1. Kombinsido tayo ed anto?

 KOMBINSIDO tayo ya inar-aro itayo nen Jehova tan labay to ya maliket so bilay tayo. (Roma 8:35-39) Kombinsido tayo met ya parad pankaabigan tayo iray prinsipyo ed Biblia. (Isa. 48:17, 18) Pero, nasubok so pananisia tayo no walay biglan nagawa ed bilay tayo.

2. Anto ran problema so dadalanen tayo natan, tan anto ray posiblin naisip tayo no ondalan tayo ed ontan iran problema?

² Anggano lingkor itayo nen Jehova, agtayo exempted ed problema. Singa bilang, ompan naproblema tayo lapud desisyon na sakey ya kapamilya tayo. Ompan na-diagnose ya wala manayay graben sakit tayo tan apektoen toy panaglingkor tayod si Jehova. Ompan bigla labat ya walay onsabin kalamidad tan sakey tayo ed saray biktima. Odino pairapen itayo na gobierno lapud pandadayew tayod si Jehova. No ondalan ka ed ontan iran subok, ompan isipen mo: ‘Akin et nagagawa ’yad siak? Wala amoy ginawak ya aliwa kanian apabarong koy Aman Jehova.’ No ontan so naliliknam, agka mapaga. Anggan saray matoor ya lingkor nen Jehova nensaman et alikna da met itan.—Sal. 22:1, 2; Hab. 1:2, 3.

3. Antoy naaralan tayo ed Salmo 34:19?

³ Basaen so Salmo 34:19. Walay duaran naaralan tayo ed sayan teksto: (1) Anggan saray matunong et manirap tan naproblema met. (2) Tulongan itayo nen Jehova no ondadalan tayod subok. Panon to tayon tutulongan? Say sakey ya paraan et ibabaga tod sikatayo ya talagan aliwan mainomay so bilay ed sayan mundo. Tua, im-promise to ya makapaliket so manlingkor ed sikato, pero agto imbaga ya ag-itayo lan balot naproblema natan. (Isa. 66:14) Kanian papasesegen to tayo ya  manpokus ed ilalo tayo—say bilay ya andi-anggaan diad balon mundo. (2 Cor. 4:16-18) Legan tayon aalagaren itan, impaseguro to ya tulongan to tayo pian naanosan tayo so kada agew.—Tag. 3:22-24.

4. Antoy pantongtongan tayo ed sayan artikulo?

⁴ Pantongtongan tayo iray matoor ya lingkor nen Jehova nen panaon na Biblia tan diad panaon tayo. Nanengneng tayo ed alimbawa ra ya anggano onarap tayo ed ag-iilaloan ya problema, ag-itayon balot paulyanan nen Jehova basta mantiwala tayo ed sikato. (Sal. 55:22) Legan tayon pantotongtongan iray agawad sikara, tepetan moy sarilim: ‘No nagawa met iyad siak, anto kasi reaksion ko? Antoy naaralan ko ed sayan lingkor nen Jehova? Diad kada alimbawa, antoy naaralan kod si Jehova ya manpabiskeg na tiwalak ed sikato?’

5. Anto ran subok so inanosan nen Jacob lapud si Laban? (Nengnengen so litrato ed apis.)

⁵ Wala ray lingkor nen Jehova nen panaon na Biblia ya dinmalan ed saray subok ya agda inilaloan. Sakey lay Jacob. Sikatoy ingganggan na ama ton si Isaac ya asawaen toy sakey ed saray anak nen Laban (kanayon da ya mandadayew met ed si Jehova). Impaseguro nen Isaac ya nabendisyonan si Jacob no ontan so gawaen to. (Gen. 28:1-4) Tinaynan nen Jacob so Canaan tan inmunor, ta aman so panlabayan nen Jehova. Walay duaran marikit nen Laban—si Lea tan Raquel. Naar-aro nen Jacob imay mas ugaw, si Raquel, kanian pinmayag ya mantrabaho ed si Laban na pitoy taon pian naasawa to. (Gen. 29:18) Pero aderal so plano nen Jacob ta niloko nen Laban. Diad samay labi na bansal, say inyakar tod si Jacob et si Lea, aliwan si Raquel! Pinmayag lanlamang si Laban ya asawaen met nen Jacob si Raquel kayari na sakey simba, basta aruman to ni na pitoy taon so pantrabaho tod si Laban. (Gen. 29:25-27) Aliwan satan labat. Masaol so panag-iter nen Laban na upa kanian kaskasian si Jacob. Diad tua, 20 ya taon ton inanosan so aliwliwan ugali na katulangan to!—Gen. 31:41, 42.

