1. Akin et nibaga tayon organisado iray lingkor nen Jehova nen inmunan siglo?

 NO WALAY ipagawa nen Jehova ed saray lingkor to, labay to ya organisado so panggawa da ed satan. (1 Cor. 14:33) Singa bilang, ingganggan itayo nen Jehova ya ‘ipulong so maong a balita ed interon dalin.’ (Mat. 24:14) Inmatalek nen Jehova iyan kimey ed si Jesus. Bilang Lider tayo, seseguradoen nen Jesus ya organisado so panagpulong ya kimey. Nen inmunan siglo, wala ray tinuron elder ya mangasikaso tan mangidaulo ed saray kongregasyon ya abuo ed nanduruman lugar. (Gawa 14:23) Diad Jerusalem, wala met so grupo na saray elder ya bubuoen na saray apostol tan mamatatken. Sayan grupo so manggagawa na saray desisyon ya tumboken na amin ya kongregasyon. (Gawa 15:2; 16:4) Lapud inmunor iray agagi ed instruksion da, “nantultuloy a binmiskeg ed pananisia iray kongregasyon tan ondarakel so bilang da ed kada agew.”​—Gawa 16:5.

2. Manlapu la nen 1919, panon ya igigiya tan tataryaan nen Jehova na espiritual ya naakan iray lingkor to?

² Anggad natan et seseguradoen nin siansia nen Jehova ya organisado iray lingkor to. Manlapu la nen 1919, walay melag ya grupo na alanaan ya lalaki ya uusaren nen Jesus ya man-organisa ed panagpulong ya kimey tan mangitarya na espiritual ya naakan ed saray papatumbok to. a (Luc. 12:42) Sankanengneng tayo ray ebidensya ya talagan bebendisyonan nen Jehova so kimey na sarayan alanaan ya brother.​—Isa. 60:22; 65:13, 14.

3-4. (a) Anto ray gunggona lapud organisado tayo? Mangiter na alimbawa. (b) Antoy pantongtongan tayo ed sayan artikulo?

³ No agtayo organisado, agtayo nasumpal so kimey ya ipapagawa nen Jesus ed sikatayo. (Mat. 28:19, 20) Singa bilang, imadyin  yo pa no anggapoy inyasain ya teritorya ya kimeyan na kada kongregasyon. No ontan, ompan anggan iner labat lay pampulongan na kada publisher. Ompan wala ray lugar ya mabetbet ya napulongan tan say arum balet et aga nakimeyan. Sakey labat itan ya alimbawa. Wala ni nanonotan yon gunggona lapud organisado tayo?

⁴ Nen wadiad dalin si Jesus, organisadon maong so impanpulong to kaiba iray papatumbok to. Anggad natan, organisado nin siansia so pangidadaulo tod sikatayo. Pantongtongan tayo ed sayan artikulo so alimbawa nen Jesus tan no panon ya aaligen na organisasyon tayo so alimbawa to. Pantongtongan tayo met no panon tayon nipanengneng ya mantitiwala tayo ed organisasyon nen Jehova.

AALIGEN NA ORGANISASYON TAYO SO ALIMBAWA NEN JESUS

5. Antoy sakey ya paraan ya aaligen na organisasyon tayo so alimbawa nen Jesus? (Juan 8:28)

⁵ Amin ya ginawa tan imbaga nen Jesus et naaralan to ed Ama to. Singa si Jesus, amin ya bangat tan instruksion na organisasyon tayo et akabase ed Salita na Dios. (Basaen so Juan 8:28; 2 Tim. 3:16, 17) Lanang itayon nabibilin ya inagew-agew tayon basaen tan iyaplika iray nanaaralan tayod Biblia. Akin et parad pankaabigan tayo no uunoren tayo itan ya bilin?

