1. Anto tay espiritual ya paraiso, tan antoy desidido tayon gawaen?

 WALAY paraiso ed dalin natan ya milyon-milyon la so manaayam. Antam no anto ’tan? Atan may espiritual ya paraiso! a Saray manaayam ditan et mareen tan maomaong ya totoo. Balibali so manayam ditan kanian desidido ira ya agla onalis. Tan labay da ya dakel nin totoo so nakaiba da ditan.

2. Akin et makapabilib so espiritual ya paraiso?

² Makapabilib iyan espiritual ya paraiso ya ginawa nen Jehova. Akin ey? On ta anggano mauge-uges iyan mundo nen Satanas tan manbubusolan iray totoo, walay deen tan pankakasakey na saray lingkor na Dios. (1 Juan 5:19; Apo. 12:12) Maar-aroy Jehova. Labay to tayon protektaan ed impluensya na sayan mundo pian mareen so nonot tayo tan makapanmatoor tayo ed sikato. Diad Biblia, inkompara so espiritual ya paraiso ed pasen ya “pansalimbengan” tan “singa nasasalog a hardin.” (Isa. 4:6; 58:11) Wadtan so bendisyon nen Jehova, kanian amin ya manaayam ditan et maliket tan maligen anggano agaylay irap na bilay ed sayan kaunoran iran agew.​—Isa. 54:14; 2 Tim. 3:1.

3. Panon ya agawa ed Israel nensaman imay propesiya diad Isaias kapitulo 65?

³ Impaisulat nen Jehova ed si propetan Isaias no antoy magmaliw ya bilay na saray manayam ed espiritual ya paraiso. Nabasa itan ed Isaias kapitulo 65, tan say unonan impakagawa na sayan propesiya et nen 537 B.C.E. Atan may nen nibulos la iray Judio ya abihag ed Babilonia tan pinmawil ira ed Israel. Benendisyonan ira nen Jehova. Tan tinulongan to ra ed impanpaalagey da lamet ed Jerusalem tan ed templo, kanian sarag da lan  dayewen si Jehova diad dugan paraan.​—Isa. 51:11; Zac. 8:3.

4. Panon ya nagagawa ed panaon tayo imay propesiya ya walad Isaias kapitulo 65?

⁴ Kasin nagagawa met ed panaon tayo imay propesiya nen Isaias? On. Ginmapo itan nen 1919. Diad satan ya taon, imbulos nen Jehova iray lingkor to manlapud impakaaripen da ed Makapanyarin Babilonia. Insan la ginmapo so espiritual ya paraiso tan kalkalna itan ya linmawak ed interon mundo. Amasyan nampulong iray lingkor nen Jehova kanian dakel so abuon kongregasyon. Tan aramay datin singa ayep so ugali da et insulong da lay “balon personalidad,” labay ton ibaga, pansasagpotan da lan aligen so ugali na Dios. (Efe. 4:24) Siempre, amta tayo ya say literal ya pakagawa na saray bendisyon ya insulat nen Isaias et dia nid balon mundo. Pero natan ni labat et dakel lan bendisyon so nanaawat tayo diad espiritual ya paraiso. Amtaen tayo no anto iratan ya bendisyon tan no akin ya importantin gawaen tayoy anggaay nayarian tayo ya mansiansia ed espiritual ya paraiso.

SARAY BENDISYON YA PANLILIKETAN TAYO DIAD ESPIRITUAL YA PARAISO

5. Base ed Isaias 65:​13, antoy panliliketan tayo ed espiritual ya paraiso?

⁵ Ag-itayo naeerasan tan napapaet ed espiritual. Diad samay propesiya nen Isaias, nanengneng tayoy baleg ya pandumaan na saramay walad espiritual ya paraiso tan saramay anggapo ditan. (Basaen so Isaias 65:13.) Antoy kipapasen na saramay anggapod espiritual ya paraiso? ‘Narasan, napapaet, tan nababaingan ira.’ Ontan so kipapasen da ta napapaulyanan ira ed espiritual. (Amos 8:11) Diad kabaliktaran balet, dakdakel so iiter nen Jehova ed sikatayo ran lingkor to pian ombiskeg so espiritualidad tayo. Iiter tod sikatayo so masanton espiritu, impaisulat to so Biblia, tan tataryaan to tayoy dakdakel ya espiritual ya naakan ta labay to ya “mangan . . . , oninum . . . , [tan] manliket” tayo.​—Ikompara so Apocalipsis 22:17.

