1. Siopay nanlapuan na abilidad tayon mansalita?

 SAY abilidad tayon mansalita et regalo nen Aman Jehova. Lapud satan ya regalo, say unonan too ya si Adan et makapitongtong ed Ama tod tawen. Diad tua, sarag toy manggawa na balo iran salita pian onlawak so bokabularyo to. Inusar nen Adan itan ya abilidad pian nagawaan toy asainmin to ya ngaranan so amin ya ayayep. (Gen. 2:19) Tan seguradon eksayted ya maong nen first time toy mitongtong ed kapara ton too, say magangganan asawa ton si Eva!—Gen. 2:22, 23.

2. Antoy ginawa na totoo nensaman tan natan ed regalo na Dios ed sikatayo ya abilidad ya mansalita?

² Pero ag-abayag, aliwliwa so impangusar na arum ed sayan regalo. Tinilaan nen Satanas ya Diablo si Eva, tan atan ya tila so rason no akin ya nagmaliw ya makasalanan iray totoo. (Gen. 3:1-4) Nagmaliw met la ya aliwliway panagsalita nen Adan. Nen nankasalanan, say tinetel to et si Eva, tan anggan si Jehova! (Gen. 3:12) Tinilaan nen Cain si Jehova nen pinatey toy agi ton si Abel. (Gen. 4:9) Kalabas na panaon, say apo nen Cain ya si Lamec et nanggawa na tula tungkol ed ibawi tan panagpatey, ya pakapatnagan ya mauge-uges la ray totoo ed saman ya panaon. (Gen. 4:23, 24) Natan ey? Wala ray politiko ya maayew tan agda itan ibabaing. Amin lawarin pelikula et walay narengel mon bastos ya salita. Diad eskuelaan, lanang ya makakarengel iray ugugaw na ayewan tan kabastosan. Tan diad lugar na trabaho, normal labat itan. Say aliwliwa tan bastos ya panagsalita na saray totoo et ebidensya ya mauge-uges la yan mundo.

3. Antoy panalwaran tayo? Antoy pantongtongan tayo ed sayan artikulo?

³ Maksil so impluensya na sayan mundo kanian no agtayo  maalwar, ompan agtayo naliklikas ya aliwliwa la manayay panagsalita tayo. Pero agtayo labay itan ya nagawa lapud lingkor itayo nen Jehova tan labay tayon napaliket so Dios tayo. Siempre, iwasan tayoy ansakit tan bastos ya panagsalita. Pero aliwan satan labat so nepeg tayon gawaen. Dapat usaren tayo met iyan balibalin regalo na Dios pian sikatoy nidayew tayo. Pantongtongan tayod sayan artikulo no panon tayon nagawaan itan (1) diad ministeryo, (2) diad saray aral tayo, tan (3) diad pitotongtong tayod arum. Pero pantongtongan tayo nin unona no akin ya importante ed si Jehova so panagsalita tayo.

4. Base ed Malaquias 3:16, akin et importante ed si Jehova iray ibabaga tayo?

⁴ Basaen so Malaquias 3:16. Nabasa ed sayan teksto ya iimanoen nen Jehova iray tongtongan tayo. No nanengneng to ed saray ibabaga tayo ya ontatakot tayo ed sikato tan sankanonot tayoy ngaran to, isulat toy ngaran tayo ed “libro na pakanodnonotan” to. Akin kasi et ontan la kaimportante ed si Jehova iray ibabaga tayo? On ta nanengneng ed satan no anton talagay walad puso tayo. Atan may imbaga nen Jesus ya “no anto so walad puso, satan so ibabalikas na sangi.” (Mat. 12:34) Nanengneng ed saray labalabay tayon pantongtongan no kasin inaro tayoy Jehova. Tan no inaro tayoy Jehova, seguradoen to ya manbilay tayoy andi-anggaan diad balon mundo.

5. (a) Akin ya say panagsalita tayo et walay koneksion tod panagdayew tayo? (b) Base ed litrato, anto ray iwasan tayo pian naliketan si Jehova ed panagsalita tayo?