6. No regular tayon aaralen so Biblia tan saray publikasyon tayo, antoy nitulong to ’tan ed sikatayo?

⁶ No regular tayon aaralen so Biblia tan saray publikasyon tayo, balbaleg so nitulong to ’tan ed sikatayo. Singa bilang, nanengneng tayo no talaga kasin akabase ed Biblia iray instruksion tan bilin ya walad saray publikasyon tayo. No diman tayo mas napapatunayan ya akabase iratan ed Biblia, diman met lalon ombiskeg so tiwala tayo ed organisasyon nen Jehova.​—Roma 12:2.

7. Anton mensahe so impulong nen Jesus, tan panon ya aaligen na organisasyon nen Jehova so alimbawa to?

⁷ Impulong nen Jesus so “maong a balita na Panarian na Dios.” (Luc. 4:43, 44) Ingganggan met nen Jesus iray disipulo to ya ipulong da so Panarian. (Luc. 9:1, 2; 10:8, 9) Diad panaon tayo, ipupulong na amin ya lingkor nen Jehova so mensahe na Panarian, inerman so kawalaan da o antokaman so responsabilidad da ed loob na organisasyon.

8. Anton pribilehyo so niiter ed sikatayo?

⁸ Inmatalek nen Jehova ed sikatayo so pangipulong na Panarian na Dios. Balbaleg itan ya pribilehyo ta ag-itan nayarin gawaen na anggan siopa labat. Singa bilang, nen wadiad dalin si Jesus, agto inabuloyan iray demonyo ya mansalita nipaakar ed sikato. (Luc. 4:41) Diad panaon tayo, antis ya makapanpulong so sakey ya Bible study kaibay kongregasyon, seseguroen ni na saray elder ya sikatoy kualipikado la parad satan ya pribilehyo. Panon tayon nipanengneng ya aapresyaen tayo so pribilehyo tayon manpulong? Samboten tayoy manpulong diad amin ya pagkakataon, inerman so kawalaan tayo. Singa si Jesus, gawaen tayo met so anggaay nayarian tayo ya itanem tan salogen so bini na katuaan diad puso na totoo.​—Mat. 13:3, 23; 1 Cor. 3:6.

9. Antoy gagawaen na organisasyon tayo pian naamtaan na totoo so ngaran na Dios?

⁹ Impakabat nen Jesus so ngaran na Dios. Nen wadiad dalin si Jesus, oniay impikasi tod Ama to: “Impakabat kod sikara so ngaran mo.” (Juan 17:26) Singa si Jesus, gagawaen tayo met so amin ya posiblin paraan pian naamtaan na arum so ngaran na Dios. Say sakey ya paraan et say pampa-publish tayo na New World Translation of the Holy Scriptures. Diad sayan translation, impawil so ngaran na Dios diad saray teksto ya orihinal ya pakabasaan na satan. Wala lad masulok ya 270 ya lenguahe so  kompleto odino kabiangan na sayan translation na Biblia. Nabasa ed Apendise A4 tan A5 na sayan translation iray impormasyon tungkol ed impangipawil ed ngaran na Dios diad Biblia. Nabasa met ed Apendise A5 iray ebidensya no akin ya dapat labat ya nabasa so ngaran na Dios diad Kristianon Griegon Kasulatan.

10. Antoy naaralan mo ed samay imbaga na sakey ya bii ya taga Myanmar?

¹⁰ Singa si Jesus, labay tayon ipaamta so ngaran na Dios ed dakel ya totoo anggad posible. Diad Myanmar, walay bii ya 67 so edad to ya apulongan na sakey ya agi. Nen naamtaan ton wala manayay ngaran na Dios, akaakis tan oniay imbaga tod samay agi: “Diad interon bilay ko, natan ko labat naamtaan ya say ngaran na Dios et Jehova. . . . Imbangat mod siak so sankaimportantian a nepeg kon naaralan.” On, no naamtaan na mapaabeban too so ngaran na Dios, balbaleg so epekto to ’tan ed bilay to.

