No Antoy Ag-amta na Saray Scientist

I-PLAY

Halos apan-aralan la na saray scientist so kada aspekto na uniberso pero dakdakel nin siansia iray importantin tepet ya agda naebatan.

Kasin amta na saray scientist no panon ya ginmapo so bilay tan uniberso? Say simplin ebat et andi. Ibabaga na arum ya say nayari labat ya mangipaamta ed nanlapuan na satan et saray scientist ya panaaralan day uniberso. Balet oniay ebat nen Marcelo Gleiser, agnostic ya professor na astronomy ed Dartmouth College: “Agmin balot nibaga no panon ya ginmapo so uniberso.”

Ontan met, oniay imbaga na sakey ya artikulo ed magasin ya Science News tungkol ed inggapo na bilay: “Singa imposible ya naamtaan no panon ya ginmapo so bilay diad Dalin: Dakel ed saray bato tan fossil nen inmuunan panaon diad dalin et anggapo la.” Ipapanengneng na saraman ya imbaga da ya agni naebatan na science so tepet ya, Panon ya ginmapo so bilay tan uniberso?

Pero ompan naisip mo, ‘No denisinyo so bilay diad dalin, siopay nandesinyo?’ Nayarin naisip mo met irayan tepet: ‘No talagan walay marunong tan maaron Amalsa, akin et papayagan ton manirap iray totoo? Akin et dakdakel so relihyon? Akin et papayagan ton manggawa na mauges iray mandadayew ed sikato?’

Aga naebatan na science iratan ya tepet. Pero agto labay ya ibaga ya agmo la naanap iray makaligliwan ebat. Diad tua, dakel ya totoo so akaanap na makapaliket ya ebat diad Biblia.

No labay mon naamtaan no akin ya imbaga na arum ya scientist ya manisia iran walay Amalsa kayari dan inaral so Biblia, onlad jw.org/pag tan i-search so “saray papanisiaan ed nanlapuan na bilay.”

Akombinsi ira na Science tan Biblia

Georgiy N. Koidan, chemist

“Say mabetbet ya gagawaen kod trabahok et panlalaokan ko ray nanduruman kemikal pian makabuo ak na molecules. Singa itan panggagalaw na chess: kailangan mon iplano iray mantutumbokan ya gawaen mo. No walay alingwanan ya anggan sakey labat ya step, nayarin nabuyak so molecule. Anggano komplikado so trabahok, simple labat itan no ikompara ed nilibon chemical reaction ya nagagawad mabilay ya selula pian makabuo na complex chemical molecules. Atan so rason no akin ya manisia ak ya wala so Sankarunongan ya Chemist—say Amalsa.

“Nen inaral koy Biblia, a-realize ko ya aliwa itan ya ordinaryon libro. Insulat so Biblia manga 2,000 taon lay apalabas, pero saray bilin to et mausa-usar anggad natan. Talagan baleg so nitulong na bilin to pian naayos iray problemad pamilya, trabaho, tan diad kakaabay. Kanian naisip ko ya say makapangiter labat na ontan iran napantiwalaan ya bilin et mas marunong nen saray totoo.”

Yan-Der Hsuuw, embryologist

“Legan ya nade-develop so sakey ya embryo, dapat ya mantutulongan so amin ya selula pian say sakey ya selula et magmaliw ya nerve, muscle, pukel, dala, tan arum ya tissues pian nabuo so sakey ya too. Agmi nin siansia eksakton natalosan no panon ya sarayan selula et onggagawan embryo. Parad siak, talagan walay marundunong ya nandesinyo ed bilay.

“Say impandeskribe na Salmo 139:15, 16 tungkol ed ibabaleg na embryo diad eges na ina, et mipara ed adiskobre na saray scientist diad apalabas iran dekada. No aliwan say Amalsa so angipaamtad samay nansulat, panon ya nirekord itan ya eksakton deskripsion dakel ya taon lay apalabas?”