1. Antoy ibabaga na Biblia nipaakar ed si Jehova, tan akin ya makaligliwa itan?

KASIN labay mon husgaan ka na totoo base ed kolor mo, itsuram, o kabaleg na laman mo? Siempre agmo labay. Maong labat ta ag-itayo huhusgaan nen Jehova base ed nanenengneng na too! Singa bilang, nen oobserbaan nen Samuel iray ananak nen Jesse, agto anengneng so anengneng nen Jehova. Imbaga nen Jehova ed si Samuel ya say magmaliw ya ari ed Israel et anak nen Jesse. Pero siopad sikara? Nen anengneng nen Samuel si Eliab, say panguloan ya anak nen Jesse, imbaga to: “Seguradon saya imay nilanaan nen Jehova.” Say amta nen Samuel et si Eliab so magmaliw ya ari ta guapo tan atagey ya laki. “Balet inkuan nen Jehova ed si Samuel: ‘Agka onnenengneng ed itsura tan katagey to, ta aliwan sikato so pinilik.’” Antoy naaralan tayo? “Say Dios et aliwan singa too ya onnenengneng ed akinpaway ya itsura, noagta si Jehova et onnenengneng ed puso.”​—1 Sam. 16:1, 6, 7.

2. Akin et agtayo nepeg ya husgaan so arum base labat ed nanenengneng tayo ya singa ibabaga na Juan 7:24? Mangiter na alimbawa.

² Lapud aliwa tayon perpekto, main-inomay tayon husgaan so arum base ed nanenengneng tayo. (Basaen so Juan 7:24.) Balet diad tua, agtayon talaga nakabat so sakey ya too base labat ed satan. Bilang alimbawa, anggano marunong tan eksperiensyado lay sakey a doktor, agto naamtaan so tuan kondisyon na pasyente no nengnengen to labat. Kaukolan ton dengelen a maong so pasyente pian naamtaan to ray sakit to nensaman, saray sintomas ya nalilikna to, tan no antoy epekto na satan ed emosyon to. Ompan ibaga to ni ingen ya manpa-X-ray  pian naeksamin so walad dalem na laman to. No ag-iratan gawaen na doktor, ompan aliwa so ibaga ton sakit na pasyente. Mipadpara, agtayo natalosan so tuan situasyon na saray agagi no basta tayo labat onnengneng ed itsura da. Kaukolan tayon talosan so tuan inkatoo ra. Siempre agtayo sarag ya basaen so puso, kanian agtayon balot naparaan si Jehova ya talagan natatalosan toy kipapasen na arum. Balet wala ray nagawaan tayo pian naalig tayoy Jehova. Anto iratan?

3. Panon ya makatulong iray alimbawa ed Biblia ed sayan artikulo pian naalig tayoy Jehova?

³ Panon ya tratratoen nen Jehova iray mandadayew ed sikato? Dedengelen to ra. Ikokonsidera tan tatalosan toy inkatoo tan situasyon da. Tan ipapanengneng toy pililikna ed sikara. Legan tayon aaralen no panon itan ya ginawa nen Jehova ed si Jonas, Elias, Hagar, tan Lot, nengnengen tayo no panon tayon naalig si Jehova diad panagtrato tayo ed saray agagi.

4. Anto ray rason ya negatibo so pakanengneng tayo ed si Jonas?

⁴ Lapud agtayo amta so amin ya detalye, ompan husgaan tayoy Jonas tan ibaga tayon sikatoy agnapanmatalekan tan agmatoor. Ingganggan nen Jehova si Jonas ya mangiyabawag na panangukom ed Ninive. Balet imbes ya onunor, linmugan ed barko ya paarap ed duman direksion pian “onarawid si Jehova.” (Jon. 1:1-3) No sika, kasin ikdan mo ni Jonas na komaduan pankanawnawa? Ompan andi la. Balet ontan so ginawa nen Jehova.​—Jon. 3:1, 2.

5. Antoy naaralan mod si Jonas diad samay pikakasi to ya nabasad Jonas 2:1, 2, 9?

⁵ Naamtaan tayoy tuan inkatoo nen Jonas diad pikakasi to nen sikatoy walad dalem na sira. (Basaen so Jonas 2:1, 2, 9.) Sakey labat itan ed saray dakdakel ya pikakasi to, tan ontulong itan pian agtayo husgaan si Jonas anggano imbatikan toy asainmin to. Nanengneng tayo ed samay pikakasi to ya sikatoy mapaabeba, maapresya, tan labalabay ton unoren si Jehova. Kampega ya pinalampas nen Jehova so lingo nen Jonas, inebatan toy pikakasi to, tan inusar to nin siansia bilang propeta!

