1-3. (a) Panon ya impanengneng na saray Kristiano ya labalabay day mantitipon? (Nengnengen so litratod gapo na artikulo.) (b) Antoy pantongtongan tayo ed sayan artikulo?

NEN 17 años ni labat nen Corinna, naaresto so ina to tan inawit dad panamairapan a kampo na Soviet. Insan si Corinna et inawit dad Siberia pian magmaliw ya aripen. Pigay libon kilometro so kaarawi na satan ed abung to. Ginawa dan aripen kanian no maminsan et pasooten dan mantrabaho ed paway ya agaylay betel tan aliwan magenap so kawes ya akasulong ed sikato. Anggan mair-irap iratan ya situasyon, determinado si Corinna tan sakey nin sister ya onatendi ed pantitipon na kongregasyon.

² Impaliwawa to: “Inmalis kami na labi ed pantratrabahoan mi, tan nanakar kami paonlad istasyon na tren ya 25 kilometro so kaarawi to. Inmalis so tren na alas dos na palbangon, tan anem oras kamin nambiahe, insan kaepas mi, nanakar kami na 10 kilometro paonlad lugar ya pantitiponan.” Kasin abawi day impanbiahe da? Oniay imbaga nen Corinna: “Diad pantitipon, inaral mi so Say Panag-bantayan tan angansion kami na saray Kingdom song. Talagan makapaseseg tan makapabiskeg na pananisia iman ya eksperiensya mi.” Anggano taloy agew ni antis iran akapawil ed trabaho ra, agnaimano na amo ra ya inmalis si Corinna tan say kaiba to.

 ³ Talagan papablien na saray totoo nen Jehova iray pankanawnawan mantitipon. Kayarin aporma so Kristianon kongregasyon, saray patumbok nen Jesus et “nanseetan [day] . . . nanlilimog.” (Gawa 2:42, NW) Nayarin ontan met so pilalek mon makaatendi ya regular ed saray pantitipon. Balet, amin ya Kristiano et wala ray aarapen dan problema. Nayarin mairap so onatendi ed aral lapud trabaho, dakel a kimey, odino naksawan ti la ed saray inagew-agew ya gagawaen tayo. Antoy mamakiwas ed sikatayo ya saragen irayan problema tan napansiansia tayoy marakep ya eskedyul tayod pipiaral? ^[1] Panon tayon natulongan iray iyaaralan tayoy Biblia tan arum ni pian natalosan da ya importante so pipiaral? Diad sayan artikulo, pantongtongan tayo so waloran rason no akin ya kaukolan tayoy mantitipon a mandayew. Sarag tayon pankatloen iratan a rason: no antoy epekto ed sika, no antoy epekto ed arum, tan no antoy epekto ed si Jehova no miaral ka. ^[2]

4. Panon itayon natulongan na saray pantitipon pian naaralan tayoy nipaakar ed si Jehova?

⁴ Nababangatan itayo ed saray aral. Natulongan itayo na kada aral pian naaralan so nipaakar ed Dios tayo, si Jehova. Singa bilang, diad loob na ngalngali duay taon, maslak ed saray kongregasyon et inaral day libron Onapit ed si Jehova diad Panagaral na Kongregasyon ed Biblia. Lapud satan ya impanaral ed saray kualidad na Dios, kaiba la ray impapuson komento na saray agagi, agta apabiskeg so panangarom ed Ama tayo ed tawen? Naaaruman met so amta tayo ed Salita na Dios no ondedengel tayon maong ed saray paliwawa, demonstrasyon, tan panagbasa na Biblia. (Neh. 8:8) Singa bilang, isipen pa ray espiritual ya kayamanan ya nadidiskobrem kada simba legan mon ipaparaan tan dedengelen iray pabitar ed panagbasa na Biblia!

5. Panon kan atulongan na saray aral pian iyaplikam iray naaralan mod Biblia tan napaaligwas moy panagpulong mo?

⁵ Nababangatan itayo ed saray aral ya iyaplika iray prinsipyo na Biblia ed interon bilay tayo. (1 Tes. 4:9, 10) Singa bilang, say Panagaral na Panag-bantayan et denesinyo parad pankaukolan na saray totoo na Dios. Kasin apakiwas ka na Panagaral na Panag-bantayan pian usisaen lamet iray kalat mo, perdonaen so sakey ya agi, odino paaligwasen so kualidad na pikakasim? Nababangatan itayo diad aral ed midweek pian magmaliw ya epektibo ed ministeryo. Naaaralan tayo no panon ya epektibon ipulong so maong a balita tan ibangat iray prinsipyo a walad Biblia.—Mat. 28:19, 20.

