1. Antoy nayarin nitepet tayo no isipen tayoy amin ya ginawa nen Jehova?

NO IMADYINEN moy kaawang na uniberso ya ginawa nen Jehova, seguro naisip mo met imay imbaga nen David nen impikasi ton: “Sano nanenengneng koy katawenan, saray kimey mo, say bulan tan saray bitewen a ginawam, antoy kablian na sakey a too pian sikatoy nodnonoten mo, tan say anak na too pian sikatoy asikasoen mo?” (Sal. 8:3, 4) Singa si David, ompan pankelawan tayo met no akin ya sankanonot tan aasikasoen itayo nen Jehova, anta melmelag tayo no ikompara ed saray bitewen tan arum nin pinalsa To. Pero singa aralen tayod sayan artikulo, mas ni so ginawa nen Jehova ed inmunan too ya si Adan tan Eva—ginawa to ran parte na pamilya to.

2. Anton espisyal ya asainmin so inter nen Jehova ed unonan ananak to diad dalin?

² Si Adan tan Eva so unonan ananak nen Jehova diad dalin, tan si Jehova so maar-aron Ama ra ed tawen. Walay espisyal ya asainmin na sayan sanasawa. Imbaga na Dios ed sikara: “Manbunga kayo tan manparakel kayo, pano yoy dalin tan uleyan yo.” (Gen. 1:28) Labay na Dios ya nawalaan ira na ananak tan asikasoen da so planetan Dalin. No agkomon nanrebelde si Adan tan Eva, mansiansia ra ed pamilya nen Jehova, pati saray ananak da.

3. Akin et nibagan pinagalangan nen Jehova si Adan tan Eva nen ginawa to ra?

³ Pinagalangan nen Jehova si Adan tan Eva nen ginawa to ra. Diad Salmo 8:5, oniay imbaga nen David tungkol ed impamalsa nen Jehova: “[Say too et] ginawam a mas abeba nen saray anghel, tan kinoronaan mo na gloria tan karakpan.” On tua, mas mabiskeg, mas matalino, tan mas maabilidad iray anghel nen saray totoo. (Sal. 103:20) Pero kinoronaan nen Jehova na  “gloria tan karakpan” so too! Imadyin mo pa man. Talagan pinagalangan nen Jehova so unonan atateng tayo!

4. Antoy agawad si Adan tan Eva nen agda inunor si Jehova, tan anto ray pantongtongan tayo ed sayan artikulo?

 ⁴ Makapaermen balet ta ag-inunor nen Adan tan Eva si Jehova kanian inekal to ra ed pamilya to. Lapud impanrebelde da, adamay tan nanirap so ananak da, ya pantongtongan tayo ed ontumbok iran parapo. Pero ag-anguman so gagala nen Jehova. Labay to nin siansia ya magmaliw ya ananak to ed andi-anggaan iray maunor ya totoo. Pantongtongan tayo nin unona no anto ray ginawa nen Jehova pian napagalangan to tayo. Insan tayo amtaen no antoy gawaen tayo la natan pian nipanengneng tayo ya talagan labay tayoy magmaliw a parte na pamilya to. Amtaen tayo met no anto ran bendisyon so iter tod saray ananak to ed dalin diad andi-anggaan.

5. Panon tayon nipanengneng ed si Jehova ya misalsalamat tayo ed abilidad tayon aligen iray kualidad to?

⁵Ginawa itayo nen Jehova ya sarag tayon aligen iray kualidad to. (Gen. 1:26, 27) Singa bilang, sarag tayoy magmaliw ya maaro, mapangasi, matoor, tan matunong ya singa sikato. (Sal. 86:15; 145:17) No aaligen tayo ray kualidad nen Jehova, sikatoy napapagalangan, tan nipapanengneng tayo met ya misalsalamat tayod sikato. (1 Ped. 1:14-16) No napapaliket tayoy Aman Jehova, maliket tayo met. Tan lapud walay abilidad tayon aligen iray kualidad nen Jehova, sarasarag tayo sirin ya gawaen so antokaman ya ipagawa to pian magmaliw tayon membro na pamilya to.

