1, 2. Anton mairap ya situasyon so inarap nen Jefte tan say anak to?

ASUMPAL lay makapaaburidon panaalagar. Nainawaan so marikit nen anengneng toy ama ton onsasabi manlapud guerra, kanian nanapuran inmabet tan malikeliket lapud makapadinayew ya impanalo na ama to. Balet imbes ya mangansion tan onsayaw met, pinilat na ama to so kawes to tan inkuan to: “O, ana’ko! Sinugatan moy pusok.” Insan to imbaga iray salitan anguman ed interon bilay na anak to, ya lapud satan et agla nagawaan na anak to iray labay tan iilaloan ton gawaen ed bilay to. Balet agnanduaruwa so marikit tan balibali inyebat to pian pasesegen so ama to ya tooren so insipan tod si Jehova. Ipapatnag na imbaga to ya mabiskeg so pananisia to. Sikatoy matalek ya anggan antoy ibaga nen Jehova et pankaabigan to itan. (Uko. 11:34-37) Agaylay liket na ama lapud amta to ya abobonan nen Jehova so mabulos ya suporta na anak to ed desisyon to.

² Anggano mairap, nanmatalek ed paraan nen Jehova si Jefte tan say anak to ya walaan na takot ed Dios. Kombinsido ira ya  nabawbawi so pansakripisyo no naawat so panangabobon na Dios.

3. Akin a makatulong ed sikatayo so alimbawa nen Jefte tan say anak to?

³ Amta tayon aliwan naynay ya mainomay so mansiansian matoor ed si Jehova. Diad tua et kaukolan tayoy “milaban ya impasya nisengeg ed pananisia.” (Jud. 3) Pian nagawaan tayo itan, imanoen pa iray subok ya asarag nen Jefte tan say anak to. Panon iran akapansiansian matoor ed si Jehova?

4, 5. (a) Antoy ingganggan nen Jehova ed saray Israelita nen onloob irad Insipan a Dalin? (b) Singa ipapanengneng na Salmo 106, antoy agawa ed saray Israelita lapud impanrebelde da?

⁴ Inagew-agew ya napapanonotan si Jefte tan say anak to ya mauges so pansumpalan na agpanmatoor ed si Jehova. Ngalngali 300 taon lay apalabas, niganggan iray inmuunan atateng da ya upoten so amin ya paganon manaayam ed Insipan a Dalin. (Deu. 7:1-4) Lapud agtinmulok iray Israelita, dakel ed sikara et naimpluensyaan ed mauges ya kagagawa na saray Canaanita, kanian apatitan ira ed saray palson dios tan linmoor ni ta akagawa ray imoralidad.​—Basaen so Salmo 106:34-39.

⁵ Lapud nanrebelde ra, ag-ira inabobonan nen Jehova tan agto la ra prinotektaan. (Uko. 2:1-3, 11-15; Sal. 106:40-43) Seguradon mairap parad saramay pamilya ya walaan na takot ed Dios so mansiansian matoor ed si Jehova legan na saraman a mairap ya taon! Balet, ipapaamta na Biblia ya wala ray matoor, singa si Jefte tan say anak to, pati si Elkana, Hana, tan Samuel ya determinadon makaawat na panangabobon na Dios.​—1 Sam. 1:20-28; 2:26.

6. Anto ray impluensya na mundo natan, tan antoy kaukolan tayon gawaen?

⁶ Manbibilay tayo natan ed mundo ya say panagnonot tan kakikiwas na totoo et singa saramay totoo ed Canaan nensaman—alablabas dan ipapaseseg so sekso, inkaruksa, tan materyalismo. Singa ginawa tod saray Israelita, malinew iray pasakbay ya iiter nen Jehova pian naprotektaan tayod saratan ya impluensya. Makaaral tayo ed lingo na saray Israelita. (1 Cor. 10:6-11) Kaukolan tayon pansagpotan ya ekalen ed bilay tayo so anggan anton pakapatnagan na panagnonot na saray Canaanita. (Roma 12:2) Matoor tayo kasi ed pansasagpot tayon gawaen itan?

