1-2. (a) Panon ya papalikdoen nen Satanas iray totoo? (b) Antoy pantongtongan tayo ed sayan artikulo?

SI Satanas, say “ama na tila,” et papalikdoen toy totoo manlapu lad panaon nen Adan tan Eva. (Juan 8:44) Say arum ed saray tila ya inkayat to et saray palson bangat nipaakar ed ipapatey tan nipaakar ed bilay kayari na ipatey. Saratan ya bangat so nagmaliw a basiyan na dakel a kabkabat a kustombre tan anito. Bilang resulta, dakel ya agagi tayo so kaukolan ya “milaban ya impasya nisengeg ed pananisia” no walay ompatey ed pamilya ra odino ed lugar da.​—Jud. 3.

² No onaarap kad ontan ya subok, antoy makatulong ed sika pian nasuportaan moy ibabangat na Biblia nipaakar ed ipapatey? (Efe. 6:11) Antoy gawaen mo pian naligliwam tan napabiskeg mo so sakey ya kapananisiaan a nayarin nadedesdes ya mibiang ed saray kustombre ya agmamaliket ed Dios? Pantongtongan ed sayan artikulo so panangigiya ya iiter nen Jehova. Unona, imanoen tayo no antoy ibabaga na Biblia nipaakar ed ipapatey.

3. Antoy resulta lapud unonan tila?

³ Agkabiangan ed gagala na Dios ya ompatey so too. Balet pian manbilay na andi-anggaan si Adan tan Eva, kaukolan dan unoren si Jehova, ya angiter ed sayan simplin ganggan: “Agka nepeg a mangay bunga na kiew na pikakabat ed maong tan mauges, ta diad agew a pangan mo ed satan et seguradon ompatey ka.” (Gen. 2:16, 17) Insan linmoob ed eksena si Satanas. Panamegley na sakey ya uleg, imbaga tod si Eva: “Seguradon agkayo ompatey.” Makapaermen ta anisia si Eva ed satan ya tila tan  angan na samay bunga. Insan angan met so asawa to. (Gen. 3:4, 6) Kanian linmoob ed mundo so kasalanan tan patey.​—Roma 5:12.

4-5. Panon ya nibagan agtinmunda si Satanas ed pamapalikdo tod saray totoo?

⁴ Inatey si Adan tan Eva a singa imbaga na Dios ya nagawad sikara. Balet agtinmundan nantila si Satanas nipaakar ed ipapatey. Asabi panaon, sikatoy angikayat na arum nin tila. Sakey ed saratan a tila et say bangat ya no ompatey so sakey a too, walay onsian ed laman to ya mantultuloy a manbilay tan onlad kawalaan na saray espiritu. Nanduruma so bersion na satan a tila ya mamapalikdo ed dakdakel ya totoo anggad panaon tayo.​—1 Tim. 4:1.

⁵ Akin et dakdakel a totoo so napapalikdo? Amta nen Satanas so nalilikna na totoo ed ipapatey tan uusaren to itan pian palikdoen ira. Lapud apalsa tayo ya manbilay na andi-anggaan, agtayo labay so ompatey. (Ecl. 3:11) Ipapasen tayon kabusol so patey.​—1 Cor. 15:26.

6-7. (a) Kasin asarag nen Satanas ya iyamot so katuaan nipaakar ed ipapatey? Ipaliwawa. (b) Panon ya makatulong so katuaan ed Biblia pian napaliisan tayoy ontakot?

⁶ Anggano ontan so gagawaen nen Satanas, agnansiansian akaamot so katuaan nipaakar ed ipapatey. Diad tua, dakel la natan so makaamta tan mangipupulong ed no antoy ibabangat na Biblia nipaakar ed kipapasen na saray inatey tan say ilalo parad saray inatey. (Ecl. 9:5, 10; Gawa 24:15) Saratan ya katuaan et makaligliwa tan ontulong ed sikatayo pian napaliisan tayoy ontakot tan manduaruwa. Singa bilang, agtayo tatakotan iray inatey tan no antoy nagawad sikara. Amta tayo ya aliwa la ran mabilay tan agda sarag ya sakitan so anggan siopa. Say kipapasen da et singa sakey ya araldalem so ugip to. (Juan 11:11-14) Ontan met, ag-amta na saray inatey so ilalabas na panaon. Kanian parad saramay napaoli ed arapen, singa kakirem labat so inlabas na panaon anggano nilasus taon la ran inatey.