6. Panon ya pinagalangan nen Jehova iray totoo diad impamalsa to ed dalin?

⁶Espisyal so ginawa nen Jehova ya panayaman tayo. Antis ya ginawa nen Jehova so too, imparaan to nin maong so planetan Dalin. (Job 38:4-6; Jer. 10:12) Lapud maiter si Aman Jehova tan sankanonot to no antoy mamaliket ed sikatayo, dakdakel so mararakep ya pinalsa to. (Sal. 104:14, 15, 24) Nen ipaparaan toy dalin, ontutunda no maminsan pian nengnengen iray agawaan to la, tan ‘anengneng to ya maabig iratan.’ (Gen. 1:10, 12, 31) Say too so inyasain ton mangasikaso ed interon dalin. Talagan baleg itan ya kagalangan! (Sal. 8:6) Labay na Dios ya panliketan ya asikasoen na perpekton totoo iyan planetan Dalin diad andi-anggaan. Kasin lanang mon pisasalamatan si Aman Jehova ed satan ya balibalin ilalom?

7. Panon ya papaneknekan na Josue 24:15 ya walay abilidad tayon mandesisyon?

⁷Inikdan itayo nen Jehova na abilidad ya mandesisyon parad sarili tayo. Walay kalayaan tayon manpili no antoy gawaen tayod bilay tayo. (Basaen so Josue 24:15.) Napaliket tayoy maaron Dios tayo no pilien tayoy manlingkor ed sikato. (Sal. 84:11; Pro. 27:11) Sayan abilidad tayo et sarag tayo met ya usaren parad pankaabigan na arum. Imanoen tayoy alimbawa nen Jesus.

8. Mangiter na alimbawa no panon ya inusar nen Jesus so abilidad ton mandesisyon.

⁸ No mandedesisyon si Jesus, say manunan sankanonot to et say pankaabigan na arum, aliwan sarili to. Maabig no aligen tayoy alimbawa to. Aminsan, naknaksawan si Jesus tan saray apostol to, kanian linma ra ed mareen ya pasen pian makapanpainawa ira komon ya magano. Pero ag-atuloy so plano ra, ta tinumbok ira na amayamay ya totoo ya labay day paibangat ed si Jesus. Kasin sinmyodot si Jesus ta ag-akapanpainawa? Andi. Diad tua, akasian to ra ingen. Kanian “imbangat to ira na dakel a bengatla.” (Mar.  6:30-34) No aligen tayoy inkamasakripisyo nen Jesus tan usaren tayoy panaon tan biskeg tayo pian tulongan so arum, niglogloria tayoy Ama tayo ed tawen. (Mat. 5:14-16) Ipapanengneng tayo met ed si Aman Jehova ya labay tayoy magmaliw ya parte na pamilya to.

9. Antoy nepeg ya tandaan na saray atateng?

⁹Inikdan nen Jehova iray totoo na abilidad ya nawalaan na ananak, tan say responsabilidad ya bangatan ira pian sikatoy aroen tan panlingkoran da. No sakey kan ateng, kasin seseryosoen mo iyan espisyal ya asainmin ya inter nen Jehova ed sika? Isip mo pa: Anggano inikdan nen Jehova iray anghel na nanduruman abilidad tan pakapanyari, agto ra balet inikdan na abilidad ya nawalaan na ananak. Kanian no sakey kan ateng, tandaan mo ya espisyal ya pribilehyo so manpamilya. Aliwan gakgalaw so pamabaleg ed ananak “diad disiplina tan panangigiya nen Jehova.” Sagradon responsabilidad itan. (Efe. 6:4, paimanod leksab; Deu. 6:5-7; Sal. 127:3) Dakdakel so itatarya na organisasyon na Dios ya makatulong ed saray atateng, singa saray nibase ed Biblia ya libro, brosyur, video, kansion, tan artikulo ed website tayo. On, inar-aro nen Jehova tan Jesus iray ugugaw. (Luc. 18:15-17) No manpapaigiya iray atateng ed si Jehova tan pansasagpotan dan pabalegen iray ananak da diad paraan ya labay to, sikatoy naliliketan. No ontan so gawaen na atateng, mas baleg so posibilidad ya saray ananak da et magmaliw met ya permanentin membro na pamilya nen Jehova!

10-11. Antoy nagmaliw ya posible lapud intarya nen Jehova so dondon?