7. (a) Antoy ginawa na saray kabaleyan nen Jefte ed sikato? (b) Panon so inkiwas nen Jefte?

⁷ Lapud agnanmatoor iray Israelita ed panaon nen Jefte, inaripen ira na saray Filisteo tan saray Ammonita. (Uko. 10:7, 8) Balet, aliwa labat lan saray kalaban a nasyon so akasubokan nen Jefte noagta ontan met ed mismon agagi to tan saray pangulo na Israel. Lapud imon tan panamusol, sikatoy pinataynan na saray agagi tod ama, tan agda inter so manepeg ya tawir to bilang panguloan. (Uko. 11:1-3) Ag-inabuloyan nen Jefte ya naimpluensyaan so kiwas to lapud inkaruksa na saray agagi to. Imbes ya gagalaen ton ibaliwala so ikekerew na tulong na saray mamatatken ed Israel, tinulongan to ni ra ingen. (Uko. 11:4-11) Antoy akatulong ed si Jefte pian onkiwas bilang maespiritual a too?

8, 9. (a) Anto ran prinsipyo ed Mosaikon Ganggan so nayarin tinmulong ed si Jefte? (b) Antoy mas importante ed si Jefte?

⁸ Aliwa labat ya mabiskeg a sundalo si Jefte noagta inaral to met ya maong iray pidedeneng na Dios ed saray totoo To. Talagan kabisado nen Jefte iray apalabas ya agawa ed Israel kanian atalosan to no antoy duga tan aliwa ed pakanengneng nen Jehova.  (Uko. 11:12-27) Saray makadios ya prinsipyo ya walad Mosaikon Ganggan so angigiya ed panagnonot tan puso nen Jefte. Amta to ya ag-abobonan nen Jehova so panem-em na sakit na linawa, imbes, kekerewen na Dios ya manaaroan iray totoo To. Imbangat met na Ganggan ya agnepeg ya ibaliwala na sakey a too so pankaukolan na arum, anggan saramay mamubusol ed sikato.—Basaen so Exodo 23:5; Levitico 19:17, 18.

⁹ Saray alimbawa na matoor a totoo a singa si Jose ya angipanengneng na panangasi ed saray agagi to anggano binusol da et nayarin angimpluensya met ed inkiwas nen Jefte. (Gen. 37:4; 45:4, 5) Say impandalepdep nen Jefte ed saratan ya alimbawa et nayarin tinmulong ed sikato ya gawaen so makapaliket ed si Jehova. Seguradon asakitan a maong si Jefte ed ginawa na agagi to, balet ag-itan angamper ed panaglingkor tod si Jehova tan ed totoo To. (Uko. 11:9) Say pangidepensa ed ngaran nen Jehova so mas importante ed sikato nen say anggan anton agpantatalosan. Sikatoy determinadon mansiansian matoor ed si Jehova kanian maabig so epekto ed sikato tan ed arum.​—Heb. 11:32, 33.

10. Panon tayon abuloyan iray prinsipyo na Dios ya ontulong ed sikatayon onkiwas bilang Kristiano natan?

¹⁰ Kasin ipapuso tayo so alimbawa nen Jefte? Nayarin asali ti lay adismaya odino aliway impantrato ed sikatayo na arum ya agagi. No ontan, agtayo aabuloyan iratan a situasyon ya mangamper ed iyatendi tayod saray aral odino panlingkor ed si Jehova tan sigpot ya pilimog ed saray agagi. Pian naalig tayoy Jefte, abuloyan tayo met ya say estandarte na Dios so ontulong ed sikatayo pian nasarag iray negatibon situasyon tan mantultuloy ya magmaliw a makapaseseg ed arum.​—Roma 12:20, 21; Col. 3:13.

