1. Antoy labay ya gawaen na amin ya lingkor na Dios, tan akin? (Nengnengen so litrato ed apis.)

INGGANGGAN nen Kristo Jesus iray papatumbok to: “Onla kayo . . . tan ibangat yo iray totoo ed amin a nasyon pian magmaliw iran disipulok.” (Mat. 28:19) Amin ya matoor a lingkor na Dios et labay dan naaralan no panon dan ‘sigpot ya sumpalen’ iyan ministeryo ya ipapagawa ed sikara. (2 Tim. 4:5) Diad tua, sayan kimey et mas importante, mas makana, tan mas apuraan nen say anggan anton trabaho. Balet, nayarin nanairapan tayon mangigana na dakel ya panaon ed ministeryo anggano labalabay tayo.

2. Anto ran mairap ya situasyon so nayarin dadalanen tayo legan tayon susumpalen so ministeryo tayo?

² Wala ray arum ya importantin kimey a mankaukolan na panaon tan biskeg tayo. Nayarin kaukolan tayoy mantrabaho na dakel ya oras ed sanagew pian nitarya tayoy pankaukolan tayo tan say pamilya tayo. Ompan nanairapan tayo lapud arum nin responsabilidad ed pamilya, sakit, depresyon, odino epekto na itatatken. Panon tayon sigpot ya sumpalen so ministeryo tayo legan tayon ondadalan ed ontan iran mairap ya situasyon?

3. Antoy naaralan tayo ed imbaga nen Jesus ya nabasad Mateo 13:23?

³ No lapud situasyon tayo et nalilimitaan so panaon ya uusaren tayod panaglingkor ed si Jehova, agtayo nepeg ya nadismaya. Amta nen Jesus ya aliwan pareparehoy karakel na napawala tayon bunga na Panarian. (Basaen so Mateo 13:23.) Papablien a maong nen Jehova so amin a gagawaen tayon panaglingkor ed sikato basta iiter tayoy sankaabigan tayo. (Heb. 6:10-12) Balet, ompan say arum ed sikatayo et nalikna ran sarag da nin aruman so panaglingkor da lapud iyabuloy na situasyon da. Diad sayan artikulo, pantongtongan tayo no panon tayon niyuna ed bilay tayo so ministeryo, no panon tayon pansiansiaen ya simpli so bilay tayo, tan no  panon tayon napaaligwas so dunong tayod panagpulong tan panagbangat. Balet amtaen tayo nin unona no antoy kabaliksan na ‘sigpot tayon sumpalen so ministeryo tayo.’

4. Antoy kabaliksan na ‘sigpot tayon sumpalen so ministeryo tayo’?

⁴ Diad simplin panangibaga, say kabaliksan na ‘sigpot tayon sumpalen so ministeryo tayo’ et gawaen tayoy anggaay nayarian tayo ya sigpot a mibiang ed kimey ya panagpulong tan panagbangat. Balet aliwan say karakel labat na oras so nalalanor. Importante ed si Jehova so motibo tayo. Lapud inaro tayoy Jehova tan say kapara tayon too, interon kamarerwa tayon mankikimey parad Kristianon ministeryo tayo. * (Mar. 12:30, 31; Col. 3:23) Nibagan interon kamarerwa so panlilingkor tayod Dios no gagawaen tayoy anggaay nayarian tayon usaren so biskeg tayo diad panaglingkor ed sikato. No aapresyaen tayoy pribilehyo tayon manpulong, pansagpotan tayon ipaamta so maong a balita ed dakel a totoo anggad posible.

5-6. Iyilustra no panon ya sarag ya iyuna na sakey ya too ed bilay to so ministeryo anggano limitado so panaon to.

⁵ Isipen pay sakey a lakin kabataan ya labalabay toy man-gitara tan mantotogtog kada walay panaon to. Sikatoy akaanap na trabaho bilang managtogtog na gitara diad sakey ya restawran ed lugar da kada Sabado tan Simba. Balet kulang so sueldo to parad saray gagastosen to. Kanian mantratrabaho met bilang cashier ed grocery manlapud Lunes anggad Biernes. Anggano mas dakel so panaon to diad pantratrabaho to ed grocery, say walad puso to et say panagtogtog. Say labay to et magmaliw ya mas marunong ed panag-gitara tan satan la so magmaliw a full-time ya trabaho to. Balet kaleganan to, panliliketan toy man-gitara kada walay pankanawnawa, anggan magano labat.

