1. Akin et mankokomento tayo ed aral?

 AKIN et mimiaral tayo? Say manunan rason et pian idayew tayoy Jehova. (Sal. 26:12; 111:1) Mimiaral tayo met pian napaseseg tayoy sakey tan sakey, lalo la ta manbibilay tayo ed sayan mair-irap ya panaon. (1 Tes. 5:11) No mankokomento tayo, nagagawaan tayo itan ya dua—nairarayew tayoy Aman Jehova tan napapaseseg tayoy sakey tan sakey.

2. Diad saray aral, kapigan tayo mankokomento?

² Kada aral, dakel so pagkakataon tayo ya makapankomento. Singa bilang, diad weekend, sarag tayoy onebat ed Panag-aral na Panag-bantayan. Tan no midweek, sarag tayoy mankomento diad Saray Espiritual a Kayamanan, Panag-aral na Kongregasyon ed Biblia, tan diad saray parte ya walay tepet-tan-ebat.

3. Anto ray nayarin subok ed pankomento, tan akin et makatulong imay nabasad Hebreo 10:24, 25?

³ Labay tayoy mankomento pian nairayew tayoy Aman Jehova tan napaseseg tayo ray agagi. Pero ompan wala ray subok. Singa bilang, ompan nanenerbiyos tayon mankomento, odino lanang tayon mangitatagey na lima pero mataltalag tayon natawag. No oniay situasyon, antoy gawaen mo? Makatulong  imay insulat nen apostol Pablo diad saray Hebreon Kristiano. Nen imbaga to ya “agtayo papaulyanan so pantitipon,” indanet to met ya importantin “manpapasesegan itayo.” (Basaen so Hebreo 10:24, 25.) Agtayo lilingwanan ya anggan say simplin komento et makapaseseg la ta balikas itan na pananisia tayo. No atan so sankanonot tayo, nabawasan so pannerbiyos tayo. Tan anggano mataltalag tayon naturo, maliket tayo nin siansia ta walay tsansa na arum ya mankomento.—1 Ped. 3:8.

4. Anto ray aralen tayo ed sayan artikulo?

⁴ Pantongtongan tayon unona ed sayan artikulo no panon tayon napaseseg so sakey tan sakey diad melag ya kongregasyon ya aliwan onman karakel so mankokomento. Insan nengnengen tayo no panon tayon napaseseg so sakey tan sakey diad baleg ya kongregasyon ya dakdakel so mangitatagey na lima ra pian mankomento. Tan pantongtongan tayo no anto ray gawaen tayo pian mas makapaseseg iray komento tayo.

5. Panon tayon napaseseg so sakey tan sakey anggano melag so kongregasyon tayo?

⁵ No melag so kongregasyon o grupo, siempre daiset met so makapankomento. Subok iya no maminsan ed mangikokondukta ta ompan kaukolan to ni manalagar antis ya walay mangitagey na lima. Aliwan mabilabilay so aral no ontan. Antoy nitulong mo? Marakep no lanang kan mangitagey na lima. No ontan so gawaen mo, napaseseg moy arum ya mankomento met ya lanang.

6-7. Antoy gawaen mo pian nabawasan so nerbiyos mon mankomento?

⁶ Kasin labalabay moy mankomento pero nauunaan kay nerbiyos? Diad tua, agmo bukbukor. Pero walay sarag mon gawaen pian nalabanan moy nerbiyos mo tan napaseseg mo ray agagi. Anto iratan ey?

⁷ Marakep no basaen mo iray suggestion ya walad apalabas iran isyu na Say Panag-bantayan. b Singa bilang, manparaan kan maong pian nakabisadom so topic. (Pro. 21:5) No kabisadom itan, mas confident kan mankomento. Say sakey nin makatulong et no antikey labat so ikomentom. (Pro. 15:23; 17:27) No daiset labat so ibagam, agka masyadon nanerbiyos. Diad tua, no simpli so komentom, manga sakey o duaran sentence labat, mas natandaan tan mas natalosan itan na agagi nen say andukdukey tan komplikadon ebat. On, anggano antikey so komentom basta nanlapud puso tan agmo labat binasa ed parapo, nanengneng na agagi ya namparaan kan maong tan natatalosan moy topic.