11, 12. Antoy insamba nen Jefte, tan antoy labay ya ibaga na satan?

¹¹ Amoria nen Jefte ya kaukolan toy tulong na Dios pian nibulos iray Israelita manlapud saray Ammonita. Sikatoy nansamba ed si Jehova ya no panaloen To, iyapay tod si Jehova bilang “apay a popoolan” so unonan ompaway ed abung to kapawil to manlapud guerra. (Uko. 11:30, 31, NW) Antoy labay ya ibaga na satan ya pangiyapay?

¹² Say pangibagat na too et kabusol nen Jehova. Malinew sirin ya ag-inisip nen Jefte so literal a pangibagat na anggan siopan too. (Deu. 18:9, 10) Diad Mosaikon Ganggan, say apay a popoolan et iter ya intero ed si Jehova, kanian mapatnag ya say iisipen nen Jefte et iter so sakey a too pian manlingkor ed si Jehova labat. Ipapatnag na sayan sipan so permanentin panlingkor ed tabernakulo. Inawat nen Jehova so imbaga nen Jefte ya kondisyon tan benendisyonan to na makapadinayew ya impanalo, tan saray kalaban et inatey tan atalo. (Uko. 11:32, 33) Balet siopa so toon iter nen Jefte ed Dios bilang “apay a popoolan”?

13, 14. Antoy ipapatnag na imbaga nen Jefte ya nabasa ed Uko-ukom 11:35 nipaakar ed pananisia to?

¹³ Nonoten imay eksenan adeskribe ed gapo na sayan artikulo. Kapawil nen Jefte manlapud guerra, say inmabet ed sikato et say inad-aro tan alenleneg ya anak to! Nia so subok: Kasin tooren toy imbaga to tan iter toy anak to pian manlingkor ed tabernakulo diad interon bilay to?

¹⁴ Seguradon inggiya lamet na saray prinsipyo na Dios si Jefte pian makapandesisyon na duga. Nayarin anonotan to may ganggan ed saray totoo na Dios diad Exodo 23:19 a nepeg dan mabulos ya iter ed si Jehova so sankaabigan da. Ibabaga met na  Ganggan ya no say sakey a too et mangisipan, nepeg ton sumpalen itan. Kuan na satan: “Bangno say sakey a too mangisipan na sakey a sipan ed kinen Jehova, . . . agto nepeg a deralen so salita to. Nepeg to a gawaen so matukoy ed ompaway ed sangi to.” (Num. 30:2) Singa say matoor a si Hana, a nayarin kapanaonan to, kaukolan ya sumpalen nen Jefte so insipan to ta mangapekta itan ed arapen dan sanama. Anggapo lay arum ya anak to; say marikit to labat so alenleneg ya ilalo to ya panlapuay poli to ya mangituloy ed ngaran tan tawir to ed Israel. (Uko. 11:34) Anggaman ontan, oniay imbaga nen Jefte ya nabasad sampot na Uko-ukom 11:35: “Biniswat ko so sangik ed Jehova, tan agko nayari a babawien.” Lapud katooran to anggano baleg so isakripisyo to, naawat toy panangabobon tan panamendisyon na Dios. Ontan met kasi gawaen mo?

15. Antoy insipan na maslak ed sikatayo, tan panon tayon makapanmatoor?

¹⁵ Nen indedika tayoy bilay tayod si Jehova, insipan tayo ya interon puso tayon gawaen so linawa to. Amta tayo ya kaukolan so pansakripisyo pian natoor tayo itan ya sipan. Balet talagan nasubok so inkamabulos tayo no niganggan itayon manggawa na saray bengatla ya diad gapo et agtayo labay. No mansakripisyo tan manlingkor itayo ed Dios anggano aliwan komportable parad sikatayo, nipanengneng tayon matoor itayo. Naynay a mas baleg ni ray bendisyon a naawat tayo nen saray sakripisyon gawaen tayo, anggano mairap iratan. (Mal. 3:10) Kumusta balet imay anak nen Jefte?

