1. Antoy pribilehyo tayon amin?

BALEG ya pribilehyo tayo ya kabiangan itayo na kongregasyon nen Jehova. Wala tayo ed espiritual ya paraiso​—mareen tan malikeliket tayon mandadayew ed si Jehova kaiba iray agagi. Kasin naisip mo met la no antoy nitulong mo parad kongregasyon?

2. Anton ilustrasyon so inusar nen apostol Pablo diad pigaran sulat to?

² Dakel so naaralan tayo ed sakey ya ilustrasyon ya inusar nen apostol Pablo diad pigaran sulat to. Diad saratan ya sulat, inkompara nen Pablo so kongregasyon ed laman na too. Inkompara to met iray membro na kongregasyon ed nanduruman parte na laman.​—Roma 12:4-8; 1 Cor. 12:12-27; Efe. 4:16.

3. Anto so taloran leksion ya pantongtongan tayo ed sayan artikulo?

³ Balang sakey ed sikatayo et importante diad kongregasyon nen Jehova. Sarag tayon pabiskegen so kongregasyon anggan antoy lahi tayo, kipapasen na panagbilay tayo, nanlapuan tayon pamilya, kultura, odino edukasyon tayo. Pantongtongan tayo ed sayan artikulo so taloran importantin leksion ya naaralan tayo ed ilustrasyon nen Pablo. Unona, aralen tayo no akin ya importante so kada sakey ed sikatayo diad kongregasyon nen Jehova. Komadua, pantongtongan tayo no antoy gawaen tayo no say pakalikna tayo et anggapoy nitutulong tayo ed kongregasyon. Tan komatlo, pantongtongan tayo no akin  ya nepeg tayon gawaen so anggaay nayarian tayo ya sumpalen so antokaman ya responsabilidad ya inter nen Jehova ed sikatayo.

4. Antoy naaralan tayo ed Roma 12:4, 5?

⁴ Nia so unonan leksion ya naaralan tayo ed ilustrasyon nen Pablo: Kada sakey ed sikatayo et importantin kabiangan na pamilya nen Jehova. Oniay imbaga nen Pablo: “No panon a say sakey ya laman et walaan na dakel a kabiangan, balet agnampapara so usar na saratan, sikatayo met, anggaman dakel itayo, et saksakey itayon laman a nikasakey ed Kristo, balet balang sakey ed sikatayo et kabiangan a mankaukolan ed sakey tan sakey.” (Roma 12:4, 5) Antoy labay ya ibaga nen Pablo? Nanduruma so nagagawaan tayo ed kongregasyon balet amin tayo et importante.

5. Anto ran “regalo” so inter nen Jehova ed kongregasyon?

⁵ No say pantotongtongan et saramay walaan na betang ed kongregasyon, ompan say tampol ya naisip mo et saray mangidadaulo. (1 Tes. 5:12; Heb. 13:17) Tua ya diad panamegley nen Kristo et inikdan nen Jehova so kongregasyon To na saray “regalo a lalaki.” (Efe. 4:8) Sarayan “regalo a lalaki” et saray membro na Mananguley ya Ulop, katulongan na Mananguley ya Ulop, membro na Branch Committee, manangasikaso na sirkito, field instructor, elder ed kongregasyon, tan ministeryal a lingkor. Amin irayan brother et tinuro nen Jehova panamegley na masanton espiritu to pian asikasoen iray inad-aro ton karnero tan pabiskegen so kongregasyon.​—1 Ped. 5:2, 3.

6. Base ed 1 Tesalonica 2:6-8, antoy pansasagpotan ya gawaen na saray brother ya tinuro na masanton espiritu?

⁶ Saray brother ya tinuro na masanton espiritu et nanduruma so responsabilidad da. No panon ya mantutulongan so nanduruman parte na laman ya singa saray lima tan sali parad pankaabigan na interon laman, ontan met iray brother ya tinuro na masanton espiritu. Mansasagpot ira parad pankaabigan na interon kongregasyon. Gagawaen da itan aliwan pian idayew ira na arum, noagta pian pasesegen tan pabiskegen iray agagi. (Basaen so 1 Tesalonica 2:6-8.) Misalsalamat tayo ta inikdan nen Jehova so kongregasyon na masakripisyo tan maespiritual iran lalaki!

