AARALEN YA ARTIKULO 33
Babantayan nen Jehova Iray Lingkor To
“Say mata nen Jehova et akabantay ed saramay ontatakot ed sikato.”—SAL. 33:18.
KANSION 4 “Si Jehova so Pastol Ko”
DIAD SAYAN ARTIKULO *
1. Akin et impikasi nen Jesus ya bantayan nen Jehova iray papatumbok to?
DIAD samay pikakasi nen Jesus antis ya ompatey, walay espisipikon kinerew to ed si Ama to. Impikasi tod si Aman Jehova ya bantayan To iray papatumbok to. (Juan 17:15, 20) Akin et ontay impikasi nen Jesus anta talagan babantayan tan aasikasoen met nen Jehova iray lingkor To? On ta amta nen Jesus ya pasyaen nen Satanas ya pairapen iray tuan Kristiano. Agda nasarag so panangataki na Diablo no anggapoy tulong nen Jehova.
2. Base ed Salmo 33:18-20, akin et agtayo nepeg ya takotan iray subok?
2 Agmanunda iray subok ed sikatayo ran tuan Kristiano natan lapud manbibilay tayo ed mundo ya kokontrolen nen Satanas. Labay ton onkapuy so liknaan tayo tan agtayo la manmatoor ed si Jehova. Pero diad tua, anggapoy nepeg tayon takotan anggan anto ni ’tay onsabin subok. Akin ey? On ta babantayan itayo nen Jehova. Amta to iray dadalanen tayo, tan labalabay to tayon tulongan pian nasarag tayo iratan. Pantongtongan tayo ed sayan artikulo so duaran salaysay ed Biblia ya prueba ya talagan ‘babantayan nen Jehova iramay ontatakot ed sikato.’—Basaen so Salmo 33:18-20.
NO SAY PAKALIKNAM ET BUKBUKOR MO
3. Diad anto ran situasyon ya nalikna tayon bukbukor tayo?
3 Anggano dakdakel so kakaarom ya agagi, ompan wala ray panaon ya say pakaliknam et bukbukor mo. Singa bilang, ompan ontan so nalikna na sakey ya kabataan no onalis so pamilya ra ed balon kongregasyon, odino no kaukolan ton ipaliwawa ed saray kaklase o teacher to iray papanisiaan tayo. Say arum ya agagi et lalabanan day ermen o pakaka-depress da, tan sasarilien da labat itan ta say pakalikna ra et aglanlamang ira natalosan na arum tan anggapo met so manmamalasakit ed sikara. Lapud satan, magulogulo so isip da tan say pakalikna ra et anggapoy kana na bilay da. Antokaman so rason ya pakaliknam et bukbukor mo, tandaan mo ya aglabay nen Jehova ya ontan so naliknam. Antoy prueba tayo?
4. Akin et imbaga nen propeta Elias ya: “Siak labat lay akera”?
4 Imanoen so agawa ed matoor ya propetan si Elias. Sikatoy tinmakas nen naamtaan to ya sikatoy labay ya ipapatey nen Jezebel. (1 Ara. 19:1-9) Kayari masulok ya 40 ya agew ya impanakar to, akasabi ed sakey ya ungib tan oniay imbaga tod si Jehova: “Siak labat lay akera [ya propeta].” (1 Ara. 19:10) Pero diad tua, wala ni 100 ya propeta ed Israel ya inyamot nen Obadias pian ag-ira napatey nen Jezebel. (1 Ara. 18:7, 13) Anto sirin so rason akin et imbaga nen Elias ya sikato labat so akera? Ompan inisip to ya nalmo met lanlamang nen Jezebel iramay propeta ya inyamot nen Obadias tan impapatey to ra. Ompan adismaya ta anggapoy anggan sakey ya apakiwas ton manlingkor ed si Jehova anggano pinaneknekan nen Jehova diad Palandey Carmel ya Sikato so tuan Dios. Odino ompan inisip to ya anggapoy pibabali na arum ed sikato, tan anggapoy makaamta ya napepeligroy bilay to. Agtayo segurado no akin ya onman so alikna nen Elias ta agla imbaga na Biblia, pero say segurado, amta nen Jehova so rason tan amta to met no panon ton natulongan.
