NO ANTOY IBABAGA NA ARUM

Iisipen na dakel ya say toon walaan na pananisia et basta labat manisia anggan anggapoy ebidensya. Singa bilang, ibaga na relihyoson too ya, “Manisia ak ed Dios.” No tepetan mo, “Akin ya manisia ka?” nayarin iyebat to, “Aya lay abangonan ko” odino, “Aya so imbangat dad siak.” Kanian singa ompapaway ya walay melag ya pandumaan na walaay pananisia tan mainomay a manisia.

NO ANTOY IBABAGA NA BIBLIA

“Say pananisia et say mabiskeg a panagmatalek a seguradon nagawa imay iilaloan, say malinew ya ebidensya na saray bengatlan tua anggano agnanengneng.” (Hebreo 11:1) Pian makapanmatalek so sakey a too ya seguradon nagawa imay iilaloan to, kaukolan toy mabiskeg ya ebidensya. Diad tua, say salita ed orihinal a lenguahe parad “mabiskeg a panagmatalek a seguradon nagawa” et aliwa labat ya nalilikna odino iisipen na sakey. Kanian say pananisia et ontutukoy ed kombiksion base ed ebidensya.

“Saray agnanengneng a kualidad to [Dios], salanti, say andi-anggaan a pakapanyari tan inka-Dios to, et sankanengneng manlapu la nen pinalsa so mundo, lapud naaamtaan iratan ed panamegley na saray pinalsa, kanian anggapoy nibaraan da.”—Roma 1:20.

NO ANTOY IBABAGA NA BIBLIA

“No anggapoy pananisia et imposiblin napaliket so Dios, ta siopaman ya onaasingger ed Dios et nepeg a manisia a sikatoy wala tan tumangan to iramay masimoon a manaanap ed sikato.”—Hebreo 11:6.

Singa abitla la, dakel ya totoo so manisia ed Dios lapu labat ta satan so imbangat ed sikara. Nayarin ibaga da: ‘Aya lay abangonan ko.’ Balet labay na Dios ya saray mandadayew ed sikato et talagan kombinsido ya sikatoy wala tan inaro to ra. Satan so sakey a rason no akin ya idadanet na Biblia ya panseetan tayon sikatoy anapen pian talagan nakabat tayo.

“Onapit kayo ed Dios, tan sikatoy onapit ed sikayo.”—Santiago 4:8.

NO ANTOY IBABAGA NA BIBLIA

“Nawalaan labat na pananisia so sakey kayari ton narengel so salita,” so ibabaga na Biblia. (Roma 10:17) Kanian say unonan gawaen pian nawalaan na pananisia ed Dios et say ‘idengel’ ed no anton talaga so ibabangat na Biblia nipaakar ed sikato. (2 Timoteo 3:16) Say panaral na Biblia so ontulong ed sikan naamtaan iray ebat ed sarayan importantin tepet: Siopa so Dios? Antoy ebidensya ya walay Dios? Talaga kasin walay malasakit na Dios ed siak? Panon ya magmaliw ya maliket so pamilyak? Anto so gagala na Dios ed arapen?

Maliket iray Tasi nen Jehova ya ontulong ed sikan manaral na Biblia. Singa imbaga ed website mi ya jw.org, “Labalabay na saray Tasi nen Jehova ya ibangat iray totoo nipaakar ed Biblia, balet ta agmi ra pipiliten a magmaliw ya membro na relihyon mi. Imbes, marespeto min ipapasabi iray bangat na Biblia, ta amta min kada sakey et walay kanepegan ton manpili no antoy panisiaan to.”

Kanian, say pananisiam et kaukolan ya base ed ebidensya ya naoobserbaan mo legan mon aaralen no kasin tua iray nababasam ed Biblia. Diad ontan, naalig mo so alimbawa na saray inmunan siglon estudyante na Biblia ya “akaparaan a maong so nonot dan angawat ed salita, a maalwar dan uusisaen so Kasulatan ya inagew-agew pian naseguro da no kasin tua iray nadngel da.”—Gawa 17:11.

“Saya so mankabaliksay bilay ya andi-anggaan, a kabaten da ka, say saksakey a tuan Dios, tan samay imbakim, si Jesu-Kristo.”—Juan 17:3.