1. Siopa ray tinmulong pian niletneg so kongregasyon ed Filipos?

KASABI nen apostol Pablo, Silas, Lucas, tan Timoteo diad Filipos ya sakop na Roma, dakel so nalmo dan interesado ed mensahe na Panarian. Tinmulong irayan apatiran maseseg ya agagi pian niletneg so kongregasyon ditan. Saray balon disipulo et ginmapon nantitipon, nayarin diad abung na sakey ya maparawes a bii ya si Lidia.​—Gawa 16:40.

2. Anton subok so tampol ya inarap na samay balon kongregasyon?

² Balet ag-abayag, walay subok ya inarap na sayan balon kongregasyon. Sinagyat nen Satanas iramay mamubusol ed katuaan ya sumpaen so panagpulong a kimey na sarayan matoor a Kristiano. Si Pablo tan Silas et inaresto, nilewet, tan impriso. Nen nibulos la rad prisoan, binisita da iray balon disipulo tan pinaseseg da ra. Insan la tinmaynan si Pablo, Silas, tan Timoteo, balet mapatnag ya tinmilak si Lucas. Anto lay gawaen na saray agagi ditan? Diad tulong na espiritu nen Jehova, intultuloy day maseseg ya panlilingkor da. (Fil. 2:12) Seguradon malikeliket si Pablo lapud satan!

3. Base ed Filipos 1:9-11, anto ray impikasi nen Pablo?

³ Kalabas na manga samploy taon, sinulatan nen Pablo so kongregasyon ed Filipos. No basaen mo itan ya sulat, napatnagan mon tampol so panangaro nen Pablo ed saray agagi to. “Makakailiw ak lan maong ed sikayon amin, a papablien ta kayo a singa ed panamabli nen Kristo Jesus,” so kuan to. (Fil. 1:8) Insulat to met ya ipipikasi to ra. Kekerewen tod si Jehova ya tulongan To ra pian ombaleg ni so panangaro ra, seguroen da no anto ray mas importantin bengatla, magmaliw iran andian na  kabalawan, agda nagapol so arum, tan napano ira na matunong a bunga. Dakel so naaralan tayo met natan ed satan ya impapuson sulat nen Pablo. Kanian basaen tayo so kabiangan na sulat nen Pablo ed saray taga Filipos. (Basaen so Filipos 1:9-11.) Insan tayo pantongtongan iray indanet to ya punto tan no panon tayon niyaplika iratan.

4. (a) Base ed 1 Juan 4:9, 10, panon ya impatnag na Dios so panangaro to ed sikatayo? (b) Panon kabaleg so nepeg ya pangaro tayo ed Dios?

⁴ Impatnag nen Jehova so baleg ya panangaro to ed sikatayo nen imbaki toy Anak to diad dalin pian ompatey parad saray kasalanan tayo. (Basaen so 1 Juan 4:9, 10.) Say masakripisyon panangaro na Dios so mamakiwas ed sikatayo ya sikatoy aroen met. (Roma 5:8) Panon kabaleg so nepeg ya pangaro tayo ed Dios? Inebatan itan nen Jesus sanen imbaga to ed sakey ya Fariseo: “Arom si Jehova a Dios mo ed interon pusom tan interon kamarerwam tan interon nonot mo.” (Mat. 22:36, 37) Labay tayo ya say panangaro tayo ed Dios et interon puso. Tan labay tayon pabiskegen so panangaro tayod sikato kada agew. Imbaga nen Pablo ed saray taga Filipos ya “lalo ni komon ya ombaleg” so panangaro da. Antoy gawaen tayo pian ombiskeg so panangaro tayo ed Dios?

5. Panon ya ombiskeg so panangaro tayo ed Dios?

⁵ Kaukolan tayon kabaten so Dios pian sikatoy naaro tayo. Ibabaga na Biblia: “Siopaman ya agmangaaro et agto kabat so Dios, ta say Dios et aro.” (1 Juan 4:8) Impaliwawa nen apostol Pablo ya ombiskeg so panangaro tayo ed Dios legan ya nanaaruman so “suston kakabatan tan aralem a pakatebek” tayo. (Fil. 1:9) Nen agano tayo nin manaaral na Biblia, ginmapo tayon aroen so Dios anggano limitado ni labat so amta tayo nipaakar ed saray balibalin kualidad to. Legan ya nanaaruman so amta tayo nipaakar ed si Jehova, lalon ombibiskeg so panangaro tayo ed sikato. Kanian importantin maong ya regular tayon aralen tan dalepdepen so Salita na Dios!​—Fil. 2:16.