⁵ Say panagsalita tayo so sakey ya basiyan nen Jehova no kasin awaten toy panagdayew tayo o andi. (Sant. 1:26) Saramay totoon agda inaroy Dios et malastog tan ansakit so panagsalita ra. (2 Tim. 3:1-5) Siempre, agtayo ra labay ya aligen. Labay tayo ya naliketan si Jehova ed panagsalita tayo. Pero, kasin naliketan si Jehova no mabait so panagsalita tayo diad aral tan diad ministeryo, balet ansakit so panagsalita tayo no wala tayo lad abung?—1 Ped. 3:7.

6. Antoy epekto na maong ya panagsalita nen Kimberly ed sakey ya kaklase to?

 ⁶ No mabait tan aliwan bastos so panagsalita tayo, ipapanengneng tayo ya lingkor itayo nen Jehova. Kanian mainomay ya naibiig na arum so pandumaan na ‘manlilingkor ed Dios tan agmanlilingkor ed sikato.’ (Mal. 3:18) Naeksperiensya itan nen Sister Kimberly. * Aminsan, walay project tod eskuelaan tan kaiba ton nanggawa so sakey ya kaklase ton bii. Apansin na kaklase to ya duma si Kimberly ed arum ya estudyante. Aliwan mabalaw, agmanaayew, tan mabaibait si Kimberly. Manbilib laingen may kaklase to tan ag-abayag et nampa-Bible study. Seguradon makakaimis si Jehova no magmaliw ya interesado ed katuaan iray arum ya totoo lapud maabig ya panagsalita tayo!

7. Antoy labay tayon epekto na panagsalita tayo?

⁷ Labalabay tayon usaren so abilidad tayon mansalita pian nairayew si Jehova tan mas lalo tayon naka-close iray agagi. Kanian pantongtongan tayo natan no anto ray gawaen tayo pian magmaliw tayon maong ya ‘ehemplo diad panagsalita’ tayo.

8. Akin et maong ya alimbawa si Jesus diad ministeryo?

⁸ Ipanengneng so respeto anggano pinansalitaan da kay ansakit. Nen wadiad dalin si Jesus, wala ray angibaga ya sikatoy mainum na alak, masiba, kakampi na Diablo, agto uunoren so Sabaton, tan anggapo kunoy respeto tod Dios. (Mat. 11:19; 26:65; Luc. 11:15; Juan 9:16) Antoy reaksion nen Jesus ey? Intepel to iratan ya amin tan agan balot binmawi. Aligen tayoy Jesus. No walay nakatongtong tayod ministeryo ya ansakit so panagsalita to, agtayo ombabawi. (1 Ped. 2:21-23) Pero diad tua, aliwan mainomay ya kontrolen so dila tayo. (Sant. 3:2) Anto sirin so makatulong ed sikatayo?

9. Antoy gawaen tayo pian nakontrol tayoy dila tayo no wala tayod panagpulong?

 ⁹ No walay unabung ya ineyagan to ka tan pinansalitaan to kay ansakit, agka onsyosyodot. Oniay imbaga nen Brother Sam: “Say iisipen ko la et kakkaukolan ton naamtaan so katuaan. Tatandaan ko met ya anggan siopan too et sarag to pay manguman.” Maabig no isipen tayo met no akin ya mamapasnok so unabung. Ompan say rason manaya et wrong timing so inyakar tayo. Sarag tayon gawaen may suggestion na sakey ya sister ya si Lucia. Say gagawaen to kuno no walay onian unabung et manpikasin tampol ed si Jehova ya nakontrol to komoy sarili to tan agmakapangibaga na ansakit.

10. Base ed 1 Timoteo 4:13, antoy tuloytuloy tayon gawaen?

¹⁰ I-improve moy panagbangat mo. Anggano  abaybayag lan manpupulong si Timoteo, binilin nen apostol Pablo ya itultuloy ton paaligwasen so panagbangat to. (Basaen so 1 Timoteo 4:13.) Sikatayo ey, antoy gawaen tayo pian magmaliw tayon epektibo ed ministeryo? Kailangan tayoy manparaan ya maong. Agtayo la nairapan ed saya lapud amayamay so iiter na organisasyon tayo pian na-improve tayoy panagbangat tayo. Singa bilang, iyaplikam iramay suggestion ed brosyur ya Manseet Ka ed Panagbasa tan Panagbangat. Rebyum met so seksion ya “Magmaliw ya Epektibo ed Ministeryo” ya walad Workbook ed Aral. Kasin uusaren mo irayan publikasyon no manpaparaan ka parad ministeryo? No manparaan kan maong, agka la masyadon mannerbiyos tan nalikas ed panagsalitam ya kombinsido ka ed ipupulong tan ibabangat mo.