6. Anto ray maabig ya resulta no ondengel tayon maong?

⁶ Pian napakiwas tayon dengelen a maong so arum, nepeg ya manpaabeba tan mananos itayo. Seguradon maabig so resulta no ondengel ka. Unona, agka mannonot na negatibo. Komadua, naamtaan moy nalilikna na agim tan no akin ya onmay ginawa to, kanian  talosan mo. Tan komatlo, ompan natulongan mo ni ya mas nakabat toy sarili to. Di ba no maminsan, agtayo met natatalosan so nalilikna tayo likud labat no ibaga tayo itan ed arum? (Pro. 20:5) Oniay inamin na sakey ya elder ed Asia: “Aminsan, nansalita ak lan tampol anta agak ni dinmengel. Imbagak ed sakey ya sister ya kaukolan ton paaligwasen so panagkomento to diad aral. Balet naamtaan ko ya ngalngali agmakabasa manaya kanian nanairapan ya mankomento.” Importante sirin ya ondengel ni so kada elder pian naamtaan toy amin a detalye antis ya mangiter na simbawa!​—Pro. 18:13.

7. Antoy naaralan tayo ed impantrato nen Jehova ed si Elias?

⁷ Saray arum ya agagi tayo et nanairapan ya mangibaga ed nalilikna ra lapud saray dinadalan da nensaman, binalegan dan kultura, odino talagan ontan so inkatoo ra. Antoy gawaen tayo pian ag-ira nababaingan ya ibagad sikatayo so nalilikna ra? Tandaan imay impantrato nen Jehova ed si Elias nen ibabatikan toy Jezebel. Pigaran agew ni pinalabas nen Elias antis ya nampikasi ed si Jehova pian ibalikas so nalilikna to. Tan dinmengel ya maong si Aman Jehova. Insan, pinabiskeg toy Elias tan inikdan toy importantin asainmin. (1 Ara. 19:1-18) Ompan kaukolan met nin palabasen so panaon antis ya ibagad sikatayo na saray agagi so nalilikna ra. Balet no mananos itayo ya singa si Jehova, nasabi lanlamang so panaon ya pantiwalaan da tayo la tan ibaga da ed sikatayo so nalilikna ra. No asinggeran da tayo, nepeg ya dengelen tayo ran maong.

8. Base ed Genesis 16:7-13, panon ya tinulongan nen Jehova si Hagar?

⁸ Si Hagar ya aripen nen Sarai et nagmaliw ya mapaatagey sanen asawa la nen Abram. Nen naamtaan nen Hagar ya sikatoy malukon, binalawbalaw toy Sarai ta anggapoy anak to. Linmoor so situasyon kanian sikatoy pinalayas nen Sarai. (Gen. 16:4-6) Lapud aliwa tayon perpekto, ompan isipen tayo ya si Hagar et alabas tan mamaong kanian duga labat so agawa ed sikato. Balet aliwan ontan so inisip nen Jehova. Angibaki na anghel ya mitongtong ed sikato. Imbaga na anghel ed sikato ya kaukolan toy manpaabeba, tan parakelen na Dios so ananak to. Atalosan nen Hagar ya sikatoy iimanoen nen Jehova tan amta Toy amin ya nagagawa ed sikato. Mandinayew si Hagar kanian oniay imbalikas to: “Sakey kan Dios a makakanengneng . . . ed siak.”​—Basaen so Genesis 16:7-13.

9. Anto ray inkonsidera nen Jehova diad impantrato tod si Hagar?

⁹ Anto ni ray anengneng nen Jehova ed si Hagar? Anengneng ton amin so dinadalan to tan saray subok ya inanosan to. (Pro. 15:3) Si Hagar et Ehipsio tan aripen na pamilyan Hebreo. Posible kasi ya no maminsan et nakakasian toy sarili to, tan makakailiw ed pamilya tan binalegan ton lugar? Aliwan sikato labat so asawa nen Abram. Diad saman a panaon, anggan saray matoor ya lalakin lingkor nen Jehova et aliwan saksakey so asawa ra. Balet aliwan onman so orihinal ya gagala nen Jehova. (Mat. 19:4-6) Kanian agla pankelawan ya pansengegan itan na panselos tan barongan ed pamilya. Anggaman agkinonsinte nen Jehova so impanbalaw nen Hagar ed si Sarai, inkonsidera To so inkatoo tan situasyon nen Hagar.

