1. Singa nabasa ed Efeso 6:10-13, anto so sakey a paraan ya ipapanengneng nen Jehova so panangiyansakit tod sikatayo? Ipaliwawa.

SAY sakey ya paraan ya ipapanengneng nen Jehova so panangiyansakit tod sikatayo ran lingkor to et diad pangiiter toy tulong pian nalabanan tayo iray kabusol tayo. Say manunan kabusol tayo et si Satanas tan saray demonyo. Pinasakbayan itayo nen Jehova nipaakar ed sikara, tan inter tod sikatayo iray kaukolan tayo pian nalabanan tayo ra. (Basaen so Efeso 6:10-13.) No awaten tayo so tulong nen Jehova tan sigpot tayon manmatalek ed sikato, sarag tayon sumpaen so Diablo. Nawalaan tayo na kompiyansa ya singa alikna nen apostol Pablo. Insulat to: “No say Dios et walad dapag tayo, siopa so onsumpad sikatayo?”​—Roma 8:31.

2. Antoy pantongtongan tayo ed sayan artikulo?

² Bilang tuan Kristiano, ag-itayo interesadon maong ed si Satanas tan saray demonyo. Say akapokusan tayo et say panaral nipaakar ed si Jehova tan panlingkor ed sikato. (Sal. 25:5) Balet, kaukolan tayon amtaen iray manunan paraan no panon ya onkikiwas si Satanas. Akin? Pian agto tayo naanamot. (2 Cor. 2:11; paimanod leksab) Diad sayan artikulo, pantongtongan tayo so sakey ya manunan paraan ya uusaren nen Satanas tan saray demonyo pian ibalang iray totoo. Pantongtongan tayo met no panon tayo ran nalabanan.

3-4. (a) Anto so espiritismo? (b) Panon kalaknab so pananisia ed espiritismo?

³ Say sakey ya manunan paraan ya uusaren nen Satanas tan saray demonyo pian ibalang iray totoo et say espiritismo. Ibabaga  na saray totoon manggagawa ed saya ya amta ra o nakontrol da iray agsarag ya amtaen o kontrolen na kaslakan a totoo. Singa bilang, ibabaga na arum ya sarag dan amtaen no antoy nagawa ed arapen panamegley na panagparles o panaghula odino panamegley na astrolohiya. Papapawayen met na arum ya sarag day mitongtong ed saray inatey. Kabiangan met ed gagawaen da so panagkulam o panananem, odino panagmahiko, tan sarag da met kunon kontrolen so arum a too. *

⁴ Panon kalaknab so pananisia ed espiritismo? Base ed sakey ya survey a ginawa ed 18 bansa diad Latin America tan Caribbean, manga kakatlo ed saray kaiba ed satan ya survey so manisia ed panagmahiko, panagkulam, odino panagsalamangka, tan ngalngali ontan met so karakel na manisia ya posible so mitongtong ed saray espiritu. Diad sakey met a survey ya ginawa ed 18 bansa diad Africa, masulok ya kapaldua ed saray kaiba ed survey so angibaga ya manisia ira ed panagkulam. Siempre, anggan iner so panaayaman tayo et nepeg tayoy manalwar ed espiritismo. Diad tua, labay nen Satanas ya ibalang so totoo ed “interon mundo.”​—Apo. 12:9.

5. Antoy nalilikna nen Jehova ed espiritismo?

⁵ Si Jehova et “Dios na katuaan.” (Sal. 31:5) Kanian antoy nalilikna to ed espiritismo? Kabusol to itan! Imbaga tod saray Israelita: “Nepeg ya anggapoy siopaman ed sikayo a mangiparalan na anak ton laki odino bii diad apoy, manparles, manmahiko, mananap na saray tanda, sakey a managsalamangka, siopaman a kontrolen toy arum ed panamegley na mahiko, onkonsulta ed espiritista odino managparles, odino siopaman ya ontupleg ed inatey. Ta siopaman a manggagawa ed sarayan bengatla et makapadimla ed si Jehova.” (Deu. 18:10-12) Saray Kristiano et agla sakop na Ganggan ya inter nen Jehova ed saray Israelita. Balet, amta tayo ya ag-anguman so nalilikna to ed espiritismo.​—Mal. 3:6.

