5 Naandi ni Kasi Paniirap Tayo?
No Akin ya Importantin Naebatan Itan
No walay makakombinsin prueba ya naandi so paniirap tayo, nayarin umanen na satan so panmoria tayo ed bilay tan anggan say panmoria tayo nipaakar ed Dios.
Isipen pa
Labay na dakel ya totoo ya ekalen so paniirap, balet walay limitasyon na nagawaan da. Imanoen iraya:
Anggano onaaligwas so medisina . . .
-
Dakdakel ni ompapatey lapud sakit ed puso.
-
Kada taon et minilyon so ompapatey lapud kanser.
-
“Wala ni ran siansiay sakit ya agnatambal, balon sakit ya onlelesa, tan dati la ran sakit ya ompapawil,” so insulat nen Dr. David Bloom diad dyurnal ya Frontiers in Immunology.
Anggano onaaligwas so panagbilay ed arum ya bansa . . .
-
Kada taon et minilyon ya ugugaw so ompapatey, lalo la ed saray lugar ya mairap so bilay.
-
Binilyon ya totoo so anggapoy matukoy ya kasilyas da.
-
Nilasus milyon so anggapoy napangalaan day malinis ya danum.
Anggano mas amta la natan iray karapatan na totoo . . .
-
Tuloytuloy ni so human trafficking ed dakel ya lugar, tan wala ray bansa ya agnakakasoan iray manggagawad satan lapud “ag-amta na saray autoridad ya nagagawa itan, odino anggapoy pakasarag da ya kasoan iratan,” so kuan na sakey a report na United Nations.
MANARAL NI
Bantayan so video ya Anto so Panarian na Dios? diad jw.org/pag.
No Antoy Ibabaga na Biblia
Iyaansakit itayo na Dios.
Agto ibabaliwala iray sakit tan ermen ya nalilikna tayo.
“Agto [Dios] binalaw odino binusol so paniirap na samay nalalames; agto inyamot so lupa to ed sikato. Dinengel to sanen kinmerew na tulong.”—SALMO 22:24.
“Ipaawit yod sikato so amin a kapagaan yo, lapud iyaansakit to kayo.”—1 PEDRO 5:7.
Agmantultuloy so paniirap tayo.
Ipropromisa na Biblia ya nasumpal so gagala na Dios parad sikatayo.
“Punasen [na Dios] so amin a lua ed kamataan da, tan anggapo lay patey, anggapo met lay panermen tan panakis tan panotot.”—APOCALIPSIS 21:3, 4.
Ekalen na Dios iray sengegan na paniirap na too.
Gawaen to itan panamegley na Panarian to, ya deneskribe na Biblia bilang sakey a tuan gobierno.
“Say Dios na tawen et mangiletneg na panarian ya agbalot naderal. Tan sayan panarian et agniiter ed anggan siopan totoo. . . . Saya labat so mansiansia ed andi-anggaan.”—DANIEL 2:44.