6. Panon itayon napapaseseg na saray aral pian mansiansia itayon mabiskeg?

⁶ Napapaseseg itayo ed saray aral. Papakapuyen na sayan sistema na mundo so nonot, liknaan, tan espiritualidad tayo. Balet diad saray aral et napapaseseg tan napapabiskeg itayo. (Basaen so Gawa 15:30-32.) Rerepasoen tayo ray kasumpalan na propesiya ed Biblia diad saray aral tayo. Kanian, napapabiskeg so pananisia tayo ya nasumpal met iray insipan nen Jehova ya nagawad arapen. Siempre, aliwa labat ya saramay mansasalita ed arap so mamapaseseg ed sikatayo. Napapabiskeg itayo met ed saray agagi ya mankokomento tan impapuson mangakansion. (1 Cor. 14:26) Tan no mitotongtong tayod saray agagi antis tan kayari aral, nalikna tayon kabiangan itayo na organisasyon tan talagan naiinawaan itayo.—1 Cor. 16:17, 18.

7. Akin et importante ya miaral itayo?

⁷ Iwawanwan itayo na masanton espiritu no wala tayod aral. Imbaga nen Jesu-Kristo: “Samay walaan na layag et ondengel komon ed ibabaga na espiritu ed saray kongregasyon.” (Apo. 2:7) On, idadaulo nen Jesus so Kristianon kongregasyon panamegley na masanton espiritu. Kaukolan tayoy masanton espiritu  pian nalabanan so tukso, makapanpakpel tan makapanparaan parad ministeryo, tan makapanggaway duga iran desisyon. Agta maabig no anamoten tayo so amin ya probisyon, kaiba la ray aral ed kongregasyon, pian naawat itan ya espiritu?

8. Panon ya natulongan iray agagi no nanengneng da itayo ed aral tan narengel da tayon mankomento tan mangansion? (Nengnengen met so kahon ya “Naynay ya Balibali so Liknaan To Kayari Aral.”)

⁸ Diad saray aral et pankanawnawa tayon ipanengneng ed saray agagi tayo ya inaro tayo ra. Isipen pan maong iray subok ya kaukolan a sungdoan na arum ya agagi ed kongregasyon yo. Agla pankelawan ya insulat nen apostol Pablo: “Nonoten tayo so sakey tan sakey”! Insan impaliwawa nen Pablo ya nipanengneng tayon nononoten odino iyaansakit tayo ra no “agtayo papaulyanan so pantitipon tayo.” (Heb. 10:24, 25) No miaral ka, ipapanengneng mo ya makanepegan iray kaagian mo ed panaon, atension, tan panangiyansakit mo. Sakey ni, napaseseg iray agagi ed saray impapuson komentom tan panangansion mo.—Col. 3:16.

9, 10. (a) Ipaliwawa no panon ya makatulong so imbaga nen Jesus ed Juan 10:16 pian natalosan tayo no akin ya importante so pilimog ed saray agagi tayo. (b) No regular itayon miaral, panon tayon natulongan so sakey ya agi ya impulisay na pamilya to?

⁹ Diad saray aral et makapikasakey itayo ed saray agagi tayo. (Basaen so Juan 10:16.) Inkompara nen Jesus so sarili to ed sakey a pastol, tan saray papatumbok to ed sakey a pulok na karnero. Isipen pa: No walad pukdol so duaran karnero, walad lawak so duara ni, tan say sakey et mankakabkab ed sananey a pasen, kasin nibaga ya saratan a limaran karnero et walad sakey a pulok? Kaslakan, say sakey a pulok na karnero et mankakaiba ya aasikasoen na pastol da. Ontan met, agtayo natumbok so Pastol tayo no gagalaen tayon ibiig so sarili tayo. Kaukolan tayoy milimog ed arum ya Kristiano pian magmaliw ya kabiangan na “sakey a pulok” a walay “sakey a managpastol.”

¹⁰ No miaral tayo, makatulong tayo ed pankakasakey tayo ran sanaagi. (Sal. 133:1) Wala ray kaagian tayo ya impulisay na saray ateng tan agagi ra. Balet insipan nen Jesus ya ikdan to ray espiritual a pamilya ya mangaro tan mangasikaso ed sikara. (Mar. 10:29, 30) No regular kan miaral, sarag moy magmaliw ya ama, ina, odino agi na saratan ya inad-aro! Agta napakiwas kan gawaen so anggaay nayarian mo pian makaatendi ed amin ya pantitipon?

11. Panon a makatulong so piaral pian niiter tayod si Jehova so manepeg ed sikato?

¹¹ No miaral itayo, niiter tayod si Jehova so manepeg ed sikato. Bilang Manamalsa tayo,  makanepegan si Jehova na dayew, gloria, pisasalamat, tan galang. (Basaen so Apocalipsis 7:12.) Diad saray aral, no manpipikasi, mangakansion, tan mansasalita tayo nipaakar ed si Jehova, iiter tayo so manepeg labat ya iter ed sikato—say panagdayew tayo. Papablien tayo so pribilehyon igalang so Dios ya dakdakel lay ginawa to parad sikatayo.

12. Antoy nalikna nen Jehova no unoren tayo so ganggan to ya miaral?

¹² Makanepegan met si Jehova ed katutulok tayo. Ingganggan to ya agtayo papaulyanan so pantitipon tayo lalo la ed sayan panaon na anggaan. No mabulos tayon uunoren itan a ganggan, naliketan si Jehova. (1 Juan 3:22) Iimanoen tan papablien to iray pansasagpot tayo ya atendian so amin ya aral.—Heb. 6:10.

