1-2. Anto so dondon, tan akin et kaukolan tayo itan?

NEN nankasalanan so perpekton too ya si Adan, naandi ed sikato so ilalon manbilay ya andi-anggaan. Pero aliwan sikato labat so apektado, adamay met anggan saray magmaliw ya ananak to. Anggapoy makatunongan ya nibaraan nen Adan ed ginawa to. Talagan ginagala toy mankasalanan. Saray ananak to balet ey? Atawir da labat so kasalanan. (Roma 5:12, 14) Duga labat ya nadusa si Adan na patey. Pero iray ananak to ey, wala kasi paraan pian niliktar ira ed sayan dusa? On, wala! Kayarin mismo na impankasalanan nen Adan, imbagan tampol nen Jehova no panon ton iliktar so minilyon ya magmaliw ya ananak nen Adan manlapud kasalanan tan ipapatey. (Gen. 3:15) Diad panaon ya pinili nen Jehova, ibaki toy Anak to diad dalin pian “iter toy bilay to” bilang dondon.—Mar. 10:45; Juan 6:51.

² Anto ’tay dondon? Diad Kristianon Griegon Kasulatan, say dondon et ontutukoy ed imbayar nen Jesus pian nabawi may abalang nen Adan. (1 Cor. 15:22) Akin et kaukolan tayoy dondon? On ta base ed Ganggan, say estandarte nen Jehova ed hustisya et “nepeg ya iter [so] bilay parad bilay.” (Exo. 21:23, 24) Lapud perpekton bilay so abalang nen Adan, perpekto met ya bilay so imbayar nen Jesus pian natumbok so estandarte na Dios ed hustisya. (Roma 5:17) Kanian sikatoy nagmaliw ya “Andi-anggaan ya Ama” ed amin ya mangipanengneng na pananisia ed dondon.—Isa. 9:6; Roma 3:23, 24.

3. Base ed Juan 14:31 tan 15:13, akin et akaparaan si Jesus ya iter so bilay to?

³ Akaparaan si Jesus ya iter so bilay to lapud inar-aro toy Ama to tan saray totoo. (Basaen so Juan 14:31; 15:13.) Satan met ya panangaro so rason no akin ya akapanmatoor  anggad patey tan agawaan ton amin so ipapagawa nen Ama to. Kanian nagawa lay orihinal ya gagala nen Jehova parad saray totoo tan diad dalin. Diad sayan artikulo, aralen tayo no akin ya inabuloyan na Dios ya manirap nin maong si Jesus antis ya ompatey. Pantongtongan tayo met so alimbawa na sakey ya nansulat ed Biblia ya pinabpabli toy dondon. Insan amtaen tayo no panon tayon nipanengneng ya misalsalamat tayo ed dondon tan no antoy gawaen tayo pian mas napabli tayoy ginawa nen Jehova tan Jesus parad sikatayo.

4. Ideskribe no panon so impatey nen Jesus.

⁴ Imadyin mo pa ray agawa antis ya inatey si Jesus. Diad tua, sarag to pa komoy onkerew na tulong ed dakdakel ya anghel pian protektaan da, pero pinaulyanan to labat ya sikatoy erelen tan sipsiplatan na saray Romanon sundalo. (Mat. 26:52-54; Juan 18:3; 19:1) Say inusar dan pansiplat ed sikato et amay ompanek tan ukisan toy laman. Insan da impasakbat ed si Jesus so ambelat ya poste ya pangipasakan ed sikato, anta mandatdala tan asugat-sugat lay beneg to. Inanosan to kalamor ya sinakbat paarap ed lugar ya pamateyan ed sikato. Balet nen agto lan talaga nasarag, impasakbat la na saray Romanon sundalo imay poste ed sakey ya laki ya say ngaran to et Simon. (Mat. 27:32) Kasabi da ed lugar ya pamateyan dad si Jesus, impasak day lima tan sali to. Nen impaalagey da la imay poste, seguradon pinasyan sakit so alikna nen Jesus legan ya nabibira iray sugat to. Akis lan akis si ina to tan agaylay ermen na saray kakaaro to. Saray Judion papangulo balet et kakantiawan tan elek-elekan da ni Jesus. (Luc. 23:32-38; Juan 19:25) Pigaran oras ya intepel nen Jesus so pinasyan sakit. Naksawan lay puso tan bala to kanian abet-abeten to lay ingas to. Antis ya nauyosan na linawa, nampikasi nin maksil, intuek toy ulo to, insan la inatey. (Mar. 15:37; Luc. 23:46; Juan 10:17, 18; 19:30) Talagan grabe impanirap to antis ya inatey!