7. Anto ray bendisyon ed saray manlilingkor ya full-time?

⁷ Saray arum ya kabiangan na kongregasyon et manlilingkor bilang misionero, espisyal payunir, odino regular payunir. Diad tua, dakel ya agagi tayo ed interon mundo so nandesisyon ya magmaliw a full-time diad panagpulong tan panaggaway babangatan. Lapud satan et dakel so natutulongan dan magmaliw ya disipulo nen Jesu-Kristo. Karaklan ed sikara et aliwan mayaman balet dakdakel so bendisyon nen Jehova ed sikara. (Mar. 10:29, 30) Inar-aro tayo irayan agagi tan misalsalamat tayo ta kabiangan ira na kongregasyon!

8. Akin ya inar-aro nen Jehova so kada manangipalapag na maong a balita?

⁸ Kasin saray brother ya walaan na responsabilidad tan saray manlilingkor ya full-time labat so importante ed kongregasyon? Andi. Kada manangipalapag na maong a balita et importante ed Dios tan ed kongregasyon. (Roma 10:15; 1 Cor. 3:6-9) Akin et nibaga tayo itan? On ta say sakey ed saray sankaimportantian ya kimey na kongregasyon et say  pangibangat ed saray totoo pian magmaliw iran disipulo na Katawan tayon Jesu-Kristo. (Mat. 28:19, 20; 1 Tim. 2:4) Satan a kimey so manuna ed bilay na amin ya kabiangan na kongregasyon, balanglan bautismado odino agbautismadon manangipalapag.​—Mat. 24:14.

9. Akin et pinabpabli tayo iray agagin bibii?

⁹ Inikdan met nen Jehova na importantin betang iray agagin bibii. Pinabpabli ton maong iray asawan bibii, saray ina, saray abalo, tan mamarikit ya matoor a manlilingkor ed sikato. Dakel so nabasa tayod Biblia ya bibiin nanmatoor ed Dios. Sikaray maabig ya alimbawa ed karunongan, kamaongan, pananisia, inkaseseg, inkakpel, tan inkamaiter. (Luc. 8:2, 3; Gawa 16:14, 15; Roma 16:3, 6; Fil. 4:3; Heb. 11:11, 31, 35) Talagan misalsalamat tayo ed si Jehova ta kaiba tayod kongregasyon iray agagin bibii ya ontan iray kualidad da!

10. Akin et pinabpabli tayo iray maedad lan agagi?

¹⁰ Bendisyon met ed kongregasyon iray maedad lan agagi. Diad arum ya kongregasyon et wala ray maedad lan agagi ya inusar day interon bilay da diad panlilingkor da ed si Jehova. Wala ra met so maedad lan agagi ya agano nin nagmaliw ya Tasi nen Jehova. Lapud matatken la ra, dakel lay sakit da tan onkakapuy lay laman da. Kanian limitado lay nagagawaan dad kongregasyon tan ed panagpulong a kimey. Balet gagawaen day anggaay nayarian da ya mibiang ed ministeryo tan uusaren day biskeg da pian pasesegen tan ipasal so arum. Makaaral tayon amin ed saray eksperiensya ra. Talagan espisyal ira ed si Jehova tan ed sikatayo!​—Pro. 16:31.

11-12. Akin et napapaseseg ka ed saray kabataan diad kongregasyon yo?

¹¹ Isipen pa met iray kabataan tan ugugaw diad kongregasyon. Dakel ya subok so aarapen da legan iran ombabaleg ed sayan mundo ya kokontrolen nen Satanas ya Diablo, tan apaliberan ira na saray totoon naimpluensyaan to. (1 Juan 5:19) Kanian napapaseseg tayon amin no nanenengneng tayo ray kabataan ya mankokomento diad saray aral, makulikuli  ran manpupulong, tan makpel dan idedepensa so pananisia da. Sikayo ran kabataan, importante kayo ed kongregasyon nen Jehova!​—Sal. 8:2.

