MAKALIGTAS KASI SO PLANETA TAYO?
Katakelan
SARAY kagubatan o katakelan et singa lungs o bala ya kailangan pian mansiansian mabilay iray pinalsa diad planetan Dalin. Akin ey? Ta singa saray bala, sasapiten na saray kakiewan so dagem. Susungapen na saray kakiewan so carbon dioxide ya delikado ed sikatayo tan ibubuga da so oxygen ya susungapen tayo pian manbilay tayo. Manga 80 percent na saray tanaman tan ayayep ed Dalin et walad saray katakelan. No anggapo ray katakelan, agtayo nabilay.
Anto Lay Nagagawa ed Saray Katakelan?
Kada taon, binilyon ya kakiewan so babatangen pian taneman na napangalaay naakan. Diad bandad sampot na 1940’s, kapaldua na saray katakelan ed interon mundo so akalbo la.
No naderal iray katakelan, ompatey met la ray tanaman ditan tan anggapo lay napanayaman na saray ayayep.
Say Planeta Tayo—Ginawan Naapiger Toy Sarili To
Anggan diad saray lugar ya halos amin ya kakiewan et abatang la, ontutubo lanlamang iray tanaman tan kakiewan ditan. Diad agano ni labat, manbilib iray ecologist ed naobserbaan dan kapeles na intubo lamet na saramay kakiewan ed lugar ya nambatangan tan nagmaliw lamet ya takel. Imanoen irayan alimbawa:
-
Inaral na saray researcher ed 2,200 ya pasen diad America tan West Africa no antoy nagawa ed katakelan ya ginawan taneman insan pinaulyanan labat. Naimano ya binmuna so dalin ditan tan tinmutubo iray kakiewan tan nagmaliw lamet ya katakelan diad loob labat na samploran taon.
-
Base ed estimate na saray researcher, diad loob na manga 100 taon, ompawil ed datin kipapasen iratan ya katakelan ya singa nen antis iran akalbo, so imbaga na Science magazine.
-
Diad agano ni, wala ray scientist ed Brazil ya inkompara da so kapeles na itubo na saray kakiewan ed pasen ya pinaulyanan labat tan ed pasen ya tinaneman na saray kiew.
-
Base ed satan ya impanaral, oniay report na National Geographic: “Manliket ira ta anengneng dan agla kailangan so mantanem lamet na kakiewan.” Diad loob labat na limaran taon, saraman ya pasen ya agtinaneman et “napno lamet na kakiewan.”
No Anto La ray Ginawan Solusyon
Diad interon mundo, wala ray ginawan paraan pian protektaan iray nakekeran katakelan tan apigeren iray aderal. Bilang resulta, imbaga na sakey ya source na United Nations ya diad apalabas ya 25 ya taon, “abawasan na masulok ya 50 percent iray kiew ya babatangen ed interon mundo.”
Pero mas ni so kailangan pian naprotektaan iray katakelan. “Say karakel na nadederal ya katakelan et pareho nin siansia diad apalabas iran taon,” so imbaga ed sakey ya report ya im-publish na Global Forest Watch.
Saray kompanya ya ilegal ya manbabatang na kakiewan pian gawaen ya tabla et binilyon ya dolyar so kita da, tan atan so manunan rason no akin ya nadederal iray katakelan.
Seseguroen na saray team ya manproprotekta ed katakelan ya daiset labat so batangen ya angkakabaleg ya kiew insan mantanem na balo
Walay Pag-asa—No Antoy Ibabaga na Biblia
“Si Jehova a a Dios et pinatubo tod dalin so amin a kiew a makapaliket a nengnengen tan maabig a naakan.”—Genesis 2:9.
Ginawa na Amalsa so amin ya katakelan ya sarag dan apigeren so sarili da pian tuloy-tuloy tayon napinabangan iratan. Labay ton protektaan tan mansiansia iray katakelan kaiba lay amin ya tanaman tan ayayep ya manbibilay ditan.
Ibabaga na Biblia ya ag-abuloyan na Dios iray sakim ya totoo ya deralen so planeta tayo tan amin a mabilay ya wadia. Nengnengen so artikulo ya “Impromisa na Dios ya Makaligtas so Planeta Tayo,” diad pahina 15.
a Jehova so ngaran na Dios.—Salmo 83:18.
