1-2. Anton ilustrasyon so makatulong pian natalosan tayoy 1 Pedro 2:21?

IMADYIN mon kaiba ka ed sakey a grupo ya manaakar diad lugar ya wala ray akatanem ya bomba. Pero kabisado na lider yo imay lugar. Legan ton manaakar, nanenengneng mo ray bakat to. Insan nen kien, agmo la nanengneng may lider. Pero agka naaburido ta wala ray bakat to ya sarag mon tumboken.

² Singa ontan met so situasyon tayo ran tuan Kristiano natan ta manbibilay tayo ed sayan mauges ya mundo. Maong labat ta angibaki si Jehova na perpekton Lider—say Anak ton si Jesu-Kristo, pian walay tumboken tayo. Diad 1 Pedro 2:21, inkompara nen apostol Pedro si Jesus ed sakey a lider. Singa samay lider ya abitla ed ilustrasyon diad parapo 1, angitilak si Jesus na saray bakat to ya sarag tayon tumboken. Aralen tayo natan iyan taloran tepet: Antoy labay ya ibaga na itumbok ed saray bakat nen Jesus? Akin et importantin tumboken tayo ray bakat to? Tan panon tayon nagawaan itan?

3. Antoy labay ya ibaga na itumbok ed bakat na sakey a too?

³ Antoy labay ya ibaga na itumbok ed bakat na sakey ya too? Diad Biblia, saray salitan “manakar” tan “sali” et ontutukoy no maminsan ed bilay na sakey ya too. (Gen. 6:9; Pro. 3:23) Saray gagawaen tan alimbawa na sakey ya too et nikompara ed saray bakat to legan ya manaakar. Kanian no imbagan tutumboken moy bakat na sakey a too, aaligen moy alimbawa to.

4. Antoy labay ya ibaga na itumbok ed saray bakat nen Jesus?

⁴ Antoy labay ya ibaga na itumbok ed saray bakat nen Jesus?  Diad simplin salita, aligen tayoy alimbawa to. Diad pinagkateman teksto na sayan artikulo, say tutukoyen nen apostol Pedro et say maabig ya alimbawa nen Jesus diad impantepel toy irap. Pero siempre, dakel ni ray sarag tayon aligen ed si Jesus. (1 Ped. 2:18-25) Diad tua, amin ya imbaga tan ginawa nen Jesus et balibalin aligen.

5. Sarag tayo kasin aligen so alimbawa nen Jesus anta aliwa tayon perpekto? Ipaliwawa.

⁵ Balet sarag tayo kasin aligen so alimbawa nen Jesus anta aliwa tayon perpekto? On, sarag tayo. Imanoen ya say imbaga nen Pedro et “maapit yon tumboken iray bakat [nen Jesus]”; agto imbaga ya perpekto tayon tumboken iratan. No gagawaen tayoy anggaay nayarian tayon tumboken iray bakat nen Jesus anggano aliwa tayon perpekto, nagagawaan tayo iyan bilin nen apostol Juan: “Mantultuloy [kayon] manbilay a singa ed impanbilay nen Jesu-Kristo.”—1 Juan 2:6.

6-7. Akin et nibaga tayon mas onapit tayo ed si Jehova no tumboken tayo iray bakat nen Jesus?

⁶ No tumboken tayo ray bakat nen Jesus, mas onapit tayo ed si Jehova. Akin et nibaga tayo itan? Unona, impanengneng nen Jesus so alimbawa no panon tayon napaliket so Dios. (Juan 8:29) Kanian no tumboken tayo ray bakat nen Jesus, napaliket tayoy Jehova. Tan seguradon onapit si Aman Jehova ed sikatayo no gagawaen tayoy anggaay nayarian tayon mikaaro ed Sikato.—Sant. 4:8.

