1. Akin et marakep no panistoryaan tayo no panon tayon naamtaan so katuaan?

 “PANON mon naamtaan so katuaan?” Seguro aminpiga la itan ya intepet ed sika na saray agagi. Diad tua, itetepet tayo met itan ed saray agagi pian mas nakabat tayo ra. Labalabay tayon narengel so istorya da no panon dan akabat tan naar-aro si Aman Jehova, tan labalabay tayo met ya istoryaen ed sikara no akin ya misatsalamat tayon wala tayod katuaan. (Roma 1:11) Napapaseseg tayo ed ontan iran istoryaan ta lalo tayon naaro so katuaan. Ombibiskeg met so determinasyon tayon ‘manakar ed katuaan’ odino manbilay diad paraan ya makapaliket ed si Jehova.—3 Juan 4.

2. Antoy pantongtongan tayo ed sayan artikulo?

² Repasoen tayo ed sayan artikulo iray pigaran rason no akin ya inar-aro tayoy katuaan. Insan tayo pantongtongan no anto ray itultuloy tayon gawaen pian mas napabli tayo itan ya regalo nen Jehova. Kayari tayon pantongtongan iyan artikulo, seguradon mas naar-aro tayoy Aman Jehova lapud impaamta tod sikatayo so katuaan. (Juan 6:44) Tan mas napaseseg itayo ya ipaamta met ed arum so katuaan.

3. Anto so sankaimportantian ya rason no akin ya inar-aro tayo so katuaan?

³ Dakdakel so rason no akin ya inar-aro tayo so katuaan. Pero say sankaimportantian ya rason et lapud inar-aro tayoy Jehova a Dios, say Lapuan na katuaan. Sikatoy akabkabat  tayo nen inaral tayo so Biblia. Naamtaan tayo ya sikato so Makapanyarin-amin ya Dios ya nanggawa ed tawen tan dalin. Pero aliwan satan labat. Sikato met so maar-aron Ama tayo ya manmamalasakit ed sikatayo. (1 Ped. 5:7) Naamtaan tayo met a sikatoy “mapangasi tan maabagey, matantan a manpasnok tan abalbaleg ed matoor a panangaro tan katuaan.” (Exo. 34:6) Importantin maong ed sikato so hustisya. (Isa. 61:8) Nasasakitan no nanenengneng ton maniirap itayo, kanian labalabay to lan panampoten so amin ya kairapan. (Jer. 29:11) Sakey itan ya rason ya inar-aro tayoy Aman Jehova ta ontan met so labay tayon nagawa!

4-5. Akin et imbaga nen apostol Pablo ya say ilalo tayo et singa angkla?

⁴ Anto ni so sakey ya rason no akin ya inar-aro tayo so katuaan? Balbaleg so nitulong na katuaan ed bilay tayo. Singa bilang, naamtaan tayod Biblia so katuaan ya walay ilalo tayo ed arapen. Insulat nen apostol Pablo no panon kaimportante itan ya ilalo. Kuan to: “Walaan itayo na sayan ilalo bilang angkla na bilay tayo, a segurado tan malet.” (Heb. 6:19, paimanod leksab) No say sakey a baloto et aka-angkla, aga niyanor-anor anggano madaluyon so dayat. Ontan met ed sikatayo. No lanang tayon sankanonot so ilalo tayod arapen, kalmado tayo labat anggano amayamay so problema tayod bilay.

⁵ Nen imbaga nen Pablo ya say ilalo et singa angkla, say tutukoyen to et say ilalo na saray alanaan ya Kristiano ya manbilay ed tawen. Balet onaplika met itan ya imbaga to ed saray Kristiano ya say ilalo ra et manbilay na andi-anggaan diad paraison dalin. (Juan 3:16) On, awalaan na direksion so bilay tayo manlapu la nen naamtaan tayo ya walay ilalo tayon manbilay na andi-anggaan.

6-7. Antoy epekto ed si Yvonne nen naamtaan toy ilalon bilay ya andi-anggaan?

⁶ Imanoen so eksperiensya nen Yvonne. Sikatoy agbinmaleg ed katuaan, tan nen ugaw ni et antakot toy ompatey. Wala kunoy abasa tod sakey ya libro ya agto nalingwanan: “Onsabi so agew ya ompatey tayon amin.” Oniay imbaga to: “Lapud saman ya abasak, agak makaugip ta sankanonot ko no antoy nagawad arapen. Naisip ko, ‘Alangan ya anggapoy rason no akin ya manbibilay tayo. No wala, anto itan?’ Agko labay so ompatey!”