⁶ Mipadpara, nayarin limitado so panaon mo ed panagpulong. Balet satan so labalabay mon gawaen. Mansasagpot ka pian napaaligwas moy abilidad mon sabien so puso na totoo diad pangipupulong mod maong a balita. Diad karakel na kaukolan mon gawaen, ompan iisipen mo no panon mon niyuna ed bilay mo so panagpulong ya kimey.

7-8. Panon tayon naalig so panmoria nen Jesus ed ministeryo?

⁷ Say panmoria nen Jesus ed ministeryo et balibalin aligen. Akasentroy bilay to ed pangipulong ed Panarian na Dios. (Juan 4:34, 35) Sikatoy nanakar na nilasus ya kilometro pian pulongan so dakel ya totoo anggad posible. Lanang ya sikatoy manaanap na pankanawnawan mitongtong ed totoo diad publikon lugar tan ed abung da. Inyuna nen Jesus ed bilay to so ministeryo to.

⁸ Naalig tayoy Kristo no mananap tayoy pankanawnawa ya ipulong so maong ya balita ed anggan anton panaon tan anggan iner a pasen. Mabulos tayon manpupulong anggano mankaukolan itan na sakripisyo. (Mar. 6:31-34; 1 Ped. 2:21) Say arum ed kongregasyon et makakapanlingkor bilang espisyal, regular, odino auxiliary payunir. Wala ray nanaral na sananey a lenguahe odino inmalis ed lugar ya mas baleg so pankaukolan parad saray managpulong. Anggaman ontan, say baleg a kabiangan na panagpulong a kimey et gagawaen na saray manangipalapag ya aliwan payunir balet iiter day sankaabigan da. Antokaman so kipapasen tayo, agkekerewen nen Jehova so mas ni nen say sarag tayon iter. Labay to ya amin tayo et maliket ed sagradon panaglingkor tayo legan tayon iyaabawag so “maglorian maong a balita na maliket a Dios.”​—1 Tim. 1:11; Deu. 30:11.

9. (a) Panon ya inyuna nen Pablo ed bilay to so panagpulong anggano kaukolan toy mananap na pambilay? (b) Base ed Gawa 28:16, 30, 31, antoy panmoria nen Pablo ed ministeryo?

⁹ Maong ya alimbawa si apostol Pablo lapud ginawa ton sankaimportantian ed bilay to so ministeryo. Nen sikatoy walad Corinto legan na komaduan impanbiahe to bilang misionaryo, daiset lay akeran kuarta to kanian nananap na pambilay diad impanggawa toy tolda. Balet aliwan say panaggaway tolda so manuna ed bilay to. Sikatoy nantrabaho pian nasuportaan toy sarili to diad ministeryo, diad ontan et nipulong toy maong a balita ed saray taga Corinto ya “anggapoy bayar.” (2 Cor. 11:7) Anggano kaukolan nen Pablo so mantrabaho, intultuloy ton inyuna ed bilay to so ministeryo, ya sikatoy manpupulong kada Sabaton. Nen dinmakep lay situasyon to, mas akapampokus la ed panagpulong. Diad saman et “inusar nen Pablo so amin a panaon to parad salita na Dios, a pinulongan to iray Judio pian paneknekan a si Jesus so Kristo.” (Gawa 18:3-5; 2 Cor. 11:9) Nen sikatoy apriso ed abung ya nirentaan to diad Roma ed loob na duay taon, pinulongan to ray binmisita ed sikato tan sinulatan to ray kapananisiaan to. (Basaen so Gawa 28:16, 30, 31.) Ag-inabuloyan nen Pablo ya walay antokaman ya makapangekal ed pokus to ed ministeryo. Insulat to: “Lapud sayan ministeryo ya impabtang ed sikami . . . , agkami onsusuko.” (2 Cor. 4:1) Singa si Pablo, anggano kaukolan tayoy mananap na pambilay, sarag tayo nin siansia ya gawaen a sankaimportantian ed bilay tayo so kimey parad Panarian.

