1-2. Antoy aralen tayo ed sayan artikulo?

ANTO kasi naliknam no walay aalagaren mon package ya say antam et i-deliver da la pero agsinmabi? Seguro nadismaya ka, lalo la no kaukolan mo lan talaga itan. Tua so ibabaga na Biblia ya: “No ag-onsabi so tatalaranan, makapasakit na puso.” (Pro. 13:12, paimanod leksab) Pero panon to no naamtaan mo ya wala met manayay rason no akin ya agda ni-deliver so package mo? Seguro agka la masyadon onsyodot tan anosan mo lan alagaren so isabi to.

² Diad sayan artikulo, aralen tayo ray pigaran prinsipyo ed Biblia ya ontulong ed sikatayon “maan-anos . . . a manalagar.” (Miq. 7:7) Insan tayo pantongtongan so duaran situasyon ya mas kakkaukolan tayoy manalagar ed si Jehova. Aralen tayo met no anto ran bendisyon so manatalaran ed saramay maan-anos a manaalagar.

3. Antoy naaralan tayo ed prinsipyon walad Proverbio 13:11?

³ Walay naaralan tayo ed Proverbio 13:11 tungkol ed no akin ya importante so pananos. Kuan to: “Say kayamanan ya agangganon agamoran et ondaiset, balet say kayamanan na samay kalkalnan mantitipon et ondakel.” Antoy naaralan tayod saya? No say sakey et maanos, mas maabig so resulta.

4. Antoy naaralan tayo ed prinsipyon walad Proverbio 4:18?

⁴ Onia met so ibabaga na Proverbio 4:18: “Say basbas na matunong et singa liwawa na kabuasan ya onliliwawa lan onliliwawa anggad kagkaagewan la.” Amta tayo ya sayan teksto et idedeskribe toy kalkalnan pangipapaamta nen Jehova ed sikatayo na gagala to. Pero onaplika met iyan bersikulo ed iyaligwas ed espiritual na sakey a Kristiano. Kalkalna itan ya nagawa tan kaukolay panaon. No say sakey et makulin man-personal  study tan iyaplika to ray bilin na Biblia tan instruksion na organisasyon nen Jehova, sandaraiset ton naalig iray kualidad nen Kristo tan lalo ton nakabat si Jehova. Walay ilustrasyon nen Jesus tungkol ed saya.

5. Anton ilustrasyon so inusar nen Jesus pian idanet ya kalkalna so iyaligwas ed espiritual?

⁵ Walay inusar nen Jesus ya ilustrasyon pian idanet ya say mensahe na Panarian ya ipupulong tayo et singa melag ya bini ya kalkalnan ontubo ed puso na mapaabeban too. Imbaga to: “Ontutubo tan ombabaleg iray bini tan agto amta [imay angisibwag] no panon a nagagawa itan. Say dalin a mismo so kalkalnan mamapawala na bunga, unona say bulong, insan say pugnel, tan dian kaunoran et say binmuyag lan dawa.” (Mar. 4:27, 28) Antoy punto na sayan ilustrasyon? No panon ya kalkalna so itubo tan ibaleg na sakey ya tanaman, kalkalna met so iyaligwas ed espiritual na sakey ya too ya angawat ed mensahe na Panarian. Singa bilang, no say sakey ya Bible study et mas nakabat tan naaro to lay Jehova, pansagpotan toy manguman. (Efe. 4:22-24) Pero tandaan tayo ya si Jehova so mamapabaleg ed bini na katuaan ya tinmubo ed puso to.—1 Cor. 3:7.

6-7. Antoy naaralan tayo ed impangiparaan nen Jehova ed dalin?

⁶ Maanos si Jehova ed amin ya gagawaen to tan aliwan inapura so panagkimey to. De-kalidad iray trabaho to, ta labay ton panliketan tan pinabangan itan na arum, tan pian nigloria so ngaran to. Bilang alimbawa, nengnengen tayo pay kalkalnan impangiparaan nen Jehova ed planetan Dalin antis itan ya panayaman na totoo.