6. Base ed 1 Juan 4:11, 20, 21, siopa ni ray nepeg tayon aroen pian ombaleg so panangaro tayo?

⁶ Say baleg ya panangaro na Dios ed sikatayo so mamakiwas met ed sikatayo ya aroen iray agagi. (Basaen so 1 Juan 4:11, 20, 21.) Ompan isipen tayo ya mainomay tayon naaro iray agagi tayo, ta kaiba tayo ran mandadayew ed si Jehova tan pansasagpotan tayon aligen iray balibalin kualidad to. Sakey ni, tutumboken tayoy alimbawa nen Jesus, ya lapud baleg ya panangaro to et inter toy bilay to parad sikatayo. Balet no maminsan, nairapan tayon unoren so ganggan ya aroen so sakey tan sakey. Imanoen tayo so sakey ya agawa ed kongregasyon diad Filipos.

7. Antoy naaralan tayo ed bilin nen Pablo ed si Euodias tan Sintique?

⁷ Si Euodias tan Sintique et maseseg ya Kristianon bibii ya akaiba nen apostol Pablo ed panaglingkor. Balet nayarin walay agawan agpantatalosan ed baetan da tan nambarongan ira. Diad sulat nen Pablo ed kongregasyon ya nanlingkoran da, espisipiko ton binitla so ngaran nen Euodias tan Sintique tan direkta to ran binilin ya “magmaliw a saksakey so nonot da.” (Fil. 4:2, 3) Binilin met nen Pablo so interon kongregasyon: “Itultuloy yon gawaen so amin a bengatla ya anggapoy panmeremere tan pansusuppiatan.” (Fil. 2:14) Seguradon akatulong so malinew ya bilin nen Pablo ed sarayan matoor ya bibii tan ed interon kongregasyon pian ombiskeg so panangaro da ed sakey tan sakey.

8. Antoy sakey a makaamper ed pangaro tayo ed saray agagi, tan antoy makatulong pian nalabanan tayo itan?

⁸ Singa si Euodias tan Sintique, walay  nayarin makaamper ed pangaro tayo ed saray agagi​—say tendensia tayon manpokus ed saray kakapuyan. Amin tayo et nalilingo. No manpokus tayo ed lingo na arum, ombetel so panangaro tayo ed sikara. Singa bilang, no agmitutulongan so sakey a brother ed panaglinis na Kingdom Hall, ompan onsyodot tayo ed sikato. Insan no isipen tayo la ray arum nin lingo na satan a brother, lalo itayon onsyodot tan onkapuy so panangaro tayod sikato. No bilang ta naliknam itan ed sakey ya agi, maabig no dalepdepen mo iya: Nanenengneng nen Jehova iray kakapuyan tayo pati saray kakapuyan na satan ya agi. Anggaman ontan, siansian inaro to tayo tan pati satan ya agi. Kanian nepeg tayon aligen so panangaro nen Jehova tan manpokus tayod saray maong ya kualidad na saray agagi tayo. No pansagpotan tayon aroen iray agagi, onelet so bedber na pankakasakey tayo.​—Fil. 2:1, 2.

9. Anto ray kaiba ed saray “mas importantin bengatla” ya binitla nen Pablo ed sulat tod saray taga Filipos?

⁹ Pinuyanan na masanton espiritu si Pablo pian bilinen iray taga Filipos​—tan amin ya Kristiano—​ya ‘seguroen iray mas importantin bengatla.’ (Fil. 1:10) Kaiba ed sarayan importantin bengatla so pamasanto ed ngaran nen Jehova, say pakasumpal na saray gagala to, tan say kareenan tan pankakasakey na kongregasyon. (Mat. 6:9, 10; Juan 13:35) No sarayan bengatla so sankaimportantian ed bilay tayo, papaneknekan tayo ya inaro tayoy Jehova.

