MANUNAN ARTIKULO | SAY BIBLIA—AKIN ET NIPRESERBA?
Nipreserba Anggano Dakdakel so Onkokontra
NO ANTOY PROBLEMA: Kontra so dakel ya politiko tan lider na relihyon ed mensahe na Biblia. Kaslakan et uusaren day posisyon da pian sebelan iray totoo ya nawalaan, mankopya, odino mangipatalos ed Biblia. Niay duaran alimbawa:
-
Manga 167 B.C.E.: Pinilit nen Arin Antiochus Epiphanes iray Judio ya manpakomberte ed Griegon relihyon, kanian ingganggan ton deralen so amin ya kopya na Hebreon Kasulatan. Saray opisyales to et “pinilat-pilat tan pinoolan da ray nalmo dan lukot ya akasulatan na Ganggan, tan pinapatey da ray manbabasan napapabiskeg odino naliligliwa ed satan,” so insulat na historian ya si Heinrich Graetz.
-
Manga 800 taon lay apalabas: Wala ray lider na Katoliko ya asanokan ed saray membro ra ya mangipupulong ed bangat na Biblia imbes ya saray sisiaen na Katoliko. Tan impasen dan erehe odino traidor so siopaman ya walaan na saray libro na Biblia likud ed saray Salmo ya Latin. Wala ray lalakin ingganggan na saray manguuley ed simbaan ya “seetan tan agda tutundaan ya anapen iray erehe . . . diad amin ya abung tan diad saray kuarton walad dalem na dalin ya iinapen dan wala ray libro na Biblia. . . . Nepeg ya deralen so abung na naerel dan erehe.”
No bilang ta aderal na saray onkokontra so Biblia, agla akasabi ed sikatayo so mensahe na satan.
Say English ya patalos nen William Tyndale et nipreserba anggano insebel itan, anggano wala ray Biblia ya pinopoolan, tan anggano pinatey ni ingen si Tyndale nen 1536
NO PANON YA NIPRESERBA SO BIBLIA: Nampokus si Arin Antiochus ed paneral na Biblia diad Israel, balet ta wala ray Judio ed arum ni ran bansa. Diad tua, base ed saray scholar, kasabi unonan siglo C.E. et masulok ya 60 porsiento na saray Judio so agla manaayam ed Israel. Diad saray sinagoga da et wala ray kopya na Kasulatan—say parehon Kasulatan ya inusar na sinmublay iran henerasyon, pati saray Kristiano.—Gawa 15:21.
Manga 800 taon lay apalabas, apairap iray totoon papablien day Biblia, balet makpel dan intuloy ya impatalos tan kinopya so Kasulatan. Anggano diad kapegleyan na koma 15 siglo et agni naimbento so klase na printing press ya sansakey a niyalis-alis iray letra, wala la ray kabiangan na Biblia ed manga 33 a lenguahe. Manlapu lad saman, agaylay peles ya nipatalos tan niimprinta so Biblia.
SAY RESULTA: Anggano kinontra na makapanyarin arari tan lider na relihyon so Biblia, siansia nin atan so sankarakelan ya imbunog tan impatalos ed interon mundo. Baleg so impluensya na satan ed saray ginawan ganggan diad pigaran bansa tan ed lenguahe ra, ontan met ed bilay na minilyon ya totoo.
Ompan Nagustoan Mo Met
DOKUMENTARYO
Pinabpabli Da so Biblia—Video Clip (William Tyndale)
Napatnagan ed saray ginawa to ya pinabpabli toy Biblia, tan anggad natan et minanabang tayo ni ed satan.