¹² Wala ray agagi tayo balet ya say pakalikna da et anggapoy nagagawaan da ed kongregasyon. Aralen tayo natan no antoy makatulong pian nalikna tayo ya importante tayo ed kongregasyon.

13-14. Akin ya iisipen na arum ya aliwa ran importante ed kongregasyon?

¹³ Imanoen so komaduan naaralan tayo ed ilustrasyon nen Pablo. Nipaakar iya ed samay nalilikna na arum ya agagi ya singa ag-ira importante ed kongregasyon. Insulat nen Pablo: “No ibaga na sali, ‘Aliwa ak a lima, kanian agak kabiangan na laman,’ aliwa yan rason pian ibaga ya ag-itan kabiangan na laman. Tan no ibaga na layag, ‘Aliwa ak a mata, kanian agak kabiangan na laman,’ aliwa yan rason pian ibaga ya ag-itan kabiangan na laman.” (1 Cor. 12:15, 16) Antoy ibabangat nen Pablo ed satan ya imbaga to?

¹⁴ No ikomparam so sarilim ed saray kakongregasyon mo, ompan onabebay pakanengneng mod sarilim. Wala ray agagi ya talagan maong ya manbangat, man-organisa, odino manpaseseg. Ompan say pakaliknam et agmo sarag ya gawaen so nagagawaan da. No ontan so naliliknam, prueba itan ya mapaabeba ka. (Fil. 2:3) Pero kaukolan moy manalwar ta no lanang mon ikokomparay sarilim ed saray maabilidad ya agagi, magmaliw ya melmelag so pakanengneng mod sarilim. Tan ompan naliknam ya aliwa kan importante ed kongregasyon. Antoy nepeg mon gawaen pian aliwan ontan so naliknam?

15. Base ed 1 Corinto 12:4-11, antoy nepeg tayon isipen ed saray abilidad ya inter nen Jehova ed sikatayo?

¹⁵ Tandaan iyan punto: Nen inmunan siglo, inusar nen Jehova so masanton espiritu pian ikdan na nanduruman regalo iray Kristiano,  balet aliwan parepareho so naawat dan regalo. (Basaen so 1 Corinto 12:4-11.) Anggaman nanduruma so inter to ed sikara ya regalo tan abilidad, balang sakey et importante. Agla itan gagawaen nen Jehova natan, pero nia so naaralan tayo: Aliwan parepareho so abilidad tayo, balet importante tayon amin ed si Jehova.

16. Anton bilin nen apostol Pablo so nepeg tayon unoren?

¹⁶ Imbes ya ikompara tayoy sarili tayo ed arum ya agagi, unoren tayo iyan bilin nen apostol Pablo: “Usisaen komon na kada sakey so gagawaen to, tan kayari na satan et sikatoy nawalaay rason a manliket nipaakar ed sarili to labat, aliwan diad pangikokompara toy sarili to ed arum.”​—Gal. 6:4.

17. Antoy resulta no unoren tayoy bilin nen Pablo?

¹⁷ No unoren tayoy bilin nen Pablo ya usisaen tayo iray mismon nagagawaan tayo, nanengneng tayo ya wala ra manayay abilidad tayo ya anggapo ed arum. Singa bilang, nayarin say sakey ya elder et agmasyadon marunong ya manpaliwawa diad kongregasyon pero marunong ya mangiyaral na Biblia. Odino ompan agmasyadon marunong ya man-organisa ya singa saray arum ya elder, pero labalabay ya asinggeran na agagi ta amta ra ya maar-aro tan balibali iray bilin to ya base ed Biblia. Sakey ni, ompan kabkabat ya maiter tan masangkaili. (Heb. 13:2, 16) No usisaen tayo iray mismon nagagawaan tan abilidad tayo, nanengneng tayo ya wala manayay nitutulong tayo ed kongregasyon tan agtayo makaibeg ed abilidad na arum ya agagi.

18. Antoy gawaen tayo pian magmaliw tayon epektibo ed ministeryo?

¹⁸ Antokaman so abilidad tayo, kaukolan tayon paaligwasen so panaglingkor tayo pian magmaliw tayon epektibo ed ministeryo. Uusaren nen Jehova so organisasyon to pian ipasal tayo ed satan. Singa bilang, diad aral tayo ed midweek et nibabangat itayo no panon so manpulong tan mangiyaral na Biblia. Kasin uusaren mod ministeryo iray nanaaralan mo ditan?