⁷ Agta malinew, simpli, tan lohikal so katuaan nipaakar ed kipapasen na saray inatey? Talagan midumaan itan ed saray makawetwet ya tila nen Satanas! Saratan a tila et aglabat mangibabalang ed saray totoo, noagta papaugesen met na saratan so Amalsa. Pian mas natalosan tayo no panon kauges so epekto na saray tilan inkayat nen Satanas, ebatan tayo irayan tepet: Panon ya saray tila nen Satanas et mamapauges ed si Jehova? Panon ya lapud saratan et singa ompapaway ya agla kaukolan so dondon bagat na Kristo? Panon ya akaarum iratan ed paneermen tan paniirap na totoo?

8. Singa ipapanengneng na Jeremias 19:5, akin ya nibagan napapauges si Jehova lapud saray tila nen Satanas nipaakar ed kipapasen na saray inatey?

⁸ Napapauges si Jehova lapud saray tila nen Satanas nipaakar ed kipapasen na saray inatey. Kaibad saratan ya tila so palson bangat ya saray inatey et papairapen ed maapoy a pasen. Talagan napapauges so Dios lapud saratan ya bangat! Panon? Papapawayen na saratan a say personalidad na maaron Dios et mipara ed personalidad na Diablo. (1 Juan 4:8) Antoy naliliknam ed satan? Tan say mas importante, anto kasi nalilikna nen Jehova, anta kabusol to so amin a klase na inkaruksa?—Basaen so Jeremias 19:5.

9. Panon ya akaapekto iray tila nen Satanas ed pananisia na totoo ed dondon bagat na Kristo ya adeskribe ed Juan 3:16 tan 15:13?

⁹ Lapud saray tila nen Satanas nipaakar ed ipapatey, singa ompapaway ya agla kaukolan so dondon bagat na Kristo. (Mat. 20:28) Say sakey nin tila nen Satanas et walaan kuno na imortal ya kamarerwa iray totoo. No tua itan, amin et manbilay na andi-anggaan. Agla kaukolan ya iter na Kristo so bilay to bilang dondon pian nawalaan tayo na bilay ya andi-anggaan. Balet tandaan ya say dondon bagat na Kristo so sankabalegan ya prueba ya inar-aro nen Jehova tan say Anak to iray totoo. (Basaen so Juan 3:16; 15:13.) Isip mo pay nalilikna da lapud saray bangat a mangibabaliwala ed satan a mabmablin regalo!

10. Panon ya saray tila nen Satanas et akaarum ed paneermen tan paniirap na totoo?

¹⁰ Saray tila nen Satanas et akaarum ed paneermen tan paniirap na totoo. No maneermen iray atateng lapud impatey na anak da, nayarin walay mangibagad sikara ya inala na Dios so anak da pian magmaliw ya anghel ed tawen. Imbes ya nabawasan so sakit ya nalilikna ra, agta mas naaruman ni ingen lapud sayan tila nen Satanas? Ontan met, say palson bangat nipaakar ed maapoy ya impierno so imbaraan na simbaan ed impamairap da ed saray kontra ed bangat da, ya pinoolan da ni ra ingen ed poste. Base ed sakey a libro nipaakar ed Spanish Inquisition, nayarin inisip na arum ed saray nanggawa ed sayan inkaruksa ya labay da labat ya natawayan na saray kontra ed simbaan “no antoy nagawad sikara diad andi-anggaan ya impierno,” pian magbabawi ira antis iran ompatey tan agla ra kuno onla ed impierno. Diad pigaran bansa, ipapasen na totoo ya obligasyon day mandayew ed saray inaatey ya kapamilya da, pian pagalangan da ra odino pian makakerew ira na bendisyon. Say arum et labay dan paliketen iray inatey ya kapamilya da pian ag-ira dusaen na saratan. Makapaermen ta sarayan bangat ya akabase ed saray tila nen Satanas et agmakapangiter na tuan ligliwa. Imbes, panlalapuan iratan na kapagaan odino takot ni ingen.

11. Panon ya saray kakanayon odino kakaaro, anggano maong so intension da, et nayarin desdesen da itayon ag-unoren so Salita na Dios?

¹¹ Say panangaro tayo ed Dios tan ed Salita to so mamabiskeg ed determinasyon tayon unoren si Jehova anggano saray kakanayon odino kakaaro tayon maong met so intension da et desdesen da itayon mibiang ed saray agmakasulatan ya kustombre nipaakar ed saray inatey. Ompan pabaingan da tayo, nayarin diad pangibaga ra ya agtayo inaro odino rerespetoen imay inatey. Odino nayarin ibaga da ya no agtayo mibiang ed kustombre et ompan sakitan na samay inatey iray mabilay. Panon tayon nasuportaan so katuaan ed Biblia? Imanoen no panon mon niyaplika irayan prinsipyo ed Biblia.

