1. Antoy prueba ya maiter si Jehova?

BUKBUKOR ni labat nen Jehova antis ya sikatoy amalsa, balet aliwan sarili to labat so inisip to. Imbes, inter to so bilay bilang regalo ed saray matalinon pinalsa to​—saray anghel tan totoo. Si Jehova, say “maliket a Dios,” et labalabay toy mangiter na maong iran bengatla. (1 Tim. 1:11; Sant. 1:17) Tan lapud labay to met ya maliket tayo, ibabangat to itayon magmaliw ya maiter.​—Roma 1:20.

2, 3. (a) Akin ya maliket itayo no maiter tayo? (b) Antoy ray aralen tayod sayan artikulo?

² Pinalsa na Dios so too unong ed indengan to. (Gen. 1:27) Labay ton ibaga, pinalsa itayo na Dios ya sarag tayon ipatnag so personalidad to. Pian magmaliw itayon maliket, kaukolan tayo sirin ya aligen so alimbawa nen Jehova diad pangipanengneng tayoy interes ed arum tan diad pagmaliw tayon maiter. (Fil. 2:3, 4; Sant. 1:5) Akin? Simpli labat so ebat—lapud ontan so maaron impandesinyo nen Jehova ed too. Anggano agtayo perpekto, sarag tayon aligen so inkamaiter nen Jehova.

³ Ibabaga na Biblia ed sikatayo no panon itayon magmaliw ya maiter. Aralen tayo iray pigaran leksion ya ibabangat na Kasulatan  nipaakar ed saya. Amtaen tayo no panon ya niwalad sikatayo so pabor na Dios no maiter tayo, tan no panon ya makatulong iyan kualidad pian nasumpal tayoy betang ya inter na Dios ed sikatayo. Aralen tayo met no akin ya maliket itayo no maiter tayo, tan no akin a kaukolan tayoy mantultuloy ya mangiter.

4, 5. Anto ran alimbawa na inkamaiter so impanengneng ed sikatayo nen Jehova tan Jesus?

⁴ Labay nen Jehova ya sikatoy aligen tayo, kanian sikatoy naliliketan no maiter tayo. (Efe. 5:1) Malinlinew ya nanengneng diad inkagawa tayo tan ed marakdakep ya dalin tan ed amin ya bengatlan wadia, ya labay na Dios a maliket so too. (Sal. 104:24; 139:13-16) Kanian sikatoy papagalangan tayo no mansasagpot itayon paliketen met so arum.

⁵ Aaligen na saray tuan Kristiano si Kristo, ya angipanengneng na perpekton alimbawa no panon so pagmaliw ya maiter. Imbagan mismo nen Jesus: “Singa say Anak na too a linma dia aliwan pian panlingkoran, noagta pian manlingkor tan iter toy bilay to a panondon ed amayamay.” (Mat. 20:28) Kanian, pinaseseg nen apostol Pablo iray Kristiano: “Pansiansia yo ed inkasikayo iyan panagnonot a wala met ed si Kristo Jesus . . . Tinaynan to so amin a walad sikato tan inawat toy kipapasen na sakey ya aripen.” (Fil. 2:5, 7) Maabig no itepet tayod sarili tayo, ‘Sarag ko kasin aligen ya mas maapit so alimbawa nen Jesus?’​—Basaen so 1 Pedro 2:21.

6. Anton leksion so imbangat nen Jesus ed sikatayo diad samay parabolo nipaakar ed maong a Samaritano? (Nengnengen so litratod gapo na artikulo.)