6. Anto ni ran problema so dinalan nen Jacob?

⁶ Wala ni ray arum ya problema ya dinalan nen Jacob. Baleg ya tua so pamilya to, pero wala ray panaon ya agmankasundo iray ananak ton lalaki. Inlako da ni ingen so agi ran si Jose pian magmaliw ya aripen. Say duaran anak nen Jacob ya si Simeon tan Levi et walay mauge-uges ya ginawa ra ya angiter na kababaingan ed pamilya ra tan ed ngaran nen Jehova. Insan inatey so inad-aron asawa nen Jacob ya si Raquel nen inyanak toy komaduan anak da. Tan nen masiken lay Jacob, walay agawan graben eras kanian apilitan so pamilya ra ya manayam lad Ehipto.—Gen. 34:30; 35:16-19; 37:28; 45:9-11, 28.

7. Anto ray ginawa nen Jehova pian nipalikna tod si Jacob ya naliliketan ed katooran to?

⁷ Diad amin ya dinadalan nen Jacob, sikatoy agbalot inmikban ed si Jehova tan agbalot kinmapuy so pananisia to. Kanian nanggawa na paraan si Jehova pian nipalikna tod si Jacob ya naliliketan ed katooran to. Singa bilang, anggano aminpigan sinaol nen Laban si Jacob, sikatoy benendisyonan nen Jehova kanian yinmaman. Nanggawa met na paraan si Jehova pian makapannengneng lamet si Jacob tan Jose—amay anak to ya say amta to et inatey la! Seguradon misatsalamat ya maong si Jacob ed si Aman Jehova nen anengneng tan alakap to lamet so anak to. On, asarag nen Jacob so amin ya subok ta sikatoy tinulongan na malet ya Kaaro to, si Jehova. (Gen. 30:43; 32:9, 10; 46:28-30) No agka met onikban ed si  Jehova, ituring to kan kaaro tan tulongan to ka pian nasarag mo ray ag-iilaloan ya nagawa ed bilay mo.

8. Antoy labalabay nen Arin David ya gawaen parad si Jehova?

⁸ Wala ray labay ya gawaen nen Arin David parad si Jehova balet ag-itan agawa base ed panlabayan to. Singa bilang, labalabay nen David so manpaalagey na templo parad si Jehova. Imbaga to itan ed si propetan Natan, tan oniay ebat nen Natan: “Gawam so antokaman a walad pusom, ta walad sika so tuan Dios.” (1 Awa. 17:1, 2) Seguradon na-excite ya maong si David nen arengel to itan. Ompan namplano lan tampol no panon ton gawaen iyan balbaleg ya proyekto.

9. Antoy reaksion nen David nen naamtaan to ya aliwan sikato so mangipaalagey na templo?

⁹ Pero diad saman ya labi, imbaga nen Jehova ed si Natan ya aliwan si David so mangipaalagey na templo, noagta sakey ed saray anak nen David ya laki. Kanian pinmawil si Natan ed si David pian ibalita iyan mensahe. (1 Awa. 17:3, 4, 11, 12) Antoy reaksion nen David? In-adjust to so goal to. Imbes ya nadismaya, sikatoy nampokus la ed pantipon na pundo tan materyales ya usaren na anak ton si Solomon parad sayan proyekto.—1 Awa. 29:1-5.