12. Anto ran kustombre nipaakar ed inatey so malinew ya agmakasulatan?

¹² “Isian” moy sarilim ed saray agmakasulatan ya bangat tan kustombre. (2 Cor. 6:17) Diad  sakey a bansa ed Caribbean, panisiaan na dakel ya no ompatey so sakey a too, nayarin sikatoy agni onalis pian “man-anyani” tan dusaen to iramay nanggaway mauges ed sikato. Samay “anyani” et nayari ni ingen ya “manggulo ed sakey ya komunidad,” so kuan na sakey a reperensya. Walay kustombre ed Africa ya sasakoban na totoo iray espiho ed abung na samay inatey tan ipapaarap dad dingding iray litrato. Antoy rason? Wala ray mangibabaga ya agnayarin nanengneng na inatey so sarili to! Bilang lingkor nen Jehova, agtayon balot manisia ed anggan anton palson bangat odino mibiang ed saray kustombre ya onsusuporta ed saray tila nen Satanas!—1 Cor. 10:21, 22.

13. No agka segurado ed sakey ya kustombre, antoy nepeg mon gawaen, a singa ibabaga na Santiago 1:5?

¹³ No agka segurado ed sakey ya kustombre odino tradisyon, manpikasi kad si Jehova tan kerew kad sikato na karunongan. (Basaen so Santiago 1:5.) Insan ka man-research ed saray publikasyon tayo. No kaukolan, mantepet kad saray elder ed kongregasyon yo. Agda ibagad sika no antoy gawaen mo, balet nayarin ipaimano dad sika iray makatulong ya prinsipyo ed Biblia, a singa saray walad sayan artikulo. No oniay gawaen mo, ipapasal mo so ‘pakayarim ya manebek,’ tan satan so ontulong ed sikan “mangibiig ed duga tan aliwa.”​—Heb. 5:14.

14. Diad anto ran paraan ya napaliisan tayoy makagapol?

¹⁴ “Gawa yo so amin a bengatla parad kigloriaan na Dios. Paliisan yoy magmaliw a pakagapolan.” (1 Cor. 10:31, 32) Sano mandedesisyon tayo no kasin mibiang tayo ed sakey ya kustombre o tradisyon, nepeg tayo met ya isipen no panon itan ya makaapekto ed konsiensia na arum, lalo lad saray kapananisiaan tayo. Agtayon balot labay so makagapol! (Mar. 9:42) Agtayo met labay ya nasakitan so liknaan na saray aliwan Tasi. Pakiwasen itayo na panangaro ya marespeton mitongtong ed sikara, ta mangigloria itan ed si Jehova. Seguradon agtayo labay so mikolkol ed arum odino balawen so tradisyon da. Tandaan, baleg so nagawaan na panangaro! No ipanengneng tayo itan diad pagmaliw ya makonsidera tan marespeto, nayarin onlemek so puso na saray onsusumpa.

15-16. (a) Akin et makabat no ipaamta tayo lad arum so papanisiaan tayo? Mangiter na alimbawa. (b) Panon tayon niyaplika imay imbaga nen Pablo ya nabasa ed Roma 1:16?

¹⁵ Ipaamta ed lugar yo ya sakey kan Tasi nen Jehova. (Isa. 43:10) No walay ompatey ya kapamilyam, nayarin onsyodot ya maong iray kakanayon mo tan saray kakaabay yo no agka  mibiang ed sakey ya kustombre. Mas mainomay mon arapen so ontan ya situasyon no amta da la so papanisiaan mo. Si Francisco ya taga Mozambique et insulat to: “Nen sikami nen asawak ya si Carolina et naaralan mi katuaan, imbaga mid saray kapamilya mi ya agkami la mandayew ed saray inatey. Asubok so desisyon mi nen inatey so atsi nen Carolina. Kustombre ed lugar mi ya amesen so bangkay bilang kabiangan na relihyoson ritual. Insan say sankaasinggeran ya kapamilya et onugip na taloy agew ed lugar ya angikalboan ed danum ya impanames. Sayan kustombre et mamaliket kuno ed espiritu na inatey. Iilaloan na pamilya nen Carolina ya sikato so manggawa ed satan.”

