SATAN ya abaybayag lan imbaga na marunong ya Arin si Solomon et mangidedeskribe ed labay ya nagawa na totoo. Nayarin lapud antiktikey so bilay tan agnatakasan so patey, nilasus taon la ya sasalien na totoo ya parukeyen so bilay. Diad apalabas iran nilibon taon, dakdakel iray istorya tan alamat nipaakar ed panaanap na totoo na paraan pian naparukey so bilay.

Singa bilang, sakey ed saratan si Gilgamesh ya ari na Sumer. Dakdakel so gawagawan istorya nipaakar ed bilay to. Say sakey et samay nabasa ed Epic of Gilgamesh, ya impeligro toy bilay to ed impanbiahe to pian naaralan to no panon ya natakasan so patey. Balet anggapoy agawaan to.

Nen 4th century B.C.E., sinali na saray manag-eksperimento ed China so mantimpla na iinumen ya papanisiaan dan manparukey na bilay. Akagawa iray iinumen ya walay laok ton daiset ya mercury tan arsenic. Ibabaga ran atan so rason no akin ya inatey so pigaran emperador na China. Dia met ed Europe nensaman, wala ray manag-eksperimento ya sinali dan gawaen ya naakan tan natunaw ed eges so balitok ta papanisiaan dan manparukey itan na bilay lapud ag-itan nalatian odino naderal.

Diad panaon tayo, wala ray biologist tan geneticist ya sasalien dan diskobrien no akin ya ontatatken iray totoo. Singa diad impandiskobre ed “iinumen ya manparukey na bilay,” nanengneng ed pansasagpot da ya anggad natan et talagan labay na totoo so mandiskobre na paraan pian ag-itayo ontatken tan ompatey. Balet antoy resulta na ontan iran impan-research?

Masulok ya 300 teorya so apawala na saray scientist ya manre-research nipaakar ed selula na too pian ipaliwawa no akin ya ontatatken tan ompatey itayo. Diad agano ni ran taon, asarag na saray molecular biologist ya kontrolen iray genes tan protein pian ontantan so itatken na saray pani-eksperimentoan dan ayep tan saray selula na too. Lapud saratan ya adiskobre da, wala ray mayayaman ya mangiiter na pundo parad pan-research no akin ya ompapatey iray totoo. Anto ray ginawa da?

Pamarukey na bilay. Manisia iray arum ya biologist ya say manunan rason na itatatken et akadepende ed saray telomere ya walad nguro na saray chromosome. Proprotektaan na saray telomere iray genetic information legan ya ondarakel iray selula tayo. Balet kada no napapaldua iray selula tayo, ontitikey iray telomere. Agmanbayag et ontunda la ran napaldua tan onggapo lay itatatken.

 Adiskobre nen Elizabeth Blackburn, say 2009 Nobel laureate, tan saray ka-team to so sakey ya enzyme ya sarag ton patantanen so itikey na saray telomere, say rason no akin ya ontatatken iray selula. Balet, diad report da et binidbir da ya agsarag na saray telomere ya aruman so average ya karukey na bilay na too.

Say pan-reprogram ed saray selula so sakey nin paraan pian nakontra so itatatken. No agla makapamparakel iray selula tayo lapud matatken la iratan, posiblin mangipasabi iratan na lingon mensahe ed saray asingger ya immune cell, kanian pansengegan itan na ilarag, sobran panotot, tan mamawala na saray sakit. Diad agano ni, in-reprogram na saray scientist ed France iray selula ya nanlapud mamatatken ya saray arum ed sikara et masulok lan 100 so edad da. Imbaga na research team leader da ya si Professor Jean-Marc Lemaître, a nanengneng ed proyekto da ya nayarin kontraen so itatatken na selula.

Aliwan amin ya scientist et manisia ya ondukey so average ya karukey na bilay lapud saray panagtambal ya pangontra ed itatatken. Tua ya naaruman so dukey na bilay na totoo manlapu la nen 19th century. Balet, say rason na satan et mas mapalinis la ray totoo, maalwar la rad saray makaalis ya sakit, tan wala la ray antibiotic tan bakuna. Kanian iisipen na arum ya geneticist ya onia labat lan talagay karukey na bilay na too.

Manga 3,500 taon lay apalabas, oniay imbaga na sakey a nansulat ed Biblia ya si Moises: “Say karukey na bilay mi et 70 taon, odino 80 taon no say sakey et makmaksil. Balet napno iratan na gonigon tan ermen; maganggano iratan ya onlabas, insan naandi kami la.” (Salmo 90:10) Anggano mansasagpot so too ya parukeyen so bilay to, say karukey na bilay na too et siansia nin ag-onarawi ed samay imbaga nen Moises.

Balet wala ray pinalsa a singa say ambalangan sea urchin odino sakey a klase na malimpek a lukan ya makapambilay na masulok a 200 taon, tan saray kiew a singa say giant sequoia et makapambilay na nilibon taon. No ikompara tayoy karukey na bilay tayo ed saratan ya pinalsa, ompan nitepet tayo, ‘Talaga kasin 70 o 80 taon labat so bilay tayo?’