6. Antoy ibabaga na Joel 2:​21-24 tungkol ed saray espiritual ya naakan ya iiter nen Jehova? Antoy gawaen tayo pian minabang tayod saratan?

⁶ Diad propesiya nen Joel, binitla to so dakdakel ya ilik, alak, tan larak pian isimbolo so agnasabaan ya espiritual ya naakan ya iiter nen Jehova ed saray lingkor To. (Joel 2:21-24) Panon itayon papakanen nen Jehova? Wadtan so Biblia, saray publikasyon tayo ya base ed Biblia, say website tayo, ontan met ed saray aral, asemblea, tan kombension tayo. No inagew-agew tayon mangan na espiritual ya naakan, agtayon balot naerasan tan napaet ed espiritual.

7. Anto ray rason akin et ‘maabig so kipapasen na puso’ tayo? (Isaias 65:14)

⁷ Malikeliket tan kokkontento itayo. Ibabaga na Biblia ya “oneyag ed liket” iray lingkor na Dios lapud manleppua ed puso ra so pisasalamat. (Basaen so Isaias 65:14.) Misatsalamat tayo ta amta tayo iray makapabiskeg ya katuaan ed Biblia tan saray makaligliwan sipan na Dios. Sakey ni, amta tayo ya lapud dondon bagat nen Jesus, seguradon nagawa iray iilaloan tayo ed arapen. Aratan so rason no akin ya ‘maabig so kipapasen na puso’ tayo. Diad tua, no paniistoryaan tayo iratan kaiba iray agagi, malikeliket tayo!​—Sal. 34:8; 133:1-3.

8. Antoy duaran manuna ya bendisyon ya panliliketan tayo diad espiritual ya paraiso?

⁸ Say duaran manuna ya bendisyon ya panliliketan tayo ed espiritual ya paraiso et say aroan tan pankakasakey tayo. (Col. 3:14) No natan ni labat et malmalet lay aroan tan pankakasakey tayo, di lalo lad balon mundo! Oniay alikna na sakey ya sister nen first time to kunon akabat iray Tasi nen Jehova: “Malikeliket ak ta diman ko labat anengneng so tuan  aroan. Ta diad tua, agko nin balot asali so magmaliw ya maliket anggan diad loob na pamilya mi.” On, say tuan liket tan inkakontento et nalikna labat na sakey no sikatoy walad loob na espiritual ya paraiso. Kanian anggan anto ni ’tay ibaga na arum ed sikatayo ran Tasi nen Jehova, ayos labat ta amta tayon walad sikatayo so pabor na Dios. Say importante et malinis so ngaran o reputasyon tayo diad pakanengneng nen Jehova tan saray agagi.​—Isa. 65:15.

9. Akin et makapalemew na liknaan imay nabasad Isaias 65:16, 17?

⁹ Kalmado tan mareen so nonot tayo. Ibabaga na Isaias 65:14 ya saramay walad paway na espiritual ya paraiso et ‘onakis ira lapud asakitan so puso ra tan manugaog ira lapud nagogonigon ira.’ Sikatayo ran lingkor na Dios balet ey? Anggano nasasakitan tan naproproblema tayo met natan, amta tayo ya onsabi lanlamang so panaon ya amin iratan et ‘nalingwanan la tan niyamot la ed pakanengneng na Dios.’ (Basaen so Isaias 65:16, 17.) Ekalen nen Jehova so amin ya problema tayo, tan agtayo lan balot nanonotan iray ansakisakit ya agawad bilay tayo.

10. Akin et labalabay mon nakaiba iray agagi diad aral? (Nengnengen met so litrato.)

¹⁰ Anggano anggapo tayo ni ed balon mundo, natan ni labat et ondedeen lay nonot tayo kada no wala tayo ed aral. Ditan et onlelemew so liknaan tayo ta agtayo ni iisipen iray problema tayo tan saray makapa-stress ya nagagawa ed mundo. Tan diad tua, makakatulong tayo pian onlemew met so liknaan na saray agagi, lalo la no nanenengneng dad sikatayo iray ugali ya kaibad bunga na espiritu na Dios​—singa say aro, liket, kareenan, kaabigan, tan inkaulimek. (Gal. 5:22, 23) Maong labat ta parte itayo na organisasyon nen Jehova! No mansiansia tayo ed espiritual ya paraiso, seguradon nanengneng tayo met so literal ya paraiso, sano nasumpal la imay sipan nen Jehova ya “balon tawen tan balon dalin.”

