SAY DALAN NA MALIKET YA KABIBILAY

Ilalo

I-PLAY

Ilalo

“[Say] nononoten ko parad sikayo [et] say kareenan, tan aliwan say kadederal, pian ikdan ta kayoy maong ya arapen tan ilalo.”—Jeremias 29:11.

“SAY ILALO ET . . . IMPORTANTE PIAN MAONG SO RELASYON TAYOD DIOS,” so kuan na libron Hope in the Age of Anxiety. “Tan atan so sankaabigan ya tambal pian nalabanay liknaan ya anggapoy kanam, bukbukor mo, tan natatakot ka.”

Nabasad Biblia ya kaukolan tayoy ilalo, tan ipapasakbay met na satan ya ag-itayo maniilalo ed saray agmet lanlamang nagawa. “Agkayo manmamatalek ed saray prinsipe odino diad anak na too, ya agmakapangiliktar,” so ibabaga na Salmo 146:3. Imbes ya manmatalek tayo ed panangiliktar na too, makabat tayo no manmatalek tayod Amalsa, ta walay pakayari ton tooren so amin ya promisa to. Anto ray impromisa tod sikatayo? Nia ray pigara.

MANAMPOT LAY KAUGSAN; ONSUBLAY SO PERMANENTIN KAREENAN PARAD SARAY MATUNONG: “Agmanbayag et anggapo lay mauges . . . Balet saray mauyamo et tawiren day dalin, tan manliket iran maong ed agnaparaan a kareenan,” so kuan na Salmo 37:10, 11. Inyarum na bersikulo 29 ya “saray matunong et . . . manbilay ira [ed dalin] diad andi-anggaan.”

MANAMPOT LAY GUERRA: “[Si] Jehova . . . [et] papatundaen to ray guerra diad interon dalin. Puputeren to ray pana tan dederalen to ray gayang; popoolan to ray kariton a parad guerra.”—Salmo 46:8, 9.

ANGGAPO LAY SAKIT, IRAP, TAN PATEY: “Say tolda na Dios et walad katooan . . . Punasen to so amin a lua ed kamataan da, tan anggapo lay patey, anggapo met lay panermen tan panakis tan panotot.”—Apocalipsis 21:3, 4.

DAKEL LAY NAAKAN PARAD AMIN: “Dakdakel so anien ya ilik diad dalin; say toktok na kapalandeyan et napanopano.”—Salmo 72:16.

PATAS YA ULEY NA SAKSAKEY YA GOBIERNO ED INTERON MUNDO—SAY PANARIAN NEN KRISTO: “Niiter ed [si Jesu-Kristo] so panuley, kagalangan, tan panarian, pian manlingkor ed sikato iray totoo ed nanduruman nasyon tan lenguahe. Say uley to et andi-anggaan, tan say panarian to et agnaderal.”—Daniel 7:14.

Panon tayon naseguro ya nagawa irayan promisa? Nen wadiad dalin si Jesus, impanengneng tod publiko ya sikatoy makanepegan ya magmaliw ya Ari. Pinaabig to ray mansasakit, pinakan to ray mairap-bilay, tan binilay to ray inaatey. Tan say mas importante et saray bangat to, ta kaibad saratan iray prinsipyo ya makatulong ed totoo ya manbilay na andi-anggaan ya walay kareenan tan pankakasakey. Impasakbay met nen Jesus iray nagawad arapen, pati say tanda na kaunoran iran agew na sayan mundo.

IRAP ANTIS NA INAWA

Impasakbay nen Jesus ya say tanda na kaunoran iran agew et aliwan kareenan tan kaligenan, noagta kabaliktaran ni ingen! Kaiba ed inter ton tanda na “kaunoran a parte na sistema na mundo” so guerra ed dakel a pasen ed mundo, eras, salot, tan maksil iran yegyeg. (Mateo 24:3, 7; Lucas 21:10, 11; Apocalipsis 6:3-8) Imbaga met nen Jesus: “Lapud idarakel na kaugsan, ombetel so panangaro na karaklan a totoo.”—Mateo 24:12.

Sayan ibetel na panangaro et nanengneng ed dakel a paraan, ya espisipikon impasakbay na sakey nin nansulat ed Biblia. Diad 2 Timoteo 3:1-5, nabasa tayo ya “diad kaunoran iran agew,” maslak ya totoo et inaro day sarili da, kuarta, tan panliliket. Mapaatagey tan masesebeg ira. Anggapoy panangaro ra ed kapamilyaan da, tan saray ananak et agmatulok ed atateng da. Dakel so kunkunwarin relihyoso balet anggapoy takot dad Dios.

Sarayan mairap ya kipapasen et prueba ya sayan mundo et wala lad kaunoran iran agew. Prueba met iratan ya say inawa ya iter na uley na Panarian et asingger la. Kanian diad samay propesiya nen Jesus tungkol ed kaunoran iran agew, oniay impaseguro to: “Sayan maong a balita na Panarian et nipulong ed interon dalin bilang pantasi ed amin a nasyon, insan onsabi so anggaan.”—Mateo 24:14.

Sayan maong a balita et mangiiter na pasakbay ed saray makasalanan tan mangiiter na ilalo ed saray matunong. Ipapaseguro tod sarayan matunong ya asingger lan nagawa iray impromisa na Dios ya bendisyon. Labay mon naamtaan ni so tungkol ed saratan ya bendisyon? No on, basam so beneg a pahina na sayan magasin.