19. Anto ray gawaen mo pian magmaliw kan kualipikado ya manaral ed School for Kingdom Evangelizers?

¹⁹ Say sakey nin uusaren nen Aman Jehova et say School for Kingdom Evangelizers. Say kualipikado ya manaral ed saya et saray agagin lalaki tan bibii ya manlilingkor a full-time tan mantaon na 23 anggad 65. Ompan iisipen mo ya aliwan parad sika iyan goal tan aliwa kan kualipikado. Pero imbes ya say nonoten mo et saray rason ya makaamper ed sika, mas maabig no ilistam iray rason no akin ya labay moy manaral ed sayan eskuelaan. Insan manplano ka no anto ray gawaen mo pian magmaliw kan kualipikado. Anggano iisipen mo ya imposible itan, diad tulong nen Jehova et magmaliw ya posible basta mansagpot ka.

20. Antoy naaralan tayo ed Roma 12:6-8?

²⁰ Say komatlon naaralan tayo ed ilustrasyon nen Pablo et nabasad Roma 12:6-8. (Basaen.) Ditan et imbaga lamet nen Pablo ya nanduruma so regalo odino abilidad na saray agagi. Balet indanet to ya usaren tayo so anggan anton abilidad tayo pian pabiskegen so kongregasyon.

21-22. Antoy naaralan tayo ed si Brother Robert tan Brother Felice?

²¹ Nengnengen tayoy alimbawa na sakey a brother ya tawagen tayon Robert. Kayari ton nanlingkor ed arum ya bansa, sikatoy niyasain ya manlingkor ed Bethel diad bansa to. Anggaman sikatoy pinaseguroan ya anguman so  asainmin to aliwan lapud walay ginawa ton makapuy, oniay alikna to: “Pigaran bulan ya nakakasian koy sarilik ta inisip ko ya pinmalpak ak ed datin asainmin ko. No maminsan et labay ko met lay ompaway ed Bethel.” Antoy akatulong ed sikato? Impanonot na kapara ton elder ya sikatoy impasal nen Jehova ed datin asainmin to pian sarasarag ton gawaen so balon asainmin to. Atalosan lanlamang nen Robert ya agla dapat manpopokus ed apalabas, noagta manpokus la ed saray sarag ton gawaen natan.

²² Ontan met so subok ed si Brother Felice Episcopo. Nan-graduate iran sanasawa ed Gilead nen 1956 tan nanlingkor ira ed sirkito diad Bolivia. Nen 1964 et nananak si misis to. Oniay imbaga nen Brother Felice: “Agmi naawat ya ontunda kami lad asainmin mi. Ngalngali sakey taon ya maer-ermen ak. Balet diad tulong nen Jehova, atalosan ko lanlamang ya kaukolan koy manpokus ed balon asainmin ko​—say impagmaliw kon tatay.” Aliknam met la iyay imbaga nen Brother Robert tan Brother Felice? Kasin nakakasian mo met so sarilim lapud anggapo lad sika natan iray datin pribilehyom? No ontan so situasyon mo, naliknam lamet so liket no manpokus ka ed saray nagawaan mo natan pian napanlingkoran moy Jehova tan saray agagi. Manggawa kay paraan ya nausar moy abilidad mo pian tulongan so arum. No ontan so gawaen mo, maliket ka ta napapabiskeg moy kongregasyon.

23. Antoy lanang tayon nonoten, tan antoy pantongtongan tayo ed onsublay ya artikulo?

²³ Importante ed si Jehova so kada sakey ed sikatayo. Labay to ya magmaliw tayon kabiangan na pamilya to. No lanang tayon sankanonot no panon tayon napabiskeg iray agagi tan pansagpotan tayon gawaen itan, nalikna tayo ya importante itayo ed kongregasyon. Anto balet so pakanengneng tayo ed saray agagi? Panon tayon nipanengneng ya inar-aro tan rerespetoen tayo ra? Atan so pantongtongan tayo ed onsublay ya artikulo.