16. Antoy reaksion na marikit nen Jefte ed insipan nen ama to? (Nengnengen so litratod gapo na artikulo.)

¹⁶ Nayarin aliwan mainomay parad anak nen Jefte ya awaten so epekto ed sikato na impansamba na ama to. Duma iya ed samay insamba nen Hana ya iter toy anak ton si Samuel ya manlingkor ed tabernakulo bilang Nazareo. (1 Sam. 1:11) Say sakey a Nazareo et sarag toy mangasawa tan manpamilya. Balet say anak nen Jefte et magmaliw ya interon  “apay a popoolan,” kanian kaukolan ton isakripisyo iratan ya liket. (Uko. 11:37-40) Bilang marikit na sakey ya mananalon komandante tan pangulo ed Israel, nayari komon ya makapiasawa ed sankaabigan ya laki ed bansa ra. Balet natan et sikatoy magmaliw lan mapaabeban lingkor ed tabernakulo. Antoy reaksion na marikit? Impanengneng to ya inyuna toy panaglingkor ed si Jehova diad imbaga to: “Amak, biniswat mo so sangim ed Jehova, gawaen mo ed siak so unong na nibesngaw na sangim.” (Uko. 11:36) Insakripisyo toy normal ya pilalek ton nawalaay asawa tan ananak pian niyuna so dugan panagdayew. Panon tayon naalig so masakripisyon ugali to?

17. (a) Panon tayon naalig so pananisia nen Jefte tan say marikit to? (b) Panon kan apaseseg na Hebreos 6:10-12 pian mansakripisyo?

¹⁷ Nilibon kabataan ya Kristiano so mabulbulos ya nansakripisyo ya agni mangasawa o miasawa, odino wala ray sanasawa ya nandesisyon ya agni mananak pian sigpot ya makapanlingkor ed si Jehova. Nayarin isasakripisyo met na saray maedad la so panaon ya nakaiba da komon iray ananak tan apo ra pian makapibiang ed saray teokratikon proyekto na panagpaalagey odino panaral ed School for Kingdom Evangelizers tan manlingkor ed lugar ya mas baleg so pankaukolan parad saray manangipalapag na Panarian. Say arum et isasakripisyo da ray personal iran bengatla pian makapibiang ed saray kampanya legan na panaoy Memoryal. Saratan ya interon puson panaglingkor et mamapaliket a maong ed si Jehova, ya agto lingwanan so gawa tan say aro ya impanengneng da parad sikato. (Basaen so Hebreos 6:10-12.) Kasin sarag mo nin aruman so sakripisyom pian sigpot kan makapanlingkor ed si Jehova?

18, 19. Antoy naaralan tayo ed salaysay na Biblia nipaakar ed si Jefte tan say anak to, tan panon tayo ran naalig?

¹⁸ Anggano napnoy subok so bilay nen Jefte, sikatoy nampaigiya ed panagnonot nen Jehova no mandedesisyon. Impulisay to ray impluensya na mundo. Anggano asakitan tan adismaya lapud ginawa na arum, agkinmapuy so determinasyon ton mansiansian matoor. Abendisyonan iran sanama ed mabulos ya impansakripisyo da, ta inusar ira nen Jehova pian suportaan so dugan panagdayew. Nen ag-inunor na arum iray estandarte na Dios, siansia nin inunor itan nen Jefte tan say anak to.

¹⁹ Papasesegen itayo na Biblia ya ‘aligen iramay anawir na saray sipan lapud pananisia tan inkaanos da.’ (Heb. 6:12) Komon ta magmaliw tayon singa si Jefte tan say anak to ya manbilay itayo unong ed importantin katuaan ya napatnagan ed impanbilay da: Aabobonan na Dios iramay manmamatoor.