3 Akin ya Maniirap Iray Maong ya Totoo?
No Akin ya Importantin Naebatan Itan
Nayarin isipen tayo ya aliwan mahustisya no manirap iray maong ya totoo. Anggapo sirin so kana na pansagpot tayon magmaliw ya maong a too ta manirap ti met lanlamang.
Isipen pa
Papanisiaan na arum ya saray totoo et ompatey insan iyanak lamet. Ibabaga ra ya saramay nanggaway maong et iyanak lamet ed mas marakep ya kipapasen ed bilay, balet saramay nanggaway mauges et iyanak lamet ed bilay ya napnoy irap. Base ed satan ya pananisia, anggan say maong ya too et manirap no walay ginawa ton mauges diad “apalabas ya bilay to.” Balet, no tua itan . . .
-
Akin et kaukolan nin manirap so sakey ya iyanak lamet no agto met lanlamang nanonotan so apalabas ya bilay to?
-
Akin et kaukolan tayo nin asikasoen so laman tayo tan paliisan iray aksidente, no mansakit o naaksidente itayo lanlamang lapud saray ginawa tayod akaunan bilay tayo?
MANARAL NI
Bantayan so video ya Akin et Aabuloyan na Dios so Paniirap? diad jw.org/pag.
No Antoy Ibabaga na Biblia
Say paniirap et aliwan dusa na Dios.
Imbes, kaslakan ed satan et basta labat nagagawa—nayarin say sakey et nibana ya walad sakey ya lugar insan walay nagawan mauges.
“Samay maples ya ombatik et agnaynay a manatalo ed lumba, samay mabiskeg et agnaynay a manatalo ed guerra, samay marunong et agnaynay a walaay naakan, samay intelihente et agnaynay a walaay kayamanan, tan saramay makabat et agnaynay ya ontatalona, ta say panaon tan saray ag-iilaloan a nagawa et onsasabid sikaran amin.”—ECLESIASTES 9:11.
Maniirap tayo lapud atawir tayon kasalanan.
Maslak ya uusaren na totoo so salitan “kasalanan” pian tukoyen so mauges ya ginawa na sakey. Balet, uusaren met itan na Biblia pian ideskribe so kipapasen ya atawir na amin ya totoo, maong man ira odino mauges.
“Inyanak ak a walay kalilingoan, tan makasalanan ak la manlapud innginew ak nen inak.”—SALMO 51:5, paimanod leksab.
Makapuy so epekto ed sikatayo na atawir tayon kasalanan.
Lapud satan et aderal so relasyon tayod Amalsa ed sikatayo. Balet, aliwan satan labat, naandi met so pankakasakey na amin ya pinalsa na Dios. Kanian grabe paniirap na saray indibidual tan na amin ya totoo ed mundo.
“Sano labay kon gawaen so duga, say mauges so walad siak.”—ROMA 7:21.
“Amin a pinalsa et saniiban oneey-ey tan nasasakitan anggad natan.”—ROMA 8:22.
Ompan Nagustoan Mo Met
SAY PANAG-BANTAYAN
Nagagawa Iray Mauges a Bengatla ed Maong a Totoo—Akin?
Ibabaga na Biblia so taloran rason na paniirap na totoo.