10. Antoy nepeg tayon gawaen pian ipasen itayo nen Jehova ya andian na kabalawan?

¹⁰ Imbilin met nen Pablo a nepeg itayon magmaliw ya andian na kabalawan. Aglabay ya ibaga na satan ya nepeg ya perpekto itayo. Agtayo nayarian so magmaliw ya andian na kabalawan a singa onman ed si Jehova a Dios. Balet ipasen itayo nen Jehova ya andian na kabalawan no pansasagpotan tayon paaralemen so panangaro tayo tan seseguroen tayo ray mas importantin bengatla. Say sakey a paraan ya nipanengneng tayoy panangaro tayo et no gawaen tayoy anggaay nayarian tayo pian agtayo nagapol so arum.

11. Akin ya nepeg tayon paliisan ya nagapol tayo so arum?

¹¹ Say bilin ya paliisan ya nagapol tayo so arum et seryoson pasakbay. Panon ya nayarin nagapol tayo so arum? Posiblin nagapol so arum diad saray pipilien tayon panagligliwaan, kawes, odino anggan say trabaho. Ompan anggapo met so gagawaen tayon mauges. Balet no naapektoan so konsiensia na arum tan nagapol ira lapud saray pipilien tayo, seryoso itan ya maong. Imbaga nen Jesus ya mas maong nin sabitan na baton gilingan so beklew tayo tan ipalereg itayo ed dayat nen say nagapol tayo so sakey a karnero to!​—Mat. 18:6.

12. Antoy naaralan tayo ed alimbawa na sanasawan payunir?

¹² Imanoen no panon ya inyaplika na sanasawan payunir so bilin nen Jesus. Manlilingkor ira ed sakey a kongregasyon ya ditan et walay balon bautismadon sanasawa ya konserbatibon maong so pamilya ra. Parad sayan balon sanasawa, agnepeg ya manbantay na sine iray Kristiano, anggano say pelikula et aliwa met ya mauges. Abigla ira nen naamtaan dan nambantay na sine imay sanasawan payunir. Kanian agni nambantay na sine iyan sanasawan payunir anggad nipasal la so konsiensia na balon sanasawa tan mas natatalosan da la no antoy duga tan aliwa. (Heb. 5:14) Impanengneng na sayan sanasawan payunir ya inaro da  irayan balon agagi, aliwa labat ya diad salita noagta pati diad gawa.​—Roma 14:19-21; 1 Juan 3:18.

13. Panon ya nayarin nasagyat tayo so arum ya mankasalanan?

¹³ Say sakey nin paraan ya nagapol tayo so arum et no nasagyat tayo ran mankasalanan. Panon itan ya nagawa? Imanoen iyan situasyon. Walay sakey ya iyaaralan na Biblia ya abayag ya nansagpot pian nitunda toy alabas ya kakainum toy alak. Amoria to ya nepeg ya agto lan balot oninum na alak. Maples so inyaligwas to tan abautismoan. Ag-abayag, walay agi ya angimbitad sikato ed sakey ya panangan tan inopresian toy alak, tan imbaga na sayan agi: “Bautismado ka la kanian wala lad sikay espiritu nen Jehova. Tan say sakey ya aspekto na satan et panangontrol ed sarili. Kanian sarag mo lan kontrolen so sarilim pian daiset labat so nainum mo.” Makapaermen no dengelen na balon brother iyan makapuy a simbawa tan lapud satan et napawil toy alabas ya kakainum toy alak!

14. Panon ya ontulong iray Kristianon pantitipon pian niyaplika tayo ray bilin ya walad Filipos 1:10?

¹⁴ Ontulong iray Kristianon pantitipon pian niyaplika tayo ray bilin ya walad Filipos 1:10 diad nanduruman paraan. Unona, ipanonot na saray nanaaralan tayo ed saray pantitipon no anto ray ipapasen nen Jehova ya mas importante. Komadua, naamtaan tayo no panon tayon niyaplika iray nanaaralan tayo pian magmaliw itayon andian na kabalawan. Tan komatlo, nasagyat itayo ya “mangaro tan manggaway maabig iran kimey.” (Heb. 10:24, 25) Legan ya mas napapaseseg itayo na  saray agagi, mas ombiskeg so panangaro tayo ed Dios tan ed saray agagi tayo. No interon puso so panangaro tayo ed Dios tan saray agagi, gawaen tayoy anggaay nayarian tayo pian agtayo nagapol so arum.

