Kasin natural labat so ontan ya pilalek? Ay, on! Ibabagad sikatayo na Biblia ya inyan na Dios ed puso tayo so ontan ya pilalek. (Eclesiastes 3:11) Nabasa met ditan ya “say Dios et aro.” (1 Juan 4:8) Kasin iyan na maaron Dios ed puso tayo so pilalek ya manbilay na andi-anggaan anta imposible manayan nagawa?

Malinew ya anggapoy toon labay toy ompatey. Diad tua, ibabaga na Biblia ya “kabusol” so patey. (1 Corinto 15:26) Wala ray ompatey ya ugaw ni, wala ra met iray mataktakken la insan ompatey, balet amin ya too et ompatey. Dakel so natatakot odino agda labay ya pantongtongan so nipaakar ed ipapatey. Kasin onsabi ni panaon ya naandi so patey? Posible kasi itan?

Kasin mankelaw ka no naamtaan mo ya agkaiba ed gagala na Dios ya ompatey so too? Nanengneng ed libro na Biblia ya Genesis so ebidensya ya labay na Dios ya manbilay na andi-anggaan ed dalin iray totoo. Imparaan ya maong na Dios so dalin pian napanayaman na too. Insan to pinalsa so unonan too, si Adan, tan inyan to ed paraiso, sakey a hardin ed Eden. Kayari na satan, “anengneng na Dios so amin a pinalsa to, tan agaylay abig.”​—Genesis 1:26, 31.

 Si Adan et perpekto tan sikatoy ginawa na Dios unong ed indengan To. (Deuteronomio 32:4) Say asawa nen Adan ya si Eva et anggapoy anggan anton depekto to, perpekto so isip tan laman to. Imbaga nen Jehova ed sikara: “Manbunga kayo tan manparakel kayo, pano yoy dalin tan uleyan yo, tan uleyan yo iray sira ed dayat tan saray ontitikyab a pinalsa ed tawen tan amin a mabilay a pinalsa ya onggagalaw diad dalin.”​—Genesis 1:28.

Kaukolan so panaon pian napano di Adan tan Eva so dalin. Mananak si Eva, tan saray ananak to et mananak met ya anggad napano lay dalin a singa labay na Dios a nagawa. (Isaias 45:18) Kasin iganggan itan nen Jehova ed si Adan tan Eva no say karukey na pambilay da et angga labat ed ibaleg na saray ananak tan apo ra, tan agda la nanengneng so pakasumpal na satan?

Isipen met so ganggan ya uleyan iray ayayep. Ingganggan si Adan ya ngaranan to ray ayayep, tan kaukolay andukey a panaon pian nagawaan to itan. (Genesis 2:19) Sakey ni, pian nauleyan to iratan, kaukolan ya obserbaan ton maong so kada sakey ed sikara tan aralen to no panon to ran asikasoen. Mas andukey a panaon so kaukolan pian nagawaan itan.

Kanian napatnagan ed samay ganggan na Dios ya panoen so dalin tan uleyan iray ayayep ya nen ginawa to so inmunan sanasawa, gagala to ya manbilay iray andukey. Tan diad tua et andukey so impanbilay nen Adan.

Nanengneng ed Biblia ya saray totoo nensaman et mas andukey so bilay da nen sikatayo natan. Nabasa ditan ya “say impanbilay nen Adan et asabi toy 930 taon.” Insan binitla to met so anemiran lalaki ya nambilay na masulok ya 900 taon! Sikara di Set, Enos, Kenan, Jared, Matusalem, tan Noe. Amin da et nambilay antis na Delap ed panaon nen Noe, tan antis na Delap et nambilay la na 600 taon si Noe. (Genesis 5:5-27; 7:6; 9:29) Akin et andukey so bilay da?

Lapud amin da et nambilay ed panaon ya saray totoo et asingger ni ed inkaperpekto. Nayarin atan so rason no akin ya andukey so bilay da. Balet antoy koneksion na inkaperpekto ed karukey na bilay? Tan panon ya naandi so patey? Pian naamtaan so ebat, amtaen tayo nin unona no akin ya ontatatken tan ompatey tayo.