No say pakaliknam et bukbukor mo, antoy naaralan mo ed ginawa nen Jehova pian natulongan toy Elias? (Nengnengen so parapo 5-6)
5. Anto ray ginawa nen Jehova pian ipaseguro ed si Elias ya agto bukbukor?
5 Anto ray ginawa nen Jehova pian natulongan toy Elias? Tinepetan toy Elias pian ibaga toy nalilikna to. Oniay amiduan intepet nen Jehova: “Antoy gagawaen mo dia, Elias?” (1 Ara. 19:9, 13) Dinmengel ya maong si Jehova nen imbaga nen Elias so amin ya nalilikna to. Kayari to, impanengneng nen Jehova ed si Elias so kabiskeg na pakapanyari To pian agto naliknan bukbukor to. Insan impaseguro To ed si Elias ya amayamay ni so matoor ya lingkor To ed Israel. (1 Ara. 19:11, 12, 18) Seguradon linmemew so liknaan nen Elias nen naibaga to lad si Jehova so amin ya pakakaaburidoan to tan nen pinaseguroan nen Jehova ya agto bukbukor. Pero aliwan satan labat so ginawa nen Jehova. Inikdan to met si Elias na importantin asainmin. Imbaga to ed si Elias ya lanaan toy Hazael bilang ari ed Sirya, tan si Jehu bilang ari ed Israel. Ingganggan met nen Jehova ya lanaan toy Eliseo bilang propeta. (1 Ara. 19:15, 16) Inikdan nen Jehova si Elias na asainmin pian agmanpokus ed saray negatibo. Amta na Dios ya kaukolan to met so kaaro kanian maong labat ta wadtan lay Eliseo ya kakkaiba to. Sika ey? No say pakaliknam et bukbukor mo, antoy gawaen mo pian tulongan ka nen Jehova?
6. Anto ray sarag mon ipikasi no say pakaliknam et bukbukor mo? (Salmo 62:8)
6 Labay nen Jehova ya ibagam ed sikato no antoy naliliknam. Nanenengneng to ray dadalanen mo tan dengelen to ka anggan anton oras ka manpikasi. (1 Tes. 5:17) Ibabaga ingen na Biblia ya makapaliket ed sikato so pikakasi na saray lingkor to. (Pro. 15:8) Anto ray ipikasim ed si Jehova no say pakaliknam et bukbukor mo? Ibagam ed si Jehova so amin ya walad pusom ya singa ginawa nen Elias. (Basaen so Salmo 62:8.) Ibagam no anto ray pakakaaburidoan mo tan no antoy epekto na saratan ed sika. Kerew mod sikato ya tulongan to kan nalabanan iray negatibon iisipen mo. Alimbawa, no natatakot ka ta kukuestionen na saray kaklasem iray papanisiaan mo, kerew mod si Jehova ya tulongan to ka pian makpel kan makapansalita. Ipikasim ya ikdan to kay karunongan pian malinew tan marespetom ya naipaliwawa iray papanisiaan tayo. (Luc. 21:14, 15) Anto balet so ipikasim ed si Jehova no nadi-depress ka? Ibagam ed si Jehova ya ikdan to ka na pakpel pian naibagam ed sakey ya maespiritual ya agi no antoy dadalanen mo. Espisipikom ya ipikasi ya tulongan to imay agi pian agto ka husgaan tan talosan to ka. On, ibagam ed si Jehova so amin ya walad pusom, nengneng mo no antoy ebat tod pikakasim, tan agka nababaingan ya manpatulong ed saray agagi. No ontan so gawaen mo, agmo naliknan bukbukor mo.