⁷ Nen ginawa nen Jehova iyan dalin, ibabaga na Biblia ya singa met “angiyan na saray sukat,” ‘impatoon to iray lusek,’ tan “angiletneg na bato” ya pinagka-pundasyon. (Job 38:5, 6) No maminsan, ontunda ni ingen pian nengnengen iray agawaan to la. (Gen. 1:10, 12) Kasin naimadyin moy reaksion na saray anghel kada no walay nanengneng dan balo ya pinalsa nen Jehova? Seguradon malikeliket ira! Ibabaga ni ingen na Biblia ya “inmeyag [ira] ed liket”  tan “inkasil day boses da ed panangirayew.” (Job 38:7) Antoy naaralan tayo ed paraan na impamalsa nen Jehova? Nilibon taon ya nankimey si Jehova antis ton asumpal ya amin, pero amta tayo ya aliketan a maong ed resulta na trabaho to ta imbaga ton “agaylay abig” so amin ya pinalsa to.—Gen. 1:31.

8. Antoy onsublay ya pantongtongan tayo?

⁸ Anengneng tayod sarayan alimbawa tan prinsipyo ed Biblia ya talagan kaukolan tayoy mananos. Pantongtongan tayo natan so duaran situasyon ya nayarin mas mairap so manalagar ed si Jehova.

9. Antoy sakey ya situasyon ya kaukolan tayoy manalagar ed si Jehova?

⁹No aalagaren tayoy ebat ed saray pikakasi tayo. Ompan wala ray pikakasi tayo ya say pakalikna tayo et ag-eebatan nen Jehova. Singa bilang, ompan ipipikasi tayo ya tulongan to tayo komon ed problema tayo, odino ikdan to tayoy biskeg pian nalabanan tayoy kakapuyan tayo. Akin et agtampol ya eebatan nen Jehova so amin ya pikakasi tayo?

10. Akin et kaukolan ya maan-anos tayon alagaren so ebat nen Jehova ed saray pikakasi tayo?

¹⁰ Dedengelen ya maong nen Jehova iray pikakasi tayo. (Sal. 65:2) Amta to ya manpipikasi tayo ta walay pananisia tayod sikato. (Heb. 11:6) Pero labay to met ya nanengneng no talaga kasin pansasagpotan tayon gawaen no antoy makapaliket ed sikato. (1 Juan 3:22) Kanian no ipipikasim ed si Jehova ya nalabanan mo komon so kakapuyan mo, ipanengneng mod sikato ya talagan gagawaen moy anggaay nayarian mon nalabanan itan, tan agka onsasawa ya kerewey tulong to. Amta nen Jesus ya wala ray pikakasi tayo ya agtampol ya ebatan nen Jehova. Kanian oniay bilin to: “Mantultuloy kayon onkerew, tan naikdan kayo; mantultuloy kayon mananap, tan makaromog kayo; mantultuloy kayon ontoktok, tan nalukasan kayo; ta balang sakey ya onkekerew et makaawat, tan balang sakey a manaanap et makaromog, tan balang sakey ya ontotoktok et nalukasan.” (Mat. 7:7, 8) No unoren tayo itan ya bilin to tan “manseet [tayod] pikakasi,” seguradon dengelen nen Jehova iray pikakasi tayo tan ebatan to lanlamang iratan.—Col. 4:2.

11. Base ed Hebreo 4:16, antoy isipen tayo no singa mabayag ya ebatan nen Jehova so pikakasi tayo?

¹¹ No say pakaliknam et mabayag ya ebatan nen Jehova so pikakasim, tandaan mo ya eebatan nen Jehova iray pikakasi “diad dugan panaon.” (Basaen so Hebreo 4:16.) Kanian agtayon balot iisipen ya matantan si Jehova no walay iilaloan tayon gawaen to pero agto ni ginawa. Singa bilang, abayag ti lan ipipikasi ya onsabi la komoy Panarian na Dios diad dalin tan naderal la komon iyan mauges ya sistema na mundo. Diad tua, imbaga nen Jesus ya kaukolan tayon ipikasi itan. (Mat. 6:10) Pero no say sakey et onkapuy lay pananisia to ed Dios ta agsinmabi so anggaan diad panaon ya iisipen to, ompan ontunda lan manlingkor. (Hab. 2:3; Mat. 24:44) Ag-itan nagawa ed sikatayo no maseet tayon alagaren so ikiwas nen Jehova, tan tuloytuloy tayo labat ya manpikasi tan mantiwala tayo ya ebatan to so pikakasi tayo. Seguradon onsabi so anggaan diad dugan panaon, ta wala lay pinili nen Jehova ya “agew tan oras” parad satan. Tan segurado tayo ya ninonot toy pankaabigan na amin a totoo nen pinili to itan ya petsa.—Mat. 24:36; 2 Ped. 3:15.