10-11. Panon tayon sigpot a sumpalen so ministeryo tayo anggano limitado lay nagagawaan tayo lapud sakit?

¹⁰ No bilang ta limitado lay pibibiang tayo ed panagpulong ed kaabungan lapud itatatken odino sakit, sarag tayoy mibiang ed arum a paraan na panagpulong. Saray Kristiano nen inmunan siglo et pinulongan da ray totoo anggan iner so kawalaan da. Sinambot day kada pankanawnawa ya inabang so katuaan—diad kaabungan, publikon lugar, tan diad impormal—inerman ya “nababanaan” da ray totoo. (Gawa 17:17; 20:20) No agtayo la sarag so manakar na arawi, ompan sarag tayoy onyurong ed sakey a publikon lugar pian pulongan tayo ray ondadalan. Sarag tayo met so manpulong ya impormal, odino diad panamegley na sulat  o telepono. Dakel ya manangipalapag ya agla tanton makakapibiang ed panagpulong ed kaabungan so makakalikna nin siansia na liket tan inkapnek ed saratan ya paraan na panagpulong.

¹¹ No bilang ta limitado lay nagagawaan mo lapud sakit, sarag mon sigpot a sumpalen so ministeryom. Imanoen pa lamet so alimbawa nen apostol Pablo. Inkuan to: “Walay biskeg kon arapen so amin a bengatla lapud samay mangiiter ed siak na pakayari.” (Fil. 4:13) Kakkaukolan nen Pablo itan ya pakayari nen sikatoy nansakit diad sakey ed saray impanbiahe to bilang misionaryo. Insulat tod saray taga Galacia: “Lapud sakit ko et nipulong kod sikayo so maong a balita diad unonan pankanawnawa.” (Gal. 4:13) Mipadpara, nayarin lapud sakit mo et nawalaan kay pankanawnawan ipulong so maong a balita ed arum, singa ed saray doktor, nars, tan arum nin mangaasikaso ed sika. Dakel ed sikara so nayarin walad trabaho no manpupulong ed kaabungan da iray agagi.

12. Antoy kabaliksan na pansiansiaen ya “akasentro” so matam?

¹² Inkuan nen Jesus: “Say mata so lamparaan na laman. Kanian no akasentro [odino “simpli,” paimanod leksab] so matam, magmaliw a masnag so interon laman mo.” (Mat. 6:22) Antoy labay ya ibaga nen Jesus? Say labay ton ibaga et nepeg tayon pansiansiaen a simpli so bilay tayo odino akasentro itan ed sakey a kalat o gagala, ya agnabalang so pokus tayo. Maabig ya alimbawa si Jesus diad impangisentro toy bilay to ed ministeryo, tan imbangat to iray disipulo to ya mansiansian akapokus diad panaglingkor ed si Jehova tan diad Panarian To. Aaligen tayoy Jesus no akasentro  met so bilay tayo ed Kristianon ministeryo, ya ‘aanapen tayo nin unona so Panarian tan say inkatunong na Dios.’​—Mat. 6:33.

13. Antoy makatulong pian makapampokus tayo ed Kristianon ministeryo tayo?

¹³ No pasimplien tayoy bilay tayo, makatulong itan pian makapampokus tayo ed ministeryo tan mas dakel so panaon tayon tulongan so arum ya kabaten tan aroen si Jehova. * Singa bilang, sarag tayo kasi manggaway pananguman ed oras na trabaho tayo pian mas ondakel so panaon tayo ed ministeryo diad loob na sakey simba? Sarag tayo kasin bawasan so panaon tayo ed saray panagligliwaan ya nayarin manguupot na panaon tayo?

14. Anto ran pananguman so ginawa na sanasawa pian mas ondakel so panaon da ed ministeryo tan mas makapampokus ira ed satan?