¹⁰Inter nen Jehova so inar-aro ton Anak pian magmaliw tayo lamet ya membro na pamilya To. Singa abitla ed  parapo 4, inekal nen Jehova si Adan tan Eva ed pamilya to, tan adamay iray ananak da. (Roma 5:12) Ginagala nen Adan tan Eva so manrebelde ed Dios, kanian dapat labat ya ekalen to ra. Saray ananak da balet ey? Inar-aro nen Jehova iray ananak da ya maunor ed sikato kanian nanggawa na paraan pian natagibi to ra. Imbaki toy panguloan ya Anak ton si Jesu-Kristo pian nadondon iray totoo. (Juan 3:16; Roma 5:19) Lapud dondon bagat nen Jesus, tinagibi na Dios bilang ananak to so 144,000 ya matoor ya totoo.—Roma 8:15-17; Apo. 14:1.

¹¹ Pero wala ni ray minilyon ya totoo ya matoor tan maunor met ed si Jehova. Iilaloan day magmaliw ya permanentin membro na pamilya to no alampasan da lay sampot ya subok kayari na Sanlibon Taon ya Uley nen Jesu-Kristo. (Sal. 25:14; Roma 8:20, 21) Lapud satan ya ilalo da, natan ni labat et tatawagen da lan “Ama” so Dios ya Amalsa ed sikara. (Mat. 6:9) Anggan saray napaoli diad balon mundo et naikdan na tsansan nakabat si Jehova tan naamtaan da iray ganggan to. No sikatoy unoren da, awaten to met ira ed pamilya to.

12. Anton tepet so ebatan tayo?

¹² On, dakdakel so ginawa nen Jehova pian pagalangan iray totoo. Tinagibi to la iray alanaan. Tan saray membro na “baleg ya ulop” et walay ilalo dan magmaliw ya permanentin membro na pamilya to diad balon mundo. (Apo. 7:9) Anto ray nepeg tayon gawaen pian nipanengneng tayod si Jehova ya labay tayoy magmaliw ya anak to diad andi-anggaan?

13. Antoy gawaen tayo pian magmaliw tayon parte na pamilya na Dios? (Marcos 12:30)

¹³Ipanengneng mo ya inar-arom si Jehova diad panlingkor mod sikato ed interon pusom. (Basaen so Marcos 12:30.) Sakey ed saray  sankarakepan ya regalo nen Jehova et say pribilehyo tayon mandayew ed sikato. Nipanengneng tayod si Jehova ya inar-aro tayo no ‘uunoren tayo ray ganggan to.’ (1 Juan 5:3) Sakey ed saray ganggan to et samay imbaga nen Jesus ya bangatan tayo iray totoo ya anggad manpabautismo ira bilang disipulo to. (Mat. 28:19) Ingganggan to met ya manaaroan tayo. (Juan 13:35) No maunor tayod si Jehova, magmaliw tayon parte na pamilya to.—Sal. 15:1, 2.

14. Panon tayon nipanengneng ya inaro tayoy kapara tayon too? (Mateo 9:36-38; Roma 12:10)

¹⁴Arom so kaparam a too. Say aro so manunan kualidad nen Jehova. (1 Juan 4:8) Anggan sanen agmo ni kabat si Jehova, inaro to ka la. (1 Juan 4:9, 10) Naalig tayoy Jehova no aroen tayoy kapara tayon too. (Efe. 5:1) Sakey ed saray sankaabigan ya paraan pian nipanengneng tayoy panangaro ed kapara tayon too et no tulongan tayo ran nakabat day Jehova legan ya wala ni panaon. (Basaen so Mateo 9:36-38.) No gawaen tayo itan, iikdan tayo ray tsansa ya magmaliw ya membro na pamilya nen Jehova. No abautismoan la so sakey ya too, itultuloy tayon aroen tan respetoen. (1 Juan 4:20, 21) Singa bilang, agtayo kukuestionen so motibo to. No walay ginawa to ya agtayo agustoan, agtayo dapat huhusgaan. Igalang tayo nin siansia tan ipasen tayo ya mas atagey nen say sikatayo.—Basaen so Roma 12:10; Fil. 2:3.

15. Siopa ray kasian tan panengnengan tayoy kamaongan?

¹⁵Kasian tan panengnengan moy kamaongan so amin ya totoo. No labay mon birbiren ka nen Jehova ya anak to diad andi-anggaan, kaukolan mon unoren iray ganggan tan prinsipyo ya walad Salita to. Singa bilang, imbaga nen Jesus ya nepeg tayon kasian tan panengnengan na kamaongan so amin ya totoo, anggan saray mamubusol ed sikatayo. (Luc. 6:32-36) Diad tua, no maminsan et mairap iyan gawaen. Pero sarag tayo, basta aligen tayoy panagnonot tan ugali nen Jesus. No pansagpotan tayon unoren si Jehova tan aligen tayoy Jesus, ipapanengneng tayod Ama tayod tawen ya talagan labay tayoy magmaliw ya permanentin membro na pamilya to.