LANANG YA MANTIWALA ED ORGANISASYON

11. Panon ya nipanengneng na saray elder ya mantitiwala ira ed organisasyon nen Jehova? (Nengnengen met so litrato.)

¹¹ Antoy sakey ya paraan ya nipanengneng na saray elder so tiwala ra ed organisasyon nen Jehova? No makaawat iray instruksion, babasaen tan aaralen dan maong, tan gagawaen day anggaay nayarian dan iyaplika itan. Singa bilang, makakaawat iray elder na saray instruksion no panon ya ipresenta iray parte ed aral, no panon so pangidaulo na pikakasi ed kongregasyon, tan no panon ya pastolan so pulok. No tumboken na saray elder so amin ya instruksion na organisasyon, seguradon nalikna na saray agagi ya inar-aro tan aasikasoen ira nen Jehova.

12. (a) Akin et importante ya manpasakop tayo ed saray mangidadaulo? (Hebreo 13:7, 17) (b) Akin et agtayo dapat manpopokus ed saray kakapuyan na saray mangidadaulo?

¹² No wala ray instruksion manlapud saray elder, gawaen tayo komoy anggaay nayarian tayon unoren iratan. No mabulos tayon onunor, nalemewan ira ed pangidadaulo da ed kongregasyon. Papasesegen itayo na Biblia ya ‘magmaliw itayon matulok tan mapasakop ed saray mangidadaulo.’ (Basaen so Hebreo 13:7, 17.) Pero no maminsan, mairap itan ya gawaen. Aliwan perpekto irayan brother kanian wala met iray kakapuyan da. Pero no atan so pampokusan tayo imbes ya saray balibalin ugali ra, singa tayo la laingen pipilaan iray kalaban tayo. Akin ey? On ta no puros kakapuyan na saray elder so nenengnengen tayo, onkapuy so tiwala tayo ed organisasyon nen Jehova. Ontan ya ontan so labay ya nagawa na saray kalaban. Anto sirin so gawaen tayo pian agtayo napatitan ed saray propaganda tan katilaan da?

AGKA OMPAPAYAG YA PAKAPUYEN NA ARUM SO TIWALAM

13. Antoy gagawaen na saray kalaban pian papawayen ya mauges so organisasyon na Dios?

¹³ Saray uksoyan ed organisasyon tayo et parad pankaabigan tayo, pero papapawayen na saray kalaban ya mauges iratan. Singa bilang, naaralan tayo ed Biblia ya labay nen Jehova ya saray lingkor to et malinis ed pisikal, moral, tan diad espiritual. Kanian no walay siopaman ya marutak so kabibilay to tan agmagbabawi, ingganggan nen Jehova ya ekalen itan ya too ed kongregasyon. (1 Cor. 5:11-13; 6:9, 10) Uunoren tayo itan ya ganggan. Pero lapud satan, ibabaga na saray kalaban ya masyado tayon istrikto, mapanghusga, tan anggapo kunoy panangasi tayo.

14. Siopay panlalapuan na saray katilaan ya ikakayat na arum tungkol ed organisasyon tayo?

¹⁴ Tandaan no siopan talagay panlalapuan na saray katilaan. Say walad benegan na sarayan katilaan et si Satanas ya Diablo, say “ama na  tila.” (Juan 8:44; Gen. 3:1-5) Uusaren to ray alipores to ya mangikayat na saray palson akusasyon tungkol ed organisasyon nen Jehova. Ontan so ginawa to nen inmunan siglo.