¹⁶ Antoy ginawa nen Francisco tan say asawa to? Imbaga nen Francisco: “Lapud inaro mi Jehova tan labay min napaliket, nandesisyon kamin agmibiang ed saman ya kustombre. Mamapasnok ya maong iray kapamilya nen Carolina. Imbaga ra ya anggapoy respeto mi ed inatey tan agla ra ompasyar ed sikami tan agmi lan balot nailaloan so tulong da. Balet lapud impaliwawa mi lad sikara iray papanisiaan mi, agmi la kaukolan ya ibaga itan legan iran manpapasnok. Indepensa kami ni ingen na arum ya kanayon to, ya imbaga ran nipaliwawa mi lad sikara so pananisia mi. Kinmalma lanlamang iray kanayon nen Carolina, tan akapikareenan kami. Diad tua, say arum et linma ni ingen ed abung mi pian mikerew na literaturan base ed Biblia.” Komon ta agtayon balot ombabaing ya idepensa so katuaan nipaakar ed ipapatey.​—Basaen so Roma 1:16.

17. Antoy makatulong ed sikatayon magmaliw ya tuan kaaro ed sakey ya kapananisiaan ya inateyan?

¹⁷ No inateyan na inad-aro so sakey ya kapananisiaan, gawaen tayoy anggaay nayarian tayon magmaliw ya “tuan kaaro . . . , sakey ya agi a nailaloan diad panaon na gonigon.” (Pro. 17:17) Panon itayon magmaliw ya “tuan kaaro,” lalo la no say inateyan ya agi et nadedesdes ya mibiang ed agmakasulatan iran kustombre? Imanoen so duaran prinsipyo ed Biblia ya makatulong ed sikatayon ligliwaen iray inateyan.

18. Akin et akaakis si Jesus, tan antoy naaralan tayod alimbawa to?

¹⁸ “Miakis kayo ed saramay onaakis.” (Roma 12:15) Nayarin agtayo amtay ibaga tayo ed sakey  ya pinasyay paneermen to. No maminsan, mas baleg so epekto na iyakis tayo nen saray ibaga tayo. Nen inatey so kaaro nen Jesus ya si Lazaro, manakis si Maria, Marta, tan arum ni lapud naandi so inad-aro dan agi tan kaaro. Kayari apat agew, nen sinmabi si Jesus, pati sikato et “akaakis,” anggano amta to ya paolien to lanlamang si Lazaro. (Juan 11:17, 33-35) Nanengneng ed inyakis nen Jesus no antoy alikna nen Jehova ed saman. Nanengneng met ed satan ya talagan inar-aro nen Jesus iyan pamilya, kanian seguradon aligliwa si Maria tan Marta. Mipadpara, no nalikna na saray agagi so panangaro tan panangiyansakit tayo, napaseguroan ira ya agda bukbukor tan apaliberan ira na maar-aro tan masuporta ya kakaaro.

19. Panon tayon niyaplika so Eclesiastes 3:7 sano liligliwaen tayo so sakey kapananisiaan ya inateyan?

¹⁹ “Panaon na ag-iyesel tan panaon na pansalita.” (Ecl. 3:7) Say sakey nin paraan pian naligliwa tayoy kapananisiaan ya inateyan et diad idengel tayon maong ed sikato. Abuloyan mon ibalikas toy walad puso to, tan agka nasasakitan no makapangibaga na “saray salitan agla ninonot.” (Job 6:2, 3) Ompan makakaarum ed ermen to so panedesdes na saray kanayon ton aliwan Tasi. Kanian manpikasi ka ya kaiba to. Mikasi ka ed “Dumerengel na pikakasi” ya ikdan to na biskeg tan malinew ya panagnonot so kapananisiaan tayo. (Sal. 65:2) No iyabuloy na situasyon, saniba yon basaen so Biblia. Odino manbasa kayo na matukoy ya artikulo ed saray publikasyon tayo, singa say makapaseseg ya istoryay bilay.

20. Antoy pantongtongan tayo ed onsublay ya artikulo?

²⁰ Talagan baleg a pribilehyo ya amta tayoy katuaan nipaakar ed saray inatey tan say balibalin arapen ya manatalaran ed saramay walad pakanodnonotan iran lubok. (Juan 5:28, 29) Kanian komon ta diad salita tan gawa et makpel tayon suportaan so katuaan ed Biblia tan ipaamta tayo itan ed arum diad kada matukoy a pankanawnawa. Pantongtongan diad onsublay ya artikulo so sakey nin paraan ya uusaren nen Satanas pian mansiansia ed espiritual ya kabilungetan iray totoo—say espiritismo. Aralen tayo no akin ya kaukolan tayon paliisan iray kagagawa tan panagligliwaan ya walay koneksion tod satan ya patit na saray demonyo.