10. Antoy gawaen tayo pian mas nakabat tayo ray agagi?

¹⁰ Naalig tayoy Jehova no pansagpotan tayon talosan so sakey tan sakey. Kabaten ya maong iray agagi. Miistoryaan kad sikara antis tan kayari na aral, miulop kad sikara diad  ministeryo, tan no posible, imbitaan mo ra ed panangan. No ontan so gawaen mo, ompan naamtaan mo ya say sakey a sister ya singa suplada et mabaing labat manaya, say sakey a brother ya singa materyalistiko et maparawes manaya, odino say saniina ya lanang ya atrasado ed aral et napapasegsegang manaya. (Job 6:29) Siempre, agtayo nepeg ya ‘pibabalian so bilay na arum.’ (1 Tim. 5:13) Balet kaukolan tayon kabaten ya maong iray agagi tan amtaen tayo ray apalabas da tan saray dadalanen dan subok pian mas natalosan tayo ra.

11. Akin et importante ya kabaten a maong na saray elder iray agagi?

¹¹ Nagkalalo lan importante parad saray elder ya kabaten a maong iray agagin walad panangasikaso ra. Imanoen so alimbawa nen Artur ya manlilingkor bilang manangasikaso na sirkito. Kaiba so sakey nin elder, binisita ra so sakey a sister ya singa mabaing tan isisian toy sarili to. “Naamtaan mi ya inatey manayay asawa to pigaran taon labat kayari na impankasal da,” so kuan nen Artur. “Anggano mairap, apabaleg ton maespiritual so duaran ananak to. Natan balet et ngalngali agla makanengneng, tan nadi-depress. Pero mabiskeg nin siansia so panangaro tan pananisia tod si Aman Jehova. Naisip mi ya dakel manayay naaralan mi ed maong ya alimbawa na sayan sister.” (Fil. 2:3) Aaligen na sayan manangasikaso na sirkito so alimbawa nen Jehova. Kabat nen Jehova iray karnero to tan amta toy paniirap da. (Exo. 3:7) No kabkabat na saray elder iray agagi, mas amta ra no panon da ran tulongan.

12. Antoy maabig ya resulta nen mas kinabat nen Yip Yee so sakey ya kakongregasyon to?

¹² No kabaten mon maong so sakey ya agi ya nasyosyodotan kad ugali to, mas natalosan mo tan nipanengneng moy pililikna ed sikato. Niay sakey ya alimbawa. “Walay kakongregasyon kon maingal ya mansalita,” so kuan nen Yip Yee, sakey a sister a taga Asia. “Inisip ko ya aliwliway ugali to. Balet nen akaibak ed ministeryo, naamtaan ko ya nensaman manaya et iibaan to ray atateng to ya manlakoy sira diad tindaan. Kaukolan ton ikasil so boses to pian ondago ray kustomer.” Inyarum to: “Diman ko naaralan ya pian natalosan ko ray agagi, kaukolan ya kabaten ko ni ran maong.” Tua, kaukolan moy mansagpot pian mas nakabat mo ray agagi. Balet, tandaan mo ya no uunoren moy bilin na Biblia ya ‘ilukas mon maong so pusom,’ aaligen moy Jehova ya inar-aro toy “amin a klase na totoo.”​—2 Cor. 6:11-13; 1 Tim. 2:3, 4.

13. Singa akarekord ed Genesis 19:15, 16, antoy ginawa na saray anghel nen manpapaleen ni Lot, tan akin?

¹³ Walay inkagawa ed bilay nen Lot ya kaukolan to lay onkiwas balet ta nampaleen ni tan agton tampol inunor so instruksion nen Jehova. Angibaki si Jehova na duaran anghel pian ibagad si Lot tan say pamilya to ya kaukolan da lay ompaway ed Sodoma. Akin? Imbaga ra: “Deralen mi iyan pasen.” (Gen. 19:12, 13) Kaimbuasan to, agnin siansia kinmiwas si Lot tan say pamilya to. Kanian binagaan la lamet na saray anghel si Lot. Pero “sikatoy manpapaleen ni.” Ompan isipen mo ya benger si Lot tan anggapoy pibabali to. Balet maan-anos si Jehova ed si Lot. “Lapud panangabagey nen Jehova,” sikaray binembenan ed lima na saray anghel tan impaway da ra ed syudad.​—Basaen so Genesis 19:15, 16.