6. (a) Panon ya uusaren nen Satanas so espiritismo parad pankaugsan na totoo? (b) Base ed Eclesiastes 9:5, anto so katuaan nipaakar ed kipapasen na saray inatey?

⁶ Papasakbayan itayo nen Jehova nipaakar ed espiritismo lapud amta to ya uusaren itan nen Satanas parad pankaugsan na totoo. Uusaren to so espiritismo pian mangikayat na katilaan​—kaiba lay katilaan ya saray inatey et mabilay ni diad arum a pasen. (Basaen so Eclesiastes 9:5.) Uusaren to met so espiritismo pian taktakoten iray totoo tan iyarawi ira ed si Jehova. Labay ton manmatalek ira ed saray mauges ya espiritu imbes ya diad si Jehova.

7. Antoy ibabaga nen Jehova ed sikatayo?

⁷ Singa abitla niman, ibabaga nen Jehova ed sikatayo no antoy nepeg tayon naamtaan pian ag-itayo nibalang nen Satanas tan saray demonyo. Imanoen iray praktikal ya nagawaan tayo pian nalabanan tayoy Satanas tan saray demonyo.

8. (a) Antoy manunan paraan pian nalabanan tayo iray mauges ya espiritu? (b) Panon ya papaneknekan na Salmo 146:4 ya katilaan so ikakayat nen Satanas nipaakar ed saray inatey?

⁸ Basaen tan dalepdepen so Salita na Dios. Saya so manunan paraan pian ag-itayo naimpluensyaan na saray katilaan ya ikakayat na saray mauges ya espiritu. Say Salita na Dios et singa makdem ya espada ya sarag ton buyaken iray katilaan ya ikakayat nen Satanas. (Efe. 6:17) Singa bilang, papaneknekan na Salita na  Dios ya aliwan tua ya makapitongtong iray inatey ed saray mabilay. (Basaen so Salmo 146:4.) Ipapanonot met na satan ed sikatayo ya si Jehova labat so napanmatalkan ya makapangibaga no antoy nagawa ed arapen. (Isa. 45:21; 46:10) No regular tayon basaen tan dalepdepen so Salita na Dios, mas mainomay tayon ipulisay tan busolen iray katilaan ya ikakayat na saray mauges ya espiritu.

9. Anto ran kagagawa ya mikonektaan ed espiritismo so nepeg tayon paliisan?

⁹ Agmanggagawa na antokaman ya mikonektaan ed espiritismo. Bilang tuan Kristiano, agtayon balot mibibiang ed anggan anton klase na espiritismo. Singa bilang, agtayo oonla ed saray espiritista odino salien tayoy mitongtong ed saray inatey diad arum nin paraan. Singa apantongtongan ed imbeneg ya artikulo, agtayo mibibiang ed saray kustombre ed ponpon ya akabase ed bangat ya saray inatey et mabilay ni diad arum a pasen. Tan agtayo manguusar na astrolohiya odino oonlad saray managparles pian naamtaan so nagawad arapen. (Isa. 8:19) Amta tayo ya amin iratan ya kagagawa et mapeligron maong, tan nayarin lapud saratan et nawalaan tayoy direktan koneksion ed si Satanas tan saray demonyo.

10-11. (a) Antoy ginawa na arum nen inmunan siglo nen naamtaan day katuaan? (b) Base ed 1 Corinto 10:21, akin et nepeg tayon aligen so alimbawa na saray inmuunan Kristiano, tan panon tayon nagawaan itan?

¹⁰ Deralen o ibantak so antokaman ya bengatlan mikonektaan ed espiritismo. Wala ray taga Efeso nen inmunan siglo ya akibiang ed espiritismo. Nen naamtaan day katuaan, walay baleg ya desisyon a ginawa ra. “Dakel ed saramay datin manmamahiko et tinipon da ray libro ra tan pinoolan dad arapan na amin.” (Gawa 19:19) Ginawa da so amin ya nayarian da pian labanan iray mauges ya espiritu. Manbili na baleg a kantidad iray libro dan nipaakar ed panagmahiko. Balet imbes ya ipakerew odino ilako da ed arum, dineral da iratan. Mas importante ed sikara so pamaliket ed si Jehova nen say bili na saratan a libro.