Kasin manggagawa ka na paraan pian mas dakel so panaon mod ministeryo tan nakaibam iray agagi? (Nengnengen so parapo 7)
7. Antoy naaralan mo ed alimbawa nen Mauricio?
7 Amin tayo et inikdan nen Jehova na importantin asainmin. Tandaan mo ya iimanoen tan papablien toy amin ya gagawaen mo diad kongregasyon tan diad ministeryo. (Sal. 110:3) Panon itan ya makatulong pian agmo naliknan bukbukor mo? Imanoen so alimbawa na kabataan ya si Mauricio. * Nen agano ni labat ya abautismoan, walay kaaro to ya kalkalnan tinmunda ya manlingkor ed si Jehova. Oniay imbaga nen Mauricio: “Nen imbeneg toy Jehova, naisip ko ya ompan onman met so nagawa ed siak. Natatakot ak ya ompan agko natoor so dedikasyon ko tan agak makapansiansia ed pamilya nen Jehova. Singa anggapo lay ka-close kod kongregasyon kanian inisip ko ya agak met lanlamang natalosan na saray agagi.” Antoy akatulong ed si Mauricio? Oniay imbaga to: “Mas dinakelan koy oras ko ed panagpulong. Akatulong iman pian agak manpokus ed sarilik tan ed naliliknak. Malikeliket ak no kaibak iray agagi ed ministeryo.” On, anggano agtayo nakakaiban personal iray agagi diad panagpulong, napapaseseg itayo no nakakaiba tayo ran man-letter writing tan man-telephone witnessing. Anto ni so akatulong ed si Mauricio? Oniay imbaga to: “Nampokus ak met ed saray asainmin ko ed kongregasyon. No walay part ko ed aral, manpaparaan ak ya maong tan papasyaen ko. Uusaren nen Jehova iratan pian ipaliknad siak ya inar-aro to ak tan inar-aro ak na saray agagi.”
NO ONDADALAN KA ED GRABE IRAN SUBOK
8. Antoy nayarin epekto ed sikatayo no ondadalan tayo ed grabe iran subok?
8 Amta tayo ya diad sayan kaunoran iran agew et nasubok itayon amin. (2 Tim. 3:1) Pero no maminsan, wala ray onsabin subok ya agtayo iilaloan. Ompan bigla labat ya ombagsak so ekonomiya ed bansa tayo, na-diagnose ya wala manayay graben sakit tayo, odino walay kapamilya o kaaro tayo ya ompatey. No nagawa iratan, ompan na-stress tayo tan agtayo amtay gawaen tayo, lalo la no nantatabonan la ray problema. Pero agtayo komon lilingwanan ya wadtan si Jehova ya akabantay tan akaparaan ya ontulong ed sikatayo kanian nasarag tayoy anggan anton subok.
9. Anto ran subok so dinalan nen Job?
9 Isip mo pa no panon ya tinulongan nen Jehova so matoor ya lingkor ton si Job. Grabe iran subok so dinalan to tan nantutumbokan iratan ya agawa. Diad loob labat na sanagew et atakew tan apoolan iray ayayep to, inatey iray lingkor to, tan say ansakisakit, inatey so amin ya ananak to! (Job 1:13-19) Anta peles to nin maneermen, bigla labat ya adapoan na manotot tan makapadimlan sakit. (Job 2:7) Agaylay irap na situasyon nen Job kanian nibaga ton: “Kabusol koy bilay ko; agko la labay so manbilay”!—Job 7:16.
