1. Antoy labay nen Jehova ya pagmaliwan tayo?

 SAKEY ed saray sankaliketan ya agew ed sanasawa et no first time dan nanengneng so kapangiyanak ya baby da. Talagan cute-cute tan makapaliket ya nengnengen so kapangiyanak ya ugaw. Pero siempre, aglabay na ateng ya mansiansia ya ontan so itsura to. Diad tua, seguradon naaburido ira no diad ilabas na panaon et aga ombabaleg. Ontan met so nalilikna nen Aman Jehova. Sikatoy malikeliket nen ginmapo tayon nanaral na Biblia. Pero agto labay ya mansiansia tayon ugaw ed espiritual. (1 Cor. 3:1) Say labay to et “magmaliw [tayon] matatken” ya Kristiano.​—1 Cor. 14:20.

2. Antoy pantongtongan tayo ed sayan artikulo?

² Antoy labay ya ibaga na matatken ed espiritual? Antoy gawaen tayo pian ontatken tayo bilang Kristiano? Antoy nitulong na anawet ya espiritual ya naakan diad itatken tayod espiritual? Tan akin et nepeg tayon iwasan so sobran tiwala ed sarili? Aralen tayo ed sayan artikulo so ebat ed sarayan tepet.

ANTOY LABAY YA IBAGA NA MATATKEN ED ESPIRITUAL?

3. Antoy labay ya ibaga na matatken ed espiritual?

³ Diad Biblia, amay Griegon salita ya impatalos ya “baleg lan too” et mankabaliksan met na “matatken,” “perpekto,” tan “kompleto.” (Efe. 4:13, paimanod leksab) Bilang Kristiano, nibagan “baleg” o “matatken” tayo lad espiritual no mabiskeg so relasyon tayo ed si Jehova. Tan diad tua, anggano matatken tayo lad espiritual, kaukolan ya tuloytuloy nin siansia so iyaligwas tayo. (1 Tim. 4:15) Aga akadepende ed edad so itatken ed espiritual. Amin tayo et sarag tayo itan ya gawaen, anggan saray kabataan ni labat. Anto ray pakanengnengan balet ya say sakey ya Kristiano et matatken lad espiritual?

4. Panon tayon nibaga ya say sakey ya Kristiano et matatken lad espiritual?

⁴ No say sakey ya Kristiano et matatken ed espiritual, uunoren toy amin ya ganggan na Dios, aliwan saramay labay to labat  ya unoren. Siempre, lapud aliwa nin perpekto, nalilingo met. Pero nanengneng ed panagnonot, ugali, tan saray desisyon to ya gagawaen toy anggaay nayarian ton paliketen si Jehova. Insulong to lay balon personalidad tan pansasagpotan ton aligen so panagnonot na Dios. (Efe. 4:22-24) Impasal to met so sarili to ya mandesisyon base ed saray ganggan tan prinsipyo nen Jehova. Kanian agto la kailangan so andukey ya listaan na saray dapat tan agto dapat ya gawaen. Sikatoy desidido ya gawaen no antoy duga tan walay disiplina tod sarili to.​—1 Cor. 9:26, 27.

5. Anto ray nayarin nagawa ed sakey ya Kristiano no aliwa nin matatken ed espiritual? (Efeso 4:14, 15)

⁵ Diad kabaliktaran balet, no say sakey ya Kristiano et aliwa nin matatken ed espiritual, matmainomay ya naloko na “saray palson bangat” tan “mapalikdo iran pakana.” Manigsisian tampol ed saray onkakalat ya tsismis, fake news, tan ed ibabaga na saray apostata. a (Basaen so Efeso 4:14, 15.) Ompan sikatoy matmainomay met ya nainggit tan ombarong, kanian apektadoy relasyon to ed arum. Tan no walay tukso, matmainomay toy ombigay imbes ya labanan to.​—1 Cor. 3:3.

