Akin et Anggapo Lay Respeto na Totoo ed Bilay?
NO AKIN YA IMPORTANTIN PABLIEN SO BILAY
No say sakey et mabisyo tan agto papablien so bilay, nipeligro toy sarili to tan nadamay so arum.
-
Say panagsigarilyo et maka-cancer tan no bilang ta walay cancer mo, lalon nairapan so laman mo ya labanan itan. Diad tua, manga 90 porsiento so ompapatey ed lung cancer lapud panagsigarilyo odino nasusungap day asewek na sigarilyo.
-
Kada taon, dakel so nato-trauma no wala ray manpapaltog ed matoon lugar. Oniay inreport na Stanford University: “Nanengneng ed impan-research ya anggan saramay ag-asakitan [ed agawan paltogan diad eskuelaan] et siansia nin naapektoay isip tan emosyon da diad dakel iran taon.”
-
No wala ray manda-drive ya akainum o aka-drugs, magmamaliw ya mapeligro so karsada. Tan no wala ray totoon anggapoy pibabali dad bilay tan palpalaran ira, nadisgrasya so arum.
NO ANTOY SARAG MON GAWAEN
Asikasom so laman mo. Aliwa nin atrasado ya itunda iray bisyo ya singa say panagsigarilyo, panag-vape, panagbuanges odino panag-drugs. Deralen na saratan so bilay mo tan pakanengnengan met itan ya agmo napapabli so bilay na arum, kaiba lay bilay na kapamilyam.
Nonot moy safety. Pian napaliisan so aksidente, ayos mo ray posiblin pakarisgoan ed abung yo. Manalwar kad panag-drive mo, tan seguroen mon akakondisyon so luganan mo. Agka palalagyat ed saray kagagawa odino sports ya manresulta ed pakadisgrasyam o ipatey mo.
Arom so kaparam a too. Rerespetoen moy bilay no aaroen moy amin a totoo antokaman so lahi o bansa ra, mayaman man ira o mairap, de-aral man ira o andi. Diad tua, say diskriminasyon tan pambusol so rason no akin ya wala ray guerra tan inkaruksa ed mundo.
NO ANTOY GAGAWAEN MI
Ibabangat na Saray Tasi nen Jehova ed totoo ya kailangan dan alwaray laman da. Makakatulong ed totoo so pangibabangat mi na Biblia pian nitunda day panda-drugs da tan arum nin bisyo o kagagawa ya makaderal ed laman.
Diad saray bilding ya ipapaalagey mi, tutumboken mi iray standard parad safety. Pian naiwasan so aksidente, impasal nin maong iray boluntaryon mangipapaalagey ed saray bilding ya pantitiponan mi tan arum ni ran pasilidad ya uusaren mi ed panagbangat na Biblia. Regular met ya iinspeksionen iray bilding mi pian nasegurado ya natutumbok mi so batas ed safety ya ipapatupad na gobierno.
Ontutulong kami ed saray naapektoan na kalamidad. Diad agano ni ya 12 bulan, tinmulong kami ed nanduruman bansa ya naapektoan na manga 200 ya graben kalamidad. Tan ngalngali 12 milyon ya dolyar so inala mi ed donasyon mi pian makapangiter kami na relief o tulong ed saray biktima.
Nen ginmapon kinmayat so Ebola virus diad West Africa nen 2014 tan diad Democratic Republic of Congo nen 2018, imbangat mi ray totoo no panon dan naprotektaan so sarili da pian ag-ira naalisan na sayan makapatey ya sakit. Angibaki kami na saray representative pian ipaliwawa ed nanduruman grupo so topic ya “Onunor Pian Niligtas.” Angikarga kami met na panag-urasan na lima ya nausar antis ya onloob ed saray pantitiponan mi parad panagdayew. Imbaga mi met ed sikara no akin ya importante so panag-uras na lima tan no anto ni ray praktikal ya makatulong pian naiwasan ya onkayat iyan makapatey ya sakit.
Diad Sierra Leone, inyanunsio ed radyo ya balibali so nagagawaan na Saray Tasi nen Jehova ta tutulongan da ray kapara dan Tasi tan aliwan Tasi pian ag-onkayat so Ebola virus.
Panag-urasan na lima diad Kingdom Hall nen onkakayat so Ebola virus nen 2014 diad Liberia
a Diad Middle East nensaman, nanengneng ed satan ya balibalin ganggan ya importantid sikara so safety, ta agda labay ya narisgo so kapamilya da tan say arum.
