1. Antoy situasyon nen ginawa nen Jesus so unonan milagro to?

 IMADYIN mo pa iyan eksena. Bandad sampot la na 29 C.E. tan kagagapo ni labat na ministeryo nen Jesus. Naimbitaan ed bansal si Jesus, say nanay ton si Maria, tan pigara ed saray disipulo to. Say ponsia et diad baley na Cana ya bandad norte na Nazaret, say lugar ya binalegan nen Jesus. Si Maria et kaaro na pamilya na nobyo tan nobya kanian mapatpatnag ya mangiiba ed pangaasikaso ed saray bisita. Pero walay agawa. Legan ya mamangan iray bisita, naamtaan nen Maria ya naupot lay alak. No anggapoy naiserbin alak, kababaing so balon kasal tan say pamilya ra. b Seguro, agda inilaloan ya onman karakel so bisita. Batik si Maria ed anak to tan imbaga to: “Anggapo lay alak da.” (Juan 2:1-3) Antoy ginawa nen Jesus? Ditan to ginawa so sankaunaan ya milagro to—say danum et pinagmaliw ton “maong ya [klase na] alak.”—Juan 2:9, 10.

2-3. (a) Panon ya inusar nen Jesus so pakayari ton manggawa na milagro? (b) Akin et marakep no aralen tayo ray milagro nen Jesus?

² Dakdakel nin milagro so ginawa nen Jesus nen wadiad dalin. c Inusar toy pakayari ton manggawa na milagro pian natulongan to ray libo-libon totoo. Singa bilang, wala tay inkagawa ya pinakan toy 5,000 ya lalaki tan diad sinmublay et 4,000 ya lalaki. Pero no ipila so bilang na bibii tan ugugaw, ompan  diad ami-amin et masulok ya 27,000 so pinakan to. (Mat. 14:15-21; 15:32-38) Diad tua, antis to ran pinakan, pinaabig to ni ray mansasakit ya wadman. (Mat. 14:14; 15:30, 31) Seguradon mankelaw ira ed pakayari nen Jesus ya mamaabig tan mamakan na dakdakel ya totoo!

³ Dakel so naaralan tayo ed saray milagro nen Jesus. Pantongtongan tayo iratan pian ombiskeg so pananisia tayo tan pian magmaliw tayo met ya mapaabeba tan makasi, ya singa sikato.

4. Siopay mas nakabkabat tayo no aralen tayo ray milagro nen Jesus?

⁴ No aralen tayo ray milagron ginawa nen Jesus, naamtaan tayo ray balibalin ugali to. Pero, aliwan satan labat. Nakabkabat tayo met so Ama to. Diad tua, si Aman Jehova so nanlapuan na pakayari nen Jesus ya manggawa na milagro. Ibabaga na Gawa 10:38: “Nilanaan na Dios [si Jesus] na masanton espiritu tan pakayari, tan nanliber ed nanduruman pasen, a nanggaway maong tan pinaabig ton amin iramay papairapen na Diablo, tan agawaan ton amin iya lapud walad sikato so Dios.” Tandaan met ya kada no mansalita si Jesus odino walay gawaen to, aaligen ton lanang so panagnonot tan ugali na Ama to. (Juan 14:9) Pantongtongan tayoy taloran leksion ya naaralan tayod saray milagro nen Jesus.

5. Antoy nampakilos ed si Jesus ya manggawa na milagro? (Mateo 20:30-34)

⁵ Unona, inar-aro itayon maong nen Aman Jehova tan si Jesus. Nen wadiad dalin si Jesus, inusar toy pakayari ton manggawa na milagro pian natulongan to iray totoon maniirap. Aminsan, walay duaran bulag ya mikakasi ed si Jesus ya tulongan to ra ta labay da lay makanengneng. (Basaen so Mateo 20:30-34.) “Akasian ira” nen Jesus kanian pinaabig to ra. Say Griegon salita ya inusar parad “akasian” et ontutukoy ed graben emosyon ya alikna nen Jesus—ansaki-sakit ed sikato ya nanengneng ton maniirap ira. Atan met so alikna nen Jesus nen pinakan to iray narasan tan pinaabig to so sakey ya aketong. (Mat. 15:32; Mar. 1:41) Antoy naaralan tayo ed saya? Nasasakitan met si Aman Jehova tan say Anak to no nanenengneng dan maniirap tayo. (Luc. 1:78; 1 Ped. 5:7) Inar-aro da tayo kanian labalabay da lan ekalen so amin ya problema ya mamapairap ed sikatayo.