11. Base ed Isaias 65:​18, 19, antoy epekto ed sikatayo na espiritual ya paraiso ya ginawa nen Jehova?

¹¹ Misatsalamat tan eksayted tayo. Imbaga nen Isaias no akin ya ‘manggayaga tan manliket’ tayo diad espiritual ya paraiso. Si Jehova ya mismo so nanggawa ed satan. (Basaen so Isaias 65:18, 19.) Diad paway na espiritual ya paraiso, ag-amta na totoo so katuaan tungkol ed Dios. Kanian labay nen Jehova ya tulongan tayo ra pian makaloob met ira ed marakdakep ya espiritual ya paraison ginawa to. Dakel so panliliketan tayon bendisyon manlapu la nen naamtaan tayoy katuaan. Agtayo itan labay ya sarilien, kanian eksayted tayon ibaga itan ed arum!​—Jer. 31:12.

12. No isipen mo ray gawaen nen Jehova diad balon mundo ya nabasad Isaias 65:20-24, antoy epekto tod sika, tan akin et ontan so naliliknam?

 ¹² Misatsalamat tan eksayted tayo met lapud ilalo tayo. Isip mo pay amin ya ipaparaan nen Jehova parad sikatayo diad balon mundo! Kuan na Biblia: “Anggapo lay kapangiyanak . . . a manbilay labat na pigaran agew.” Say bilay tayo et “singa karukey na bilay na sakey a kiew.” ‘Mangipaalagey tayo na kaabungan tan manayam tayo ditan tan mantanem tayo na kaubasan tan kanen tayoy bunga to.’ ‘Ag-itayo mansagpot ed andi-kakanaan’ lapud ‘bendisyonan itayo nen Jehova.’ On, ag-itayo naupotan na gawaen diad balon mundo! Seguroen nen Aman Jehova ya anggapoy kulang ed bilay tayo. Amta to so pankaukolan na kada sakey ed sikatayo kanian ‘ebatan to tayo la’ antis tayo nin onkerew. Diad tua, ibabaga na Biblia ya ‘peneken toy pirawat na balang mabilay a bengatla.’​—Isa. 65:20-24; Sal. 145:16.

13. Base ed Isaias 65:25, anton pananguman so nagawa ed sakey ya too no onggapo lan manlingkor ed si Jehova?

¹³ Mareen tan maligen so bilay tayo. Diad tulong na masanton espiritu nen Jehova, wala ray totoo ya datin masebesebeg tan makapataktakot so ugali da ya inuman day bilay da. (Basaen so Isaias 65:25.) Ginawa ray anggaay nayarian da pian naekal day aliwliwan ugali ra kanian natan et maamo la ra. (Roma 12:2; Efe. 4:22-24) Pero siempre, anggano lingkor tayo la na Dios, agtayo nin siansia perpekto kanian makakagawa tayo ni na lingo. Say makapabilib balet, impaniiba itayo nen Aman Jehova. Walay tuan aroan tan kareenan ed sikatayo ran lingkor to. Si Jehova labat so makagawa ed satan! Sarag ton pankasakeyen so “amin a klase na totoo.”​—Tito 2:11.

14. Base ed istoryay bilay na sakey ya brother, akin et nibaga tayon talagan tua imay nabasad Isaias 65:25?

¹⁴ Talaga kasin sarag na sakey ya too so manguman? Pian naebatan itan, nengnengen tayoy sakey ya alimbawa. Walay kabataan ya laki ya ayaman to lay prisoan manlapu la nen 20 so taon to. Imoral so kabibilay to tan lanang ya nasasangkot ed gulo. Aminpiga lan apriso lapud pantatakew to tan arum nin seryoson krimen. Labalabay toy milaban, anggapoy aatrasan to. Pero nen naamtaan toy katuaan ed Biblia tan ginapoan to lay miaral, awalaan na direksion so bilay to. Atalosan to ya kaukolan to itan ya usaren parad si Jehova. Ag-abayag, sikatoy nampabautismo bilang Tasi nen Jehova. Talagan agawa ed sikato imay nabasa ed Isaias 65:25. No dati et masebesebeg ya singa leon, natan et mareen tan maamo la ya singa kordero.

