1. Akin et nibaga tayon mabisbiskeg so pananisia nen Matthew ed kioli?

 UGAW ni labat si Matthew et wala lay graben sakit to tan aminpiga lan naoperaan. Aminsan, nambantay iran pamilya na binulan ya programa na JW Broadcasting^®. Diad sampot, say music video et tungkol ed ilalo ya nabilay iray inatey. Tan walay eksena ya inabet na atateng so anak da ya inmoli. b Kayari dan nambantay, inasinggeran nen Matthew iray atateng to, binembenan toy lima ra, tan imbaga to: “Mommy, Daddy, anengneng yo man? Anggano ompatey ak, bilayen to ak lanlamang nen Aman Jehova. Alagar yo ak a, nanengneng yo ak lamet.” Pitoy taon ni labat nen Matthew ed saman, pero tudtua la ed sikato so ilalon kioli. Kasin naimadyin moy alikna na atateng to nen anengneng dan mabisbiskeg so pananisia to?

2-3. Akin et maabig no sankanonot tayo so ilalon kioli?

² Maabig no isipen tayon lanang so promise na Biblia ya nabilay iray inaatey. (Juan 5:28, 29) Akin ey? On ta agtayo bemben so bilay tayo. Ompan na-diagnose ya wala manayay graben sakit tayo o walay biglan ompatey ya kapamilya o kaaro tayo. (Ecl. 9:11; Sant. 4:13, 14) Napakilos itayo na ilalon kioli ya manmatoor anggano ondalan tayo ed ontan iran subok. (1 Tes. 4:13) Ibabaga na Biblia ya kabkabat tan inar-aro itayo nen Aman Jehova. (Luc. 12:7) Lalo tayon natalosan itan no dalepdepen tayo so kioli. Isip mo pa: No bilayen nen Jehova so sakey ya too, kaukolan ton ipawil so amin ya detalye pian sikato nin siansia iman. Labay ton ibaga sirin, kabkabat to tayo! Tan ontan lay panangaro nen Jehova ed sikatayo kanian nanggawa na paraan pian anggano ompatey tayo et walay tsansa tayon nabilay lamet tan agtayo lan balot ompatey!

³ Pantongtongan tayo ed sayan artikulo no akin ya makapantiwala tayo ya nabilay iray inaatey. Pantongtongan tayo met so  salaysay ya angalaan na pinagkateman teksto tayo: “Say agim et onoli.” (Juan 11:23) Insan tayo aralen no anto ray gawaen tayo pian lalon ombiskeg so pananisia tayo ed ilalon kioli.

4. Antoy kailangan pian mantiwala tayo ed sakey ya promise? Mangiter na ilustrasyon.

⁴ Pian mantiwala tayo ed sakey ya promise, dapat kombinsido tayo ya amay nan-promise et talagan labalabay tan sarasarag ton gawaen so im-promise to. Singa onia ’tan ay: Imadyin mo pan aderal so abung yo lapud maksil ya bagyo. Abalitaan itan na kaarom tan imbaga tod sika, ‘Agka mapaga, tulongan ta ka pian naapiger so abung mo.’ Alikas mo ya seryoso ed imbaga to, tan labalabay to kan tulongan. Antam met ya sarasarag ton apigeren so abung yo ta marundunong ya construction worker tan kompletoy gamit to. Katon baleg so tiwalam ya tooren toy imbaga to. Say kioli ey? Kasin makapantiwala tayo ed im-promise na Dios ya nabilay iray inaatey? Kasin labalabay tan sarasarag ton gawaen itan?

5-6. Akin et segurado tayon labalabay nen Jehova ya bilayen iray inaatey?

⁵ Kasin labalabay nen Jehova ya bilayen iray inaatey? On! Akin et segurado tayo ya labalabay to? Say sakey ya patunay et dakel so propesiyan impaisulat tod Biblia tungkol ed sayan promise to. (Isa. 26:19; Os. 13:14; Apo. 20:11-13) Tan no si Jehova so nan-promise, tooren ton tooren. (Jos. 23:14) Diad tua, eksayted si Jehova ya bilayen iray inaatey. Antoy patunay?