⁶ Niwalad sikatayo so pabor nen Jehova no aligen tayoy perpekton alimbawa to tan nen Kristo, no nonoten tayoy pankaabigan na arum, tan no manggawa tayoy paraan pian natulongan tayo rad saray pankaukolan da. Diad samay parabolo nipaakar ed maong a Samaritano, malinew ya iilaloan nen Jesus ya gawaen na saray patumbok to so anggaay nayarian da pian natulongan so arum, anggan ed saramay duma so kipapasen da. (Basaen so Lucas 10:29-37.) Nanonotan mo ni may tepet ya amakiwas ed si Jesus ya isalaysay so parabolo nipaakar ed maong a Samaritano? Intepet na samay Judio ed sikato: “Siopa tay kaparak a too a nepeg kon aroen?” Nanengneng ed ebat nen Jesus ya singa samay Samaritano, nepeg ya mabulos tayon mangiter no labay tayon niwala ed sikatayo so pabor na Dios.

7. Antoy koneksion na ugalin inkamakasarili odino inkamaiter ed isyu na soberanya?

⁷ Saray Kristiano et walaan na dakel ya maabig a rason no akin ya kaukolan dan iyugali so pagmaliw a maiter. Singa bilang, sayan kualidad et mikonektaan ed isyu ya pinalesa nen Satanas diad hardin na Eden. Panon? Imbaga nen Satanas ya si Adan tan Eva​—kaiba lay amin ya totoo—​et mas maabig so pansumpalan da no manpokus ira ed sarili da tan no unaen day panlabayan da imbes ya unoren da so Dios. Makasarili si Eva lapud pinilalek toy magmaliw a singa Dios. Makasarili met si Adan lapud pilalek ton paliketen labat si Eva. (Gen. 3:4-6) Malinlinew no antoy nansumpalan na saray desisyon da. Agtayon balot magmaliw a maliket no makasarili tayo. No maiter tayo, ipapanengneng tayo ya kombinsido tayon say paraan na Dios labat so sankaabigan.

8. Akin et nepeg ya ninonot komon na inmunan sanasawa so pagmaliw a maiter?

⁸ Inikdan na Dios so inmunan sanasawa na saray instruksion ya ontulong ed sikaran  nonoten komon so pankaabigan na arum, anggano sikaran dua ni labat ed saman diad hardin na Eden. Benendisyonan nen Jehova si Adan tan Eva tan imbaga ton manparakel ira, panoen day dalin, tan uleyan da itan. (Gen. 1:28) No panon ya interesadon maong so Amalsa ed pankaabigan na pinalsa to, nepeg met komon ya interesado si Adan tan Eva ed pankaabigan na saray magmaliw ya ananak da. Kaukolan ya magmaliw a paraiso so interon dalin parad pankaabigan na ilalak nen Adan. Satan ya baleg a proyekto et mankaukolan na kooperasyon na ombabaleg a pamilya to.

9. Panon ya say pankimey a gawaen ya Paraiso so interon dalin et nanresulta komon ed liket?

⁹ Parad perpekton laki tan bii, say pankimey dan gawaen ya paraiso so interon dalin et mankaukolan na sigpot a pikoopera ed si Jehova pian nasumpal iray gagala to, diad ontan et makaloob ira ed painawa to. (Heb. 4:11) Talagan makapaliket tan makagunggona komon iman ya proyekto! No inyuna da labat so pankaabigan na arum, angiter komon itan ed sikara na dakel a bendisyon tan baleg a liket.

10, 11. Panon tayon nasumpal so ganggan ed sikatayo ya manpulong tan manggaway babangatan?

¹⁰ Natan, inikdan nen Jehova iray totoo to na kimey ya manpulong tan manggaway babangatan. Pian nasumpal tayo itan a kimey, kaukolan ya talagan interesado tayo ed pankaabigan na arum. Makapantultuloy tayo ed sayan kimey no say mamapakiwas ed sikatayo et say panangaro ed Dios tan ed kaparan too.

¹¹ Nen inmunan siglo C.E., tinukoy nen Pablo so sarili to tan saray maapit ya kaiba to bilang ‘kakimeyan na Dios’ lapud responsabilidad da ya mantanem tan mansalog ed bini na katuaan na Panarian. (1 Cor. 3:6, 9) Natan, sarag tayo met so magmaliw ya ‘kakimeyan na Dios’ no mabulos tayon usaren so panaon, kaykayarian, tan biskeg tayo ed panagpulong a kimey ya ingganggan na Dios. Talagan baleg iyan pribilehyo!