16. Panon tayon naprotektaan so reputasyon na pamilya nen Jehova?

¹⁶Protektaan mo so reputasyon na pamilya nen Jehova. Diad pamilya, maslak et aligen na yugtan so gagawaen na saray kuya to. No iyaaplika na saray kuya to iray prinsipyo na Biblia, maong ya alimbawa so naalig to may yugtan. Pero no aliway gagawaen da, ompan naimpluensyaan da met ya manggaway aliwa. Ontan met ed pamilya nen Jehova. No say sakey ya Kristiano et man-apostata o manggawa na mauges o imoral, ompan aligen na arum ya agagi so ginawa to. No ontan so nagawa, naderal so reputasyon nen Jehova tan saray mandadayew ed sikato. (1 Tes. 4:3-8) Agtayo sirin aaligen so mauges ya gagawaen na arum tan agtayo manggagawa na pakaderalan na relasyon tayo ed si Aman Jehova.

17. Antoy agtayo dapat iisipen, tan akin?

¹⁷Si Jehova so panmatalekan mo, aliwan saray materyal ya bagay. Insipan nen Jehova ya itarya toy kanen, kawes, tan panayaman tayo basta iyuna tayod bilay tayo so Panarian tan unoren tayo ray ganggan to. (Sal. 55:22; Mat. 6:33) Amta tayo ya aliwan saray materyal ya bagay so mangiter na tuan proteksion tan liket. Diad tua, mas mareen so puso tan nonot tayo no iyuna tayod bilay tayo so panlabayan nen Jehova. (Fil. 4:6, 7) Kanian anggano bilang ta dakel so kuartam, mannonot ka nin maong antis kan mangaliw na nambabangil, ta  ompan saratan laingen so mangupot na oras tan biskeg mo. Itepet mod sarilim: ‘Kasin saray materyal ya bagay so manunad bilay ko?’ Tandaan tayo ya no labay tayoy magmaliw ya membro na pamilya nen Jehova, kaukolan ya makuli tayon gawaen iray ipapagawa tod sikatayo. Agtayo sirin aabuloyan ya lapud materyal et agtayo niiter ed si Jehova so sankaabigan tayo. Nanonotan yo imay kabataan a laki ya lapud manunad bilay to so materyal et agto inawat imay imbitasyon nen Jesus ya magmaliw ya patumbok to? Sinayang to so tsansa to ya manlingkor ed si Jehova tan magmaliw ya sakey ed saray alanaan ya ananak to! Agtayo komon aaligen so ginawa to.—Mar. 10:17-22.

18. Anton baleg ya kagalangan tan bendisyon so iter nen Jehova ed saray maunor ya totoo diad andi-anggaan?

¹⁸ Iter nen Jehova ed saray maunor ya totoo so sankabalegan ya kagalangan—say kagalangan ya sikatoy aroen tan dayewen da diad andi-anggaan! Saramay parad dalin et panliketan dan asikasoen iyan balibalin planeta. Asingsingger lan ipawil na Panarian na Dios so inkarakep na sayan dalin. Ekalen nen Jesus so amin ya problema ya resulta na impanrebelde nen Adan tan Eva. Minilyon so paolien nen Jehova, ipawil toy kasil na laman da, tan ikdan to ra na tsansan manbilay na andi-anggaan diad Paraiso. (Luc. 23:42, 43) No perpekto la so amin ya ananak nen Jehova diad dalin, nipanengneng da lan talaga imay “gloria tan karakpan” ya tinukoy nen David.—Sal. 8:5.

19. Antoy nepeg tayon tandaan?

¹⁹ No kaiba ka ed “baleg ya ulop,” marakdakep ya ilalo so manatalaran ed sika. Inar-aro ka na Dios tan labay to ya magmaliw kan permanentin membro na pamilya to. Kanian paliket moy Aman Jehova tan unor mo ray ganggan to. Diad kada agew, komon ta mabilabilay ed nonot tan pusom iray sipan to. Tandaan mo ya baleg a kagalangan so mandayew ed si Aman Jehova diad andi-anggaan, kanian komon ta agmon balot iikbanan iyan ilalom!