8. Antoy nalilikna nen Jehova no gagawaen moy ‘the best’ mo ed panagkomento?

⁸ Panon to no ginawam la iramay suggestion pero manaalangan kan mankomento ya mas mabetbet? Tandaan mo ya napapaimis moy Aman Jehova no gagawaen moy ‘the best’ mo ed panagkomento. (Luc. 21:1-4) Agan balot ipagawa nen Jehova so agmo sarag. (Fil. 4:5) Marakep no walay goal mo, amay antam ya nasarag mo, tan ipikasim ed si Jehova ya nalabanan moy pannerbiyos mo. Singa bilang, i-goal mo ya kada aral et makapankomento ka anggano sakey labat. Insan diad ontutumbok iran aral, i-goal mo ya mamidua, mamitlo, o mas mabetbet ka nin mankomento.

9. Antoy nayarin subok no baleg so kongregasyon?

⁹ No diad kongregasyon yo et amayamay so publisher, ompan duma met so subok. Seguradon amayamay so agagi ya labay day mankomento kanian ngalngali agka naturo. Ontan so situasyon nen Sister Daniella. c Labalabay to kunoy mankomento ed aral ta parte itan na panagdayew to ed si Jehova, napapaseseg toy arum, tan napapabiskeg toy mismon pananisia to. Pero nen inmalis ed kongregasyon ya amayamay so publisher, mataltalag lan natuturo ya mankomento—no maminsan ingen et agan balot natatawag. Oniay imbaga to: “Makapakapuy. Singa ak nasisibletan. No lanang ak lan aga natuturo, iisipen ko laingen ya sasadyaen da la amo.”

10. Anto ray sarag mon gawaen pian mas baleg so posibilidad ya makapankomento ka?

¹⁰ Kasin aka-relate ka ed alikna nen Daniella? No on, ompan natabangan ka lan mankomento tan isipen mo ya ondengel ka labat ed aral. Pero agka komon nadidismaya. Wala ray sarag mon gawaen. Singa bilang, manparaan kay dakel ya komento pian dakel nin siansia so reserbam anggano agka natawag diad bandad gapo. No ipaparaan moy artikulo ya aralen ed Panag-bantayan, isip mo no antoy koneksion na kada parapo ed manunan tema. No ontan so gawaen mo, walan-walay marakep ya punto ya naiyarum mo. Maabig met no iparaan mon ebatan iramay parapon tungkol ed aralem ya katuaan ya mas mairap ya ipaliwawa. (1 Cor. 2:10) Akin ey? On ta posiblin mas daiset so mankomento ed sarayan parapo. Panon to balet no ginawam la irayan suggestion pero linmabas lay pigaran aral et agka nin siansia natuturo? Antis na aral, katongtong mo la may mangikondukta tan ibagam ed sikato no anton parapo so labay mon ebatan.

11. Base ed Filipos 2:4, antoy gawaen tayo?

¹¹ Basaen so Filipos 2:4. Pinaseseg nen apostol Pablo iray Kristiano ya isipen day pankaabigan na arum. Panon tayo yan naiyaplika  diad aral? Nipanengneng tayo ya sankanonot tayoy pankaabigan na arum no tandaan tayo ya labay da met so mankomento, ya singa sikatayo.

12. Anto ni sakey ya paraan pian napaseseg tayo ray agagi diad aral? (Nengnengen met so litrato.)

¹² Isip mo pa: No kaistoryaan mo ray kakaarom, kasin marakep no sikan lanang so mansasalita tan agmo la ra pasaleten? Siempre andi! Pasublayen mo met iran mangistorya. Ontan met ed aral. Labay tayo ya anggad posible et amayamay so makapankomento. Diad tua, say sakey ya paraan pian napaseseg tayo ray agagi et no ikdan tayo ray tsansa ya mankomento pian naibalikas day pananisia ra. (1 Cor. 10:24) Antoy gawaen tayo pian walay tsansa na arum ya mankomento?

13. Antoy gawaen tayo pian mas dakel so makapankomento?

¹³ Maabig no antikey labat so komentom pian dakel ni ray makapankomento. No ontan so gawaen na saray elder tan saray agagin mabetbet ya mankokomento, aligen ira na arum. Ontan met, iwasan moy mangibaga na dakdakel ya punto. No ikomentom ya amin so walad parapo, anggapo lay iyebat na arum. Singa bilang, diad sayan parapo et walay duaran suggestion—gawaen ya antikey so komento tan iwasan so mangibaga na dakdakel ya punto. Kanian no sikay unonan atawag ya mankomento ed sayan parapo, mas maabig no sakey ya punto labat so iyebat mo.

