MANUNAN ARTIKULO | AKIN YA MAGMALIW A MATUA?
Kasin Anggapo La Natan so Totoon Matua?
Si Hitoshi et mantratrabaho ed accounting office na sakey ya agency ed Japan. Nen rerebyuen dan dua na boss to so pinansyal a rekord na kompanya, imbaga na boss to ya doktoran toy report to. Balet impaliwawa to ya agnaakoy konsiensia toy mansaol ed trabaho. Lapud satan, sikatoy tinaktakot na boss to ya ekalen tod trabaho, tan nakal ya tua.
Diad tinmumbok iran bulan, naeekalan lay ilalo si Hitoshi ya makalmo ni trabaho. Aminsan nen sikatoy iinterbyuen, imbaga ton agto nayariay mansaol diad trabaho. Oniay imbaga na mani-interbyu: “Sika labat so ontay kanonotan!” Pinakasil na kapamilya tan kakaaro nen Hitoshi so liknaan to ya mansiansian matua, balet ta manduaruwa. Imbaga to, “Talaga kasin makatulong so pagmaliw ya matua lapud pananisiak?”
Makapaermen ta ipapaimano na sayan eksperiensya nen Hitoshi ya dagdaiset so mamapabli ed totoon matua. Diad tua et iisipen na arum ya no matua ka, agka laingen onasenso, lalo lad negosyo. “Apaliberan ak na totoon aliwan matua,” so kuan na sakey a biin mantratrabaho ed South Africa, “tan no maminsan et mair-irap so magmaliw a duma.”
Say sakey ya alimbawa na ag-inkamatua ya dakel so manggagawa et say panagtila. Nen imbebeneg ya taon, diad impanaral nen Robert S. Feldman, sakey ya psychologist ed University of Massachusetts Amherst, naamtaan to ya 60 porsiento na saray adulto et mantitila na maminsan ed kada samploran minuto no mitotongtong ira. “Talagan makapabigla itan,” kuan nen Feldman. “Agmi naisip ya kabiangan lad inagew-agew a kabibilay na totoo so mantila.” Agta makapakelaw ya dakdakel so totoon agda labay so natilaan balet dakdakel so mantitila?
Akin et amayamay natan so mantitila, mantatakew, tan arum nin kagagawa ya aliwan matua? Panon ya naapektoan na ag-inkamatua iray totoo? Tan say mas importante, panon tayon naiwasan irayan kagagawa?