¹¹ Panon tayon naalig so alimbawa na sarayan  Kristiano nen inmunan siglo? Maabig no deralen o ibantak tayo so antokaman ya nayarin walad sikatayo ya mikonektaan ed espiritismo. Kaiba ed satan iray anting-anting o antokaman ya isusulong odino uusaren na totoo pian naprotektaan ira kuno ed saray mauges ya espiritu.​—Basaen so 1 Corinto 10:21.

12. Anto ray nepeg tayon itepet ed sarili tayo nipaakar ed panagligliwaan tayo?

¹² Usisaen ya maong iray pipilien mon panagligliwaan. Tepetan moy sarilim: ‘Kasin manbabasa ak na saray libro, magasin, odino artikulo ed Internet ya nipaakar ed espiritismo? Anto ray dedengelen kon musika, babantayan kon pelikula tan palabas ed TV, odino gagalawen kon video games? Kasin wala ray pipilien kon panagligliwaan ya mikonektaan ed espiritismo? Kasin nipaakar iratan ed saray bampira, zombie, odino misteryoson pakapanyari? Kasin ipapanengneng na saratan ya singa anggapoy uges na panagmahiko odino panagkulam?’ Siempre, agto labay ya ibagan amin ya istoryan singa imposiblin nagawa tan produkto labat na imahinasyon et mikonektaan ed espiritismo. Sano uusisaen mo ray panagligliwaan mo, komon ta determinado kan manggawa na desisyon ya makatulong ed sikan mansiansian arawi ed antokaman ya kabusol nen Jehova. Labay tayon gawaen so anggaay nayarian tayo ya “napansiansiay malinis a konsiensia” ed arapan na Dios.​—Gawa 24:16. *

13. Antoy labay tayon paliisan?

¹³ Paliisan so mangistorya nipaakar ed saray demonyo. Diad saya et labay tayon aligen so alimbawa nen Jesus. (1 Ped. 2:21) Antis ya linmad dalin si Jesus, sikatoy nambilay lad tawen, kanian dakel so amta to ed si Satanas tan saray  demonyo. Balet agto inistorya iray ginawa na saray mauges ya espiritu. Labay nen Jesus ya ibangat iray totoo nipaakar ed si Jehova, aliwan nipaakar ed si Satanas. Naalig tayoy Jesus no agtayo mangikayat na saray istorya nipaakar ed saray demonyo. Imbes, ipapanengneng tayod saray ibabaga tayo ya say puso tayo et “atenyeg na maong a bengatla,” say katuaan.​—Sal. 45:1.

14-15. (a) Akin et agtayo nepeg ya takotan iray mauges ya espiritu? (b) Antoy ebidensya ya proprotektaan nen Jehova iray totoo to natan?

¹⁴ Agtatakotan iray mauges ya espiritu. Diad sayan mundo, nayarin wala ray mauges ya nagawad sikatayo. Ompan biglan onsabi so aksidente, sakit, odino say ipatey ni ingen. Balet agtayo nepeg ya isipen ya saray agnanengneng ya espiritu so panlalapuan na saratan. Ibabaga na Biblia ya “say panaon tan saray ag-iilaloan a nagawa” et nayarin onsabi ed anggan siopa. (Ecl. 9:11) No nipaakar ed saray demonyo, impanengneng nen Jehova ya sikatoy mas makapanyari nen say sikara. Singa bilang, ag-inabuloyan na Dios ya pateyen nen Satanas si Job. (Job 2:6) Diad panaon nen Moises, impanengneng nen Jehova ya sikatoy mas makapanyari nen saray managmahikon saserdote na Ehipto. (Exo. 8:18; 9:11) Lapud pakapanyarin inter nen Jehova ed niglorian si Jesus, impanengneng nen Jesus ya sikatoy mas makapanyari nen si Satanas tan saray demonyo sanen imbantak to rad dalin. Tan diad asingger lan arapen, sikaray ibantak ed kaaralman, ya ditan et agda la sarag ya sakitan so anggan siopa.​—Apo. 12:9; 20:2, 3.

