“O Dumerengel na pikakasi, onasingger ed sika so amin a klase na totoo.”​—Salmo 65:2.

Ibabaga na arum ya manpipikasi ira lapud ombabalibali liknaan da, anggano ag-ira manisia ya walay ondedengel ed sikara. Balet manpipikasi tayo aliwan pian oninawa labat so liknaan tayo tan pian naresolbe iray problema tayo. Ipapaseguro ed sikatayo na Biblia ya “si Jehova * et asingger ed amin ya ontatawag ed sikato, amin ya ontatawag ed sikato diad katuaan. . . . Dedengelen to so ikekerew day tulong.”​—Salmo 145:18, 19.

Kanian segurado tayo ya dedengelen nen Jehova a Dios iray pikakasi na saray mandadayew ed sikato. Oniay maar-aron imbaga to: “Ontawag tan onasingger tan manpikasi kayod siak, tan dengelen ta kayo.”​—Jeremias 29:12.

“Manseet kayod pikakasi.”​—Roma 12:12.

Papasesegen itayo na Biblia ya ‘agtayo ontutundan manpikasi’ tan ‘mantultuloy tayon manpikasi ed amin a pankanawnawa.’ Malinew sirin ya labay nen Jehova a Dios ya manpikasi tayo ed sikato.​—Mateo 26:41; Efeso 6:18.

Akin et labay na Dios ya manpikasi tayod sikato? Isipen pa: Agta maliket so ateng no say anak to et manpatulong ed sikato? Nayarin amta met la na ateng so pankaukolan tan nalilikna na anak to, balet no narengel to ray salitan “Tay, nayarin tulongan yo ak?” agta ipapanengneng na satan ya sikatoy pantitiwalaan na anak to tan maapit so liknaan tod sikato? Mipadpara, no manpikasi tayo ed si Jehova a Dios, ipapanengneng tayo ya walay tiwala tayo ed sikato tan labay tayo ya onapit tayod sikato.​—Proverbio 15:8; Santiago 4:8.

“Ipaawit yod sikato so amin a kapagaan yo, lapud iyaansakit to kayo.”​—1 Pedro 5:7.

Labay na Dios ya manpikasi tayod sikato lapud inar-aro tan iyaansakit to tayo. Amta to no anto ray pakakaaburidoan tayo, tan labay to tayon tulongan.

Diad interon bilay nen Arin David, sikatoy nampikasi ed si Jehova a Dios pian onkerew na tulong tan imbaga tod Sikato iray nalilikna tan iisipen to. (Salmo 23:1-6) Antoy liknaan na Dios ed si David? Inar-aro na Dios si David tan dinengel to ray dakel ya pikakasi to. (Gawa 13:22) Dedengelen met na Dios iray pikakasi tayo lapud inar-aro to tayo.

Imbaga iratan na sakey ed saray nansulat na salmo ed Biblia. Sikatoy kombinsido ya dedengelen na Dios iray pikakasi to, tan baleg so epekto na satan ed sikato. Mas inmapit ed Dios tan akatulong itan pian nasarag to ray problema tan pakakaaburidoan to.​—Salmo 116:1-9.

No kombinsido tayo ya dedengelen na Dios so pikakasi tayo, mas labalabay tayoy mitongtong ed sikato. Ontan so eksperiensya nen Pedro, ya manaayam ed northern Spain. Inatey so 19 años ya anak to lapud aksidente. Imbalikas tod Dios so amin ya nalilikna to tan aminpigan impikasi to ya sikatoy ligliwaen tan tulongan na Dios. Antoy agawa? “Inebatan nen Jehova iray pikakasik. Sikami nen asawak et tinulongan na saray kapara min Kristiano,” so kuan nen Pedro.

Agnipawil so bilay na anak to lapud pikakasi, balet akatulong itan ed si Pedro tan ed pamilya to diad nanduruman paraan. Oniay natandaan nen María Carmen ya asawa to: “Akatulong ed siak so pampikasi pian nalabanan koy ermen ko. Seguradon natatalosan ak nen Jehova ta no manpikasi ak ed sikato, ondedeen so liknaan tan nonot ko.”

Naamtaan tayo manlapud Biblia tan ed saray eksperiensya na arum ya dedengelen na Dios iray pikakasi. Balet nanengneng tayo met ya agdedengelen na Dios so amin ya pikakasi. Akin et wala ray dedengelen na Dios a pikakasi balet say arum et andi?