Akin et Anggapo Lay Respeto na Totoo ed Sarili Da?
NO AKIN YA IMPORTANTIN RESPETOEN SO SARILI
Saray totoon walay respeto dad sarili da et nasasarag da ray subok, tan ag-ira main-inomay ya onsuko.
-
Ipapanengneng na impan-research ya saramay anggapoy tiwala dad sarili da et posiblin manka-anxiety, nadepress, tan ag-ira makapangan o akan la ran akan. Baleg met so posibilidad ya manbuanges odino man-drugs ira.
-
Saramay walay respeto dad sarili da et agda ikokomparay sarili da ed arum, kanian mainomay day miulop tan mikaaro. Balet saramay abebbebay pakanengneng dad sarili da et walay tendensia dan balawen so arum, kanian nadederal so relasyon da ed arum.
-
Anggano ondalan ed graben problema o subok iray totoon walay respeto dad sarili da, nasarag da itan tan makaimwas ira. Agda aabuloyan iray problema ya makapigil ed sikaran naabot iray goal da. Balet saramay abebbebay pakanengneng dad sarili da, melag labat ya problema et singa la balbaleg ya maong. Kanian, onsuko la ra.
NO ANTOY SARAG MON GAWAEN
Pilim iray maong ya kakaaro. Miulop kad saray magalang ya totoo, saramay talagan imamalasakit da ka tan pabibiskegen day liknaan mo.
Tulongan moy arum. No maomaong tan matuttulong ka, anggan diad saramay agmakabales ed sika, magmaliw kan maliket ta nansakripisyo ka. Tan anggano agnapapansin na arum so gagawaen mo, diad loob mo, maliket ka nin siansia.
Tulongan mo ray anak mon respetoen day sarili da. Nagawaan mo itan no abuloyan mo ran solusyonan da ray problema da, anggad sarag da. Ontulong itan ed sikara pian amta day gawaen da tan makaaral ira. No nasasali da iratan, kalkalna dan narespetoy sarili da, ya makatulong anggad ibaleg da.
NO ANTOY GAGAWAEN MI
Saray pantitipon tan pangiyaaral na Biblia na Saray Tasi nen Jehova et makakatulong ed totoo pian magmaliw ya maliket so bilay da tan narespeto day sarili da.
SINIMBAN PANTITIPON MI
Diad saray sinimban pantitipon mi, nae-enjoy mi ray base ed Biblian paliwawa, tan kaiba ed saratan ya paliwawa iray suhestion no panon min narespetoy sarili mi. Anggapoy entrance fee ed saray pantitipon mi tan welcome so amin. Naaralan mo ditan no . . .
-
akin ya importante ka ed Dios
-
anton talagay gagala na bilay
-
panon kan nawalaay maong ya kakaaro
Nakabat mo met ditan iray tuan kakaaro ya talagan “mangiyansakit ed sakey tan sakey.” —1 Corinto 12:25, 26.
Parad kaaruman ya impormasyon tungkol ed saray pantitipon mi, i-search diad jw.org/pag so antikey a video ya Antoy Gagawaen Diad Kingdom Hall?
PANGIYAARAL MI NA BIBLIA
Mangiyoopresi kami na interactive ya panag-aral na Biblia gamit so libron Panliketan so Bilay ya Anggapoy Anggaan! Balibali iyan libro ta wala ra diay bersikulo ed Biblia, malinew ya eksplinasyon, makapainteres iran tepet, makapabiskeg iran video, tan marakdakep iran litrato. Makatulong iyan panag-aral na Biblia pian ag-abebbebay pakanengneng na totoo ed sarili da tan magmaliw ya maliket so bilay da.
Pian nanengneng no anto ray gunggona no manpaiyaral ka na Biblia ed Saray Tasi nen Jehova, i-search diad jw.org/pag so antikey a video ya Akin ya Aralen so Biblia?
Ompan Nagustoan Mo Met
ONLIING!
No Panon ya Ipanengneng so Respeto
Say respeto et kaukolan ya lanang ya ipanengneng na sanasawa ed sakey tan sakey, aliwan no labay da labat. Panon mon nipanengneng ya rerespetoen moy asawam?
EBAT ED SARAY TEPET ED BIBLIA
Antoy Ibabaga na Biblia Tungkol ed Panangaro ed Sarili?
Imbaga nen Jesus: “Arom so kaparam a too a singa ed sikan dili.” Antoy labay ton ibaga?
NIPAAKAR ED SIKAMI
Man-request na Ombisita ed Sika
Pantongtongan so tepet mo nipaakar ed Biblia, odino amtaen ni kaaruman ya impormasyon nipaakar ed Saray Tasi nen Jehova.
NIPAAKAR ED SIKAMI
Onatendi ed Aral
Amtaen no anto ray nagagawad aral mi. Mananap na pantitipon o aral ya asingger ed sikayo.