13, 14. Panon tayon onaapit ed si Jehova tan si Jesus diad saray aral?

¹³ No miaral itayo, ipapanengneng tayon labay tayoy onapit ed si Jehova tan ed Anak to. Diad saray aral et igigiya itayo na Makapadinayew a Managbangat tayo panamegley na Salita to, say Biblia. (Isa. 30:20, 21) Anggan saray agmananisia ya onaatendi et nayarin ibaga ran: “Say Dios so peteg a walad limog yo.” (1 Cor. 14:23-25) Bebendisyonan nen Jehova na masanton espiritu to iray aral tan igigiya to so programan panagbangat ya base ed Biblia. Kanian diad saray aral tayo sirin et boses nen Jehova so dedengelen tayo tan nalilikna tayoy maaron panangasikaso to. Lapud satan et onapit itayo ed sikato.

¹⁴ Imbaga nen Jesus: “No iner so kawalaan na duara odino talora a nantitipon dia ed ngaran ko, wala ak ed pegley da.” (Mat. 18:20) Satan ya imbaga nen Jesus et onaplika met ed saray aral tayo. Bilang ulo na kongregasyon, say Kristo et “manaakar ed pegley” na saray kongregasyon na totoo na Dios. (Apo. 1:20–2:1) Isipen pa! Si Jehova tan si Jesus so mismon mamapabiskeg ed sikatayo diad saray aral. Anto kasi nalikna nen Jehova no nanenengneng ton labalabay tayoy onapit ed sikato tan ed Anak to?

15. Panon ya say pipiaral tayo et mangipanengneng ya labay tayon unoren so Dios?

¹⁵ No miaral itayo, ipapanengneng tayon susuportaan tayoy soberanya na Dios. Anggano igaganggan itayo nen Jehova ya miaral, agto itayo pipiliten. (Isa. 43:23) Kanian akadepende ed sikatayo no panon tayon ipanengneng ed si Jehova so kaaralem na impapuson panangaro tayod sikato tan kabiskeg na determinasyon tayon suportaan so uley to. (Roma 6:17) Alimbawa, nayarin dedesdesen itayo na amo tayo ya mantrabaho kanian agtayo makapiaral ya regular. Nayarin susumpaen itayo na gobierno tan tataktakoten da tayon manmulta, nipriso, odino mas grabe ni no mantitipon tayo pian mandayew. Odino ompan natutukso itayon unaen so panagligliwaan imbes ya miaral. Diad saratan a situasyon, kaukolan tayoy manpili: Siopa so panlingkoran tayo? (Gawa 5:29) No pilien tayon suportaan so soberanya nen Jehova, napaliket tayoy puso to.—Uli. 27:11.

16, 17. (a) Akin et nibaga tayo ya importantin maong ed saray Kristiano nen inmunan siglo so pantitipon? (b) Antoy liknaan nen Brother George Gangas nipaakar ed saray Kristianon pantitipon?

¹⁶ Saray Kristiano nensaman et agbasta nanlilimog ya agano kayari na makapakelaw ya milagro nen Pentecostes 33 C.E. “Nanseetan dan inaral so ibabangat na saray apostol, nanlilimog ira.” (Gawa 2:42, NW) Say Griegon salita a nipatalos ya “nanseetan” et tutukoyen toy pansungdo odino panseet ed sakey a kimey, tan pansagpotan itan a maong. Lapud pananguley na Roma tan isusumpa na saray lider na Judion relihyon,  aliwan mainomay parad saray Kristiano so onatendi ed saray pantitipon. Balet, nanseet ira.

¹⁷ Dakel ya lingkor nen Jehova natan so mangipapanengneng na aralem ya apresasyon ed saray Kristianon pantitipon. Oniay imbaga nen George Gangas a nanlingkor bilang membro na Mananguley ya Ulop ed masulok ya 22 a taon: “Parad siak, say pilimog ed agagi so sakey ed saray sankaliketan a nagawa ed bilay tan lapuan itan na panamaseseg. Labalabay ko ya sakey ak ed saray makaunan onsabi ed Kingdom Hall tan sampot ya onalis, no posible. Malikeliket ak ya maong no katongtong ko ray totoo na Dios. No kaibak ira, singa kaibak iray pamilyak diad espiritual a paraiso.” Inyarum to ni: “Singa say kompas ya akaturon naynay ed norte, ontan met so kanonotan tan pilalek kon onatendi ed saray aral.”

18. Antoy naliliknam ed saray pantitipon tayo, tan antoy determinadom a gawaen?

¹⁸ Kasin ontan met so naliliknam nipaakar ed pantitipon pian idayew si Jehova? Komon ta determinado ka sirin ya mansungdo tan manseet ed pansasagpot mon regular a miaral. Diad ontan et ipapanengneng mo ya miabobon ka ed si Arin David ya angibagan: “O Jehova, labalabay koy abung a panaayaman mo.”—Sal. 26:8, NW.