14. Anto ray posiblin rason no akin ya naabagey nen Jehova si Lot?

¹⁴ Nayarin naabagey nen Jehova si Lot lapud pigaran rason. Ompan manaalangan si Lot ya taynanan so abung to lapud natatakot ed saray totoon manaayam ed paway na syudad. Aliwan satan labat. Seguradon abalitaan nen Lot imay agawa ed duaran ari ya naplag ed abot na aspalto diad asingger ya lawak. (Gen. 14:8-12) Bilang asawa tan ama, mapaga si Lot ya ompan walay mauges ya nagawa ed pamilya to. Sakey ni, mayaman si Lot kanian nayarin balibali so abung tod Sodoma. (Gen. 13:5, 6) Siempre, aliwan makatunongan iratan ya baraan pian agtampol unoren nen Lot si Jehova. Balet, agnampokus si Jehova ed lingo nen Lot tan sikatoy impasen Ton “matunong a too.”​—2 Ped. 2:7, 8.

15. Imbes ya husgaan tayon tampol so sakey ya too base ed nanenengneng tayod sikato, antoy nepeg tayon gawaen?

¹⁵ Imbes ya husgaan mon tampol so sakey ya too base ed nanenengneng mod sikato, gawam so anggaay nayarian mon talosan so nalilikna to. Ontan so ginawa nen Veronica ya taga Europe. “Walay sister ya singa akasibangot lan lanang,” so kuan to. “Mas labay toy manbukbukor. No maminsan, natatakot ak kanian agko aasinggeran. Balet naisip ko, ‘No  siak so walad situasyon to, kaukolan koy kaaro.’ Kanian inasinggeran ko tan kinumustak. Legan kamin maniistoryaan, imbalikas toy nalilikna to. Mas natatalosan ko la natan so situasyon to.”

16. Akin et nepeg tayon ipikasi ya tulongan itayo nen Jehova ya ipanengneng so pililikna?

¹⁶ Talagan si Jehova labat so makatalos ed sikatayo. (Pro. 15:11) Kanian manpatulong kad sikato ya nanengneng mo met komon so nanenengneng to ed arum tan naaralan mo no panon mon ipanengneng so pililikna ed sikara. Baleg so nitulong na pikakasi ed sakey ya sister ya si Anzhela pian nipanengneng toy tuan pililikna. Walay kakongregasyon to ya mairap ya pibagayan. Inamin nen Anzhela: “Singa agko napigilan ya kritikoen iman ya sister tan inisip ko ya mas maabig no iwasan ko la. Balet nampikasi ak ed si Jehova ya nipanengneng ko komon so pililikna ed sayan agi.” Kasin inebatan nen Jehova so pikakasi nen Anzhela? Intuloy to: “Intagar ko ed ministeryo tan abayag kamin nantongtong kayari to. Maan-anos ak ya dinmengel. Mas naarok la natan iyan sister, tan agak ontundan mamaseseg ed sikato.”

17. Antoy pansagpotan mon gawaen?

¹⁷ Agka mamipili na pangipanengnengan moy pililikna. Amin ya agagi et walay dadalanen dan problema, ya singa si Jonas, Elias, Hagar, tan Lot. No maminsan, sikaran mismo so nanggawa na problema da. Balet no isipen mo, amin tayo pa et asali tayo lay aproblema lapud sarili tayon lingo. Kanian duga labat ya iganggan itayo nen Jehova ya ipanengneng so pililikna ed sakey tan sakey. (1 Ped. 3:8) No uunoren tayoy Jehova, ontutulong tayo pian mansiansia so pankakasakey na pamilya tayo ed interon mundo anggano wala ray pandurumaan tayo. Kanian, komon ta gawaen tayoy anggaay nayarian tayon dengelen tan kabaten iray agagi, tan ipanengneng tayoy pililikna ed sakey tan sakey.