1. Anto ran espiritual ya goal so sarag tayon gawaen?

 LABALABAY tayoy manlingkor ed si Jehova ta inar-aro tayo. Tan siempre, labay tayon iter so ‘the best’ tayo ed sikato. Pero pian niiter tayoy ‘the best’ tayo, dapat walay espiritual ya goal tayo. Singa bilang, sarag tayon i-goal ya ipanengneng iray balibalin ugali, aralen iray skill ya mausar ed organisasyon, tan tulongan iray agagi diad nanduruman paraan. *

2. Akin et importante ya walay espiritual ya goal tayo tan pansagpotan tayon gawaen itan?

² Akin et labay tayoy onaligwas ed espiritual? Say manunan rason et labay tayon napaliket si Aman Jehova. Seguradon makakaimis si Jehova no nanenengneng to ya uusaren tayoy talino tan abilidad tayo diad panlilingkor tayod sikato. Say sakey nin rason et labay tayon tulongan iray agagi. (1 Tes. 4:9, 10) Walan-wala ni aligwasan tayo ed espiritual anggano abayag tayo lad katuaan. Nengnengen tayo no panon tayon nagawaan itan.

3. Base ed 1 Timoteo 4:12-16, antoy impaseseg nen apostol Pablo ed si Timoteo?

³ Nen impawit nen apostol Pablo imay unonan sulat to ed si Timoteo, elder lay Timoteo. Pero pinaseseg nin siansia nen Pablo ya itultuloy toy onaligwas ed espiritual. (Basaen so 1 Timoteo 4:12-16.) Kasin naimanom imay duara ya impaseseg nen Pablo ed si Timoteo? Unona, binilin toy Timoteo ya ipanengneng to ray kualidad ya singa say panangaro, pananisia, tan kalinisan. Komadua, binilin toy Timoteo ya paaligwasen toy panagbasa to ed publiko, paraan na panagbilin to, tan say panagbangat to. Pantongtongan tayo natan so alimbawa  nen Timoteo, tan amtaen tayo no anto ran goal so sarag tayon gawaen pian napaaligwas tayoy panlilingkor tayod si Jehova tan mas dakel so nagawaan tayod ministeryo.

4. Base ed Filipos 2:19-22, akin et mausa-usar si Timoteo ed si Aman Jehova?

⁴ Akin et mausa-usar si Timoteo ed si Aman Jehova? On ta maomaong si Timoteo tan balibali ugali to. (Basaen so Filipos 2:19-22.) Base ed impandeskribe nen Pablo, si Timoteo et mapaabeba, matoor, makuli, tan nailaloan. Maar-aro tan manonot ed saray agagi. Kanian naar-aro nen Pablo si Timoteo, tan imbaki to ya ontulong ed saray kongregasyon. Mairap itan ya asainmin pero baleg so tiwala nen Pablo ya nagawaan itan nen Timoteo. (1 Cor. 4:17) No ipanengneng tayo met iray ugali ya labalabay nen Jehova, naar-aro to tayo tan lalo to tayon usaren ed kongregasyon.—Sal. 25:9; 138:6.

5. (a) Panon mon naamtaan no anton ugali so nepeg mon paaligwasen? (b) Base ed litrato, antoy ginawa na mas ugaw ya sister pian magmaliw ya mas matulong ed saray agagi?

⁵ Manpili na ugali o kualidad ya labay mon paaligwasen. Ipikasim tan isip mo no anto ran ugali so kaukolan mo nin paaligwasen. Manpili kay sakey ya pampokusan mo. Singa bilang, kasin labay moy magmaliw ya mas matulong ed saray agagi? Kasin nalilikas mod sarilim ya kailangan mo nin paaligwasen so pangipanengneng na tuan panangasi tan panamerdona? Maabig no mantepet ka ed maespiritual ya kaarom no anto ray ni-suggest to pian mas naipanengneng mo irayan kualidad.—Pro. 27:6.