⁷ Nen tinedyer lay Yvonne, apulongan na saray Tasi nen Jehova. Imbaga to: “Atalosan ko ya posible manaya ya manbilay ak na andi-anggaan diad Paraison dalin.” Antoy epekto na satan ed sikato? Oniay imbaga to: “Masamit lay ugip ko ta agko la pampapagaan no antoy nagawad arapen tan agko la antakot so ompatey.” Talagan naar-aro nen Yvonne so katuaan tan labalabay ton ipaamta itan ya ilalo ed arum ya totoo.—1 Tim. 4:16.

8-9. (a) Diad sakey ya ilustrasyon nen Jesus, antoy ginawa na sakey a laki nen akalmo na kayamanan, tan akin et ontan so ginawa to? (b) Parad sika, akin et sulit so amin ya sakripisyom parad katuaan?

⁸ Say sakey nin katuaan ed Biblia et say maong a balita tungkol ed Panarian na Dios. Imbaga nen Jesus ya say katuaan tungkol ed Panarian et singa akaamot ya kayamanan. Oniay imbaga to ya nabasa ed Mateo 13:44: “Say Panarian na tawen et singa kayamanan ya akaamot ed uma, ya aromog na sakey a too tan inyamot to lamet; tan lapud liket to et inlako ton amin so kayarian to tan sinaliw to iman ya uma.” Diad tua, agpa manaanap na kayamanan imay laki. Balet nen aromog to itan, inlako ton amin so kayarian to pian naala to itan. Akin kasi? On ta amta to ya mabmablin maong imay nalmo ton kayamanan. Kanian sulit anggan anto nid ’tay isakripisyo to.

 ⁹ Kasin sulit no mansakripisyo tayo parad katuaan? Ay on! Anggano paniibaen ni so amin ya niiter na sayan mundo, agto napantayan so liket ya nalilikna tayo natan diad panlilingkor tayod si Jehova tan say ilalo tayon manbilay na andi-anggaan sano uleyan la na Panarian na Dios so interon dalin. Tan sakey ni, wala ni kasi naisip mon mas importante odino mas mabli nen say pribilehyo ya kaarom si Aman Jehova? Nalikna tayo labat so tuan liket no amta tayon napapaliket tayoy Jehova.—Col. 1:10.

10-11. Akin et inuman nen Michael so kabibilay to?

¹⁰ Wala ray agagi tayo ya baleg so insakripisyo ra pian nagawaan day panlabayan nen Jehova. Say arum ed sikara et sikat tan atagey so posisyon dad trabaho balet tinaynan da iratan. Wala met iray nampasimpli na bilay da imbes ya manpayaman. Tan say arum et talagan inuma-uman day bilay da nen akabat day Jehova. Ontan so ginawa nen Michael. Sikatoy agbinmaleg ed katuaan. Nen kabataan ni, nan-training ed martial arts. Kuan to: “Seseguradoen ko ya mabiskeg tan kondisyon so laman ko. Anggapoy aatrasan ko.” Balet nen nanaral na Biblia si Michael, naamtaan to ya kabusol nen Jehova so inkaruksa. (Sal. 11:5) Oniay imbaga nen Michael tungkol ed samay sanasawan Tasi ya angiyaral ed sikato: “Agda ak balot diniktaan ya itundak so martial arts, basta intuloy da ak labat ya inyaralan na Biblia.”

¹¹ Nen mas nakakabat nen Michael si Jehova, mas naar-aro to. Pambiliban ton maong so panangasi nen Jehova ed saray lingkor To. Ag-abayag, atalosan nen Michael ya kaukolan ton umanen so kabibilay to. Oniay imbaga to: “Inar-arok ya maong so karate kanian mair-irap parad siak ya itunda itan. Pero amtak ya napaliket koy Aman Jehova tan kombinsido ak ya sulit so anggan anton isakripisyok pian makapanlingkor ak ed sikato.” Atalosan nen Michael ya talagan mabmabli so katuaan ya nalmo to. Kanian anggano mairap, inuman toy kabibilay to.—Sant. 1:25.

12-13. Antoy epekto na katuaan ed si Mayli?

¹² Pian lalo tayon natalosan ya mabmabli so katuaan, inkompara itan na Biblia ed silew ya manliwawa ed dalan tayo no ambilbilunget. (Sal. 119:105; Efe. 5:8) Misatsalamat si Mayli ya tagad Azerbaijan nen aliwawaan so nonot to lapud impanaral toy Biblia. Mandumaan so relihyon na atateng to. Say tatay to et Muslim tan say nanay to et Judio. Oniay imbaga to: “Manisia ak ya walay Dios, pero amayamay so tepet ko. Singa bilang, ‘Akin et ginawa ni na Dios so too anta manirap lanlamang legay bilay to, insan no ompatey et dusaen tod impierno?’ Lapud ibabaga na saray totoo ya manlalapud Dios so amin ya nagagawa, naisip ko laingen, ‘No ontan sirin di singa tayo labat puppet ya kokontrolen na Dios tan panlikliketan toy paniirap tayo?’”