⁶ Imanoen tayo so imbaga nen Job. Kombinsido si Job ya anggano sikatoy ompatey, “pirawaten” nen Jehova ya nanengneng lamet ya mabilay, kanian paolien toy Job. (Job 14:14, 15) Ontan so nalilikna nen Jehova ed amin ya lingkor to ya inatey la. Nanailiw to la ra kanian labalabay to la ran bilayen pian nanengneng to ran maliket tan maksil lamet. Panon to balet iray binilyon ya inatey ya agdan balot akabat si Jehova? Lapud maar-aro so Dios, bilayen to met ira. (Gawa 24:15) Gawaen to itan pian walay tsansa ran mikaaro ed sikato tan manbilay ya andi-anggaan diad dalin. (Juan 3:16) On, labalabay nen Jehova ya bilayen iray inaatey.

7-8. Akin et segurado tayo ya sarasarag nen Jehova ya bilayen iray inatey?

⁷ Kasin sarasarag met nen Jehova ya bilayen iray inatey? On, ta sikato so “Makapanyarin-amin”! (Apo. 1:8) Matmainomay ton taloen so amin ya kalaban, anggan say patey, “say unor a kabusol.” (1 Cor. 15:26) No isipen mon maong itan, ombiskeg so liknaan mo. Imanom pay eksperiensya nen Sister Emma Arnold. Graben irap so dinalan to tan na pamilya to nen World War II. Wala ray kapamilya tan kaaro dan inatey diad Nazi concentration camp. Oniay imbaga nen Emma pian nalemewan so liknaan na anak ton bii: “No agla nabilay iray inaatey, labay ton ibaga sirin mas mabiskeg so patey nen say Dios. Pero andi, di ba?” Duga si Sister Emma, anggapon balot so mas mabiskeg nen say si Jehova! Sikato so amalsa ed amin ya mabilay, kanian sarasarag ton ipawil so bilay na saray inatey.

⁸ Say sakey nin rason no akin ya makapantiwala tayon sarasarag nen Jehova ya bilayen iray inaatey et lapud anggapoy limitasyon na memorya to. Memorize toy ngaran na amin ya bitewen. (Isa. 40:26) Ibabaga met na Biblia ya mabilabilay nin siansia ed nonot to iray matoor ya lingkor to anggano abaybayag la ran inatey. (Job 14:13; Luc. 20:37, 38) Kanian no bilayen to ray inatey, matmainomay to ta walad memorya to so amin ya impormasyon da —no antoy walad DNA da, saray agawgawa ed bilay da, tan anggan say sankamelagan ya detalye tungkol ed sikara.

9. Akin et manisia ka ed promise nen Jehova ya bilayen to ray inaatey diad arapen?

⁹ On, manisia tayo ya bilayen nen Jehova iray inaatey diad arapen ta labalabay tan sarasarag ton gawaen itan. Pero walay sakey nin rason no akin ya manisia tayo ed satan ya promise to: Ginawa to la itan nensaman. Wala ray matoor ya lingkor to ya inikdan toy pakayari ya bilayen so inatey, sakey lay Jesus. Impairekord to iratan ya salaysay diad Biblia. Pantongtongan tayoy sakey ya salaysay ya walay binilay nen Jesus, amay nabasad Juan kapitulo 11.

10. Antoy agawa ed si Lazaro legan ya manpupulong si Jesus ed lugar ya arawi ed Betania, tan antoy ginawa nen Jesus? (Juan 11:1-3)

¹⁰ Basaen so Juan 11:1-3. Imadyin mo pa yan salaysay ya agawa nen bandad sampot na 32 C.E. diad Betania. Ditan manaayam si Lazaro, Maria, tan Marta. Close ed si Jesus irayan sanaagi. (Luc. 10:38-42) Pero nansakit na grabe si Lazaro kanian aburido iray agagi to. Angibaki iray mensahero ya mangibalita ed si Jesus, ya diad saman et walad basil na Jordan. Sikatoy manpupulong ed lugar ya say kaarawi to et duaran agew ya akaren manlapud Betania. (Juan 10:40) Say makapaermen balet, inatey lay Lazaro nen akasabi may mensahero ed si Jesus. Diad tua, amta la nen Jesus ya inatey lay Lazaro. Pero, pinalabas to ni duay agew insan linma ed Betania. Kanian nen kasabi nen Jesus ed Betania, apat agew lan inatey si Lazaro. Walay plano ton gawaen parad kakaaro to ya seguradon “kigloriaan na Dios.”—Juan 11:4, 6, 11, 17.