15. Akin et labay tayon tulongan so dakel nin totoo ya makaloob ed espiritual ya paraiso, tan panon tayon nagawaan itan?

¹⁵ Oniay nabasad gapo na Isaias 65:13: “Inkuan na Soberanon Katawan a Jehova.” Tan diad sampot na bersikulo 25, nabasa iray salitan, “inkuan nen Jehova.” On, no antoy inkuan to, nagawan-nagawa! (Isa. 55:10, 11) Nagagawa la natan so espiritual ya paraiso! Espisyal iya ta singa tayo baleg ya pamilya, tan sanaagi so turing tayo ed sakey tan sakey. Diad loob na sayan pamilya, sankalikna tayoy deen tan agtayo masyadon mapagpaga anggano magulogulo so mundo. (Sal. 72:7) Atan so rason no akin ya labay tayon tulongan so mas dakel nin totoo pian magmaliw met iran parte na sayan pamilya. Nagawaan tayo itan no mamasya tayo ed kimey ya panagpulong tan panagbangat.​—Mat. 28:19, 20.

ANTOY GAWAEN TAYO PIAN LABAYEN NA TOTOO SO ONLOOB ED ESPIRITUAL YA PARAISO?

16. Antoy makatulong pian labayen na totoo so onloob ed espiritual ya paraiso?

¹⁶ Kada sakey ed sikatayo et walay nitulong to pian lalon ondakep so espiritual ya paraiso  tan labayen met na arum so onloob ditan. Nagawaan tayo itan no aligen tayoy Jehova. Agto pipiliten iray totoo ya manlingkor ed sikato. Imbes, kalkalna to ran ‘iyaasingger’ ed sikato. (Juan 6:44; Jer. 31:3) No naamtaan na saray mapaabeban totoo ya maar-aroy Jehova tan balibali ugali to, natural met labat ya onapit so liknaan da ed sikato. Sikatayo balet ey? No ipanengneng tayoy balibalin ugali, panon met itan ya makatulong pian labayen na saray totoo so onloob ed espiritual ya paraiso?

17. Antoy gawaen tayo pian napakiwas iray totoo ya onloob ed espiritual ya paraiso?

¹⁷ No maar-aro tan maomaong so panagtrato tayo ed saray agagi, nayarin atan so mamakiwas ed saray totoo ya onloob ed espiritual ya paraiso. No walay interesado ya first time toy miaral, labay tayon nalikna to imay alikna na saray taga Corinto nensaman nen first time day onla ed pantitipon na saray Kristiano. Kuan da: “Say Dios so peteg a walad limog yo.” (1 Cor. 14:24, 25; Zac. 8:23) Gawaen tayo sirin so anggaay nayarian tayo pian ‘mansiansiay kareenan’ ed kongregasyon tayo.​—1 Tes. 5:13.

18. Antoy nayarin mamakiwas ed totoo ya onloob ed espiritual ya paraiso?

¹⁸ Importante ya say pakanengneng tayo ed saray agagi et pareho ed pakanengneng nen Jehova ed sikara. Say nenengnengen nen Jehova et saray maong ya ugali ra, aliwan saray kakapuyan da, ta amta to ya onsabi panaon et naekal lanlamang iratan. Ontan tayo met sirin. No bilang ta asakitan da tayo o wala ray agpantatalosan, ayosen tayo itan diad paraan ya nipanengneng tayo nin siansiay kaabigan tan malasakit ed sakey tan sakey, tan “mabulos [tayon] manpeperdonaan.” (Efe. 4:32) No nanengneng na totoo ya ontan tayo, seguradon napakiwas iran onloob ed espiritual ya paraiso  ta labay dan ontan met so pantrato na arum ed sikara. b

AGKA OMPAPAWAY ED ESPIRITUAL YA PARAISO

19. (a) Diad kahon ya “ Inmalis Ira Balet Pinmawil Ira Lanlamang,” antoy imbaga na arum nen akapawil irad espiritual ya paraiso? (b) Antoy desidido tayon gawaen? (Nengnengen met so litrato.)

¹⁹ Misatsalamat tayo ta manaayam tayod espiritual ya paraiso! Diad ilalabas na taon, mas lalo iyan ondadakep, tan ondadakel iray onloloob dia ya mandadayew ed si Jehova. Komon ta lanang tayon ipanengneng ya papablien tayo iyan paraiso ya ginawa to parad sikatayo. No say sakey et labay toy napesel ed espiritual, magmaliw ya kontento, walay deen na nonot to, tan maligen so liknaan to, kaukolan toy onloob ed espiritual ya paraiso tan agto lan balot sasaliey ompaway! Manalwar tayo balet ta mamapasya met si Satanas pian natukso to tayon taynan so espiritual ya paraiso. (1 Ped. 5:8; Apo. 12:9) Agtayo ompapayag ya nagawa itan! Gawaen tayo sirin so anggaay nayarian tayo ya pansiansiaen so inkarakep, inkalinis, tan deen ed espiritual ya paraiso.