1. Nen kabataan ni si propetan Daniel, akin et pambiliban na saray taga Babilonia?

 NEN kabataan ni si propetan Daniel, sikatoy binihag ed Babilonia. Anggano sakey ya bihag tan ugaw ni, apabilib to iray opisyales na Babilonia. Anggapoy nabalaw ed sikato. Anta guapo la lanti, matalino ni, tan nanlapu ed respetadon pamilya. (1 Sam. 16:7) Anengneng day potensyal to kanian impasal da pian magmaliw ya opisyal ed palasyo.—Dan. 1:3, 4, 6.

2. Antoy pakanengneng nen Jehova ed si Daniel? (Ezequiel 14:14)

² Wala balet so anengneng nen Jehova ed si Daniel ya ag-anengneng na saray taga Babilonia. Anto ’tan ey? Makaala tayoy ideya ed mismon imbaga nen Jehova ya walad Ezequiel 14:14. (Basaen.) Nen imbaga itan nen Jehova, ompan tinedyer o masulok ya 20 ni labat so taon nen Daniel. Pero diad pakanengneng nen Jehova, say inkatunong nen Daniel et mipara lad inkatunong nen Noe tan Job—sarayan lalaki et deka-dekada ya nanlingkor ed Sikato. (Gen. 5:32; 6:9, 10; Job 42:16, 17) On, inar-aro nen Jehova si Daniel, tan lapud nanmatoor si Daniel ed interon bilay to, agkinmupas so panangaro na Dios ed sikato.—Dan. 10:11, 19.

3. Antoy pantongtongan tayo ed sayan artikulo?

³ Pantongtongan tayo ed sayan artikulo so duaran ugali o kualidad nen Daniel ya alabayan nen Jehova ed sikato kanian pinabpabli to. Rebyuen tayo iramay situasyon ya impanengneng to iratan ya kualidad. Insan amtaen tayo no anto ray akatulong akin et nipanengneng to iratan. Tan diad sampot, pantongtongan tayo no panon tayon naalig si Daniel. Sayan artikulo et manunan ginawa parad saray kabataan, pero makaaral tayon amin ed alimbawa to.

4. Akin et nibaga tayon makpel si Daniel? Mangiter na alimbawa.

⁴ No say sakey et makpel, agto labay ya ibagan aglan balot makaliknay takot. Ompan natatakot met, pero lalabanan to itan ta labay ton gawaen so duga. Ontan si Daniel. Anggano kabataan ni labat, makmakpel la. Pantongtongan tayoy duaran situasyon ya impanengneng toy pakpel. Amay unona et agawa manga duay taon kayarin dineral na Babilonia so Jerusalem. Walay akugip nen Arin Nabucodonosor ya balbaleg ya imahen kanian natatakot tan aburidon maong. Binantaan to ray matatalinon lalaki ed Babilonia, kaiba lay Daniel, ya pateyen to ran amin no agda nibaga ed sikato so akugip to tan no antoy kahulugan na satan ya kugip. (Dan. 2:3-5) Kailangan ya onkilos ya tampol si Daniel, ta no andi, dakel so ompatey! Kanian akitongtong si Daniel ed ari tan akikasi ya “ikdan toy panaon pian nibaga tod ari so kabaliksan na kugip.” (Dan. 2:16) Makapabilib iyan ginawa to! Ta diad tua, antis to ’ya, anggapoy nabasa ed Biblia ya asali to lay angipatalos na kugip. Makmakpel si Daniel tan mabisbiskeg so pananisia to. Kinatongtong toy taloran kakaaro to ya si Sadrac, Mesac, tan Abednego b tan imbaga tod sikara ya “mikasi ra ed Dios na tawen ya ipaamta tod sikara iyan sekreto.” (Dan. 2:18) Inebatan nen Jehova so pikakasi ra. Diad tulong na Dios, impatalos nen Daniel so kahulugan na kugip nen Nabucodonosor. Lapud pakpel nen Daniel, aligtas so bilay to tan saray kakaaro to.

5. Diad anto nin situasyon ya impanengneng nen Daniel so pakpel?

⁵ Kalabas na pigaran taon manlapu la nen impatalos nen Daniel so kugip na ari tungkol ed balbaleg ya imahen, asubok lamet so pakpel to. Nankugip lamet si Nabucodonosor. Diad satan ya kugip et walay anengneng ton balbaleg ya kiew. Makmakpel ya imbaga nen Daniel ed ari so kahulugan na kugip to. Imbaga to ingen ya naatapis so ari tan temporaryon naekal ed pagiging ari to. (Dan. 4:25) Ag-itan inyamot nen Daniel anggano amta to ya posiblin agnagustoan na ari itan ya mensahe tan ompan ipapatey to ni ingen.

