KASIN NIBAGAM YA MALIKET KA? No on, antoy mamapaliket ed sika? Kasin say pamilyam, trabahom, odino relihyon mo? Ompan walay pipirawaten mon mamaliket ed sika, singa say pakasumpal mod panaral mo, pakalay maong ya trabaho, o pangaliw na balon kotse.

Dakel ya totoo so maliket no agawaan day papangarapen da o asaliw day labay da. Pero panon kabayag itan ya liket? Mabetbet ya maganggano labat itan, kanian nayarin makapadismaya.

Say liket et adeskribe bilang maong ya kipapasen a nayarin manbayag, ya pakaliknam et kontento kad bilay mo tan balibali liknaan mo, tan labalabay mon mantultuloy itan.

Ontan met, lapud mantultuloy iyan kipapasen, say liket et adeskribe ya singa panakar o kabibilay, aliwan destinasyon odino gagala. No ibagam ya, “Magmaliw ak ya maliket no . . . ” et singa iyaalagar mo ni panliket mo.

Pian natalosan tayo, ikompara tayoy liket ed kasil na laman. Antoy gawaen tayo pian maksil so laman tayo? Nibagan manaakar tayo ed dugan dalan nipaakar ed satan no masustansia ray kakanen tayo, mani-exercise tayo, tan balanse tayod gagawaen tayo. Ontan met, say liket et resulta na dugan kabibilay, ya uunoren mo ray dugan prinsipyo.

Anto ran prinsipyo ed bilay tan ugali so pakapatnagan na maliket ya kabibilay? Anggaman diad saray walad leksab et wala ray mas importante, baleg so nitulong na saraya:

• INKAKONTENTO TAN INKAMAITER

• KASIL NA LAMAN TAN BISKEG NA LIKNAAN

• PANANGARO

• PAMERDONA

• GAGALA ED BILAY

• ILALO

Ibabaga na respetadon libro na karunongan: “Maliket iramay andiay pakabalawan so panagbilay da.” (Salmo 119:1) Nengnengen tayo itan ya panagbilay.