⁷ Komadua, perpekton inalig nen Jesus so Ama to. Kanian oniay imbaga to: “Siopaman ya akanengneng ed siak et anengneng to met lay Ama.” (Juan 14:9) Maar-aro so impantrato nen Jesus ed totoo. Singa bilang, kinasian to may akating, tinalosan to may situasyon na biin manpaparala, tan aki-ermen tan aki-akis ed saray inateyan. No aaligen tayo iratan ya  ugali nen Jesus, aaligen tayo met lay Jehova. (Mar. 1:40, 41; 5:25-34; Juan 11:33-35) No aaligen tayoy Jehova, mas onelet so pikakaaro tayo ed Sikato.

8. Akin et ‘natalo’ tayo so mundo no tumboken tayoy bakat nen Jesus?

⁸ No tumboken tayo ray bakat nen Jesus, agtayo naimpluensyaan na sayan mundo. Diad samay labi antis na impatey nen Jesus, oniay imbaga to: “Tinalok so mundo.” (Juan 16:33) Labay ton ibaga, sikatoy agnampaimpluensya ed panagnonot, ambisyon, tan kagagawa na saray totoo ed sayan mundo. Agton balot nilingwanan so rason no akin ya linma diad dalin—pian napasanto so ngaran na Ama to. Sikatayo balet ey? Posiblin nabalang so pokus tayo lapud nambabangil so iyoopresi na sayan mundo. Pero no aligen tayoy Jesus ya akapokus ed panggawa na panlabayan nen Jehova, natalo tayo met so mundo!—1 Juan 5:5.

9. Antoy gawaen tayo pian mansiansia tayo ed dalan paarap ed bilay ya andi-anggaan?

⁹ No tumboken tayoy bakat nen Jesus, manbilay tayoy andi-anggaan. Nen nantepet so sakey ya mayaman ya kabataan a laki no antoy gawaen to pian nawalaan na bilay ya andi-anggaan, oniay imbaga nen Jesus: “Gala, magmaliw kan patumbok ko.” (Mat. 19:16-21) Oniay imbaga met nen Jesus ed saray Judio ya agmanisia ya sikato so Kristo: “Saray karnerok [et] tutumboken da ak. Ikdan ko ray bilay ya andi-anggaan.” (Juan 10:24-29) Imbaga met nen Jesus ed si Nicodemo ya membro na Sanhedrin ya saray “mangipapanengneng na pananisia ed sikato” et “nawalaan na bilay ya andi-anggaan.” (Juan 3:16) Ipapanengneng tayoy pananisia ed si Jesus no uunoren tayo ray bangat to tan aaligen tayoy alimbawa to. No gawaen tayo itan, mansiansia tayo ed dalan paarap ed bilay ya andi-anggaan.—Mat. 7:14.

10. Antoy gawaen tayo pian mas nakabat tayoy Jesus? (Juan 17:3, paimanod leksab)

¹⁰ Kaukolan tayon kabaten ya maong si Jesus pian maapit tayon natumbok iray bakat to. (Basaen so Juan 17:3 tan paimanod leksab.) Importante ya tuloytuloy tayon kabaten si Jesus. Aralen tayo iray ugali, panagnonot, tan prinsipyo tod bilay. Anggano abayag tayo lad katuaan, kaukolan ya tuloytuloy tayo nin kabaten si Jehova tan say Anak to.

11. Anto ray nabasa ed libron Mateo, Marcos, Lucas, tan Juan?

¹¹ Labalabay nen Jehova ya nakabat tayoy Anak to, kanian impaisulat to so apatiran Ebanghelyo—say libron Mateo, Marcos, Lucas, tan Juan. Nabasa ditan so bilay tan ministeryo nen Jesus nen wadiad dalin. Naamtaan tayo met iray imbaga, ginawa, tan alikna to. Makatulong irayan apatiran libro pian naynay tayon nanonotan so alimbawa  nen Jesus. (Heb. 12:3) Wadtan iray bakat ya intilak to. Kanian no aralen tayo iyan apatiran libro, mas lalo tayon nakabat si Jesus tan mas maapit tayon natumbok iray bakat to.