10. Antoy bendisyon nen Jehova ed si David?

¹⁰ Nen impaamta nen Natan ed si David ya aliwan sikato so mangipaalagey na templo, wala ni sakey ya mensahe ya impaibaga nen Jehova ed sikato. Im-promise nen Jehova ya diad pamilya nen David so panlapuan na ari ya manuley anggad angga. (2 Sam. 7:16) Diad balon mundo, seguradon malikeliket si David no naamtaan to ya nanlapud pamilya to si Jesus, say Ari ya manuley ed Sanlibon Taon! Antoy naaralan tayo ed sayan salaysay? Agtayo komon nadidismaya no agtayo nagawaan so amin ya goal tayo ed espiritual. Singa agawad si David, ompan walay arum ya bendisyon ya ipaparaan nen Jehova parad sikatayo ya mas ni nen say iilaloan tayo.

11. Panon ya benendisyonan nen Jehova iray Kristiano nen inmunan siglo anggano agsinmabi so Panarian diad panaon ya iilaloan da? (Gawa 6:7)

¹¹ Duma met so subok ed saray Kristiano nen inmunan siglo. Singa bilang, tatalaranan da so isabi na Panarian na Dios pero agda amta no kapigan itan nagawa. (Gawa 1:6, 7) Anggano onman, antoy ginawa ra? Makuli dan impulong so maong a balita. Nen anengneng da so idadakel na disipulo, alikna ra so bendisyon nen Jehova ed amin ya sagpot da.—Basaen so Gawa 6:7.

12. Antoy ginawa na saray Kristiano nen inmunan siglo nen walay graben eras?

¹² Nen inmunan siglo, walay agawan graben eras “ed interon dalin.” (Gawa 11:28) Apektado met iray inmuunan Kristiano. Seguradon inmirap so bilay da ta kulang so naakan. Kasin naiimadyin mo ray ulo na pamilya ya aburido ran maong ed pananap na pambilay? Kasin naiimadyin moy impakadismaya na arum ya kabataan ta ag-atuloy so plano dan manboluntaryo ed arum ya lugar? Agtayo amta so amin ya agawa. Pero seguradon nan-adjust irayan inmuunan Kristiano. Ginawa da nin siansia so anggaay nayarian dan manpulong, tan malikeliket iran angipawit na tulong ed saray mankaukolan ya agagi ed Judea.—Gawa 11:29, 30.

13. Anto ran bendisyon so naawat na saray Kristiano nen inmunan siglo anggano walay eras?

¹³ Anto ran bendisyon so naawat na saray Kristiano nen inmunan siglo anggano walay eras? Anengneng ya mismo na saray apektadon agagi ya talagan agmamaulyan si Jehova. (Mat. 6:31-33) Lalo dan naaro iray agagi ya tinmulong ed sikara. Saraman balet so angiter  na donasyon tan tinmulong ed panagbunog et seguradon alikna da met so liket ya manlalapu ed panangiter. (Gawa 20:35) On, benendisyonan iran amin nen Jehova ta mabulos iran nan-adjust nen anguman so situasyon da.

14. Antoy agawa ed si Bernabe tan apostol Pablo, tan antoy resulta? (Gawa 14:21, 22)

¹⁴ Dakel so kinmontra tan nampairap ed saray Kristiano nen inmunan siglo, tan no maminsan et bigla labat itan ya nagawa. Naeksperiensya itan nen Bernabe tan apostol Pablo nen manpupulong ira diad Listra. Diad gapo, maawa-awat iray totoo. Pero ag-abayag, wala ray sinmabin Judio tan inimpluensyaan da ra, kanian arum ed saramay apulongan et sikara lanlamang so nantupak ed si Pablo ya anggad patey-pateyan la. (Gawa 14:19) Antoy ginawa nen Bernabe tan Pablo? Inmalis ira ed arum a lugar tan intuloy day nampulong. Antoy resulta? Dakel so atulongan dan magmaliw a disipulo. Pinaseseg da met iray agagi ya anosan da labat iray subok. Seguradon binmiskeg so liknaan da ed mismon alimbawa nen Pablo tan Bernabe. (Basaen so Gawa 14:21, 22.) Maabig so resulta lapud ag-ira sinmuko. On, seguradon bendisyonan itayo nen Jehova no agtayo onsuko ed kimey ya ipapagawa tod sikatayo.