14. Antoy makatulong pian amta tayon kontrolen so kabetbet na pangitagey tayoy lima tayo? (Nengnengen met so litrato.)

¹⁴ Usaren tayoy pakatebek tan magmaliw tayon malikas pian nakontrol tayo so kabetbet na pangitagey tayoy lima tayo. No tagey tayo lan tagey, ompan napilitan may mangikokondukta ya sikatayon lanang so turoen to anta agni akapankomento so arum. Tan ompan natabangan lan mankomento so arum.—Ecl. 3:7.

15. (a) Antoy agtayo gagawaen no ag-itayo aturon mankomento? (b) Anto ray nepeg ya tandaan na saray mangikokondukta? (Nengnengen met so kahon ya “ No Sika so Mangikondukta.”)

 ¹⁵ No amayamay so mangitatagey na lima, ompan mataltalag tayon napili ya mankomento. No maminsan ingen, ompan agtayon balot naturo. Tua, makapadismaya itan, pero agka komon ombabarong no agka atawag.—Ecl. 7:9.

16. Panon tayon napaseseg iramay nankomento?

¹⁶ No agmo nikomento so amin ya imparaan mo, marakep no dengel mon maong so komento na arum, insan pisalamatan mo ira kayari na aral. Tandaan ya anggano aga arengel na agagi so amin ya imparaan mo, napaseseg mo ni ran siansia no komendaan mo ra. (Pro. 10:21) Say pangiter na komendasyon et sakey ya paraan pian napaseseg tayoy sakey tan sakey.

17. (a) Antoy gawaen na atateng pian natulongan da ray ananak da ya manparaan na komento ya matukoy ed edad da? (b) Base ed video diad paimanod leksab, antoy apatiran gawaen tayo no manpaparaan tayoy komento?

¹⁷ Anto ni gawaen tayo pian napaseseg tayoy sakey tan sakey diad aral? No sakey kan ateng, tulongan mo iray ugaw nin ananak mo ya manparaan na komento ya matukoy ed edad da. (Mat. 21:16) No maminsan, seryoso  iray pantotongtongan tayo diad aral, singa saray isyu ed moral odino probleman aarapen na sanasawa. Pero walan-wala seguroy parapo ya nakomentoan na ugugaw. Maabig met no i-explain mod ananak mo no akin ya aliwan sikaran lanang so natawag no mangitagey iray lima. No natatalosan day rason, ag-ira ombarong no dumay napili ya mankomento.—1 Tim. 6:18. d

18. No mankokomento tayo, antoy gawaen tayo pian aga onlad sikatayo so atension? (Proverbio 27:2)

¹⁸ Tandaan ya say rason no akin ya mankokomento tayo et labay tayon irayew si Jehova tan napaseseg iray agagi. (Pro. 25:11) Wala ray pagkakataon ya labay tayoy man-share na makapaseseg ya eksperiensya tayo. Pero agtayo komon ipapaarap so atension ed sarili tayo. (Basaen so Proverbio 27:2; 2 Cor. 10:18) Labay tayo ya say natilak ed isip na agagi et no antoy naaralan da ed si Jehova, diad Salita to, tan diad organisasyon to. (Apo. 4:11) Pero siempre, no say tepet et personal, sarag mon i-share so personal ya naliliknam o eksperiensyam. Walay ontan ya tepet diad onsublay ya parapo.

19. (a) Antoy epekto no sankanonot tayoy pankaabigan na arum diad aral? (Roma 1:11, 12) (b) Akin et labalabay moy mankomento diad aral?

¹⁹ Anggano anggapoy istrikto odino detalyadon instruksion tungkol ed pankomento, walay nagawaan tayon amin pian magmaliw ya mas makapaseseg itan. Singa bilang, no wala tayod melag ya kongregasyon, ompan kaukolan ya mas mabetbet tayon mangitagey na lima. Tan no baleg so kongregasyon tayo, maliket tayo nin siansia anggano matalag tayon naturo, ta labay ton ibaga, maaral tan makomento iray kakongregasyon tayo. On, no sankanonot tayoy pankaabigan na arum, seguradon “makapanpapasesegan itayo” tan malikeliket tayo kada aral.—Basaen so Roma 1:11, 12.