Kinatongtong nen Jehova si Job pian ipaseguro ya maar-aro Ton aasikasoen iray pinalsa To, tan nalikna nen Job ya sikatoy inar-aro na Dios (Nengnengen so parapo 10)
10. Antoy ginawa nen Jehova pian natulongan toy Job ya naanosan iray subok? (Nengnengen so litrato ed apis.)
10 Amta nen Jehova so amin ya dinalan nen Job. Lapud inar-aro toy Job, tinulongan to pian makapan-anos tan makapanmatoor. Kinatongtong nen Jehova si Job. Impanonot nen Jehova ya Sikato so sankarunongan ed interon uniberso tan maar-aro Ton aasikasoen iray pinalsa To. Impaimano tod si Job iray nanduruma tan makapabilib ya ayayep. (Job 38:1, 2; 39:9, 13, 19, 27; 40:15; 41:1, 2) Imbaki met nen Jehova so mas ugaw ya lingkor ton si Elihu pian pabiskegen tan ligliwaen si Job. Impanonot nen Elihu ed si Job ya iimanoen nen Jehova so panaanos na saray lingkor To tan bendisyonan Toy katooran da. Say sakey met ya rason no akin ya imbaki nen Jehova si Elihu et pian bilinen si Job ya agmanpopokus ed sarili to. Imbes, kaukolan toy manpokus ed si Jehova, say Amalsa na uniberso. (Job 37:14) Inikdan met nen Jehova si Job na asainmin. Kaukolan ton ipikasi so taloran kakaaro to ta ambelat so kasalanan da. (Job 42:8-10) Panon itayon tutulongan nen Jehova natan no ondadalan tayo ed grabe iran subok?
11. Anto ray nabasa ed Biblia ya makaligliwa ed sikatayo no ondadalan tayo ed saray subok?
11 Agla direktan mitotongtong si Jehova ed sikatayo natan ya singa ginawa to ed si Job. Pero mitotongtong ed sikatayo panamegley na Salita to, say Biblia. (Roma 15:4) Pian ag-itayo naekalan na ilalo, impaisulat to ed Biblia ya walay balibalin bilay ed arapen. No ondadalan tayo ed saray graben subok, wala ray teksto ed Biblia ya makaligliwa ed sikatayo. Singa bilang, diad Roma 8:38, 39, impaseguro nen Jehova ya anggapon balot so “makapangisian ed sikatayo ed panangaro [to],” anggan saray sankagrabian nin subok. Diad Salmo 145:18, ipapaseguro nen Jehova ya sikatoy “asingger ed amin ya ontatawag ed sikato” panamegley na pikakasi. Imbaga nen Jehova ya no mantiwala tayo ed sikato, nalampasan tayoy anggan anton subok tan maliket tayo nin siansia anggano mairap so situasyon. (1 Cor. 10:13; Sant. 1:2, 12) Ibabaga met na Biblia ya saray subok et magano tan temporaryo labat kompara ed premyon iter na Dios ed sikatayo, say bilay ya andi-anggaan. (2 Cor. 4:16-18) Insipan met nen Jehova ya deralen to so panlalapuan na amin ya irap—si Satanas ya Diablo tan amin ya mauges. (Sal. 37:10) Kasin wala la ray a-memorize mon teksto ed Biblia ya makatulong pian naanosan mo ray subok?
12. Antoy labay nen Jehova ya gawaen tayo pian natulongan itayo na Salita to?
12 Labay nen Jehova ya lanang tayon basaen tan aralen so Biblia, tan dalepdepen tayo iray nababasa tayo ditan. No iyaplika tayoy nanaaralan tayo, mas ombiskeg so pananisia tayo tan lalo tayon onapit ed si Aman Jehova. Kanian anggan anto ni ’tay onsabin subok, nasarag tayo! Iiter met nen Jehova so masanton espiritu to ed saramay mantitiwala ed Salita to. No walad sikatayo so espiritu na Dios, walay “pakayari [tayo] a mas mabiskeg nen say pakayari na too.”—2 Cor. 4:7-10.