15. Antoy ginawa na saray lider na relihyon ed si Jesus tan ed saray papatumbok to?

¹⁵ Anggan say mismon Anak na Dios et dineralan nen Satanas. Perpekto si Jesus tan dakel so ginawa ton milagro nen wadiad dalin, pero wala ray inusar nen Satanas ya mangikayat na katilaan tungkol ed sikato. Singa bilang, imbaga na saray lider na relihyon ya amay pakayari nen Jesus ya mamapaway na saray demonyo et inter kuno ed sikato na “manuley na saray demonyo.” (Mar. 3:22) Nen lilitisen si Jesus, sikatoy inakusaan na saray lider na relihyon ya anggapoy respeto to ed Dios, tan kinombinse da ray totoo ya dapat labat ya nasentensiaan na ipapatey si Jesus. (Mat. 27:20) Tan nen ipupulong na saray papatumbok nen Jesus so maong a balita, wala ray Judio ya kinmontra ed sikara tan ‘sinugsogan da ray aliwan Judio pian busolen da ira.’ (Gawa 14:2, 19) Oniay imbaga na Say Panag-bantayan ya Disyembre 1, 1998 tungkol ed Gawa 14:2: “Anta agla lanti inawat na saray onsusumpan Judio so mensahe ya ipupulong na saray Kristiano, inimpluensyaan da ni iray aliwan Judio pian ag-ira ondengel tan busolen da ra.”

16. Antoy dapat tayon tandaan no wala ray narengel tayon palson akusasyon tan katilaan tungkol ed organisasyon tayo?

¹⁶ Anggad natan et agnin siansia ontutundan mangikayat na katilaan si Satanas. Diad tua, ibabaga na Biblia ya ‘ibabalang toy interon mundo.’ (Apo. 12:9) Kanian no wala ray narengel mon istorya ya dederalan day organisasyon o saray brother ya mangidadaulo, tandaan mo ya pakana itan na saray kalaban! Asalin mismo itan nen Jesus tan na saray  disipulo to nen inmunan siglo. Diad panaon tayo, dakel ya agagi so napapairap lapud saray palson akusasyon, pero agtayo la nabibigla ta impasakbay la itan na Biblia. (Mat. 5:11, 12) Ag-itayo bastabasta manisia ed saray palson akusasyon tan katilaan ta amta tayo la no siopay panlalapuan na satan. Pero anto ni dapat tayon gawaen pian ag-itayo naimpluensyaan?

17. Antoy gawaen tayo pian ag-itayo naimpluensyaan na saray palson istorya? (2 Timoteo 1:13) (Nengnengen met so kahon ya “ Antoy Gawaen Mo no Wala ray Palson Istorya?”)

¹⁷ Agmo dedengelen iray palson istorya. Antoy gawaen tayo no wala ray palson istorya? Makaaral tayo ed samay instruksion nen apostol Pablo ed si Timoteo. Imbaga tod si Timoteo ya bilinen to iray agagi ya “agda iimanoen iray palson istorya” tan ‘agda dedengelen iray palson istorya ya mamapabanday ed Dios.’ (1 Tim. 1:3, 4; 4:7) Isipen iyan ilustrasyon: No say sakey ya melag ya ugaw et walay nadokdok to, ompan basta to labat isubo anggano marutak. Pero ag-itan gawaen na sakey ya adulto ta amta ton nayarin panlapuan itan na sakit. Ontan tayo met. Agtayo panisiaan iray palson istorya ta makapuy so epekto to ’tan ed espiritualidad tayo. Nanlapu iratan ed si Satanas. Say dengelen tayo labat et say “maabig iran salita” na katuaan.​—Basaen so 2 Timoteo 1:13.

18. Panon tayon nipanengneng ya mantitiwala tayo ed organisasyon nen Jehova?

¹⁸ Apantongtongan tayo ed sayan artikulo so taloran paraan ya aaligen na organisasyon tayo so alimbawa nen Jesus. No man-personal study ka, imanom no anto ni ray paraan ya aaligen na organisasyon tayo so alimbawa to. Tulongan mo ray kakongregasyon mo ya mas ombiskeg so tiwala ra ed organisasyon. Tan anggan antoy nagawa, agka onsisian ed organisasyon tayo tan ituloy mo labat so matoor ya panlilingkor mo ed si Jehova. No ontay gawaen mo, ipapanengneng mo ya walay tiwalam ed organisasyon ya uusaren to pian nasumpal so gagala to. (Sal. 37:28) Komon ta lanang tayon pablien so pribilehyo tayo ya magmaliw ya parte na maar-aron pamilya nen Jehova!