11. Diad sayan salaysay, antoy naaralan tayo tungkol ed pankakaaro?

¹¹ Walay naaralan tayo diad sayan salaysay tungkol ed pankakaaro. Kasin apansin mo ya nen angibaki na mensahero si Maria tan Marta, say impaibaga da labat ed si Jesus et mansasakit si Lazaro? Agda inobliga si Jesus ya onlad Betania. (Juan 11:3) Nen inatey lay Lazaro, sarag pan bilayen nen Jesus anggano walad arawi. Pero mas pinili toy onlad Betania pian nakatongtong toy Maria tan Marta. Kasin walay ontan ya kaarom, amay no napro-problema ka et wadtan parad sika anggano agka onkekerew na tulong? Atan may klase na kaaro ya nailaloan ed “amin a panaon.” (Pro. 17:17) Aligen tayo sirin si Jesus, ipanengneng tayo ya tua itayon kaaro! Ituloy tayo natan imay salaysay tan nengnengen tayo no antoy sinmublay ya agawa.

12. Antoy im-promise nen Jesus ed si Marta, tan akin et panisiaan itan nen Marta? (Juan 11:23-26)

¹² Basaen so Juan 11:23-26. Nen naamtaan nen Marta ya nitan lay Jesus, inabet to tan imbaga to: “Katawan, no wadia ka labat, agkomon inatey so agik.” (Juan 11:21) Duga met si Marta ta sarasarag nen Jesus ya paabigen si Lazaro. Balet wala manayay mas makapakelaw ya gawaen nen Jesus. Oniay im-promise to ed si Marta: “Say agim et onoli.” Tan onia  ni imbaga to pian mas panisiaan itan nen Marta: “Siak so kioli tan say bilay.” On, inikdan na Dios si Jesus na pakayari ya bilayen iray inatey. Diad akadkauna iran taon na ministeryo nen Jesus, wala lay binilay ton ugaw ya kakkapatey to. Tan wala met so balolakin binilay to, posiblin diad mismon agew na impatey to. (Luc. 7:11-15; 8:49-55) Pero sarag to kasin bilayen so apat agew lan inatey ya say bangkay to et onggagapo lan naaagnas?

13. Base ed Juan 11:32-35, antoy reaksion nen Jesus nen anengneng ton onaakis si Maria tan arum nin wadman? (Nengnengen met so litrato.)

¹³ Basaen so Juan 11:32-35. Imadyin mo pay sinmublay ya agawa. Nen inmabet met si Maria ed si Jesus, imbaga to met may imbaga nen atsi to: “Katawan, no wadia ka labat, agkomon inatey so agik.” Manak-akis kalamor si Maria, pati saray Judio ya tinmumbok ed sikato. Nen anengneng tan arengel nen Jesus so iyaakis da, singa bebetagen so puso to, kanian akaakis met. Amta to ya ansakisakit so naandian na kapamilya o kaaro. Seguradon agnitepel nen Jesus ya anggapoy gawaen to pian napatunda so iyaakis na kakaaro to.

14. Antoy naaralan tayo ed si Jehova diad samay reaksion nen Jesus nen anengneng toy inyakis nen Maria?

¹⁴ Antoy naaralan tayo ed si Jehova diad samay inyakis nen Jesus? Naaralan tayo ya si Jehova et maar-aron Dios tan anlemek so puso to. Akin et ontan so nibaga tayo? Singa naaralan tayo diad imbeneg ya artikulo, perpekton inalig nen Jesus so panagnonot tan liknaan nen Ama to. (Juan 12:45) Kanian nen imbaga na Biblia ya ansakisakit ed si Jesus ya nanengneng ton onaakis iray kakaaro to, segurado tayo ya onman met so alikna nen Jehova. Nasasakitan met so Ama tayo no nanenengneng ton onaakis tayo lapud graben ermen. (Sal. 56:8) Makapa-touch ya ontan manayay Aman Jehova!

15. Base ed Juan 11:41-44, antoy ginawa nen Jesus nen akasabi la rad angiponponan ed si Lazaro? (Nengnengen met so litrato.)

¹⁵ Basaen so Juan 11:41-44. Impaekal nen Jesus so bato ya akasara ed angiponponan ed si Lazaro. Aglawari labay nen Marta ta ambanget la kuno may bangkay. Pero oniay imbaga  nen Jesus: “Agta imbagak ed sika a no manisia ka et nanengneng moy gloria na Dios?” (Juan 11:39, 40) Insan tinmangay si Jesus ed tawen tan nampikasi ta labay ton si Jehova so nirayew ed ontumbok ya gawaen to. Kayari ton nampikasi, inmeyag: “Lazaro, paway ka!” Tan pinmaway si Lazaro! Seguradon mankelaw iray totoo, lalo la ta iisipen na arum ed sikara ya imposible lan nabilay so apat agew lan inatey. c

