Ompan pakalikna tayo et agtayo natulongan so kaaro tayon mankakaproblema ed isip. Pero diad tua, baleg so nagawaan na panmalasakit ed sikato pian naanosan toy situasyon to. Antoy gawaen tayo ey?

“Aliston ondengel.”—SANTIAGO 1:19.

Say sankaabigan ya nagawaan mod kaarom et say idengel ed sikato. Agmo kailangan so mansalita lan mansalita. Dengel moy ibabaga to tan ipaliknam ya walay malasakit mo. Talosan mo, agka manko-konklusyon, tan agmo huhusgaan. Ompan wala ray nibaga to ya agto la ninonot tan pagbabawian to lanlamang.—Job 6:2, 3.

‘Ligliwam.’—1 TESALONICA 5:14.

Ompan aburido so kaarom, odino say pakalikna to et anggapoy kana to. Kanian anggano agmo amta no antoy ibagam, ipasegurom ed sikato ya inar-arom. Diad ontan et naligliwa tan onkasil so liknaan to.

“Say tuan kaaro et mangaaro ed amin a panaon.”—PROVERBIO 17:17.

Mangiter na praktikal ya tulong. Imbes ya isipen mon antam lay kailangan to, mas maong no tepetan mo. No naiirapan so kaarom ya ibaga no anto  ray kailangan to, man-suggest ka na praktikal iran nagawaan yon dua, singa say panakar, pan-shopping, panlinis, odino arum ni.—Galacia 6:2.

‘Anosan mo.’—1 TESALONICA 5:14.

Ompan no maminsan et aglabay na kaarom so mitongtong. Kanian ibagam ed sikato ya akaparaan kan ondengel no labay to lay mitongtong. Lapud dadalanen to, ompan walay nibaga to odino nagawaan to ya makapasakit ed sika. Ompan bigla ton i-cancel so lakad yo odino ompan misyosyodot. No ontan, pampasensiaan mo tan talosan mo la.—Proverbio 18:24.

“Labay kon ituring to ak ya sakey a kaaron napantiwalaan. Anggano agko nasolusyonan iray problema to, seseguroen ko ya ondedengel ak ed sikato. No maminsan, say kailangan to met labat et amay walay ondengel ed sikato pian nainawaan.”—Farrah, a say kaaro to et walay problema ed karakel o karaiset na kakanen to, walay anxiety, tan depression to.

“Walay sakey ya kaarok ya mao-maong tan masayahin. Iimbitaan to ak ed abung to tan ilulutoan to ak na masasarap ya naakan. Lapud maar-aro tan ginawa ton palagay so loob ko, agak la nababaingan ya ibagad sikatoy naliliknak. Pinakasil toy linawak!”—Ha-eun, walay depression to.

“Importante so pampasensia. No walay ginawa nen asawak ya makapasyodot, ibabagak ed sarilik ya agto man gagagalaen, aliwan onman si asawak, lapu labat iman ed sakit to. Makakatulong itan pian agak manpasnok tan palampasen ko la.”—Jacob, walay depression nen asawa to.

“Baleg ya tulong tan ligliwa si asawak. No onataki graben anxiety’k, agto ak pipiliten ya gawaen so agko labay. No maminsan ni ingen anggan saramay labalabay to ya gawaen, itutunda to parad siak. Talagan agnatawalan so panagsakripisyo tan panagpalugar nen asawak.”—Enrico, walay anxiety to.