Say stress et reaksion na laman mo ed sakey a mairap ya situasyon. Idikta na utek mo so idaloy na dakdakel ya hormone ed amin ya parte na laman mo. Lapud satan et ompeles so parok na pusom, ontagey so presyon na dalam, ompeles so ingas mo, tan onawet iray muscle na laman mo. Agmo iratan naliklikas ya nagawa, balet akaparaan lay laman mo ya onkiwas. No asumpal lay makapa-stress ya situasyon, onkalma lay laman mo tan ompawil lad normal.

Say stress et normal ya reaksion na laman pian naarap mo iray mair-irap tan mapeligron situasyon. Satan ya reaksion et onggapo ed utek mo. Say maong ya epekto na stress et natulongan kan magmaliw ya alisto odino onkiwas a tampol. No dugaruga labat so stress, makatulong itan pian naabet mo ray goal mo odino pian maabig so nagawaan mo, singa bilang diad eksamin, interbyu parad trabaho, odino diad sports.

Balet no abaybayag la, grabe, tan tuloytuloy lay stress mo, nayarin walay makapuy ya epekto na satan ed sika. No paulit-ulit odino naynay ka lan nai-stress, naapektoan so laman, emosyon, tan panagnonot mo. Nayarin manguman so ugalim, pati panagtratom ed arum. No grabe lay stress mo, ompan natukso kan man-druga, manbuanges, mansigarilyo, tan arum nin makapuy ya kagagawa pian nasarag mo itan. Ompan manresulta ni ingen itan ed depresyon, sobran kesaw, odino pambikkel.

Aliwan parepareho so epekto na stress ed kada too, balet nayarin panlapuan itan na nanduruman sakit. Tan nayarin naapektoan so amin lawari ya parte na laman na too.