¹⁴ Ontan so ginawa na sakey ya elder a si Elias tan say asawa to. Imbaga to: “Agkami ni makapanpayunir ed saman, balet amta min wala ray sarag min gawaen pian mas ondakel so panaon mid ministeryo. Kanian nanggawa kami na angkelag iran pananguman. Singa bilang, binawasan mi ray gastos mi. Naisip mi met ya sobra manayay panaon mi ed panagligliwaan kanian binawasan mi met itan. Tan kinerew mid saray amo mi ya umanen so eskedyul na trabaho mi. Bilang resulta, akapibiang kami ed panagpulong no labi, dinmakel so iyaaralan mi na Biblia, tan akapibiang kami ni ingen ed panagpulong diad ordinaryon agew mamidua ed kada bulan. Talagan makapaliket!”

15-16. Base ed 1 Timoteo 4:13, 15, panon ya tuloytuloy tayon napaaligwas so abilidad tayo ed ministeryo? (Nengnengen met so kahon ya “ Saray Kalat ya Makatulong Pian Sigpot Kon Nasumpal so Ministeryok.”)

¹⁵ Say sakey nin paraan pian sigpot tayon nasumpal so ministeryo tayo et diad pamaaligwas  tayod abilidad tayon manpulong. Wala ray totoo ya diad trabaho da et kaukolan so tuloytuloy ya panangipasal tan panaral pian naaruman so amta ra tan onaligwas so abilidad da. Ontan met ed sikatayo ran mangipupulong na Panarian. Kaukolan ya tuloytuloy tayon aralen no panon tayon paaligwasen so abilidad tayo ed ministeryo.​—Pro. 1:5; basaen so 1 Timoteo 4:13, 15.

¹⁶ Balet, panon tayon tuloytuloy ya onaligwas ed ministeryo? Imanoen tayon maong iray instruksion ya nanaawat tayo diad sinimban Aral Parad Ministeryo tan Bilay na Kristiano. Diad sayan aral et makakaawat tayo na makanakanan panangipasal pian natulongan itayon tuloytuloy ya onaligwas ed abilidad tayo ed ministeryo. Singa bilang, no say chairman et mangiter na konseho ed saray estudyante ya walaan na parte, imanoen tayo ray suhestion ya makatulong ed sikatayon onaligwas ed ministeryo. Sarag tayon iyaplika iratan ya suhestion diad ontumbok ya pampulong tayo. Sarag tayoy manpatulong ed manangasikaso na grupo tayo, odino miulop tayod sikato diad ministeryo. Sarag tayo met so miulop ed eksperiensyadon manangipalapag, payunir, odino ed manangasikaso na sirkito. Legan ya mas onaaligwas tayo ed panangusar ed saray walad Uusaren ed Panagbangat (Teaching Toolbox), mas maliket tayon manpulong tan manbangat.

17. Antoy naeksperiensyam no sigpot mon sumpalen so ministeryom?

¹⁷ Talagan baleg so pribilehyo tayo ta inabuloyan itayo nen Jehova ya magmaliw a “kakimeyan” to! (1 Cor. 3:9) No “seguroen [mo] no anto ray mas importantin bengatla” tan manpokus ka ed Kristianon ministeryo, “maliket [mon] lingkoran si Jehova.” (Fil. 1:10; Sal. 100:2) Bilang sakey ed saray ministro na Dios, makapanmatalek ka ya ikdan to kay pakayari a kaukolan mo pian nasumpal moy ministeryom antokaman so onsabin mairap ya situasyon odino anggano nalimitaan so kipapasen mo. (2 Cor. 4:1, 7; 6:4) Balanglan melag o baleg so nagagawaan mo ed panagpulong lapud situasyon mo, ‘nawalaan kay rason a manliket’ no interon kamarerwa so pibibiang mo ed ministeryo. (Gal. 6:4) No sigpot mon sumpalen so ministeryom, ipapanengneng mon inarom si Jehova tan say kaparam ya too. “Diad panggawam ed saya et niliktar moy sarilim tan saramay ondedengel ed sika.”​—1 Tim. 4:16.