12. Antoy sakey nin situasyon ya kaukolan tayoy manalagar ed si Jehova?

¹²No biktima tayo na ag-inkahustisya. Diad mundo, maslak et aliwliway panagtrato dad  sika no dumay kasarian mo, lahim, kulturam, tribum, odino bansan nanlapuan mo. Say arum et anggapoy respeto da ed saramay walay kapansanan o walay sakit dad isip. Dakel met ya agagi so biktima na ag-inkahustisya lapud uunoren da iray prinsipyo ed Biblia. No bilang ta nagawa iya ed sika, tandaan mo iyan imbaga nen Jesus: “Samay akapansungdo [o akapan-anos] anggad anggaan et sikatoy nilaban.” (Mat. 24:13) Pero panon to no diad mismon kongregasyon et naamtaan mo ya walay biktima na ag-inkahustisya lapud seryoson kasalanan ya ginawa na sakey ya agi? No akasabi la itan ed saray elder, kasin manmatalek ka ya asikasoen da itan diad paraan ya labay nen Jehova tan maanos mon alagarey desisyon da? Antoy gagawaen na saray elder no walay onian nagawa?

13. Antoy labay nen Jehova ya gawaen na saray elder no walay akagawa na seryoson kasalanan?

¹³ No naamtaan na saray elder ya walay akagawa na seryoson kasalanan ed kongregasyon, manpikasi rad si Jehova ya ikdan to ra na “karunongan a manlalapud tagey” tan naasikaso da komon itan diad paraan ya labay to. (Sant. 3:17) Sankanonot da ya say gagala da et pian ‘napapawil imay nankasalanan manlapud lingon dalan to,’ no posible ni. (Sant. 5:19, 20) Seseguroen da met ya naprotektaan so kongregasyon tan naligliwa iramay naagrabiado odino asakitan. (2 Cor. 1:3, 4) No walay bembenan na saray elder ya kaso na seryoson kasalanan, amtaen da ni no anton talagay agawa. Kanian mankaukolan itan na panaon. Manpikasi irad si Jehova, simbawaen da imay nankasalanan base ed Biblia, tan seguroen da ya “dugaruga labat so panangipetek” ya iter da ed sikato. (Jer. 30:11, paimanod leksab) Ag-ira manaapuran mandesisyon, pero agto met labay ya ibaga ya gagalaen dan pabayagen ni itan. No tumboken na saray elder iray instruksion nen Jehova, naseguro da ya parad pankamaongan na interon kongregasyon so desisyon da. Pero anggano ginawa da la iratan ya amin, ompan ansakisakit nin siansia ed saray apektadon agagi so ginawa to may nankasalanan. No ontay situasyon mo, antoy gawaen mo pian nabawasan so sakit ya naliliknam?

14. No naagrabiado tan asakitan ka ed ginawa na sakey ya agi, siopan alimbawa ed Biblia so balibalin aligen mo?

¹⁴ Kasin naagrabiado tan asakitan ka ed ginawa na sakey ya too, ya ompan kaagian  tayo ni ingen? Wala ray maong ya alimbawa ed Biblia ya pakaaralan mo. Nen abiktima ira na ag-inkahustisya, impalima da la itan ed si Jehova. Say sakey ed sikara et si Jose. Anggano aliwliway ginawa ed sikato na saray kuya to, agnanem-em na sakit na linawa. Ginawa to nin siansiay anggaay nayarian ton manmatoor ed si Jehova, kanian alikna toy panangaro nen Jehova legan ton itetepel so irap. (Gen. 39:21) Sinmabi lanlamang so panaon ya pinerdona nen Jose iray kuya to tan anengneng toy impamendisyon nen Jehova ed katooran to. (Gen. 45:5) Singa si Jose, gawaen mo komon so anggaay nayarian mo ya lalon onapit ed si Jehova pian natambal so sakit ya naliliknam. Tan manmatalek ka ya iter to lanlamang so hustisya ed dugan panaon.—Sal. 7:17; 73:28.