5. Parad si Jesus, antoy mas ansakit nen say paraan na impamatey ed sikato?

⁵ Diad tua, say talagan sankasakitan ed si Jesus et aliwan say paraan na pamatey dad sikato, noagta say akusasyon da ya sikatoy managmudmora—anggapo kunoy respeto to ed Dios tan ed ngaran na Dios. (Mat. 26:64-66) Nanaburidoan to itan ya maong kanian akikasi ni ingen ed Ama to ya nipaliis komon ed satan ya kababaingan. (Mat. 26:38, 39, 42) Akin et inabuloyan nen Jehova ya manirap ya maong tan ompatey so inar-aro ton Anak? Pantongtongan tayoy taloran rason.

6. Akin et kaukolan ya nipasak si Jesus ed panamairapan ya poste?

⁶ Unona, kaukolan ya nipasak si Jesus ed poste pian nibulos iray Judio ed “samba na Ganggan.” (Gal. 3:10, 13) Nisamba odino naayew ira ta insipan dan unoren da so Ganggan na Dios pero agda ginawa. Anta atawir da la lanti kasalanan nen Adan, inaruman da ni kasalanan da, kanian talagan kanepegan day ompatey. (Roma 5:12) Base ed Ganggan na Dios ed bansan Israel, no say sakey a too et akagawa na kasalanan ya makanepegan na dusan ipapatey, talagan nepeg dan pateyen. Tan no maminsan, say bangkay et ibitay ed poste. * (Deu. 21:22, 23; 27:26) Kanian nen impasak si Jesus ed poste, singa to inako so dusa ya para komon ed saray Judio. Kanian minabang met ira ed dondon bagat to anggano onman so ginawa ra ed sikato.

7. Antoy komaduan rason no akin ya inyabuloy na Dios ya manirap so Anak to?

 ⁷ Say komaduan rason no akin ya inabuloyan na Dios ya manirap so Anak to et lapud labay ton iparaan parad pagmaliw ton Atagey a Saserdote. Asalin mismo nen Jesus ya aliwan mainomay ya unoren so Dios no say sakey et ondadalan ed graben subok. Onman la kairap so situasyon to kanian nampikasi “tekep na maksil ya akis tan saray lua.” Lapud “asali ton mismo so nanirap,” natatalosan toy liknaan tan pankaukolan tayo no nasusubok tayo kanian amta to no panon to tayon tulongan. Misalsalamat tayod si Jehova ta say pinili ton Atagey a Saserdote et mapangasi tan “makapilikna ed saray kakapuyan tayo.”—Heb. 2:17, 18; 4:14-16; 5:7-10.

8. Antoy komatlon rason no akin ya inyabuloy na Dios ya manirap ya maong si Jesus?

⁸ Say komatlon rason no akin ya inyabuloy nen Jehova ya manirap ya maong si Jesus et pian naebatan iyan importantin tepet: Manmatoor kasi ed si Jehova so sakey a too no ondalan la ed graben subok? Ibabaga nen Satanas ya andi! Manlilingkor tayo labat kuno ed Dios ta bebendisyonan to itayo. Tan singa to ibabaga ya kaparpara tayoy ama tayon si Adan, agtayo met kuno inaroy Jehova. (Job 1:9-11; 2:4, 5) Pero walay tiwala nen Jehova ed Anak to kanian inabuloyan ton ondalan ed sankagrabian lan subok. Nanmatoor si Jesus anggad patey kanian apaneknekan ya talagan matilatila si Satanas.