6. Panon ya nagagawa so itatken ed espiritual? Mangiter na ilustrasyon. (Nengnengen met so litrato.)

⁶ Singa abitlad gapo, inkompara na Biblia so proseso na itatken ed espiritual diad ibabaleg na ugaw. Lapud datdaiset ni so amta na sakey ya ugaw, kailangan to ray ateng to ya manprotekta tan mangigiya ed sikato. Bilang ilustrasyon, no say sakey et ugaw ni, bembenan na ateng to so lima to no ombeltang irad karsada. Legan ya ombabaleg, ompan abuloyan la na ateng to ya ombeltang ya bukor ed karsada, pero bilinen da nin siansia ya man-ingat tan onlingaw ed kawanan tan kawigi antis ya ombeltang. Balet no adulto la, amta to la ray dapat ton gawaen anggano agda la bilinen ta makalakal la. Singa ontan met so proseso na itatken ed espiritual. No panon ya say sakey ya ugaw et kailangan toy tulong na mas matatken pian naiwasan to ray peligro, say sakey ya Kristianon ugaw ni ed espiritual et lanang ya akadepende ed tulong na saray maespiritual ya Kristiano. Agto ni amtay gawaen to pian makapandesisyon na duga tan naiwasan to iray peligro ya maneral ed relasyon tod si Jehova. Diad kabaliktaran balet, no say sakey  ya Kristiano et matatken lad espiritual, sarag toy mandesisyon ya bukor. Pero antis ya mandesisyon, ikokonsidera to iray prinsipyo ed Biblia pian naamtaan toy panagnonot nen Jehova tan ditan to ibase iray desisyon to.

7. Kasin kailangan na saray maespiritual ya Kristiano so tulong na arum?

⁷ Labay to kasin ibaga, aglan balot onkerew na advice so Kristianon matatken la ed espiritual? Andi met. Wala ray pagkakataon ya kailangan met na saray maespiritual ya agagi so tulong na arum. Pero no say sakey et ugaw nid espiritual, akadepende labat ed ibaga o idikta na arum imbes ya mandesisyon parad sarili to. Diad kabaliktaran balet, anggano onkerew na advice so maespiritual ya Kristiano ed saray eksperiensyadon agagi, sankanonot to nin siansia ya sikaton mismo so mandesisyon parad sarili to, ta labay ton iyaplika imay ibabaga na Biblia ya “kada sakey et nepeg ton sakbaten so dilin responsabilidad to.”​—Gal. 6:5.

8. Diad anto ran paraan ya mandumaan iray maespiritual ya Kristiano?

⁸ No panon ya aliwan parepareho so itsura na saray adulto, aliwa met ya parepareho so marakep ya kualidad tan ugali na saray maespiritual ya Kristiano. Singa bilang, say arum et kabkabat ya makpel, tan say arum et maiter. Wala met iray agagi ya makasi tan maong ya manligliwa, tan say arum et aralem so kakabatan da. Nayarin mandumaan met so desisyon na duaran maespiritual ya Kristiano anggano parehoy situasyon da. Tua, mandumaan so desisyon da pero parehon akabase ed Biblia. Nagagawa iya ed saray situasyon ya kaukolan day mandesisyon base ed ididikta na konsiensia ra. Pero lapud maespiritual ira, agda huhusgaan so arum ya duma so desisyon da. Say importante ed sikara et napansiansia so pankakasakey.​—Roma 14:10; 1 Cor. 1:10.

ANTOY GAWAEN TAYO PIAN ONTATKEN TAYO ED ESPIRITUAL?

9. Kasin automatic so itatken ed espiritual? Ipaliwawa.

⁹ Maples ya ombaleg iray ugugaw. Diad ilalabas na panaon, agtayo naliklikas ya baleg la ra manaya. Duma balet so itatken ed espiritual. Aliwa itan ya automatic, kanian kailangan tayoy mansagpot. Singa bilang, imanoen no antoy naaralan tayo ed saray agagi ed Corinto. Inawat day maong a balita, nampabautismo ra, akaawat iray masanton espiritu, tan abayag dan akaiba si apostol Pablo kanian personal iran akaaral ed sikato. (Gawa 18:8-11) Pero kalabas na pigaran taon, dakel ed sikara so ugaw nin siansia ed espiritual. (1 Cor. 3:2) Agtayo labay ya ontan so nagawa ed sikatayo, kanian antoy gawaen tayo?

10. Antoy gawaen tayo pian ontatken tayod espiritual? (Judas 20)

¹⁰ Pian ontatken tayod espiritual, dapat labay tayoy ontatken ed espiritual. No say sakey ya Kristiano et mas labay toy ‘magmaliw ya andiay kakabatan,’ aga mansagpot ya onaligwas kanian mansiansian ugaw ed espiritual. (Pro. 1:22) Agtayo labay ya nagawad sikatayo imay nagagawa ed arum ya adulto ya akadepende ni ran siansia ed ateng da no mandedesisyon ira. Tandaan tayo ya say iyaligwas tayo et ag-akadepende ed arum. Sikatayon mismo so akanresponsabilidad ed satan. (Basaen so Judas 20.) Kanian no labay moy ontatken ed espiritual, ipikasim ed si Jehova ya ikdan to kay “panlabay tan pakayarin onkiwas.”​—Fil. 2:13.