6. Antoy sarasarag ya gawaen nen Jesus lapud pakayari ya inter na Dios ed sikato?

⁶ Komadua, inikdan nen Jehova si Jesus na pakayarin solusyonan so amin ya problema na totoo. Nanengneng ed saray milagro nen Jesus ya sarasarag ton solusyonan so amin ya problema ya agtayon balot nasolusyonan. Singa bilang, walay pakayari ton ekalen so mismon lapuan na amin ya problema tayo—say atawir tayon kasalanan tan saray epekto to, kaiba lay sakit tan patey. (Mat. 9:1-6; Roma 5:12, 18, 19) Saray milagro nen Jesus et patunay ya sarag ton paabigen so “amin a klase na sakit” tan bilayen iray inatey. (Mat. 4:23; Juan 11:43, 44) Sarag to met ya patundaen iray bagyo tan taloen iray demonyo. (Mar. 4:37-39; Luc. 8:2) Ombibiskeg so liknaan tayo ta amta tayon sarasarag nen Jesus ya ekalen so amin ya problema tayo!

7-8. (a) Antoy ipapaseguro na saray milagro nen Jesus? (b) Anton milagro so labalabay mon nanengneng diad balon mundo?

⁷ Komatlo, makapantiwala tayo ya nagawa so amin ya im-promise nen Jehova ya bendisyon na Panarian. Say sakey nin rason no akin ya nanggawa na milagro si Jesus et lapud  labay ton ipanengneng iray milagro ya gawaen to ed interon mundo no sikato la so Ari ed Panarian na Dios. Isipen pa iray bendisyon ya awaten tayo no sikato la so manuley diad dalin. Maksil tan perpekto lay laman tayo, ta ekalen toy amin ya klase na sakit tan kapansanan ya mamapairap ed sikatayo. (Isa. 33:24; 35:5, 6; Apo. 21:3, 4) Agtayo lan balot naerasan, tan agtayo met la manirap lapud saray kalamidad. (Isa. 25:6; Mar. 4:41) Tan seguradon agaylay liket tayo no abeten tayo la ray kakaaro tan kapamilya tayo ya bilayen nen Jesus! (Juan 5:28, 29) Dinan ed sarayan milagro so labalabay mon nagawa diad balon mundo?

⁸ Kada no manggawa na milagro si Jesus, sankanengneng ya sikatoy mapaabeba tan makasi. Marakep no aligen tayo iratan ya ugali to. Pantongtongan tayoy duaran milagro ya ginawa to. Say unona et amay milagro ya ginawa to diad bansal ed Cana.

9. Akin et nanggaway milagro si Jesus diad bansal ed Cana? (Juan 2:6-10)

⁹ Basaen so Juan 2:6-10. Nen naupot so alak diad samay bansal, kasin obligado si Jesus ya solusyonan iman ya problema? Andi. Anggapo pay propesiya ya say Mesias et gawaen ton alak so danum. Pero imadyin mo pa ya diad bansal mo et anggapo lay naiserbin inumen na saray bisita. Makapaaburido anto? On, seguradon akasian nen Jesus imay nobyo tan nobya tan say pamilya ra, tan agto labay  ya kababaing ira ed saray bisita ra. Kanian singa abitla ed gapo, pinagmaliw to ya sankaabigan ya klase na alak so manga 390 ya litro na danum. Seguro, ginagala nen Jesus ya ontan karakel ta pian wala ni nakera ya nausar na balon kasal parad ontumbok iran okasyon odino sarag dan ilako pian walay kuarta da ya panumpisaan da. Seguradon misatsalamat ya maong may balon kasal!