12, 13. Anto ray nibagam ya bendisyon ed panaggaway babangatan?

¹² Seguradon magmaliw tayon maliket no mabulos tayon iter so panaon tan biskeg tayo diad panagpulong tan panaggaway babangatan. Dakel ed saray awalaan na maaligwas ya panangiyaral na Biblia so makapangibagan tua itan. Talagan maliket tayo no nanengneng tayon naliliketan iray iyaaralan tayo lapud natatalosan day aaralen da, ombibiskeg so pananisia da, manggagawa ray pananguman, tan inanabang da met lad arum so katuaan. Si Jesus et aliketan met ya maong nen say imbaki ton 70 ya manpulong et “malikeliket a pinmawil” lapud saray balibalin naeksperiensya ra.​—Luc. 10:17-21.

¹³ Malikeliket iray manangipalapag ed interon mundo no nanenengneng day positibon epekto na mensahe na maong a balita ed bilay  na totoo. Imanoen pay eksperiensya nen Anna, sakey ya ugaw nin single ya sister, a pinalaknab toy ministeryo to ed inyalis tod sakey a lugar ya mankaukolan diad Eastern Europe. * “Dakel so nayarin iyaralan na Biblia dia, tan labalabay ko itan,” so insulat to. “Malikeliket ak ed ministeryok. Kada onsempet ak, anggapo lay panaon kon nonoten ni iray problemak. Say nononoten ko la et saray iyaaralan ko​—saray problema tan pampapagaan da. Manggagawa ak na paraan no panon ko ran napaseseg tan natulongan diad praktikal iran paraan. Tan akombinse ak ya ‘mas makapaliket so mangiter nen say mangawat.’”​—Gawa 20:35.

14. Anggano daiset so walaay positibon reaksion ed maong a balita, akin ya siansian makapaliket so manpulong?

¹⁴ Nalikna tayoy liket no iikdan tayoy pankanawnawa iray totoo ya onkiwas ed mensahe na maong a balita anggano agda labay so ondengel. Diad tua, mipara so kimey tayo natan ed kimey nen propeta Ezequiel nensaman, ya imbaga nen Jehova ed sikato: “Nepeg mon ibaga ed sikara iray salitak, ondengel man ira odino andi.” (Eze. 2:7; Isa. 43:10) Anggano wala ray agmangawat ed mensahe ya ipupulong tayo, papablien nen Jehova iray sagpot tayo. (Basaen so Hebreo 6:10.) Walay sakey a manangipalapag ya angipanengneng na balibalin panmoria ed saya. Oniay insulat to nipaakar ed ministeryo to, “Sikami so nantanem, nansalog, tan impikasi mid si Jehova ya pabalegen to komon so interes da.”​—1 Cor. 3:6.

15. Antoy reaksion na dakel a totoo ed inkamaiter tayo, tan nepeg kasin manpaapekto tayod reaksion da?

¹⁵ Labay nen Jesus ya nalikna tayoy liket diad pagmaliw a maiter. Positibo so reaksion na dakel ya totoo ed ugalin inkamaiter. “Iyugali yo so mangiter, pian saray totoo et mangiter ed sikayo,” so impaseseg to. “Ikalbo rad saray akwalan yo so maabig a sukat, pinedper, sinedser, tan mantampuwag. Ta sikayoy sukaten unong ed sukat a panusukat yo.” (Luc. 6:38) Siempre, aliwan amin et positibo so reaksion dad inkamaiter tayo, balet no  apresyaen da itan, seguradon magmaliw met la ran maiter. Kanian iyugali tayo so mangiter, apresyaen da man itan o andi, ta agmo amta no panon kabaleg so epekto na anggan aminsan labat ya impangiter mo.