6. Antoy gawaen mo pian nagawaan moy goal mo ya paaligwasen so sakey ya ugali o kualidad?

⁶ Pansagpotan mon gawaen so goal mo. Maabig no i-personal study’m so ugali o kualidad ya labay mon paaligwasen. Singa bilang, ompan labay mon aralen so mamerdona ya manlapud puso. Maabig no basaen mo nin unona iray alimbawa ed Biblia ya mabulos ya amerdona tan saramay aga amerdona, insan dalepdep mo iratan. Say sakey ya maong ya alimbawa et si Jesus. Mabulos ton pinerdona so kasalanan na arum. (Luc. 7:47, 48) Say nenengnengen to et say kamaongan na sakey ya too, aliwan saray lingo. Duma balet iray Fariseo ta “ipapasen dan anggapoy kakanaan na arum.” (Luc. 18:9) No adalepdep mo la irayan alimbawa, tepetan moy sarilim: ‘Siak ey, antoy nanenengneng kod arum, kasin say  maong ya ugali ra o saray lingo ra?’ No ngalngali agmo naperdona so sakey ya too, isip mo so amin ya balibalin ugali to, tan ilistam iratan. Insan mo tepetay sarilim: ‘Anto kasi pakanengneng nen Jesus ed sayan too? No si Jesus so walad situasyon ko, kasin perdonaen to?’ No walay onian study project tayo, nauman tayoy panagnonot tayo. Ompan diad gapo et nairapan ka nin siansia ya perdonaen so akasakit ed sika. Pero no walay onian study project mo, napasalan mo lanlamang so mamerdona.

7. Panon ya uusaren nen Jehova iray agagin “marundunong a mankimey”? (Proverbio 22:29)

⁷ Say sakey nin marakep ya i-goal et say panaral na skill ya mausar ed organisasyon. Isip mo pa so karakel na boluntaryo ya kaukolan pian makapangipaalagey tayoy Bethel, Assembly Hall, tan Kingdom Hall. Dakel ya agagi so akaaral na skill nen akaiba dan namboluntaryo iray agagi ya marundunong ya mantrabaho. Singa nanengneng ed litrato, anggan saray sister et makakaaral na skill ya nakaukolan ed panmintina na saray Assembly Hall tan Kingdom Hall. Saray brother tan sister ya “marundunong a mankimey” so uusaren nen Jehova (say “andi-anggaan ya Ari”) tan si Jesus (say “Ari na saray arari”) pian nasumpal so gagala da. (Basaen so Proverbio 22:29; 1 Tim. 1:17; 6:15) Siempre, tandaan tayo ya say rason no akin ya manaral tayoy skill et lapud labay tayon nidayew si Jehova, aliwan say sarili tayo.—Juan 8:54.

8. Antoy gawaen mo pian antam no anton skill so aralen mo?

⁸ Manpili na sakey ya skill ya labay mon aralen. Anto kasin skill so pampokusan mo? Tepetan mo ray elder ed kongregasyon yo tan anggan say manangasikaso na sirkito no anton skill so ni-suggest da ya aralen mo. Singa bilang, ompan i-suggest da ya i-improve moy panagpaliwawam o panagbangat mo. No ontan so suggestion da, tepetan mo ra no antoy espisipiko ya kaukolan mon paaligwasen tan mansagpot ka pian man-improve kad satan. Panon mon nagawaan itan?

9. Antoy gawaen mo pian nagawaan moy goal mo ya manaral na sakey ya skill?

⁹ Pansagpotan mon gawaen so goal mo. Antoy gawaen mo no labay mon i-improve so panagbangat mo? Aral mon maong imay brosyur ya Manseet Ka ed Panagbasa tan Panagbangat. No walay asainmin mo diad aral ed midweek, misuyo ka ed kualipikadon brother ya patiuna ton dengelen so asainmin mo, tan tepetan mo no anto ni ray ni-suggest to ya paaligwasen mo. Maabig met no ipasal moy manparaan ya masakbay. No ontan so gawaen mo, nanengneng na agagi ya agka labat marunong ya manbangat, noagta maseet ka met tan talagan nansagpotan moy asainmin mo.—Pro. 21:5; 2 Cor. 8:22.