10. Anto ran detalye ed Juan kapitulo 2 so pakaaralan tayo? (Nengnengen met so litrato.)

¹⁰ Imanoen pa iray detalye ya walad Juan kapitulo 2. Kasin naimanom ya aliwan si Jesus so angibales na danum diad saray buyog? Saramay lingkor la so binagaan ton mangibales ta agto labay ya onlad sikatoy atension. (Bersikulo 6, 7) Tan nen nagmaliw lan alak imay danum, aliwan si Jesus ya mismo so inmasingger ed samay manangasikaso na ponsia pian ipataway imay alak. Saramay lingkor la so imbaki to. (Bersikulo 8) Anggapo met so nabasa tayon angala si Jesus na alak, insan linmad arap tan imbaga tod saray bisita ya, ‘Ni, tawayan yo yay alak ya kakkapanggawak!’

11. Antoy naaralan tayo ed milagro nen Jesus diad Cana?

¹¹ Antoy naaralan tayod si Jesus nen pinagmaliw ton alak so danum? Makaaral tayo ed kapaabebaan to. Agto inlastog so ginawa to. Diad tua, anggano dakdakel so agawaan to nen wadiad dalin, agton balot inlastog iratan. Lanang ton ipapaarap so dayew ed Ama to. (Juan 5:19, 30; 8:28) Aligen tayoy Jesus. Agtayon balot ipapasirayew iray nagagawaan tayo, tan aliwa komon ya atagtagey so pakanengneng tayod sarili tayo. Antokaman so pribilehyo tayod organisasyon, anggapoy karapatan tayon manpasirayew. Say ipasirayew tayo et si Aman Jehova, ta inikdan to tayoy pribilehyon makapanlingkor ed sikato. (Jer. 9:23, 24) Singa ginawa nen Jesus, ipaarap tayod si Jehova so amin ya dayew. Diad tua, wala tay nagawaan tayo no anggapoy tulong nen Aman Jehova?—1 Cor. 1:26-31.

12. Anto ni sakey ya paraan ya naalig tayoy kapaabebaan nen Jesus? Mangiter na alimbawa.

¹² Imanoen so sakey nin paraan ya naalig tayoy kapaabebaan nen Jesus. Isipen pa iyan situasyon: Aminpigan in-rehearse na sakey ya elder so kabataan ya ministeryal a lingkor ta first time toy man-public talk. Kanian diad samay mismon agew na public talk, balibali impan-paliwawa na ministeryal a lingkor tan apaseseg so interon kongregasyon. Kayari na aral, walay inmasingger ed samay elder tan imbaga ton: ‘Marakdakep may paliwawa nen Brother M.S. awa?’ Antoy ibaga to may elder ey? Kasin ibaga ton: ‘Ay e, aminpiga kamin nan-rehearse. Dakel so impauman kod sikato’? Odino mas maabig no ibaga ton: ‘Amasya lanti, namparaan ya maong’? On, no mapaabeba tayo, agtayo la ipapaamta ed arum so ginawa tayon kamaongan, ta agtayo labay ya sikatayo so narayew. Ayos labat anggano ag-itan nakabatan na arum, ta amta tayon anengneng tan papablien nen Jehova so ginawa tayo. (Ikompara so Mateo 6:2-4; Heb. 13:16) Tandaan, napapaliket tayoy Aman Jehova no aaligen tayoy kapaabebaan nen Jesus.—1 Ped. 5:6.

13. Antoy anengneng nen Jesus nen asingger lad syudad na Nain, tan antoy ginawa to? (Lucas 7:11-15)

¹³ Basaen so Lucas 7:11-15. Masulok ya sakey taon manlapu nen inggapo nen Jesus so ministeryo to, sikato tan saray disipulo to et amaarap ed Nain, sakey ya syudad ed Galilea ya ag-arawi ed Sunem. Taga Sunem imay bii ya say anak to et binilay nen propetan Eliseo. (2 Ara. 4:32-37) Nen asingger la ra di Jesus  ed Nain, walay asabat dan tulor. Say inatey et alenleneg ya anak na sakey ya biyuda. Anta biyuda la lanti, inatey ni alenleneg ya anak to. Mapatpatnag ya mieermen iray totoo ed sikato ta dakel so akitulor. Antoy ginawa nen Jesus ey? Pinatunda to may tulor, tan binilay to imay anak na biyuda. Seguradon amay ermen to et asalatan na liket! Tattalora so akarekord ed Ebanghelyo ya walay binilay nen Jesus, tan aya so sankaunaan.