6. Antoy akatulong ed si Daniel akin et makmakpel?

⁶ Antoy akatulong ed si Daniel akin et makmakpel manlapu la nen ugaw anggad intatken  to? Seguradon akaaral ed alimbawa nen nanay tan tatay to. Inunor da imay bilin nen Jehova ed saray atateng ya nabasad Deuteronomio 6:6 anggad 9, tan imbangat dad si Daniel so Mosaikon Ganggan. Aliwan samay Samploran Ganggan labat so amta nen Daniel, amta to met so arum nin detalye ed Mosaikon Ganggan. Singa bilang, kabisado to iray nayari tan agnayarin kanen na saray Israelita. c (Lev. 11:4-8; Dan. 1:8, 11-13) Kabisado to met so history na bansan Israel tan no antoy nansumpalan na saray Israelita nen agda inunor so Dios. (Dan. 9:10, 11) Makmakpel met si Daniel ta aminpiga to lan apatunayan ya lanang ton kaibay Aman Jehova, tan wadtan iray anghel ya akaparaan ya ontulong ed sikato.—Dan. 2:19-24; 10:12, 18, 19.

7. Anto ni akatulong ed si Daniel akin et makmakpel? (Nengnengen met so litrato.)

⁷ Maaral si Daniel. Inaral to iray insulat na saray akadkaunan propeta na Dios, pati saray propesiya nen Jeremias. Lapud maaral, atalosan to ya asingger lan nibulos iray Judio ya abihag ed Babilonia. (Dan. 9:2) Anengneng nen Daniel ya lanang ya nagagawa iray ibabaga nen Jehova kanian binmiskeg so tiwala to ed Dios. No say sakey et mabiskeg so tiwala to ed Dios, anggapoy takotan to. (Ikompara so Roma 8:31, 32, 37-39.) Mapikasi met si Daniel. (Dan. 6:10) No manpipikasi, ibabaga toy amin ya nalilikna to, ipapatua to ray kasalanan to, tan agto lilingwanan so onkerew na tulong ed si Jehova. (Dan. 9:4, 5, 19) On, too met labat si Daniel ya singa sikatayo, kanian aliwan sipor ya makpel. Pero lapud maaral, mapikasi, tan mabiskeg so tiwala to ed si Jehova, sikatoy akapampakpel.

8. Anto ray gawaen tayo pian magmaliw tayon makpel?

⁸ Anto met sirin so gawaen mo pian magmaliw kan makpel? Ompan lanang kan bibilinen na saray atateng mo ya agka ontatakot ed saray totoo, tan nanenengneng mon mismo ed alimbawa ra ya makpel ira. Pero tandaan mo ya agnamana so pakpel. Kailangan moy man-effort pian naaralan moy magmaliw ya makpel. Singa itan panaral na balon skill. Antoy gawaen mo pian magmaliw kan marunong ed sakey ya skill? Obserbaan tan bantayan mon maong so gagawaen na trainer mo, insan mo aligen. Ontan met ed pagiging makpel. Kaukolan mon obserbaan iray ginawa na saray makpel ya lingkor nen Jehova tan alig moy alimbawa ra. Singa bilang, antoy naaralan mod si Daniel? Importante ya lanang mon aralen tan basaen so Biblia. Lanang ka met ya manpikasi ed si Jehova tan ibagam ed sikato so amin ya walad pusom pian naliknam ya talagan sankaaro kayo. Tandaan mo ya lanang to kan suportaan basta mantiwala ka ed sikato. No gawaen mo iratan ya amin, magmaliw kan makpel no nasubok lay pananisiam.

9. Anto ray maong ya resulta no makpel tayo?

⁹ Maabig so resulta no manpakpel tayo. Apatunayan itan nen Ben, sakey ya kabataan diad Germany. Diad eskuelaan da, sikato labat so manisia ya walay Dios ya Amalsa. Amin ya kaklase tan teacher to et manisia ed evolution. Naikdan si Ben na chance ya mangiter na class report no akin ya ontan so papanisiaan to. Makpel ton in-explain no anto ray ebidensya ya walay Amalsa. Antoy resulta? Oniay imbaga nen Ben: “Dinmengel ya maong may teacher ko. Diad tua, kinerew to may ginamit kon reference insan to in-distribute ed saray  kaklasek.” Anto met so reaksion na saray kaklase nen Ben? “Agak makapanisia ya open-minded ira manaya, tan pambiliban da kunoy pakpel ko,” so kuan to. Antoy naaralan mod si Ben? Respetoen ka na totoo no nanengneng dan makpel ka, tan ompan atan so rason pian labay da met lan kabaten si Jehova. On, dakdakel so maong ya resulta no manpakpel ka.