9. Akin et maong ya alimbawa si apostol Juan?

⁹ Lapud katuaan tungkol ed dondon, binmiskeg so pananisia na dakel ya Kristiano. Ag-ira tinmundan nampulong anggano amayamay so kinmontra ed sikara tan intepel day subok anggad intatken da. Say sakey ya alimbawa et si apostol Juan. Impulong toy katuaan tungkol ed Kristo tan ed dondon diad masulok ya 60 taon. Nen masulok lan 90 so taon to, sikatoy impriso na gobierno na Roma diad isla na Patmos tan impasen dan kriminal. Antoy rason? Say kuan to: “Lapud pansasalitak nipaakar ed Dios tan pantatasik nipaakar ed si Jesus.” (Apo. 1:9) Balibalin aligen so pananisia tan katooran nen Juan!

10. Anto ray insulat nen Juan ya pakapatnagan ya pinabpabli ton maong so dondon?

¹⁰ Nanengneng ed saray insulat nen Juan ya inar-aro toy Jesus tan papablien ton maong so dondon. Diad tua, masulok ya 100 ya beses ya nabasa ed sulat to so tungkol ed dondon tan no panon tayon minabang ed satan. Alimbawa, insulat nen Juan: “No walay mankasalanan, walay sakey a mananulong tayo a kaiba na Ama, salanti, si Jesu-Kristo.” (1 Juan 2:1, 2) Nanengneng met ed saray sulat nen Juan ya importante so “panagtasi nipaakar ed si Jesus.” (Apo. 19:10) Talagan pinabpablin maong nen Juan so dondon! Panon tayo met ya nipanengneng ya papablien tayo itan?

11. Antoy gawaen tayo no natutukso tayon manggawa na aliwa?

¹¹ Agka manpapadaeg ed tukso. No talagan papablien tayoy dondon, agtayo iisipen ya: ‘Ayos labat ya mankasalanan ak, ta onkerew ak lanlamang na perdona ed si Jehova.’ Aliwa itan. Say dugan isipen tayo no natutukso tayon manggawa na aliwa et: ‘Andi! Agko iya gawaen. Anta balbaleg so insakripisyo nen Jehova tan Jesus parad siak, insan oniay gawaen ko?’ Kerewen tayod si Jehova ya ikdan to tayo na pakpel ya gawaen so duga. Ipikasi tayon: ‘Ama, agmo komon aabuloyan ya nadaeg ak na tukso.’—Mat. 6:13.

12. Panon tayon niyaplika so bilin ya walad 1 Juan 3:16-18?

 ¹² Arom iray agagi. Ipapanengneng tayon papablien tayo so dondon no inar-aro tayo ray agagi. Akin? Ta aliwan sikatayo labat so dinondon nen Jesus, dinondon to met iray agagi tayo. Sikatoy akaparaan ya ompatey parad sikara, labay ton ibaga, inar-aro to ra. (Basaen so 1 Juan 3:16-18.) Nipanengneng tayo ya inar-aro tayo met iray agagi diad paraan na pantratrato tayo ed sikara. (Efe. 4:29, 31–5:2) Alimbawa, tulongan tayo iray mansasakit tan ondadalan ed subok, singa saramay naapektoan na kalamidad. Pero panon to no asakitan tayod ginawa o imbaga na sakey ya agi?