16. Antoy nepeg ya mamakiwas ed sikatayon mangiter?

¹⁶ Say tuan maiter ya too et agmanaalagar na kasalat. Ontan so walad nonot nen Jesus sanen imbangat to: “No mangiparaan kay ponsia, imbitaan mo iray pobri, lupoy, piley, bulag; tan naliketan ka, lapud ag-ira makabales ed sika.” (Luc. 14:13, 14) “Say mabunlok a too et nabendisyonan,” so imbaga na sakey pinuyanan a managsulat. Onia ni imbaga na sakey: “Maliket so siopaman a mangipapatnag na konsiderasyon ed samay pakaskasi.” (Pro. 22:9; Sal. 41:1) On, nepeg ya mangiter tayo lapud naliketan tayo no ontulong tayod arum.

17. Anto ran klase na panangiter so mamaliket ed sika?

¹⁷ Sanen inaon nen Pablo iray salita nen Jesus ya “mas makapaliket so mangiter nen say mangawat,” agto labat tutukoyen so pangiter na materyal iran bengatla noagta tutukoyen to met so pangiter na panamaseseg, panangigiya, tan tulong ed saray mankaukolan. (Gawa 20:31-35) Diad salita tan gawa, imbangat itayo nen apostol Pablo ya iter no antoy walad sikatayo​—say panaon, biskeg, atension, tan panangaro tayo.

18. Antoy imbaga na dakel ya researcher nipaakar ed pagmaliw ya maiter?

¹⁸ Naobserbaan met na saray researcher ed social science ya maliket iray totoon maiter. Unong ed sakey ya artikulo, “imbaga na totoo ya nagmaliw iran mas maliket kayari ran nanggaway kamaongan ed arum.” Ibabaga met na saray researcher ya importante so itulong ed arum pian nawalaan na “tuan gagala tan kabaliksan” so bilay “lapud pepeneken na satan iray manunan pankaukolan na too.” Kanian maslak et irerekomenda na saray eksperto so pamboluntaryo ed panlingkor ed totoo ta makatulong itan ed bunigas na laman da tan magmaliw iran maliket. Agla iya pankelawan na saray totoo ya aawaten day Biblia bilang Salita na maaron nandesinyo ed too, si Jehova.​—2 Tim. 3:16, 17.

19, 20. Akin ya labay moy magmaliw a maiter?

¹⁹ Nayarin mairap ya pansiansiaen so ugalin inkamaiter lapud saray totoo ed kaliberliber tayo et mas iyuuna day sarili da nen say arum. Balet imbaga nen Jesus ya say duaran sankaimportantian ya ganggan et aroen si Jehova diad interon puso, kamarerwa, nonot, tan biskeg tayo, tan aroen so kapara tayon too a singa ed panangaro tayod sarili tayo. (Mar. 12:28-31) Singa atalosan tayo ed sayan artikulo, saramay mangaaro ed si Jehova et mangaalig met ed sikato. Maiter si Jehova, ontan met si Jesus. Tan papasesegen da itayon gawaen met itan, ta satan so mamaliket ed sikatayo. No pansagpotan tayon ipanengneng ed Dios tan ed kapara tayon too so inkamaiter, napagalangan tayoy Jehova tan nagunggonaan itayo, ontan met ed arum.

²⁰ Seguradon pansasagpotan mo lay magmaliw ya maiter ed arum, lalo lad saray kapananisiaan tayo. (Gal. 6:10) No itultuloy mon gawaen itan, seguradon aroen tan apresyaen ka na arum, tan lapud satan et magmaliw kan maliket. “Say mabunlok a too et onaligwas,” so ibabaga na Proverbio 11:25, “tan siopaman a paiinawaen toy arum et nainawaan met.” Siempre, say mabulos ya panangiter tan kaabigan et nipanengneng ed nanduruman paraan tan ed dakel ya aspekto na panagbilay mo bilang Kristiano tan ed ministeryom, tan manresulta itan ed saray bendisyon. Aralen ed ontumbok ya artikulo iratan ya paraan.