Karunongan Pian Maliket so Pamilyam
Say panangasawa tan pakawalaan na ananak et espisyal ya regalo na Amalsa. Labay ton maliket so pamilya tayo. Kanian panamegley na sakey a sagradon libro, igigiya to tayo pian mas onelet so ulopan na pamilya tayo tan magmaliw ya mas maliket. Imanom pa irayan praktikal ya bilin to.
Asawan Lalaki, Aro Yoy Kaasawaan Yo
“Nepeg ya aroen na saray asawan lalaki so kaasawaan da a singa ed dilin laman da. Say lakin mangaaro ed asawa to et mangaaro ed sarili to, ta anggapoy toon bubusolen toy dilin laman to, noag ingen papakanen tan papablien to itan.”—EFESO 5:28, 29.
Say asawan laki so ulo na pamilya. (Efeso 5:23) Balet say maong ya asawan laki et aliwan mamaong tan agto ipasoot so labay to. Papablien toy asawa to tan aasikasoen toy materyal tan emosyonal ya pankaukolan to. Labalabay to met ya paliketen so asawa to, kanian agto lanang ya ipipilit no antoy labay to. (Filipos 2:4) Ibabaga tod asawa to iray nalilikna tan iisipen to, tan ondedengel no walay ibabaga na asawa to. Aliwa met ya “mapaspasnok” so panagtrato tod sikato tan agto sasakitan ed pisikal odino diad emosyon.—Colosas 3:19.
Asawan Bibii, Respeto Yoy Kaasawaan Yo
“Say asawan bii et nepeg a walaan na aralem a respeto ed asawa to.”—EFESO 5:33.
No rerespetoen na asawan bii so asawa to tan susuportaan to ray desisyon to, magmaliw ya mareen so pamilya. No alingo so asawa to, agto melmelagen noagta mansiansian maulimek tan marespeto. (1 Pedro 3:4) No walay problema ya kaukolan ton ipaamta ed si asawa to, sikatoy manalagar na dugan panaon tan marespeton mitongtong ed sikato.—Eclesiastes 3:7.
Manmatoor Ka ed Asawam
“Iyamong toy asawa to, tan magmaliw iran sakey a laman.”—GENESIS 2:24.
No magmaliw ya sanasawa so sakey a laki tan sakey a bii, nawalaan iray maapit ya relasyon. Kanian kaukolan na sanasawa ya paeleten so relasyon da. Lanang iran mantongtong tan manggawa ray kaabigan ed sakey tan sakey. Kaukolan da met so manmatoor ed balang sakey kanian ag-ira misekso ed sananey. No say sakey et agmanmatoor, gagagalaen ton sakitan so asawa to, dederalen toy tiwala to, tan posiblin nabuyak so pamilya ra.—Hebreo 13:4.
Atateng, Ipasal Yo ray Ananak Yo
“Ipasal moy ugaw ed dalan a nepeg ton laen; anggan sano ontatken la et ag-onsian ditan.”—PROVERBIO 22:6.
Inter na Dios ed saray atateng so responsabilidad ya mangipasal ed saray ananak da. Kaiba ed satan so pangibangat ed sikara na maong ya ugali tan pangipanengneng na maong ya alimbawa ed sikara. (Deuteronomio 6:6,7) No walay aliwan ginawa na sakey ya ugaw, agtampol ompetang so ulo na sakey a marunong ya ateng. Sikatoy “aliston ondengel, agbengatbengat a mansalita, matantan a manpasnok.” (Santiago 1:19) No disiplinaen na ateng so anak to, kaukolan ya gawaen to itan ed maaron paraan, aliwan mapaspasnok.
Ananak, Unor Yo ray Atateng Yo
“Ananak, magmaliw kayon maunor ed atateng yo . . . ‘Igalang moy amam tan inam.’”—EFESO 6:1, 2.
Kaukolan ya unoren tan respetoen na ananak iray atateng da. No igagalang na ananak iray atateng da, malikeliket so ulopan da tan walay pankakasakey na pamilya ra. Nipanengneng na saray wala lad edad ya ananak ya igagalang da ray atateng da no aasikasoen da ra. Nagawaan da itan no seguroen dan maayos so panaayaman na atateng da odino iiter day materyal ya pankaukolan da.—1 Timoteo 5:3, 4.
Ompan Nagustoan Mo Met
PANON A MAGMALIW YA MALIKET SO PAMILYAM?
Patulongan ed Dios Pian Maliket so Panangasawa Yo
Makatulong so duaran tepet pian ondakep so panangasawa yo.
SAY PANAG-BANTAYAN
Asawan Lalaki—Gawaen ya Maligen so Abung Yo
Nayarin mainawa ed pinansyal so sakey a pamilya balet ta aliwan mainawa ed mas importantin bengatla.
ONLIING!
No Panon ya Ipanengneng so Respeto
Say respeto et kaukolan ya lanang ya ipanengneng na sanasawa ed sakey tan sakey, aliwan no labay da labat. Panon mon nipanengneng ya rerespetoen moy asawam?
PANANGASAWA TAN PAMILYA
No Panon so Magmaliw ya Maong a Tatay
No anton klase na asawa ka natan, ontan met ya klase na tatay ka no niyanak lay anak mo.
Manunan Bangat na Biblia—Video
Antoy Pangipapasen na Dios ed Panangasawa?
Labay na Dios ya maliket so relasyon yon sanasawa. Wala ray bilin ed Biblia ya akatulong ed dakel ya sanasawa.
NIPAAKAR ED SIKAMI
Man-request na Ombisita ed Sika
Pantongtongan so tepet mo nipaakar ed Biblia, odino amtaen ni kaaruman ya impormasyon nipaakar ed Saray Tasi nen Jehova.
