Agto Ikbanay Papanisiaan To
Nen 11 años nen Song Hee, naimano nen nanay to ya aliwan normal so kurbay beneg to. Diad impan-check-up na doktor, anengneng ya walay scoliosis to. Satan a sakit et onkukurbad gilig so spine, ya singa letran “C” odino “S.” Linmoor so kondisyon nen Song Hee kanian kakkaukolan toy manpa-opera. Balet aglabay nen Song Hee so manpasaksak na dala. Ininterbyu na Onliing! nipaakar ed agawad sikato.
Nen naeksamin na doktor itan ya sakit mo, atulongan da ka?
Manga taloy taon ya manpapacheck-up ak ed duaran doktor, balet siansia nin onkukurbay spine ko. Diad tua, linmoor ya anggad sesekseken to lay puso tan balak, kanian nairapan ak ya onengas. Kaukolan ko lan talagay manpa-opera.
Pinmayag kan manpaopera?
On. Balet imbaga dad siak ya mairap may operasyon. Diad saman, 116 degrees lay kurbay spine ko, talagan grabe la. Balet diad situasyon ko, mas sensitibo so operasyon. Agko labay so manpasaksak na dala lapud saray relihyoson papanisiaan ko ya base ed Biblia. *
Walay nalmom ya doktor ya ompayag ed ontan?
Walay nalmo mi nen nanay ko ya espisyalista diad lugar mi ed Florida, U.S.A. Balet nen imbagak ya agko manpasaksak na dala, say kuan to, anggapoy doktor ya manggawa na ontan kakomplikadon operasyon ya agmangusar na dala. Imbaga to nin ompan agko la nasabi 20 no agak manpa-opera. Et 14 años ko ni labat ed saman.
Impaliwawam ed sikato no akin ya agmo labay so manpasaksak na dala?
On. Imbagak ed sikato ya base ed Biblia so papanisiaan ko, impaliwawak ya imbaga na Dios ya sagrado so dala, balang lan dala na too odino ayep. * Diad saray Israelita nensaman, patey so dusa na pangan na dala! * Impabasak met ed sikatoy Gawa 15:19, 20. Abitla diman ya saray Kristiano et nepeg dan ‘arawian so dala.’ Labay ton ibaga, ag-itan nepeg ya iloob ed laman—agkanen odino isaksak.
Antoy kuan na doktor ey?
Ipipilit ton siansia ya kaukolan to ak ya saksakay dala. Tan abigla ak ta say kuan na ospital, basta manpasaksak ak na dala, libre lay pampaoperak.
Grabe ’tan ya opresi ah! Antoy ginawa yo nen nanay mo ey?
Anggano singa anggapoy malabay ya man-operad siak ta agak manpasaksak na dala, agmi inikbanay papanisiaan mi. Balet mas nagmaliw ya komplikadoy situasyon, ta diad ley et menor-de-edad ak ni. Tan lapud onggragrabe kondisyon ko, insegep dad korte so kasok. Maong labat ta say desisyon na abogado na Florida et ikdan ak na 30 agew ya mananap na doktor ya ompayag ed kekerewen ko.
Walay nalmom?
On, wala! Say Hospital Liaison Committee na Saray Tasi nen Jehova ed lugar mi et kinoktak day sakey ya espisyalistad scoliosis diad New York ya angibagan anggan oniay kipapasen ko et posible so operasyon ya agmangusar na dala, tan labay to ak ya nengnengen. Kanian akalmo kami doktor antis na petsa ya inter na korte. *
Kumustay operasyon ey?
Ayos so nansumpalan! Pian nipetek so spine ko, kinargaan nen Dr. Robert M. Bernstein na balatyang ya nai-adjust so beneg ko. Amiduay operasyon ko, duaran simba so baetan.
Akin et amidua?
On ta no diad unonan operasyon et dakel so naandin dala, wala ni duay simba pian ondakel so red blood cells ko antis na komaduan operasyon. Say agawa balet, diad samay duaran operasyon et daiset so naandin dala, maong labat ta namplanon maong iramay doktor, marunong ira tan maal-alwar ed impan-opera da. Insan kayari operasyon, kinmasil ak ya tampol, anggapoy komplikasyon ta agak nampasaksak na dala. *
Anto met so kuan na doktor mo ed resulta ey?
Nepeg ya ikonsidera na saray doktor so pasyente
Malikeliket! Imbaga ton, “say pangasikasod pasyente et aliwa labat lan basta pangopera.” Parad sikato, nepeg ya ikonsidera na saray doktor so pasyente, kaiba lay amin ya papanisiaan to tan saray importantid sikato. Anggan saray aliwan Tasi nen Jehova et labay da met ya ontan so pantratod sikara.
^ par. 7 Say nanay nen Song Hee et sakey ed Saray Tasi nen Jehova. Nagmaliw met ya Tasi si Song Hee nen abautismoan nen 2012 diad edad ya 16.
^ par. 17 Tutulongan na Saray Hospital Liaison Committee iray Tasin pasyente ya mananap na marunong iran doktor ya agmansasaksak na dala.
^ par. 21 Diad sakey ya artikulo nipaakar ed no akin a mapeligroy panagpasaksak na dala, imbaga na Clinical Excellence Commission, New South Wales (Australia) Health: “Say panagpasaksak na dala et panag-transplant na mabilay ya tissue. Singa diad anggan anton pampa-transplant, say natural ya reaksion na laman et agto itan awaten ta ag-itan parte na laman to. Kanian kaukolan sirin so panalwar tan ikonsideran maong so epekto na saya.”