¹⁵ Dakel so nanenengneng tayon ebidensya ya proprotektaan nen Jehova iray totoo to natan. Isipen pa: Ipupulong tan ibabangat tayoy katuaan diad amin ya pasen ed dalin. (Mat. 28:19, 20) Bilang resulta, ipapaamta tayod totoo iray mauges ya gagawaen na Diablo. No sarag ya patundaen nen Satanas so amin ya kimey tayo, abayag to la komon ya agawaan. Mapatnag sirin ya agto nayarian. Kanian agtayo nepeg ya takotan iray mauges ya espiritu. Amta tayo ya “saray mata nen Jehova et onnenengneng ed interon dalin pian ipatnag toy biskeg to parad saramay matoor so puso rad sikato.” (2 Awa. 16:9) No matoor tayo ed si Jehova, anggapon balot so nagawaan na saray demonyo ya pansengegan na permanentin kaderal tayo.

16-17. Mangiter na alimbawa no panon ya kaukolan so pakpel pian nalabanan iray mauges ya espiritu.

¹⁶ Kaukolan so pakpel pian nalabanan iray mauges ya espiritu, lalo la no susumpaen itayo na saray kakaaro o kakanayon ya maong met so intension da. Balet bebendisyonan nen Jehova iramay mangipapanengneng na pakpel. Imanoen so alimbawa na sister ya tagad Ghana ya manngaran na Erica. Si Erica et mantaon na 21 nen inawat toy panangiyaral na Biblia. Lapud sikatoy anak na espiritista ya lider na relihyon, iilaloan na pamilya to ya sikatoy mibiang ed kustombre ya pangan na karne ya inyapay ed saray dirios nen tatay to. Nen aglabay nen Erica so mibiang ed satan ya ritual, impasen na pamilya to ya insulto itan ed saray dirios. Panisiaan na pamilya to ya dusaen ira na saray dirios tan dapoan da ra na sakit ed isip tan laman.

¹⁷ Sinali na pamilya nen Erica ya sikatoy puersaen ya mibiang ed satan ya kustombre, balet talagan agda apilit. Lapud satan et pinataynan da ed abung. Wala ray Tasi ya amatuloy ed sikato diad abung da. Kanian nibagan benendisyonan nen Jehova si Erica na balon pamilya—saray kapananisiaan to ya nagmaliw ya agagi ton lalaki tan bibii. (Mar. 10:29, 30) Anggano intakwil na saray kakanayon to tan pinoolan da ni ingen iray gamit to, nansiansian matoor si Erica ed si Jehova, sikatoy abautismoan, tan natan et regular payunir la. Sikatoy agnatatakot ed saray demonyo. Tan oniay imbaga to nipaakar ed pamilya to: “Inagew-agew kon ipipikasi ya naeksperiensya komon na pamilyak so bendisyon ya nakabat day Jehova tan say kawayangan ya resulta na panlingkor ed maaron Dios tayo.”

18. Anto ray awaten tayon bendisyon no manmatalek tayo ed si Jehova?

¹⁸ Aliwan amin et makaeksperiensya na ontan kabaleg ya subok ed pananisia. Balet kaukolan tayon amin ya labanan iray mauges ya espiritu tan manmatalek ed si Jehova. No gawaen tayo itan, dakel ya bendisyon so awaten tayo, tan ag-itayo nibalang na saray katilaan nen Satanas. Ontan met, ag-itayo ontakot ed saray demonyo kanian ag-itan magmaliw ya rason na itunda tayo ed panlilingkor tayod Dios. Say sankaimportantian ed amin, onelet so pikakaaro tayo ed si Jehova. “Manpasakop kayo ed Dios,” so insulat na disipulon si Santiago, “balet sumpa yo so Diablo, tan ibatikan to kayo. Onapit kayo ed Dios, tan sikatoy onapit ed sikayo.”​—Sant. 4:7, 8.