10. Antoy gawaen tayo no nanairapan tayo ed skill ya labay tayon paaligwasen? Mangiter na alimbawa.

¹⁰ Panon to no anggan antoy pansasagpot mo et nanairapan ka nin siansia ed sakey ya skill ya labay mon paaligwasen? Itultuloy mo labat tan agka onsusuko. Makaaral tayo ed alimbawa nen Brother Garry. Lapud nanairapan ya manbasa, nababaingan kunon maong nensaman ya manbasa diad aral. Pero maseet ton inaral so dugan panagbasa tan agsinmuko. Baleg kunoy nitulong ed sikato na saray suggestion ya walad publikasyon tayo tan say impangipasal ed sikato na saray kualipikadon brother. Kanian natan et sarasarag to lay manpaliwawa ed Kingdom Hall, sirkiton asemblea, tan anggan diad kombension!

11. Singa si Timoteo, antoy makatulong pian mas dakel so nagawaan tayo parad si Jehova?

 ¹¹ Kasin nagmaliw ya marundunong ya managbangat tan managpaliwawa si Timoteo? Anggapoy nabasa ed Biblia, pero seguradon nagmaliw ya mas epektibo ed saray responsabilidad tod kongregasyon lapud inunor toy bilin nen Pablo. (2 Tim. 3:10) Singa si Timoteo, no aralen tayo ray nanduruman skill tan pansagpotan tayon paaligwasen iray abilidad tayo, mas akaparaan tayon mangawat na kaaruman iran responsabilidad.

12. Antoy agmo nalinglingwanan ya agawad bilay mo ya tinulongan ka na agagi?

¹² Misatsalamat tayo ed tulong na agagi. Singa bilang, no naospital ka, seguradon misatsalamat ka no pasyaren ka na saray elder ya membro na Hospital Liaison Committee o Patient Visitation Group. No ondadalan kad problema o subok, seguradon makainawa ka no walay maar-aron elder ya ondengel tan mamabiskeg ed sika. No kaukolan moy tulong ed sakey ya Bible study’m, seguradon naliketan ka no walay payunir ya mangiba ed sikan mangiyaral tan man-suggest no panon mo nin napaaligwas so panagbangat mo. Amin irayan agagi et malikeliket ya ontutulong ed sikatayo. Nalikna tayo met itan ya liket no akaparaan tayon ontulong ed arum. Kuan nen Jesus: “Mas makapaliket so mangiter nen say mangawat.” (Gawa 20:35) Antoy gawaen mo sirin no walay onian goal mo?

13. Antoy dapat mon tandaan no maniisip kay goal mo?

¹³ Dapat espisipiko ka no maniisip kay goal mo. Ta no aliwan espisipiko so goal mo, mas mairap so manplano no panon mo itan ya gawaen, tan agmo naamtaan no kasin agawaan mo la o andi ni. Singa bilang, agmo labat ibabaga ya, ‘Labay koy onseseg.’ Dapat walay malinew tan espisipikon goal ed nonot mo no panon kan onseseg. No wala lay naisip mo ya espisipikon goal, maabig no isulat mo itan, insan iplanom no panon mon nagawaan.

14. Akin et nepeg ya akaparaan tayon man-adjust anggano walay goal ya labalabay tayon gawaen?

¹⁴ Anggano walay goal ya labalabay tayon gawaen, dapat akaparaan tayon man-adjust. Akin ey? On ta agtayo kontrolado so amin ya situasyon. Isipen pay apostol Pablo. Sikato so sakey ed saray tinmulong pian nabuo so  kongregasyon ed syudad na Tesalonica. Tan seguradon say goal to et makapanbayag ni diman pian natulongan to ray agagi ta balo ni rad katuaan. Pero nen nipeligroy bilay nen Pablo ta tutugisen na saray onkokontra, apilitan ya onlad arum a lugar. (Gawa 17:1-5, 10) No mansiansia ed Tesalonica si Pablo, ompan nadamay iray agagi. Kanian nan-adjust si Pablo ta anguman so situasyon. Pero anggano wala lad arum ya lugar, nanggawa nin siansiay paraan pian natulongan to ray agagi ed Tesalonica. Imbaki toy Timoteo ed Tesalonica pian agnapaulyanan so espiritual ya pankaukolan na saray agagi diman. (1 Tes. 3:1-3) Maong labat ta akaparaan met si Timoteo ya ontulong!