16. Akin ya samay nabasad Juan kapitulo 11 et pabiskegen toy pananisia tayo ed kioli?

¹⁶ Amay salaysay ya nabasa ed Juan kapitulo 11 et pabiskegen toy pananisia tayo ed kioli. Kasin nanonotan yo may promise nen Jesus ed si Marta? Kuan to: “Say agim et onoli.” (Juan 11:23) Singa si Jehova, labalabay tan sarasarag met nen Jesus ya tooren itan ya promise. Amay inyakis to et patunay ya labalabay to lan naekal so patey tan say graben ermen ya epekto na satan. Nen binmilay si Lazaro, pinatunayan lamet nen Jesus ya sarasarag ton paolien iray inatey. Dalepdepen tayo sirin imay imbaga nen Jesus ed si Marta: “Agta imbagak ed sika a no manisia ka et nanengneng moy gloria na Dios?” (Juan 11:40) On, talagan manisia tayo ya tooren nen Jehova so promise to ya bilayen to iray inaatey. Pero, antoy gawaen tayo pian lalon ombiskeg so pananisia tayo ed kioli?

17. Antoy tandaan tayo no babasaen tayo ray salaysay ed Biblia tungkol ed kioli?

¹⁷ Basam iray salaysay tungkol ed kioli tan isip mo no anto ran leksion so naaralan mo ed saratan. Nabasa ed Biblia so waloran totoo ya binilay lamet nen Jehova diad dalin. d Marakep no i-personal study’m iratan. Legan mo irayan aaralen, tandaan mo ya aliwa labat irayan is-istorya—talagan nambilay nensaman irayan lalaki, bibii, tan ugugaw. Isip mo  no antoy naaralan mo ed kada salaysay tan no panon dan ipapanengneng ya talagan labalabay tan sarasarag na Dios ya bilayen iray inaatey. Tan agmo lilingwanan ya aralen so sankaimportantian ya kioli—say inkioli nen Jesus. Amayamay so akanengneng ya talagan sikatoy inmoli. Say inkioli nen Jesus et mabiskeg ya patunay ya talagan walay kioli ed arapen.—1 Cor. 15:3-6, 20-22.

18. Antoy gawaen mo pian nipapusom iray kansion tayo tungkol ed kioli? (Nengnengen met so paimanod leksab.)

¹⁸ Dengelen, kansionen, tan dalepdepen iray “espiritual a kansion” tungkol ed kioli. e (Efe. 5:19) Makatulong irayan kansion pian lalon ombiskeg so pananisia tayo ed kioli tan magmaliw itan ya tudtua ed isip tayo. Kanian maabig no lanang mon dengelen iratan. Ipraktis yo iratan diad family worship, tan pantongtongan yo so kabaliksan na saray lyrics. I-memorize mo tan ipapusom iratan. No bilang ta ondalan kad subok ya nalalanor lay bilay mo o inateyan kay inad-aro, ipanonot ed sika na masanton espiritu iratan ya kansion pian ombiskeg so liknaan mo tan nasarag mo iratan ya subok.

19. Anto ray balibalin imadyinen tayo ed nagawan kioli? (Nengnengen met so kahon ya “ Antoy Itepet Mod Sikara?”)

¹⁹ Imadyin mo lay balon mundo. Inikdan itayo nen Jehova na abilidad ya man-imadyin. Kanian marakep no imadyin mo lay sarilim ed Paraiso. Oniay imbaga na sakey ya sister: “Lanang kon iimadyinen ya wala ak lad balon mundo. Diad tua, singak la nasisingob iray ambalbalingit ya rosas diad Paraiso!” Imadyin moy sarilim ya mikakabat ka ed saray apaolin karakter ed Biblia. Siopay labalabay mon nakaistoryaan? Antoy itepet mod sikato? Isip mo met ya aabeten mo la ray pinaolin kapamilyam tan kakaarom. Anto kasi unonan reaksion mo no nanengneng mo la ra? Antoy ibagam? Kasin lakapen mo ra ya malmalet? Kasin makaakis ka lapud liket?

20. Antoy determinasyon mo?

²⁰ Maong labat ta walay ilalon kioli! Makapantiwala tayo ed satan ya promise nen Jehova ta labalabay tan sarasarag ton gawaen itan. Komon ta tuloytuloy tayon pabiskegen so pananisia tayo ed kioli. No ontan so gawaen mo, mas lalom ya naar-aro si Jehova, say Dios ya mangipapaseguro ed sika ya, ‘Onoli so inad-arom!’