ISIP mo pan manbabantay kay video nipaakar ed bilay na paboritom ya musician. Diad gapo et nanengneng moy impanugaw to, insan nanaral ya mantogtog, tan tuloytuloy so pamprapraktis to. Insan la mantotogtog ed saray concert, anggad oonla lad nanduruman bansa, tan sinmikat ed interon mundo. Balet nagugunoyan, say eksena la na video et sanen inmakulaw la, tan diad sampot na video, sikatoy inatey.

Satan ya video et tuan istorya na bilay na toon inatey la. Balet, anggano say video et bilay na sakey ya musician, scientist, atleta, odino sikat ya too, kaslakan ya pareparehoy batik na istorya. Nayarin dakdakel so agawaan to nen mabilay ni, balet kasin naisip mo ya mas dakel komon so agawaan to no agtinmakken tan ag-inatey?

Makapaermen ya isipen, pero talagan ontan so pansumpalan tayon amin. (Eclesiastes 9:5) Anggano antoy gawaen tayo, agtayo natakasan so itatatken tan ipapatey. Aliwan satan labat, ompan napatikeyan so bilay tayo no naaksidente itayo odino nawalaan tayoy graben sakit. Ibabaga na Biblia ya singa itayo kelpa a “wala natan balet nagugunoyan et naandi la.”​—Santiago 4:14.

Parad arum, anggapoy kaseguroan na bilay kanian say kabibilay da et “mangan tan oninum tayo, ta nabuas et ompatey tayo.” (1 Corinto 15:32) Balet ontan so gagawaen da lapud iisipen da ya nayarin ompatey ira ed anggan anton oras tan anggapoy ilalo da. Tan no wala ray dadalanen tayon mairap ya situasyon, ompan nitepet tayo, ‘Talaga kasin onia labat so bilay?’ Panon tayon naamtaan so ebat?

Dakel so manaanap na ebat panamegley na science. Wala ray paraan ya adiskobre na saray scientist tan doktor pian naparukey so bilay. Tan wala ray scientist ya siansia nin aaralen da no panon ya mas naparukey so bilay. Pero anggan antoy resulta na pansasagpot da, say tepet et: Akin et ontatatken tan ompatey tayo? Panon ya naandi so patey? Saratan ya tepet et naebatan ed onsublay iran artikulo, pati say tepet ya: Talaga kasin onia labat so bilay?