13. No ondadalan tayod subok, panon ya makatulong so espiritual ya naakan ya itatarya na “matoor tan makabat ya aripen”?
13 Diad tulong nen Jehova, mangitatarya so “matoor tan makabat ya aripen” na dakdakel ya artikulo, video, tan kansion pian ombiskeg so pananisia tayo tan mansiansia tayon alerto ed espiritual. (Mat. 24:45) Pablien tayo komon ya amin iratan ya probisyon nen Jehova. Walay sister ed United States ya misatsalamat ya maong ed amin ya espiritual ya naakan ya itatarya na matoor ya aripen. Kuan to: “Diad 40 ya taon ya panlilingkor kod si Jehova, aminpigapigan asubok so katooran kod sikato.” Dakel so dinalan ton subok—adisgrasya tan inatey so lolo to, inatey so atateng to lapud graben sakit, tan anggan sikato et amidua ton nilabanan so cancer. Antoy akatulong ed sikato pian nasarag ton amin iratan? Oniay imbaga to: “Agak balot pinaulyanan nen Jehova. Balbaleg so nitulong ed siak na espiritual ya naakan ya itatarya to panamegley na matoor tan makabat ya aripen. Kanian determinado ak ya singa si Job, nibagak met ya: ‘Anggad ompatey ak et agko ikbanan so integridad ko!’”—Job 27:5.
Anto ray sarag mon gawaen pian napabiskeg mo ray agagi? (Nengnengen so parapo 14)
14. Panon ya uusaren nen Jehova iray agagi tayo no ondadalan tayo ed saray subok? (1 Tesalonica 4:9)
14 Imbangat itayo nen Jehova ya aroen tan ligliwaen so sakey tan sakey diad mairap iran panaon. (2 Cor. 1:3, 4; basaen so 1 Tesalonica 4:9.) Dakel ya agagi tayo so singa si Elihu, labalabay da tayon tulongan no ondadalan tayod saray subok pian makapanmatoor tayo ed si Jehova. (Gawa 14:22) Imanoen so eksperiensya nen Diane. Nen nansakit na grabe so asawa to, sikatoy agpinaulyanan na saray kakongregasyon to tan tinulongan da pian mansiansian mabiskeg ed espiritual. Oniay imbaga to: “Pigaran bulan ya mair-irap so situasyon mi. Pero wadtan so maar-aro tan mabisbiskeg ya taklay nen Jehova ya sinmuporta ed sikami. Inusar to ray kakongregasyon mi. Balbaleg so nitulong na impasyar, intawag, tan saray lakap da pian naanosan min amin iraman. Agko amtay man-drive kanian sasamaren ak na saray agagi pian makapiaral tan makapanpulong ak.” On, maong labat ta parte itayo na maar-aron pamilya nen Aman Jehova!
MAONG LABAT TA BABANTAYAN ITAYO NEN JEHOVA!
15. Akin et kombinsido tayo ya nasarag tayoy anggan anton subok?
15 Amin tayo et seguradon nipaarap ed subok. Pero singa inaral tayo ed sayan artikulo, agtayo bukbukor ya arapen iratan. Tandaan tayo ya walad abay tayo so maar-aron Ama tayo, si Jehova. Babantayan to tayo, dedengelen to ray pikakasi tayo, tan akaparaan ya lanang ya ontulong ed sikatayo. (Isa. 43:2) Inter tod sikatayo so pribilehyon manpikasi, say Biblia, say dakdakel ya espiritual ya naakan, tan say suporta na saray maar-aron agagi. Kanian kombinsido tayo ya nasarag tayoy anggan anton subok.
16. Panon tayon naipanengneng ya labalabay tayoy manpaasikaso ed si Jehova?
16 Misatsalamat tayo ta babantayan itayo na Ama tayo ed tawen! “Malikeliket so puso tayo lapud sikato.” (Sal. 33:21) Pablien tan pisalamatan tayo sirin so amin ya iiter nen Jehova pian natulongan to tayo. Tan ipanengneng tayod kabibilay tayo ya labalabay tayoy manpaasikaso ed sikato. Labay ton ibaga, pansagpotan tayon unoren si Jehova tan gawaen tayoy panlabayan to. Diad ontan et bantayan to itayo diad andi-anggaan!—1 Ped. 3:12.
KANSION 30 Kaarok, Dios Ko, tan Amak