13. Akin et importantin mamerdona tayo?

¹³ Kasin no maminsan et mairap mon perdonaen so sakey ya agi? (Lev. 19:18) No on, makatulong iyan bilin: “Itultuloy yon itepel so sakey tan sakey tan mabulos a perdonaen so sakey tan sakey anggano walay rason na sakey ya ireklamo imay sakey. No panon a si Jehova et mabulos to kayon pinerdona, ontan met so gawaen yo.” (Col. 3:13) Kada no mamerdona tayo, ipapanengneng tayod si Aman Jehova ya papablien tayoy dondon. Anto ni ray gawaen tayo pian mas napabli tayo iyan regalo na Dios?

14. Antoy nepeg tayon gawaen pian mas napabli tayoy dondon?

¹⁴ Pisalamatan moy Jehova ed inter ton dondon. Oniay imbaga nen Joanna, ya 83 años ya sister ed India: “Diad saray pikakasik kada agew, agko lilingwanan so misalamat ed si Aman Jehova ta inter toy dondon.” Kada agew, nonot mo ray agawaan mon lingo tan ipikasim ed si Jehova ya perdonaen to ka komon. Siempre, no akagawa kay ambelat a kasalanan, kaukolan moy manpatulong ed saray elder. No ibagam itan ed sikara, dengelen da ka tan ipanonot dad sika iray bilin na Biblia. Ipikasi da ka tan kerewen dad si Jehova ya perdonaen to ka base ed dondon bagat nen Jesus pian “onabig” ka ed espiritual.—Sant. 5:14-16.

15. Akin et importantin aralen tan dalepdepen tayoy dondon?

¹⁵ Dalepdep moy dondon. “Makaakis ak kada no babasaen koy impanirap nen Jesus,” so imbaga nen Sister Rajamani ya mantaon na 73. Ompan nasasakitan ka met no iisipen moy impanirap na Anak na Dios. Pero diad tua, no diman mo mas dadalepdepen so impansakripisyo nen Jesus, diman met mas onaralem  so panangarom ed sikato tan ed Ama to. Kanian marakep no i-personal study’m so dondon pian mas nadalepdep mo nin maong.

16. Antoy epekto ed sikatayo no ibabangat tayod arum so dondon? (Nengnengen so litratod apis.)

¹⁶ Ibangat mod arum so dondon. Kada no ibabaga tayod arum so tungkol ed dondon, mas napabli tayo itan. Wala ray balibalin publikasyon tan video ya makatulong pian nipaliwawa tayo no akin ya kaukolan ya ompatey si Jesus. Singa bilang, sarag tayon usaren so leksion 4 na brosyur ya Maong a Balita ya Nanlapud Dios! Say title na sayan leksion et “Siopa si Jesu-Kristo?” Sarag tayo met ya usaren so kapitulo 5 na libron Antoy Ibabangat na Biblia? Say title na sayan kapitulo et “Say Dondon—Sankarakepan ya Regalo na Dios.” Tan kada taon, mas napapabli tayo so dondon no onaatendi tayo ed Memoryal na impatey nen Jesus tan no makulikuli tayon iimbitaan so arum ya onatendi met. Say pangibangat ed arum tungkol ed si Jesus et balbaleg ya pribilehyon inter nen Jehova ed sikatayo!

17. Akin ya say dondon so sankarakepan ya regalo na Dios ed totoo?

¹⁷ On, dakdakel so rason no akin ya kaukolan tayon pablien ya maong so dondon. Lapud dondon, sarag tayoy mikaaro ed si Jehova anggano aliwa tayon perpekto. Lapud dondon, seguradon naapiger so amin ya dineral na Diablo. (1 Juan 3:8) Lapud dondon, nasumpal ya amin so gagala nen Jehova diad dalin—magmaliw ya Paraiso so interon mundo! Tan lapud dondon, onsabi so panaon ya amin ya totoo et inar-aro day Jehova tan manlilingkor ira ed sikato. Komon ta kada agew et mannonot tayoy paraan ya nipanengneng tayon papablien tayo so dondon—say sankarakepan ya regalo na Dios ed totoo!