11. Antoy ginawa na arum ya agagi pian na-improve day panagbangat da?

 ¹¹ Na-improve tayo met so paraan na panagbangat tayo no obserbaan tayo ray agagi ya maong ya manbangat. Walay balibalin gagawaen nen Brother Sam ya abitlad  parapo 9. Iisipen to kuno no antoy sekreto na saray agagin maong ya manbangat. Aaralen to so paraan na panagbangat da, insan to itan aligen. Marakep met so gagawaen na sakey ya sister ya si Talia. No public talk et dedengelen ton maong iray marundunong ya manpaliwawa, ta ditan kuno makakaaral no panon ton ipaliwawa ed ministeryo iray topic ya maslak ya itetepet na saray unabung.

12. Antoy mairap ya gawaen na arum ya agagi?

¹² Walay nitulong tayon amin pian magmaliw ya marakep tan makapaseseg iray aral tayo. Say sakey et no impapuso tan maligligsa tayon mangansion tan mankomento. (Sal. 22:22) Pero wala ray agagi ya nababaingan ya mangansion o mankomento diad aral. Sika ey, kasin nababaingan ka met? Amtaen tayo sirin no antoy akatulong ed arum ya agagi pian nalabanan day baing da.

13. Antoy makatulong pian impapuso so panangansion mo no aral?

 ¹³ Mangansion ya impapuso. No mangakansion tayoy Kingdom song, say manunan sankanonot tayo et say pangirayew tayod si Jehova. Makaaral tayod si Sister Sara. Imbaga to ya aliwa kunon maong ya mangansion. Pero labalabay ton idayew si Jehova no panangansion la ed aral. Kanian say gagawaen to, no manpaparaan parad aral et aliwan samay topic labat ya aralen so ipaparaan to. Ipa-practice to met la iray kansionen. Iisipen to met no antoy koneksion na lyrics ed samay topic ya pantongtongan diad aral. Oniay imbaga to: “Lapud akapokus ak ed lyrics, agak la masyadon nako-conscious ed boses ko.”

14. Antoy makatulong pian makapankomento ka nin siansia ed aral anggano nababaingan tan mannerbiyos ka?

 ¹⁴ Mankomento kada aral. Subok iya ed arum ya agagi. Oniay imbaga nen Sister Talia ya abitlad  parapo 11: “No dakel so too, naiirapan ak ya mansalita tan mannerbiyos ak. Aga labat masyadon halata ta malumanay so boses ko. Pero diad tua, mair-irap koy mankomento.” Balet ag-ompapayag si Talia ya atan so makaamper ed pankomento tod aral. Kanian say ipaparaan ton komento et amay direktan ebat ed tepet. Oniay imbaga to: “No siak so unonan onebat, okay labat no antikey, simpli, tan direkta ed punto—ta aman ya klase na ebat so aanapen na mangikokondukta.”

15. Antoy nepeg tayon tandaan pian agtayo manalangan ya mankomento?

 ¹⁵ Aliwa met ya mabaing so arum ya agagi, pero manaalangan iran mankomento. Akin kasi? Oniay imbaga nen Sister Juliet: “No maminsan, ngalngali agko labay so mankomento ta singa sim-simpli tan ataptapew labat so ibagak.” Pero agtayo komon lilingwanan ya anggano simpli so komento tayo, basta aman so ‘the best’ tayo, papablien itan nen Jehova. * Makakaliket si Aman Jehova no mankokomento tayo nin siansia ed aral anggano nababaingan o mannerbiyos tayo no maminsan.