15. Antoy akatulong ed sakey ya sister pian nitepel toy aliwliwan ginawa na arum?

¹⁵ Ompan aliwa met ya onman kagrabe ed si Jose so naeksperiensyam ya ag-inkahustisya. Pero siempre, natural labat ya nasakitan tayo no aliwliwa so pantrato ed sikatayo na arum. No nagawa itan ed sika, maabig no iyaplikam iray prinsipyo na Biblia, anggano aliwan agi so akasakit ed sika. (Fil. 2:3, 4) Imanoen iyan naeksperiensya na sakey ya sister. Naamtaan to ya sikatoy itsi-tsismis tan dederalan na katrabaho to. Imbes ya onsyodot tan ombawi, ninonot toy alimbawa nen Jesus ya nen sikatoy ininsulto et agbinmales. (1 Ped. 2:21, 23) Kanian nandesisyon iman ya sister ya mas maong no agto la pabalegen iman ya isyu. Diad inlabas na saray agew, naamtaan to ya wala manayay graben sakit na katrabaho to tan nai-stress lan maong. A-realize na saman ya sister ya ompan onman so imbagbaga na katrabaho to ta mair-irap so dadalanen to. Maong labat ta intepel to la imay agawa kanian agnakokonsiensia tan mareen so nonot to.

16. No biktima ka na ag-inkahustisya, antoy nepeg mon tandaan pian onlemew so liknaan mo? (1 Pedro 3:12)

¹⁶ No biktima ka na ag-inkahustisya odino asakitan ka lapud ginawa na arum, tandaan mo ya si Jehova et “asingger ed samay asugatay puso to.” (Sal. 34:18) Mas lalo to kan naar-aro lapud nanenengneng to ya mantetepel ka tan ipapasakbat mod sikato so ambelat ya awit mo. (Sal. 55:22) Lanang mo met ya nonoten ya sikato so Sankatagyan ya Ukom ed interon  dalin tan nanenengneng to so amin ya nagagawa. (Basaen so 1 Pedro 3:12.) Kanian no walay problemam ya anggapo lan talagay solusyon to natan, ipanengneng mod si Jehova ya maan-anos kan manaalagar ed sikato.

17. Base ed Isaias 30:18, antoy insipan nen Jehova ed saramay maniilalo ed sikato?

¹⁷ Asingsingger tayo lan natawayan iray bendisyon na Panarian. Dakel so ipaparaan nen Aman Jehova parad sikatayo! Oniay ibabaga na Isaias 30:18: “Si Jehova et maan-anos a manaalagar ed pangipatnag toy kaabigan ed sikayo, tan sikatoy onalagey pian kasian to kayo. Ta si Jehova et Dios na inkahustisya. Maliket so amin a mantultuloy a manilalo ed sikato.” Natan ni labat et dakel lan bendisyon so panliliketan na saramay maniilalo ed si Jehova, tan dakel ni so awaten da diad balon mundo.

18. Anto ran bendisyon so manatalaran ed sikatayo?

¹⁸ No balon mundo la, anggapo la ray problema ya kaukolan tayon anosan. Anggapo met lay ag-inkahustisya tan naandi lay amin ya sakit. (Apo. 21:4) Agtayo la panaburidoan no iner so pangalaan tayoy pambilay tayo lapud agla nasabaan so panangan, tan wadman lan amin so kaukolan tayo. (Sal. 72:16; Isa. 54:13) Mainawa tan malikeliket lay bilay tayo ed satan!

19. Ipaparaan itayo nen Aman Jehova parad anto?

¹⁹ Tandaan mo ya kada no tutulongan ka nen Jehova ya nalabanan iray kakapuyan mo tan nipanengneng iray balibalin ugali, ipaparaan to ka la parad bilay ed balon mundo. Kanian agmo susukoan so sarilim. Ituloy mo labat so panlilingkor mo. Awaten mon siansia so tuan bilay! Komon ta amin tayo et maan-anos tan malikeliket ya manalagar ed si Jehova ya anggad sumpalen to lay amin ya sipan to.