11. Panon itayon tutulongan nen Aman Jehova pian ontatken tayo ed espiritual? (Efeso 4:11-13)

¹¹ Amta nen Jehova ya kailangan tayoy tulong pian ontatken tayod espiritual. Kanian uusaren to ray “pastol tan managbangat” ed kongregasyon ya ontulong ed sikatayon magmaliw ya “singa baleg lan too, ya anggad nasabi tayo lay nagnap ya inkatatken, a mipara ed  Kristo.” (Basaen so Efeso 4:11-13.) Iikdan itayo met nen Aman Jehova na masanton espiritu, ta atan so ontulong pian niwalad sikatayoy “kanonotan nen Kristo.” (1 Cor. 2:14-16) Impaisulat to met so apatiran Ebanghelyo ya ditan et naamtaan tayo so panagnonot, panagsalita, tan ugali nen Jesus nen wadiad dalin. No aligen moy panagnonot tan ugali nen Jesus, seguradon ontatken ka ed espiritual.

ANTOY NITULONG NA ANAWET YA ESPIRITUAL YA NAAKAN?

12. Antoy kaiba ed “saray manunan bangat nipaakar ed Kristo”?

¹² Pian ontatken tayod espiritual, agtayo dapat mankokontento ed “saray manunan bangat nipaakar ed Kristo,” singa say bangat tungkol ed panagbabawi, pananisia, bautismo, tan kioli na saray inatey. (Heb. 6:1, 2) Sarayan bangat so pundasyon na inka-Kristiano. Kanian arayan topic so nampokusan nen apostol Pedro nen pinulongan to iray totoo ed Jerusalem nen Pentecostes. (Gawa 2:32-35, 38) No say sakey et labay toy magmaliw ya disipulo nen Kristo, kaukolan ton awaten irayan bangat. Singa bilang, impaimano nen Pablo ya no say sakey et agmanisia ed kioli na saray inaatey, aga nayarin magmaliw ya disipulo nen Kristo. (1 Cor. 15:12-14) Pero, aliwan saray manunan bangat labat so kaukolan tayon talosan pian ontatken tayod espiritual.

13. Antoy gawaen tayo pian nagunggonaan tayo ed anawet ya espiritual ya naakan ya abitla ed Hebreo 5:14? (Nengnengen met so litrato.)

¹³ Kaiba ed anawet ya espiritual ya naakan iray ganggan tan prinsipyo nen Jehova. Makatulong iratan pian natalosan tayoy panagnonot to. Pian nagunggonaan tayo ed satan ya naakan, kaukolan tayon aralen, dalepdepen, tan iyaplika iray katuaan ya walad Biblia. No ontay gawaen tayo, ipapasal tayoy sarili tayo ya isipen ya lanang no antoy makapaliket ed si Jehova no mandedesisyon tayo. b​—Basaen so Hebreo 5:14.

14. Panon ya tinulongan nen Pablo iray agagi ed Corinto pian ontatken ira ed espiritual?

¹⁴ No say sakey et ugaw ni ed espiritual, ompan mairap toy mandesisyon no anggapoy espisipikon ganggan ed Biblia tungkol ed situasyon to. No anggapoy espisipikon ganggan ed Biblia, ompan isipen na arum ya agagi ya sarag da lan gawaen so antokaman ya labay  da. Say arum balet, ompan mananap ni ra na espisipikon instruksion anta agmet la kaukolan. Atan so problema na saray agagi ed Corinto nensaman. Tinepetan da si Pablo no kasin sarag day mangan na karne ya inyapay ed saray idolo. Imbes ya idesisyonan ira nen Pablo, imbaga tod sikara ya walay “kanepegan [dan] manpili” base ed no antoy ididikta na konsiensia ra. Binitla to ray pigaran prinsipyo ya makatulong ed sikaran manggaway desisyon ya agda pakakonsiensiaan tan agmet pakagapolan na arum. (1 Cor. 8:4, 7-9) Labay iran tulongan nen Pablo ya ontatken ed espiritual, kanian imbangat to ra ya ibase day desisyon da ed saray prinsipyo nen Jehova, imbes ya mananap iray espisipikon instruksion o mandepende ra labat ed idikta na arum.