¹³ Inanap nen Mayli so ebat ed saratan ya tepet to. Ag-abayag, nampaiyaral na Biblia ed saray Tasi ya anggad abautismoan. Oniay imbaga to: “Nen atalosan koy malinlinew ya bangat na Biblia, nagmaliw ya mas maliket so bilay ko. Dinmeen met so nonot ko ta naebatan na Biblia so amin ya tepet ko.” Singa si Mayli, misatsalamat tayod si Jehova, “say Dios ya anawag ed [sikatayo] manlapud kabilungetan tan angawat ed [sikatayo] ed makapakelaw a liwawa to.”—1 Ped. 2:9.

14. Antoy gawaen tayo pian mas naaro tayo so katuaan? (Nengnengen met so kahon ya “ Arum nin Angikomparaan ed Katuaan.”)

¹⁴ Pigara labat irayan rason no akin ya papablien tayon maong so katuaan. Seguro wala ni ray naisip mon arum ya rason. Anto  kasi no diad personal study’m et anapen mo ni ray arum ya rason no akin ya kaukolan tayon aroen so katuaan? No inar-aro tayoy katuaan, determinado tayon aralen itan tan manbilay base ed satan.

15. Antoy sakey ya paraan ya nipanengneng tayon inar-aro tayoy katuaan?

¹⁵ Nipanengneng tayo ya inar-aro tayoy katuaan no regular tayon aralen so Biblia tan saray nibase ed Biblian publikasyon tayo. Diad tua, anggano abaybayag tayo lan Tasi, amayamay ni ray kaukolan tayon aralen. Oniay nabasa ed sankaunaan ya isyu na The Watchtower: “Say katuaan, a singa melag ya rosas ed katakelan, et apaliberan tan ngalngali natabonan na saray mabunabuna tan ataragey ya dika na katilaan. Pian naromog mo itan, nengneng kad kaliberliber. . . . Pian naalam itan, yuko ka. Nepeg ya agka labat nakontento ed sakey a rosas na katuaan. . . . Mantipon ka, mananap ka ni.” Aliwan mainomay so manaral, pero sulit no gawaen mo itan.

16. Panon kan manpi-personal study? (Proverbio 2:4-6)

¹⁶ Aliwan amin ya Tasi et mahilig ya manbasa  tan manaral. Balet labay nen Jehova ya “itultuloy [tayon] anapen” so katuaan tan “itultuloy [tayon] kotkoten” itan ya singa akaamot ya kayamanan. (Basaen so Proverbio 2:4-6.) No gawaen tayo itan, mas onaralem so pakatalos tayo ed katuaan, tan sikatayo lanlamang so minabang ed saray nanaaralan tayo. Makaaral tayo ed si Brother Corey. No sikatoy manbabasa na Biblia, manpopokus kuno ed kada bersikulo. Kuan to: “Babasaen koy amin ya footnote, cross-reference, tan manre-research ak. . . . Amayamay so nanaaralan ko.” Antokaman so paraan na panag-personal study tayo, nipanengneng tayo ya talagan inar-aro tayoy katuaan no ipapanaon tan pansasagpotan tayon aralen itan.—Sal 1:1-3.

17. Antoy labay ya ibaga na pambilay base ed katuaan? (Santiago 1:25)

¹⁷ Siempre, kulang so basta panaral labat ed katuaan. Kaukolan tayoy manbilay base ed katuaan. Labay ton ibaga, iyaplika tayod bilay tayo iray nanaaralan tayo. No ontan so gawaen tayo, nalikna tayoy tuan liket. (Basaen so Santiago 1:25.) Panon tayon naseguro ya manbibilay tayo base ed katuaan? In-suggest na sakey ya brother ya marakep no usisaen tayoy sarili tayo—isulat tayo no anto la ray maong ya nagagawaan tayo tan no anto ni ray kaukolan tayon i-improve. Mipara itan ed sayan imbaga nen apostol Pablo: “Antokaman so inaligwasan tayo la, mantultuloy tayo komon ya onabante.”—Fil. 3:16.

18. Akin et gagawaen tayoy anggaay nayarian tayon ‘manakar ed katuaan’?

¹⁸ Isipen pa iray balibalin resulta no gawaen tayoy anggaay nayarian tayon ‘manakar ed katuaan’! Magmaliw tayon mas maliket, tan napaliket tayo met si Jehova tan saray agagi. (Pro. 27:11; 3 Juan 4) On, komon ta determinado tayon aroen so katuaan tan manbilay base ed katuaan!