10. Diad Biblia, antoy tutukoyen na salitan “katooran”?

¹⁰ Diad Biblia, uusaren so Hebreon salita parad “katooran” odino “matoor a panangaro” no say idedeskribe et say espisyal ya panangaro na Dios parad saray lingkor to. Uusaren met itan ya salita pian deskribien so aroan na saray lingkor na Dios. (2 Sam. 9:6, 7) Iilaloan met nen Jehova ya matoor tayod sikato tan agtayo onikban anggan antoy nagawa. Ontan so ginawa nen Daniel. Lalon inmelet so katooran tod si Jehova diad inlabas na panaon.

11. Panon ya asubok so katooran nen Daniel nen masiken la? (Nengnengen so litrato ed apis.)

¹¹ Diad interon bilay nen Daniel, aminpigan asubok so katooran to ed si Jehova. Balet say sakey ed saray sankairapan ya subok ya inarap to et nen masulok lan 90 so taon to. Diad saman et asakop la na Medo-Persia so Babilonia, tan si Arin Dario la so manuuley. Kabusol na saray opisyal na palasyo si Daniel tan anggapoy respeto ra ed si Jehova, kanian nanggawa ray pakana pian ompatey si Daniel. Walay batas ya impapirmaan dad ari ya ditan nasubok no siopay panmatooran nen Daniel—say Dios to o say ari. Diad satan ya batas et bawal so manpikasi ed anggan siopan Dios diad loob na 30 ya agew. Pero kasin tinmunda si Daniel ya manpikasi ed si Jehova pian naala toy pabor na ari tan agnadusa? Andi. Agbalot tinmunda. Nanmatoor ed Dios to anggano amta ton ibuntok da ed ungib na leon. Pero inligtas na Dios si Daniel kanian ‘agsinakitan na saray leon.’ On, benendisyonan nen Jehova so katooran to. (Dan. 6:12-15, 20-22) Panon tayon naalig so katooran nen Daniel?

12. Akin et nanmatoor si Daniel ed si Jehova anggano bilay to ni so kasalat?

¹² Pian makapanmatoor tayo ed si Jehova, dapat inar-aro tayo. Inar-aron maong nen Daniel si Jehova kanian nanmatoor anggano bilay to ni so kasalat. Akin et ontan la kabiskeg so panangaro nen Daniel ed si Jehova?  Seguradon sankanonot ton lanang iray balibalin kualidad nen Jehova. (Dan. 9:4) Lanang to met ya dadalepdepen so amin ya kamaongan ya impanengneng nen Jehova ed sikato tan ed saray kapara ton lingkor na Dios.—Dan. 2:20-23; 9:15, 16.

13. (a) Panon ya nasusubok so katooran na saray kabataan natan? Mangiter na alimbawa. (Nengnengen met so litrato.) (b) Singa nabantayan ed video ya abitlad paimanod leksab, antoy iyebat mo no walay mantepet ed sika no kasin susuportaan na Saray Tasi nen Jehova so gagawaen na saray homoseksual?

¹³ Singa si Daniel, saray kabataan ya Tasi natan et apaliberan na saray totoon anggapoy respeto da ed si Jehova tan ed saray ganggan To. No sakey kan kabataan, seguro asalim la ya naging kabusol ka na arum lapud dumay papanisiaan mo. Ompan i-bully da ka ni ingen pian agka la manmatoor ed si Jehova. Asali itan nen Graeme, sakey ya kabataan ya taga Australia. Aminsan nen high school si Graeme, tinepetan na teacher so interon klase no antoy reaksion da no bilang ta walay kaaro da ya aminen ton sikatoy sakey ya homoseksual. d Imbaga na teacher ya onlad sakey ya panig iramay suportaan da so kaaro da ed pagiging homoseksual to, pero onlad kabilang panig iramay agda konsintien iman ya kaaro da. Oniay imbaga nen Graeme ya agawa: “Amin da et linmad saksakey ya panig, puera labat ed siak tan samay kaklasek ya Tasi.” Asubok so katooran nen Graeme ed si Jehova diad saray sinmublay ya agawa. Oniay imbaga to: “Aramay kaklase mi tan amay mismon teacher mi, sakey oras da kamin ininsulto. Ginawak so amin pian kalmado ak labat tan malinew kon na-explain so papanisiaan ko. Pero agda ak dengelen.” Antoy alikna nen Graeme ed sayan agawa? Oniay imbaga to: “Siempre, ansakit no insultoen ka na arum, pero balibali liknaan ko ta akapanmatoor ak ed si Jehova tan naidepensak so pananisiak.” e