15. Antoy labay ya ibaga na ‘napano na matunong a bunga’?

¹⁵ Masimoon ya impikasi nen Pablo ya komon et ‘napano na matunong a bunga’ iray taga Filipos. (Fil. 1:11) Segurado ya kaiba ed sayan “matunong a bunga” so panangaro da ed si Jehova tan ed saray totoo to. Kaiba met ed satan so pangipulong dad arum nipaakar ed pananisia ra ed si Jesus tan say balibalin ilalo da. Diad Filipos 2:15, nausar so sananey nin ilustrasyon, say ‘isinag a singa silew ed mundo.’ Dugaruga iya ta tinawag nen Jesus iray disipulo to ya “liwawa na mundo.” (Mat. 5:14-16) Ingganggan to met iray patumbok to ya ‘ibangat da iray totoo pian magmaliw iran disipulo to,’ tan ‘mantasi ira diad sankaarawian a pasen na dalin.’ (Mat. 28:18-20; Gawa 1:8) Manbubunga itayo na “matunong a bunga” no aktibo tayon mibibiang ed sayan sankaimportantian a kimey.

16. Panon ya ipapanengneng na Filipos 1:12-14 ya sarag tayoy onsinag a singa silew anggano mairap so situasyon tayo? (Nengnengen so litrato ed apis.)

¹⁶ Anggan anto so situasyon tayo, sarag tayoy onsinag a singa silew. No maminsan, wala ray singa makaamper ed pangipulong tayo ed maong a balita ya magmamaliw lanlamang ya pankanawnawa pian makapanpulong tayo. Singa bilang, si apostol Pablo et akapriso ed sakey ya abung ed Roma nen sinulatan to iray taga Filipos. Balet ag-iya akaamper ed sikato ya manpulong ed saray guardia tan saray ombibisita ed sikato. Maseseg a nampulong si Pablo anggano ontan so situasyon to, kanian  apaseseg iray agagi ya magmaliw ya matalek tan makpel tan ‘andian na takot a mangipulong ed salita na Dios.’​—Basaen so Filipos 1:12-14; 4:22.

17. Mangiter na sakey ya alimbawa diad panaon tayo no panon ya nagmaliw a mabunga iray agagi anggano mairap so situasyon.

¹⁷ Dakel ya agagi tayo so mangaalig ed inkakpel nen Pablo. Manaayam ira ed saray bansa ya ag-ira makapanpulong ed publiko odino diad kaabungan, kanian manaanap iray arum a paraan pian nipulong da so maong a balita. (Mat. 10:16-20) Diad sakey ed saratan a bansa, walay manangasikaso na sirkito ya insuheri to ed saray manangipalapag ya pulongan da iray kanayon, kakaabay, kaklase, katrabaho, tan saray kabat da. Diad loob na duay taon, dinmakel so bilang na saray kongregasyon ed satan a sirkito. Ompan diad bansa ya panaayaman tayo et bulos tayon makakapanpulong. Balet walay naaralan tayo ed saratan ya agagi tayo: No naynay tayon mananap na paraan ya makapanpulong ed arum, ikdan itayo nen Jehova na pakayari pian makapanpulong itayo anggano mairap so situasyon.​—Fil. 2:13.

18. Antoy determinado tayon gawaen?

¹⁸ Diad sayan importantin panaon, komon ta determinado tayon iyaplika iray bilin ya walad sulat nen Pablo ed saray taga Filipos. Komon ta seguroen tayo iray mas importantin bengatla, magmaliw tayon andian na kabalawan, agtayo igagapol so arum, tan manbunga itayo na matunong a bunga. Diad ontan et ombaleg so panangaro tayo tan nidayew tayo so maaron Ama tayo, si Jehova.