15. Panon ya tinulongan nen Pablo iray Hebreon Kristiano pian ontatken ira ed espiritual?

¹⁵ Wala met so importantin naaralan tayo ed samay sulat nen Pablo ed saray Hebreon Kristiano. Say arum ed sikara et agla nampatatken ed espiritual. Imbaga ingen nen Pablo ya “pinmawil [ira ed] dati a singa sakey a mankaukolan na gatas,” imbes ya mangan iray anawet ya espiritual a naakan. (Heb. 5:12) Ag-ira nansagpot ya aralen tan talosan iray balon katuaan ya ibabangat nen Jehova ed sikara diad kongregasyon. (Pro. 4:18) Singa bilang, wala ray Judio ya manisia ed si Jesus pero ibabaga ra ya kaukolan nin unoren so Mosaikon Ganggan, anta anampot la itan manga 30 taon lay apalabas nen inyapay nen Jesus so bilay to. (Roma 10:4; Tito 1:10) Linmabas lay 30 taon, pero agda nin siansia natalosan ya agda la kaukolan ya unoren so Mosaikon Ganggan. Atan so rason no akin ya sinulatan nen Pablo iray Hebreon Kristiano. Seguro naimano yo ya puros anawet ya espiritual ya naakan so karga na libron Hebreo. Atan so kakkaukolan na saray Hebreon Kristiano nensaman pian ombiskeg so pananisia ra. Lapud satan ya sulat, atalosan da ya mas marakep ya aminpigapiga so balon paraan na pandadayew da ed si Jehova no ikomparad panguunor da ed Mosaikon Ganggan. Awalaan met ira na pakpel ya ipulong so maong a balita anggano dakel ya Judio so onkokontra ed sikara.​—Heb. 10:19-23.

IWASAN SO SOBRAN TIWALA ED SARILI

16. Legan tayon onaaligwas ed espiritual, anto ni dapat tayon gawaen?

¹⁶ Anggano matatken tayo la ed espiritual, kaukolan tayo nin siansia so mansagpot pian  mansiansian mabiskeg so espiritualidad tayo. No agtayo manalwar, ompan mankampante tayo la tan sobra lay tiwala tayod sarili tayo. (1 Cor. 10:12) Importante ya “itultuloy [tayon] suboken” so sarili tayo, tan agtayo ontutundan pabiskegen so relasyon tayo ed si Jehova.​—2 Cor. 13:5.

17. Diad samay sulat nen Pablo ed saray agagi ed Colosas, panon ton indanet ya importante so pansiansian matatken ed espiritual?

¹⁷ Diad samay sulat nen Pablo ed saray agagi ed Colosas, indanet to ya importantin mansiansia ran matatken ed espiritual. Anggano mabiskeg so espiritualidad da, binilin ni ran siansia nen Pablo ya manalwar ira pian ag-ira naimpluensyaan na panagnonot na mundo. (Col. 2:6-10) Binitla met nen Pablo so malasakit nen Epafras ed saray taga Colosas. Kabkabat nen Epafras iray agagi ditan, tan naynay to ran ipipikasi pian “makapansiansia [ran] nagnap” o matatken ed espiritual. (Col. 4:12) Antoy punto? Amta nen Pablo tan Epafras ya kaukolan na sakey so mansagpot tan onkerew na tulong ed Dios pian mansiansian matatken ed espiritual. Labay da ya mansiansian mabiskeg so espiritualidad na saray agagi ed Colosas anggano wala ray dadalanen dan subok.

18. Antoy nayarin nagawa ed sakey ya Kristiano anggano matatken lad espiritual? (Nengnengen met so litrato.)

¹⁸ Imbaga nen Pablo ed saray Hebreon Kristiano ya anggano say sakey et matatken lad espiritual, wala nin siansiay posibilidad ya permanentin naandid sikato so pabor na Dios. No say sakey ya Kristiano et agmanalwar, ompan onsabi ed punto ya agto la dengelen si Jehova tan agla magbabawi ed saray kasalanan to, kanian agto naawat so panamerdona na Dios. Maong labat ta aliwa nin ontan so situasyon na saray Hebreon Kristiano nensaman. (Heb. 6:4-9) Diad panaon tayo ey? Panon to iramay agagi ya nagmaliw ya inaktibo odino adispelo, pero sinmabi panaon et nagbabawi la ra? Nanengneng ed mapaabeban impagbabawi ra ya aliwan sikara imay tinukoy nen Pablo ya aglan balot naperdona. Pero siempre, kaukolan day tulong diad ipawil da ed si Jehova. (Eze. 34:15, 16) Ompan walay iyasain na saray elder ya maespiritual ya agi ya ontulong ed sikara pian ombiskeg lamet so relasyon da ed si Jehova.

19. Antoy pansagpotan tayon gawaen?

¹⁹ On, sarag moy ontatken ed espiritual basta mansagpot ka. Itultuloy moy mangan na anawet ya espiritual ya naakan tan alig moy panagnonot nen Jehova. Tan no bilang ta matatken ka lad espiritual, agka komon mankakampante. Gawam so anggaay nayarian mon mansiansian matatken ed espiritual natan tan diad andi-anggaan!