14. Anto ni sakey ya paraan pian mansiansia tayon matoor ed si Jehova?

¹⁴ Singa si Daniel, no inar-aro tayoy Jehova, mas desidido tayon manmatoor ed Sikato. Antoy gawaen tayo pian naar-aro tayoy Aman Jehova? Kabaten tayon maong pian nanengneng tayo iray balibalin ugali to. Singa bilang, aralen tayo ray nanduruman pinalsa to. (Roma 1:20) Maabig no basaen mo iray artikulo o bantayan mo iray video ed seryen “Wala Kasi Nandesinyo?” Marakep met no i-personal study’m so brochure ya Pinalsa Kasi Bilay? tan The Origin of Life—Five Questions Worth Asking. Oniay imbaga nen Esther, sakey ya kabataan ed Denmark, tungkol ed saratan: “Makapabilib tan malinlinew iray explanation ya nabasa ditan. Napantiwalaan ya impormasyon so nabasa ed saratan ya brochure. Agda ka diktaan no antoy panisiaan mo.” Onia met so imbaga nen Ben ya abitla nen niman: “Binmiskeg so pananisiak nen binasak irayan artikulo tan brochure. Akombinse ak ya talagan walay Dios ya Amalsa.” No i-personal study’m met iratan, seguradon onsang-ayon ka ed sayan ibabaga na Biblia: “Sika so makanepegan, Jehova a Dios mi, a mangawat na gloria tan galang tan pakayari, lapud pinalsam so amin a bengatla.”—Apo. 4:11. f

15. Anto ni sakey ya paraan pian naar-aro tayoy Jehova?

¹⁵ Say sakey nin paraan pian naar-aro tayoy Aman Jehova et no aralen tayon maong so bilay na Anak to, si Jesus. Ontan so ginawa nen Samira, sakey ya kabataan ya tagad Germany.  Kuan to: “Nen inaral koy bilay nen Jesus, mas akabkabat ko met si Aman Jehova.” Nen ugaw ni si Samira, agto kuno na-imagine ya sikatoy inar-aro nen Jehova tan sarag ton nakaaro so Dios. Pero maka-relate kuno ed si Jesus. “Labalabay koy Jesus ta mabaibait tan inar-aro to ray ugugaw,” so kuan to. Nen inaral ton maong so bilay nen Jesus, diman to met akabkabat tan naar-aro si Aman Jehova. Akin ey? Oniay imbaga to: “Atalosan ko ya amin ya ugali nen Jesus et inalig to lanlamang ed Ama to. Parehon-pareho ira. A-realize ko ya atan so sakey ya rason no akin ya imbaki nen Jehova si Jesus diad dalin—pian mas nakabkabat na totoo si Jehova.” (Juan 14:9) Sika ey? Labay mo met ya naka-close si Aman Jehova? Marakep sirin no i-personal study’m so bilay nen Jesus. No ontay gawaen mo, seguradon naar-arom si Jehova tan mansiansia kan matoor ed sikato diad ilalabas na panaon.

16. Anto ray maabig ya resulta no matoor tayo? (Salmo 18:25; Miqueas 6:8)

¹⁶ No matoor tayo, nawalaan tayo met na matoor ya kakaaro. (Ruth 1:14-17) Tan no matoor tayo ed si Jehova, kontento tayod bilay tayo tan panatag so loob tayo. Akin ey? On ta im-promise nen Jehova ya sikatoy matoor ed saramay matoor ed sikato. (Basaen so Salmo 18:25; Miqueas 6:8.) Isip mo pa: Melmelag tayo labat komparad Dios ya Amalsa, pero labalabay to tayon nakaaro. Anggan anto ni tay subok ya dalanen mo tan anggan siopa ni tay onkontra ed sika, nakayam itan ta tulongan to ka. Tan anggano ompatey ka, im-promise to ya bilayen to ka. Gawaen to iratan ya amin ta agto labay ya napultot so pankakaaro yo. (Dan. 12:13; Luc. 20:37, 38; Roma 8:38, 39) Aligen tayo sirin si Daniel. Manmatoor tayo ed si Jehova!

17-18. Anto ni ray naaralan tayo ed si Daniel?

¹⁷ Duara labat ya kualidad nen Daniel so apantongtongan tayo, pero dakel ni ray naaralan tayod sikato. Singa bilang, wala ray impakugip nen Jehova ed si Daniel tan wala ra met so nantutumbokan ya pasingawey ya anengneng to. Tan naikdan met si Daniel na abilidad ya ipatalos iray mensahen nanlapud Dios. Dakel ed saratan ya propesiya et agawa la. Say arum balet et nagawa ni labat diad arapen, tan apektado tayon amin.

¹⁸ Pantongtongan tayod ontumbok ya artikulo so duaran propesiya ya insulat nen Daniel. Ugaw man tayo o matatken tayo la, kaukolan tayon talosan iratan ya propesiya ta makatulong iratan pian duga iray desisyon tayo. Makatulong met iratan ya propesiya pian magmaliw tayon makpel tan matoor ed si Jehova, diad ontan et akaparaan tayo ed saray asingsingger lan nagawa.