12. Antoy gawaen tayo pian makaaral tayo ed saray Ebanghelyo?

¹² Pian talagan makaaral tayo ed saray Ebanghelyo, agtayo labat basta babasaen iratan. Kaukolan ya aralen tayon maong tan dalepdepen tayo. (Ikompara so Josue 1:8, paimanod leksab.) Pantongtongan tayo natan no antoy nepeg tayon gawaen pian nadalepdep tan niyaplika tayo iray nababasa tayo ed saray Ebanghelyo.

13. Antoy gawaen mo pian magmaliw ya mabilabilay ed isip mo iray nababasam ed Ebanghelyo?

¹³ Unona, gawam ya mabilabilay ed isip mo iray nababasam ed Ebanghelyo. Imadyin moy nababasam ya singa nanenengneng, nalilikna, tan narerengel mo iray nagagawa. Makatulong no man-research ka ed saray publikasyon ya itatarya na organisasyon nen Jehova. Aral moy konteksto—saray agawa antis tan kayari na samay salaysay ya babasaen mo. I-research mo iray totoo tan lugar ya abitla ditan. No say babasaen mon salaysay et akarekord met ed arum ya Ebanghelyo, pankomparam iratan. Ta no maminsan, wala ray detalye ya agnisulat ed sakey ya Ebanghelyo, pero nabasa ed sananey ya Ebanghelyo.

14-15. Antoy gawaen tayo pian niyaplika tayo iray nanaaralan tayod Ebanghelyo?

¹⁴ Komadua, iyaplikam iray nababasam ya salaysay ed Ebanghelyo. (Juan 13:17) Kayarim ya inaral so sakey a salaysay, itepet mo iraya: ‘Antoy naaralan kod saya ya niyaplikak ed sarilik? Panon ko kasi yan nausar pian natulongan ko met so arum?’ Isip mo no siopay labay mon pasesegen, insan istoryam ed sikato iray naaralan mo.

¹⁵ Gawaen tayo sirin iyan duaran apantongtongan tayo. Aralen tayo natan so salaysay tungkol ed pobrin balo ya naimano nen Jesus diad templo.

16. Istoryam pay naiimadyin mon nagagawa base ed Marcos 12:41.

¹⁶ Gawam ya mabilabilay ed isip mo so salaysay. (Basaen so Marcos 12:41.) Imadyin mo iyan eksena ya agawa nen Nisan 11, 33 C.E. Pigaran agew labat la et ompatey lay Jesus. Ngalngali sanagew ya nambangat si Jesus diad templo. Sikatoy inasinggeran na saray lider na relihyon ya kontra ed sikato. Say arum et kukuestionen day autoridad to, tan wala ray mantetepet met ed sikato ta labay dan anapan na lingo. (Mar. 11:27-33; 12:13-34) Linmad arum ya pasen na templo si Jesus, posiblin diad parte ya tatawagen ya Sular na Bibii. Ditan et sankabantag to iray pananginan na donasyon. Inmirong si Jesus tan inobserbaan to iray totoo ya mangipepelag na donasyon da. Dakel so anengneng ton mayayaman ya mandodonasyon. Seguro, sankarengel toy kalansing na dakdakel ya sinsilyo ya ipepelag da.

17. Antoy ginawa na pobrin balo ya abitla ed Marcos 12:42?

¹⁷ Basaen so Marcos 12:42. Insan nagugunoyan, walay nitan lan bii—“sakey a pobrin balo.” Nala toy imano nen Jesus. (Luc. 21:2) Mair-irap so bilay to yan bii; seguro ngalngali anggapoy isaliw toy naakan. Pero linma nin siansia ed sakey ed saray pananginan na donasyon tan ngalngali agto ipanengneng so duaran angkelag ya sinsilyo ya bemben to. Anganko, ag-anggan kinmalansing nen impelag to. Pero amta nen Jesus so indonasyon to—duaran lepta. Atan so sankamelagan ya sinsilyo diad saman ya panaon. Ag-itan ingen makasaliw na sakey ya anuyaw o siwit, anta atan lay sankamuraan ya manok ya naakan ed lugar da.

