawalaay seksual ya interes ed agmo asawa.​—Mateo 5:27, 28; Santiago 1:14, 15.

No akikalugoran so asawam, ilaloan mon natatalosan na Dios so naliliknam. (Malaquias 2:13, 14) Ipikasim so ligliwa tan panangigiya to, tan “bembenan to ka.” (Salmo 55:22) No nandesisyon kan perdonaey asawam tan ituloy so relasyon yo, kaukolan yon dua a pansagpotan ya apigeren so panamaley yo.​—Efeso 4:32.

“Si Jehova met inekal to so kasalanan mo,” kuan nen propeta Natan sanen nagbabawi si David ed impikalugoran to.​—2 Samuel 12:13.