15. Antoy naaralan mod si Brother A. H. Macmillan?

¹⁵ Nen asingger lay 1914, walay iilaloan na saray agagi ya gawaen nen Jehova. Say sakey ed sikara et si Brother A. H. Macmillan. Inisip nen Brother Macmillan tan na arum ya agagi ya asingger la ran onlad tawen. Diad paliwawa to nen Setyembre 1914, oniay imbaga to: “Aya la seguroy sampot ya public talk ko.” Pero singa amta tayo la, aliwan nin saman so sampot. Kalabas labat na pigaran agew, oniay imbaga nen Brother Macmillan: “Seguro maganat labat so arum ed sikatayo kanian inisip tayon onla tayon tampol ed tawen.” Insan inyarum to: “Say importante, mankuli tayo ed kimey ya ipapagawa na Katawan.” Ontan ya ontan so ginawa nen Brother Macmillan. Masetseseg diad ministeryo. Sikatoy inyasain met na organisasyon ya ompasyar tan mamaseseg ed dakel ya agagi ya apriso lapud agda labay so mansundalo. Tan agto pinaulyanan so pipiaral anggano masikesiken la tan makapkapuy lay laman to. On, dakel so ginawa nen Brother Macmillan legan ton aalagaren so premyo to. Antoy epekto to ’ya ed sikato? Oniay insulat to antis ya inatey nen 1966: “Agan balot kinmapuy so pananisiak.” Balibalin aligen so alimbawa nen Brother Macmillan, lalo la no abaybayag tayo lan aalagaren so anggaan na sayan mundo!—Heb. 13:7.

16. Anton ag-iilaloan ya subok so inarap nen Brother Herbert Jennings tan nen asawa to? (Santiago 4:14)

¹⁶ Say sakey met ya makapabiglan subok et no na-diagnose ya wala manayay graben sakit tayo. Ontan so agawad si Brother Herbert Jennings. b Abanggit to ed istoryay bilay to ya malikeliket iran sanasawa ya nanlingkor bilang misionero ed Ghana. Balet kalabas na pigaran taon, a-diagnose si Brother Jennings ya walay bipolar mood disorder to. Anonotan to may nabasa ed Santiago 4:14, tan a-realize to ya duga may ibabaga na sayan teksto ya ‘agtayo amta no antoy nagawa nabuas.’ (Basaen.) Insulat to: “Kaukolan min tanggapen ya walay sakit ko, kanian tinaynan mi so asainmin mi tan saray kakaaro mi ed Ghana insan pinmawil kamid Canada [pian manpatambal].” Tinulongan nen Jehova si Brother Jennings tan si asawa to  pian tuloytuloy iran makapanlingkor anggano wala yan subok ed bilay da.

17. Antoy epekto ed arum ya agagi nen abasa da so istoryay bilay nen Brother Jennings?

¹⁷ Dakel ya agagi so akaaral ed alimbawa nen Brother Jennings. Oniay insulat na sakey ya sister: “Diad ami-amin ya artikulo, say istoryay bilay nen Brother Jennings so aka-touch ya maong ed siak. . . . Nen abasak ya kaukolan ya taynan nen Brother Jennings so asainmin to pian manpatambal, aman so akatulong pian magmaliw ak met ya realistiko ed situasyon ko.” Onia met so insulat na sakey ya brother ya a-diagnose ya walay mental disorder to: “Samploy taon ak ya nanlingkor bilang elder, pero kaukolan kon ikbanan so pribilehyok. . . . Abebbeba so pakanengneng kod sarilik, kanian no nababasak iray nagagawaan na agagi diad istoryay bilay da, lalo ak laingen ya nadi-depress. . . . Pero nen abasak so istoryay bilay nen Brother Jennings ya agsinmuko anggano walay sakit to, binmiskeg so liknaan ko.” On, no agtayo onsuko anggano wala ray makapadismayan nagawa ed bilay tayo, napaseseg tayo ray agagi tan aligen da so pananisia tan panaanos tayo.—1 Ped. 5:9.