18. Base ed Marcos 12:43, 44, antoy imbaga nen Jesus ed donasyon na samay balon bii?

¹⁸ Basaen so Marcos 12:43, 44. Pandinayewan nen Jesus so ginawa na balo. Kanian tinawag to ray disipulo to, inturo to may balo, insan to imbagan: “Mas dakel ni so impelag na sayan pobrin balo a bii nen say impelag na amin.” Akin et ontay imbaga nen Jesus? Oniay intuloy to: “Ta say impelag dan amin [saramay mayayaman] et nanlapud saray sulok da, balet sikato, anggaman ed pankakkaukolan to et impelag toy amin a walad sikato, amin lan pambilay to.” Nen indonasyon na sayan matoor ya balo so alenleneg la kalamor ya kuarta to, singa to imbaga ed si Jehova ya, ‘Ama, sikayo lay akauley ed siak.’—Sal. 26:3.

19. Anton importantin leksion so naaralan tayo ed imbaga nen Jesus tungkol ed ginawa na pobrin balo?

¹⁹ Iyaplikam so naaralan mo. Itepet mod sarilim, ‘Anton leksion so naaralan kod imbaga nen Jesus tungkol ed ginawa na pobrin balo?’ Isip mo pa may balo. Seguradon labay to met komon ya mas baleg so niiter to parad si Jehova. Pero diad tua, anggano melmelag so indonasyon to, inter toy sankaabigan tan anggaay nayarian to parad si Jehova. Tan amta nen Jesus ya papablien itan nen Ama to. Nia so importantin leksion ya naaralan tayo: Naliliketan si Jehova no iter tayod sikato so sankaabigan tayo—say interon puso tan interon kamarerwa ya panaglingkor. (Mat. 22:37; Col. 3:23) Naliliketan si Jehova no gagawaen tayoy anggaay nayarian tayo! Onaplika iya ed oras tan biskeg ya uusaren tayo ed panagdayew, singa say pampupulong tan pipiaral tayo.

20. Panon mon niyaplika so leksion ya naaralan mo ed samay salaysay tungkol ed pobrin balo?

²⁰ Panon mon niyaplika so leksion ya naaralan mo ed sayan salaysay tungkol ed pobrin balo? Isip mo no siopa ran agagi so mankaukolan na panamaseguro ya naliliketan si Jehova ed pansasagpot da. Singa bilang, kasin walay kabat mon akulaw lan sister ya nakokonsiensia  odino nalilikna ton anggapo lay kana to ta limitado lay nagagawaan tod ministeryo? Odino wala kasi kabat mon brother ya walay graben sakit to tan nadidismaya lapud agla regular ya makakapiaral? Napaseseg mo ra no mangibaga ka na saray “maabig a salita” ya mamabiskeg ed sikara. (Efe. 4:29) Istoryam ed sikara so naaralan mo ed samay salaysay tungkol ed pobrin balo. Ipanonot na satan ed sikara ya naliliketan si Jehova no iiter tayoy sankaabigan tayo. (Pro. 15:23; 1 Tes. 5:11) No kokomendaan mo iray agagi lapud iiter dad si Jehova so sankaabigan da anggano singa melmelag labat itan, maapit mon tutumboken so bakat nen Jesus.

21. Antoy determinadom ya gawaen?

²¹ Misalsalamat tayo ta dakel so nabasa tayon detalye ed bilay nen Jesus diad saray Ebanghelyo. Makatulong iratan pian sikatoy naalig tayo—pian maapit tayon natumbok iray bakat to! Balibali sirin ya diad personal study o Family Worship tayo et aralen tayo so Ebanghelyo. Tandaan, makaaral tayo labat no gawaen tayon mabilabilay ed isip tayo iray salaysay ditan tan no iyaplika tayod bilay tayo. On, kaukolan tayon aligen iray ginawa nen Jesus. Pero kaukolan tayo met ya dengelen iray imbaga to. Diad ontumbok ya artikulo, amtaen tayo no anto ray naaralan tayo ed saray sampot ya imbaga nen Jesus antis ya ompatey.