16. Anton klase na panagsalita so iwasan tayo?

¹⁶ Iwasan so amin ya “makapasakit a salita.” (Efe. 4:31) Siempre, lapud Kristiano tayo, agtayo manaayew tan aliwan bastos so panagsalita tayo. Pero no maminsan, ompan agtayo nalilikas ya makapasakit la manayay panagsalita tayo. Singa bilang, ompan walay pangaran o tawag tayo ed saray totoon dumay kultura, probinsya, tribu, o lahi da. Tan ompan nasasakitan tayo lay arum ed panaglurey tayo. Oniay inamin na sakey ya brother: “No maminsan, labay ko met labat so manpaelek pero makapainsulto la manayay ibabagak tan nasasakitan ko lay liknaan na arum. Maong labat ta wadtay asawak ya manpanonot ed siak. No sikami labat ya dua, ipaimano tod siak iray makapasakit ya salitan nibagak ed sikato tan ed arum ya too.”

17. Panon tayon napabiskeg iray agagi? (Efeso 4:29)

¹⁷ Seguroen ya makapabiskeg iray ibabagam. Alisto tayo komon ya mangiter na komendasyon, imbes ya manreklamo tayo o balawen tayo ray agagi. (Basaen so Efeso 4:29.) Agtayo komon aaligen iray Israelita. Imbes ya misalamat irad si Jehova, reklamo la ran reklamo. Diad tua, makaalis itan ya ugali. Nanonotan yo may agawa nen aliwliway imbalita na samploran espiya? Lapud saman, “nanmeremere so amin ya Israelita ed si Moises.” (Num.  13:31–14:4) Diad kabaliktaran balet, say pangiter na komendasyon et napaliket toy arum. Seguradon apaseseg so marikit nen Jefte ya mansiansia ed asainmin to lapud tinaon ya bibisitaen na saray kakaaro ton bibii pian komendaan da. (Ukom 11:40) Oniay imbaga nen Sara ya abitlad  parapo 13: “No kokomendaan tayo ray agagi, ipapalikna tayod sikara ya inar-aro ira nen Jehova tan importante ira ed kongregasyon.” Kanian maabig sirin no iyugali tayo ya pisalamatan tan komendaan iray agagi ed saray maong ya nagagawaan da.

18. Base ed Salmo 15:1, 2, akin et agtayo dapat mantitila tan antoy kaiba ed saya?

¹⁸ Agmantitila. No mantila tayo, agtayo napaliket si Jehova lapud kabusol toy “matilan dila.” (Pro. 6:16, 17) Diad mundo natan, normal labat so mantila, pero agtayo itan gagawaen ta labay tayon unoren si Jehova. (Basaen so Salmo 15:1, 2.) Panon to no agtayo met direktan nantila, pero inyamot tayoy sakey ya impormasyon pian naloko so arum? Iwasan tayo met itan, ta say labay nen Jehova et mansalita tayoy katuaan.

19. Antoy sakey ni ya agtayo dapat gagawaen?

¹⁹ Agmantsi-tsismis. (Pro. 25:23; 2 Tes. 3:11) Oniay epekto na tsismis ed si Sister Juliet ya abitlad  parapo 15, kuan to: “No walay narerengel kon tsismis, nasasakitan ak parad samay too ya dederalan da. Tan diad tua, nadederal so tiwalak ed toon ma-tsismis. Ta no kaya ton i-tsismis so bilay na arum, ompan i-tsismis to ak met no akabeneg ak la.” Kanian no nalikas mo ya say simplin istoryaan et magmamaliw lan tsismisan, uman mo lay tongtongan tan mangistorya ka lay makapaseseg.—Col. 4:6.

20. Panon mon usaren so abilidad mon mansalita, tan akin ya ontan so determinasyon mo?

²⁰ Maksil so impluensya na sayan mundo, kanian manalwar tayon maong pian agtayo naalig so aliwliwa tan makaderal ya panagsalita ra. Tandaan, say abilidad tayon mansalita et regalo nen Jehova tan importante ed sikato no panon tayon uusaren itan. No duga so panguusar tayod satan diad ministeryo, diad aral, tan diad pitotongtong tayod arum, seguradon bendisyonan to itayo. No naderal la yan sistema na mundo, anggapo lay mauges ya impluensya kanian main-inomay tayo lan nairayew si Jehova diad panagsalita tayo. (Jud. 15) Pero komon ta natan ni labat et seguradoen tayo la ya ‘saray ibabalikas na sangi tayo et makapaliket ed si Jehova.’—Sal. 19:14.