14. Anto ran detalye ed Lucas kapitulo 7 so pakaaralan tayo? (Nengnengen met so litrato.)

¹⁴ Imanoen pa iray detalye ya walad Lucas kapitulo 7. Apansin mo ya nen “anengneng” nen Jesus imay maer-ermen ya ina, diman to akasian tan “sikatoy naabagey to”? (Bersikulo 13) Seguro singa bebetagen so puso nen Jesus nen anengneng to ya akis lan akis. Pero agto labat akasian; walay ginawa to pian nipalikna to ya mieermen. Inasinggeran nen Jesus imay ina, tan seguradon malumlumanay so boses to nen imbaga ton: “Agka la onaakis.” Insan apakilos si Jesus ya manggawa na milagro pian natambal so ermen na biyuda. Binilay to may anak tan “inter to ed ina to.”—Bersikulo 14, 15.

15. Antoy naaralan tayo ed milagro nen Jesus diad Nain?

¹⁵ Antoy naaralan tayod si Jesus nen binilay to imay anak na biyuda? Importantin ipalikna tayo ed saray inateyan ya mieermen tayod sikara. Anggano agtayo sarag ya bilayen iray inatey, sarag tayo balet ya aligen so inkamaobserba nen Jesus. Dapat malikas tayo ed dadalanen na saray inateyan. Manisip tayoy makapaseseg ya ibaga tayod sikara pian onlemew so liknaan da, tan mangiter tayoy praktikal ya tulong. d (Pro. 17:17; 2 Cor. 1:3, 4; 1 Ped. 3:8) Anggano simpli labat so ibagam o gawaen mo, baleg lay epekto to ed sakey ya inateyan.

16. Singa inyakto ed litrato, antoy naaralan mo ed eksperiensya na sakey ya nanay nen kakkapatey na anak to?

¹⁶ Imanoen iyan eksperiensya ya agawa pigaran taon lay apalabas. Legan na kansion diad aral, apansin na sakey ya sister ya onaakis  tan aga makakansion so sakey ya nanay ya medyo asingger ed niyurongan to. Tungkol ed kioli imay kansion. Emosyonal imay nanay ta kakkapatey na anak to. Sikatoy inasinggeran ya tampol na samay sister, inakbayan to, tan aga inmalis anggad aga asumpal imay kansion. Oniay imbaga na samay nanay tungkol ed saman ya agawa: “Diad saman ko aliklikna so panangaro na saray agagi. Maong labat ta akiaral ak. Walan-walay tulong ya naawat tayo no wala tayod Kingdom Hall.” On, naaralan tayo ed sayan eksperiensya ya anggan saray simplin gagawaen tayo pian naligliwa iramay ‘asugatan so puso ra’ et nanenengneng tan papablien nen Jehova.—Sal. 34:18.

17. Anto ray naaralan tayo ed sayan artikulo?

¹⁷ No aralen tayo iray milagro nen Jesus ya akarekord ed Biblia, seguradon ombiskeg so pananisia tayo. Singa apantongtongan tayo ed sayan artikulo, patunay iratan ya inar-aro itayo nen Jehova tan Jesus, sarasarag nen Jesus ya solusyonan so amin ya problema tayo, tan asingsingger lan ontua so amin ya im-promise na Dios ya bendisyon na Panarian. Kanian no babasaen tayo iray milagro nen Jesus, imanoen tayon maong iray detalye tan dalepdepen tayo no panon tayon naalig so ugali to. Anto kasi no man-eskedyul kay personal study o Family Worship ya say topic et saray milagro nen Jesus? Seguradon dakel so naaralan mo. I-share mo iratan ed arum. Talagan makapaseseg no ontan iray panistoryaan tayo!—Roma 1:11, 12.

18. Antoy pantongtongan tayo diad onsublay ya artikulo?

¹⁸ Say komatlo tan sampot ya akarekord ed Biblia ya walay binilay nen Jesus et agawa nen asingger lan nasumpal so ministeryo to diad dalin. Pero duma iya ed samay duaran akauna, ta say binilay to et malet ya kaaro to ya apat agew lan inatey. Anto ray naaralan tayo ed sayan milagro? Tan antoy gawaen tayo pian ombiskeg so pananisia tayo ya diad arapen et talagan nabilay iray inaatey? Atan so pantongtongan tayo diad onsublay ya artikulo.