15. No manguman so situasyon tayo, akin et posible ya manguman met so goal tayo? Mangiter na alimbawa.

¹⁵ Antoy naaralan tayo ed naeksperiensya nen Pablo diad Tesalonica? Ompan walay labalabay tayon goal pero anguman so situasyon tayo kanian imposible lan nagawaan tayo itan. (Ecl. 9:11) No ontan so situasyon mo, manisip kay arum ya goal ya sarag mon gawaen. Ontan so ginawa na sanasawan si Ted tan Hiedi. Dati iran Bethelite, pero pinmaway ira lapud nansakit na grabe so sakey ed sikara. Pero lapud inar-aro day Jehova, nanisip iray paraan pian mas dakel ni so nagawaan da ed ministeryo. Nan-regular payunir ira. Insan ag-abayag, niyasain ira bilang espisyal payunir. Akapan-training ni ingen si Ted bilang substitute circuit overseer. Pero kalabas na panaon, anguman so age requirement parad saray circuit overseer, kanian amta nen Ted tan Hiedi ya agla ra makapanlingkor ed sirkito. Anggano adismaya ra, say ninonot da la et makapanlingkor ni ran siansia ed si Jehova diad arum ya paraan. Oniay imbaga nen Ted: “Diad amin ya agawad bilay mi, naaralan mi ya agtayo labat manpopokus ed saksakey ya asainmin o pribilehyo.”

16. Antoy naaralan tayo ed Galacia 6:4?

¹⁶ Agtayo kontrolado so amin ya nagawad bilay tayo. Kanian agtayo dapat iisipen ya say panangaro nen Jehova ed sikatayo et akadepende ed asainmin tayo, tan agtayo dapat ikokomparay pribilehyo tayo ed pribilehyo na arum. Oniay imbaga nen Hiedi: “Agka maliket no ikomparam so bilay mo ed bilay na arum.” (Basaen so Galacia 6:4.) Basta say importante, gagawaen tayoy anggaay nayarian tayo pian magmaliw tayon mausar ed si Jehova tan ed kongregasyon. *

17. Antoy gawaen mo pian magmaliw kan kualipikado ed saray pribilehyo?

¹⁷ Mas dakel so nagawaan mo parad si Jehova  tan anggapoy makasagabal ed sikan mangawat na pribilehyo no simpli so bilay mo tan no iwasan moy onutang. No walay long-term ya goal mo, dapat wala met so short-term ya goal mo pian naabot mo itan. Singa bilang, no goal moy man-regular payunir, anto kasi no salien mo ni so man-auxiliary payunir na pigaran bulan? No goal moy magmaliw ya ministeryal a lingkor, anto kasi no mas dakelan moy oras mon manpulong tan i-goal mon pasyaren iray kakongregasyon mon mansasakit tan maedad la? No diman mas ondadakel so eksperiensyam, mas magmaliw kan kualipikado ed kaaruman ya responsabilidad. Tan antokaman so asainmin ya niiter ed sika, gawam so ‘the best’ mo.—Roma 12:11.

18. Antoy naaralan mo ed alimbawa nen Sister Beverley? (Nengnengen met so litrato.)

¹⁸ Sikayo ran agagi min maedad la, agyo komon iisipen ya anggapo lay sarag yon i-goal ta matatken ki la. Imanoen so alimbawa nen Sister Beverley ya 75 lay taon to. Ngalngali agla makaakar lapud graben sakit to. Pero nen panaon na panag-imbita parad Memoryal, labay ton aruman so oras tod ministeryo. Kanian inisip to no anto ray sarag ton i-goal. Nen agawaan to ray goal to, malikeliket! Lapud alimbawa to, apaseseg met iray agagi ya mas mankuli ni ed ministeryo. Anggano limitado lay nagagawaan na saray maedad lan agagi, papablien iratan ya amin nen Jehova.—Sal. 71:17, 18.

19. Anto ray espiritual ya goal mo?

¹⁹ Maabig sirin no manisip ka na goal ya sarag mon gawaen. Ipanengneng mo ray ugali ya labalabay nen Jehova. Manaral kay skill ya gawaen to kan mas mausar ed si Jehova tan ed organisasyon to. Manisip kay paraan no panon mo nin natulongan iray agagi. * Singa si Timoteo, makaseguro ka ya bendisyonan nen Jehova so pansasagpot mo, tan “nanengneng na amin a totoo so iyaaligwas mo.”—1 Tim. 4:15.