Nen manpapanabos lay Jesus, akin et imbaga to iramay salita nen David ya walad Salmo 22:1?

Sakey ed saray sampot ya imbaga nen Jesus antis ya ompatey et nabasad Mateo 27:46 tan Marcos 15:34: “Dios ko, Dios ko, akin et pinaulyanan mo ak?” Nen imbaga iya nen Jesus, sinumpal to imay propesiyan imbaga nen David ya walad Salmo 22:1. Pero agto labay ya ibagan sikatoy ombabarong ed Ama to odino kinmapuy lay pananisia to. Ta diad tua, akaparaan si Jesus ya ompatey tan amta toy rason no akin. (Mat. 16:21; 20:28) Amta to met ya diad ipatey to, agmangiyan si Jehova na “alar ed paliber to” ya manprotekta ed sikato. (Job 1:10) Inabuloyan nen Jehova ya manirap si Jesus pian napaneknekan to ya talagan matoor anggad ipapatey.—Mar. 14:35, 36.

Kanian akin ya imbaga nen Jesus iraman ya salita ya walad Salmo? Agtayo segurado no akin, pero nia ray posiblin rason. *

Nen imbaga itan nen Jesus, nayarin idadanet to ya sikatoy ag-ipaliis nen Jehova ed ipapatey. Bilang sakey ya too, naeksperiensya nen Jesus so ansaki-sakit ya klase na ipapatey ta ag-impaliis nen Jehova ed satan. Amta to ya kaukolan ton “natawayan [so] ipapatey parad kada too” pian nabayaran to so dondon.—Heb. 2:9.

Nen imbaga nen Jesus so pigaran salita ed saman ya salmo nen David, ompan labay  ton ipaimano so interon salmo. Kabisado na saray Judio nensaman iray salmo, kanian no walay narengel dan anggan sakey labat ya bersikulo, nanonotan dan tampol no anton salmo so angalaan ed satan. Kanian nen imbaga nen Jesus iramay salita nen David, posiblin labay ton ipanonot ed saray Judion papatumbok to so dakdakel ya propesiya tungkol ed ipatey na Mesias ya walad saman ya salmo. (Sal. 22:7, 8, 15, 16, 18, 24) Tan nanonotan da ya diad bandad sampot na sayan salmo et mangirarayew ed si Jehova bilang ari ed interon dalin.—Sal. 22:27-31.

Nen imbaga nen Jesus iraman ya salita nen David, nayarin ipapaimano to ya anggapoy kasalanan to. Antis ya impasak si Jesus, ilegal so impanlitis dad sikato tan senentensiaan da na ipapatey ta agto kuno rerespetoen so Dios. (Mat. 26:65, 66) Lablabi la nen nilitis da tan ag-atumbok so dugan proseso. (Mat. 26:59; Mar. 14:56-59) Kanian nen imbaga nen Jesus ya “Dios ko, Dios ko, akin et pinaulyanan mo ak?” nayarin ipapaimano to ya anggapoy ginawa ton krimen ya makanepegan na sentensian patey.

Nayarin ipapanonot nen Jesus ya anggano dinmalan ed irap si David, agto labay ya ibagan nakal lay pabor nen Jehova ed sikato. Nen imbaga nen David ya “Dios ko, Dios ko, akin et pinaulyanan mo ak?” agto labay ya ibagan kinmapuy lay pananisia to ed Dios. Nanengneng ed sinmublay ya imbaga to ya walay tiwala ton iliktar nen Jehova iray lingkor To. Tan dia tua, dinengel nen Jehova so ikekerew toy tulong. (Sal. 22:23, 24, 27) Ontan met so nagmaliw ya situasyon nen Jesus ya “Anak nen David.” Anggano sikatoy inabuloyan nen Jehova ya ipasak ed panamairapan ya poste, agto labay ya ibagan nakal lay pabor nen Jehova ed sikato.—Mat. 21:9.

Ompan labay labat nen Jesus ya ipaway so nalilikna to ed impangiyabuloy nen Jehova ya manirap pian nipanengneng to ya talagan matoor. Diad tua, agpa labay nen Jehova ya manirap tan ompatey so Anak to. Nagmaliw labat itan ya parte na gagala nen Jehova nen nanrebelde si Adan tan Eva. Anggapoy ginawa nen Jesus ya aliwa pero kaukolan toy manirap tan ompatey pian naebatan iramay isyu ya ginawa nen Satanas tan pian nibayar toy bilay to, diad ontan et nabawi may abalang nen Adan. (Mar. 8:31; 1 Ped. 2:21-24) Nagawa labat iya no temporaryon ekalen nen Jehova so proteksion to ed si Jesus.

Nayarin labay nen Jesus ya manpokus iray papatumbok to ed rason no akin ya inabuloyan nen Jehova ya onman so ipatey to. * Amta nen Jesus ya say ipatey to bilang kriminal diad panamairapan ya poste et nayarin pakagapolan na arum ya papatumbok to. (1 Cor. 1:23) Pero no say isipen da et no anton talagay rason na impatey nen Jesus, natalosan da ya aliwan kriminal, noagta Manangiliktar.—Gal. 3:13, 14.

Antokaman so rason no akin ya imbaga iman nen Jesus, say segurado et amta to ya gagawaen toy linawa nen Jehova. Kayari to iman ya imbaga, say inkuan to et: “Asumpal la!” (Juan 19:30; Luc. 22:37) Lapud inabuloyan nen Jehova ya manirap tan ompatey si Jesus, asumpal ya amin nen Jesus so ipapagawa nen Ama to. Tan lapud satan et asumpal to so amin ya propesiya tungkol ed sikato ya “nisulat ed Ganggan nen Moises tan ed sulat na saray Propeta tan Salmo.”—Luc. 24:44.