18. Singa inyakto ed litrato, antoy naaralan tayo ed alimbawa na biyudan sister ya taga Nigeria?

¹⁸ Dakel ya lingkor nen Jehova so apektado na saray kalamidad tan saray onkakalat ya sakit, singa say COVID-19 pandemic. Singa bilang, legan na pandemic, ngalngali anggapo lay akeran naakan na sakey ya biyudan sister tan na anak to. Nen iluluto la na sister may datdaiset la kalamor ya belas ya almusal da, intepet na anak to no iner so pangalaan day onsublay ya iluto ra. Imbaga na sister ed anak to ya anggapo lay isaliw day naakan ta anggapo lay kuarta ra. Pero kaukolan da kunon aligen so pananisia to may biyuda ya taga Zarepat—basta iluto da labat may keran belas tan mantiwala irad si Jehova. (1 Ara. 17:8-16) Antis nin onsabi so oras na panangugto, abigla ra ta walay atanggap dan relief supply ya imbunog  na saray agagi! Amayamay, kanian walay abasto da ed masulok ya duay simba. Manbilib may sister ta mandengdengel manayay Jehova ed tongtongan dan sanina. On, no mantiwala tayo ed si Jehova, saray subok ni ingen so mamaelet na relasyon tayo ed sikato!—1 Ped. 5:6, 7.

19. Anton subok so inarap nen Brother Aleksey Yershov?

¹⁹ Diad imbebeneg iran taon, ag-iilaloan na dakel ya agagi tayo ya pairapen ira na gobierno. Sakey ed sikara si Brother Aleksey Yershov ya taga Russia. Abautismoan si Brother Yershov nen 1994. Diad saman ya panaon et wala ni kalayaan na Saray Tasi nen Jehova ed satan ya bansa. Pero kalabas na saray taon, anguman so situasyon ed Russia. Nen 2020, nilooban tan in-raid na saray pulis so abung nen Brother Yershov, tan kinompiska da so dakel ya gamit to. Kayari pigaran bulan, sikatoy kinasoan na gobierno. Say ansakit, imbase da itan ya kaso ed saray video ya inrekord na sakey ya too ya nampanggap ya interesado ed Biblia tan masulok ya sakey taon ya nampa-study ed saray Tasi.

20. Antoy ginawa nen Brother Yershov pian ombiskeg so relasyon tod si Jehova?

²⁰ Anggano mairap so dinalan nen Brother Yershov, wala kasi maong ya epekto to ’ya ed sikato? On wala. Lalon binmiskeg so relasyon to ed si Aman Jehova. Kuan to: “Mas mabetbet kamin manpipikasi ya saniba nen asawak. Amtak ya agko iya nasarag no anggapoy tulong nen Jehova.” Onia ni imbaga to: “Baleg ya tulong so personal study pian ag-onkapuy so liknaan ko. Dadalepdepen koy alimbawa na saray matoor ya lingkor nensaman. No babasaen ko ray salaysay ed Biblia, diman ko mas natatalosan ya talagan importante so mansiansian kalmado tan manmatalek ed si Jehova.”

21. Anto ray naaralan tayo ed sayan artikulo?

²¹ Anto ray naaralan tayo ed sayan artikulo? Diad sayan mundo, walan-wala ray ag-iilaloan ya nagawa ed bilay tayo. Pero ipapaseguro nen Jehova ya tulongan to tayo basta mantiwala tayo ed sikato. Tandaan tayo so pinagkateman teksto: “Dakel so pakakairapan na matunong, balet sikatoy isasalba nen Jehova ed saratan ya amin.” (Sal. 34:19) Kanian komon ta aliwan saray problema so sankanonot tayo. Manpokus tayo ed si Jehova tan ed pakayari ton ontulong ed sikatayo. No ontan so gawaen tayo, naibaga tayo met may imbaga nen apostol Pablo: “Walay biskeg kon arapen so amin a bengatla lapud samay mangiiter ed siak na pakayari.”—Fil. 4:13.